Skákþing Akureyrar hefst 12. janúar

Mótið hefst nk. sunnudag 12. janúar kl. 13.00 í Skákheimilinu, Íþróttahöllinni við Skólastíg. Mótið er að þessu sinni haldið í samvinnu við Landsbanka Íslands og nefnist Landsbankamótið.

Teflt verður í einum flokki og er öllum heimil þátttaka. Aðeins þeir skákmenn sem eiga lögheimili á Akureyri eða eru fullgildir félagsmenn í Skákfélagi Akureyrar geta unnið titilinn sem teflt er um:

„SKÁKMEISTARI AKUREYRAR 2014."

Dagskrá:

Á mótinu er áformað að tefla 9 umferðir á eftirtöldum dögum

Sunnudaginn 12. janúar kl. 13.00         1. umferð

Fimmtudaginn 16. janúar kl. 18.00       2. umferð

Sunnudaginn 19. janúar kl. 13.00         3. umferð

Fimmtudaginn 23. janúar kl. 18.00       4. umferð

Fimmtudaginn 30. janúar kl. 18.00       5. umferð

Sunnudaginn 2. febrúar kl. 13.00         6. umferð

Sunnudaginn 9. febrúar kl. 13.00         7. umferð

Fimmtudaginn 13. febrúar kl. 18.00     8. umferð

Sunnudaginn 16.febrúar kl. 13.00        9. umferð

Hraðskákmót Akureyrar og verðlaunafhending verður svo sunnudaginn 23. febrúar kl. 13.00

Mótsstjórn áskilur sér rétt til að gera minniháttar breytingar á þessari dagskrá þegar fjöldi þátttakenda liggur fyrir. Ákvörðun um þetta mun liggja fyrir við upphaf 1. umferðar. 

Umhugsunartími verður 90 mínútur á skákina, auk þess sem 30 sekúndur bætast við tímann fyrir hvern leik (90+30).

Mótið verður reiknað til innlendra og alþjóðlegra skákstiga.

Þátttökugjald er kr. 3.000 fyrir skuldlausa félagsmenn, kr. 4.000 fyrir aðra. Þátttaka er ókeypis fyrir þá unglinga sem greitt hafa æfingagjald. 

Skráning er með tölvupósti á netfangið [e-mail], eða á skákstað eigi síðar en 30 mínútum fyrir auglýst upphaf 1. umferðar.

Verðlaun. Veitt verða peningarverðlaun fyrir þrjú efstu sætin, auk a.m.k. einna stigaverðlauna. Lágmarksverðlaunafé er kr. 50.000 en getur hækkað með góðri þátttöku.  Endanleg ákvörðun um upphæð verðlauna mun liggja fyrir eftir upphafsumferð mótsins.

 

Skákæfing hjá Skákdeild Breiðabliks í kvöld

Skákæfing hjá Skákdeild Breiðabliks í kvöld Mæting  kl 19:45 og hraðskákmótið byrjar stundvíslega kl 20:00 !

Átta umferða hraðskákmótið (5mín + 2sek) verður reiknað til FIDE hraðskákstiga eins og öll þriðjudagsmótin í vetur !

Allir velkomnir ókeypis í einn glæsilegasta skáksal landsins óháð því í hvaða taflfélagi þeir eru.

Æfingin er í Stúkunni við Kópavogsvöll (3ju hæð). Gengið inn um kjallarahæð bakatil. Húsið opnar kl 19:30.

Skákárið 2013 í máli og myndum

 

Ritstjóri heldur áfram þeirri venju sinni að gera úttekt á liðnu ári. Hæst ber N1 Reykjavíkurskákmótið en sem fyrr var þar slegið þátttökumet! Kínverjar settu svip sinn á mótið en einir þrettán Kínverjar komu til að taka þátt  í landskeppni Íslands og Kína og tóku svo þátt í N1 Reykjavíkurskákmótinu. Hannes Hlífar Stefánsson endurheimti Íslandsmeistaratitilinn eftir  tveggja ára hlé eftir úrslitaeinvígi við Björn Þorfinnsson og virðist vera í feiknastuði um þessar mundir.

 

 

 

Ísland eignaðist sinn þrettánda stórmeistara þegar Hjörvar Steinn Grétarsson hampaði titlinum að EM taflfélaga loknu þar sem hann tefldi fyrir ensku sveitina Jutes of Kent. Bragi Þorfinnsson náði stórmeistaraáfanga eftir taflmennsku með sama klúbbi í ensku deildakeppninni. Björn, bróðir hans, náði stórmeistaraáfanga á Íslandsmótinu í skák.

 

 

Þrír sigurvegarar stóðu uppi á N1 Reykjavíkurskákmótinu að þessu sinni. Það voru stórmeistararnir Pavel Eljanov, Úkraínu, Wesley So, Filippseyjum, og Amin Bassem, Egyptalandi. Hannes Hlífar Stefánsson stóð sig best íslenskra skákmanna eins og svo oft áður. Kínverska undrabarnið Wei Yi stal senunni og varð yngsti stórmeistari heims í Reykjavík!

 

 

Ungu ljónin nýttu mótið vel og mörg