Wow air stórmótið hófst í gær

Wow air mótið - Vormót Taflfélags Reykjavíkur hófst í gærkvöldi í skákhöll félagsins að Faxafeni 12.  Mótið er nú haldið í fyrsta sinn og keppt er í tveimur stigaflokkum, A flokki fyrir skákmenn yfir 2200 elo skákstig og B flokki fyrir skákmenn á bilinu 2000-2199 elo.  Það má með sanni segja að mótinu hafi verið tekið opnum örmum því margir af okkar sterkustu skákmönnum taka þátt og gera Wow air mótið að einu sterkasta skákmóti hér innanlands í háa herrans tíð. 

Alls taka 22 skákmenn þátt í A flokknum en meðal þátttakenda þar eru sex stórmeistarar, þeirra á meðal fyrsti stórmeistari Íslands Friðrik Ólafsson, margfaldur Íslandmeistari í skák Hannes Hlífar Stefánsson og nýjasti stórmeistarinn okkar, Hjörvar Steinn Grétarsson.   Þrír alþjóðlegir og fjórir Fide meistarar eru einnig meðal þátttakenda ásamt tveimur af okkar efnilegustu skákmönnum sem var boðið að taka þátt í flokknum, en það eru þeir Oliver Aron Jóhannesson og Dagur Ragnarsson.  Þeir fá hér frábært tækifæri til að spreyta sig gegn sterkustu skákmönnum landsins.   

 

Í B flokknum tefla 16 skákmenn.  Stigahæstur er Hrafn Loftsson en meðal annarra keppenda má nefna skákmeistara Taflfélags Reykjavíkur Kjartan Maack og ungstirnið Vignir Vatnar Stefánsson.  Flokkurinn er góð blanda af "gömlum refum" og ungum og upprennandi skákmönnum sem fá nú dýrmæta reynslu, og væntanlega helling af stigum í sarpinn.

Eftir að Björn Jónsson formaður Taflfélags Reykjavíkur hafði sett mótið og leikið fyrsta leiknum í skák stórmeistarans Hannesar Hlífars Stefánssonar og Þorvarðar Ólafssonar hófst taflmennskan og var hart barist.  Í A flokki var mikið um óvænt úrslit, og fóru ungu boðsgestirnir þar hamförum.  Tveir Fide meistarar lágu þá í valnum en Oliver Aron (2115) sigraði þá óvænt Sigurbjörn Björnsson (2360) meðan Dagur Ragnarsson (2105) vann Guðmund Gíslason (2314).   Þá náði Sigurður Páll Steindórsson (2215) góðu jafntefli gegn stórmeistaranum Þresti Þórhallssyni (2435).  Þá má nefna að alþjóðlegi meistarinn Sævar Bjarnarson (2101) sem lætur sig aldrei vanta á skákmót sigraði Jónas Þorvaldsson (2286).  Önnur úrslit voru nokkuð eftir bókinni, en töluvert var um yfirsetur í fyrstu umferð, en tvær slíkar eru leyfðar í þessu sjö umferða móti.

 

Í B flokki voru úrslitin nokkuð eftir bókinni, en þó má nefna góð jafntefli hjá Jóhanni Helga Sigurðssyni (2029) gegn Hrafni Loftssyni (2184) og Birki Karli Sigurðssyni (1738) gegn Arnaldi Loftssyni (2078).  Ungstirnið Vignir Vatnar Stefánsson (1844) gerði jafntefli við Kjartan Maack (2121) en það er löngu hætt að koma mönnum á óvart þótt þessi ellefu ára drengur nái góðum úrslitum gegn sér miklu stigahærri andstæðingum.

Önnur umferð Wow air mótsins fer fram næstkomandi mánudagskvöld, en þá munu mætast meðal annarra Fidemeistarinn Ingvar Þór Jóhannesson og stórmeistarinn Hannes Hlífar Stefánsson, Hjörvar Steinn Grétarsson og Oliver Aron Jóhannesson og Þröstur Þórhallsson mun tefla við Lenku Ptacnikovu.

 

Gestir eru velkomnir á þetta stórmót í Faxafeni 12 og við hlökkum til að sjá ykkur!

• Úrslit, staða og pörun: A flokkur   B flokkur
• Skákir: 1  2  3  4  5  6  7
• Myndir

Hjörvar Steinn vann Boðsmót Árnamessu í Stykkishólmi. Dagur, Jón Trausti og Mikael Jóhann unnu flugfarseðla

 

Hjörvar Steinn vann Boðsmót Árnamessu í Stykkishólmi. Dagur, Jón Trausti og Mikael Jóhann unnu flugfarseðla

 

Fyrsta boðsmót Árnamessu heppnaðist afskaplega vel enda teflt við frábærar aðstæður í Lionshúsinu Stykkishólmi og um eftirsótta vinninga. Tíu efnilegum unglingum var boðin þátttaka á mótinu og þáðu allir boðið með þökkum og áttu saman ánægjulega helgi í Hólminum.

 

 

Hjörvar Steinn Grétarsson tefldi sem gestur en aðrir þátttakendur voru þau Dagur Ragnarsson, Dagur Andri Friðgeirsson, Hrund Hauksdóttir, Jón Trausti Harðarson og Oliver Aron Jóhannesson Fjölni, Mikael Jóhann Karlsson SA, Nökkvi Sverrisson TV, Veronika Steinunn Magnúsdóttir TR og Birkir Karl Sigurðsson SFÍ.

Allir tefldu við alla og fóru 5 umferðir fram á laugardegi og fjórar á sunnudegi. Mótið var mjög spennandi frá fyrstu umferð til þeirrar síðustu og baráttunni um flugfarseðla með Icelandair lauk ekki fyrr en með síðustu skákinni þegar Jón Trausti vann Mikael Jóhann.

 

 

Eins og reikna mátti með þá sigraði Hjörvar Steinn alla sína andstæðinga. Öruggur í 2. sæti varð Dagur Ragnarsson með 7,5 vinninga úr 9 skákum. í 3. - 4. sæti lentu jafnir Jón Trausti Harðarson og Mikael Jóhann Karlsson með 5,5 vinninga og Oliver Aron Jóhannesson varð fimmti með 5 vinninga. Krakkarnir gistu saman á hóteli og fengu veitingar í boði Sæfells ehf í Stykkishólmi.

Icelandair gaf glæsilega vinninga og til minningar um þátttökuna fengu allir keppendur viðurkenningargrip að launum. Veðrið lék við Hólmara og fjölda ferðamanna sem dvöldu í Hólminum og nýttu keppendur boðsmótsins sér það með skoðunarferðum og fótboltaleikjum. Helgi Árnason og Donika Kolica voru skákstjórnendur og áttu þau náðugan dag við verkefnið enda þaulvanir þátttakendur og frábærir keppnismenn í hópnum.

Myndaalbúm (HÁ)

Viltu hækka á skákstigum og styrkja um leið við skákhreyfinguna?

Skáksamband Íslands hefur því ákveðið að hrinda af stokkunum átakinu Skákstig fyrir Aurora-krónur. Tilgangurinn með því er að styrkja við æskulýðsstarf sambandsins.

Flestum ætti að vera ljóst að nýverið fengu allir íslendingar úthlutað svonefndum Aurora-krónum.  Fyrir flesta eru þessar krónur verðlausar eða svo gott sem, en þó er mögulegt að umbreyta þeim í verðmæti ef um er að ræða talsvert magn. Er það mat Skáksambandsins að góður möguleiki sé á að fjármagna tíðari utanferðir okkar yngstu manna með þessum fjármunum. Margt smátt gerir eitt stórt!

Söfnunin fer þannig fram að skákmenn geta ánafnað Skáksambandinu Aurora-krónunum sínum í skiptum fyrir íslensk skákstig! Þannig mun sá sem gefur skammtinn sinn, þ.e. 31,8 krónur, fá jafnmörg skákstig sem bætast við í næsta útreikningi.  Við það bætist að tíu gefendur verða dregnir út nk. sunnudag og munu þeir hljóta 100 skákstig til viðbótar! Sú regla gildir ekki fyrir stórmeistara og aðeins að hálfu fyrir alþjóðlega meistara.

Skáksambandið hefur jafnframt ákveðið að íbúar landsbyggðarinnar munu fá heldur fleiri skákstig en aðrir, en það er gert í viðleitni til þess að ýta upp hinu svonefnda skákstigaþaki sem víða hrjáir fámenn skákfélög á landsbyggðinni.  Verður reglan útfærð þannig að landsbyggðarmenn fá t.d. 31,8 skákstig x2 eða 63,6 stig. Landsbyggð er í þessu tilfelli skilgreind byggð utan 100 km. radíus frá Reykjavík.

Hvernig á að taka þátt?

Skáksambandið gerir sér grein fyrir því að ekki allir kunna eða treysta sér til þess að sækja eða millifæra Aurora-krónurnar sínar, mætti segja að það sé tæknilega flókið. Til þess að einfalda mönnum tæknina þurfa þeir einfaldlega að fylla út skráningareyðublað sem er hér að neðan og merkja þar við hvort þeir óski eftir aðstoð við millifærsluna. Sjálfboðaliðar á vegum Skáksambandsins mun svo hringja í menn eða eftir atvikum heimsækja og framkvæma þannig millifærsluna fyrir þeirra hönd.

Skáksamband Íslands vonast eftir góðri þátttöku í söfnuninni og hvetur menn jafnframt til þess að deila átakinu á Facebook og segja vinum og vandamönnum frá því. Mögulegt er að vinir og ættingjar sem ekki tefla geti ánafnað skákstigunum til skákmanns sem þeir þekkja. Takmörk eru þó sett við það að hámarkshækkun hvers skákmanna eru 100 skákstig. Upplýsingar um slíkt er hægt að koma á framfæri í skráningareyðublaðinu.

• Taka þátt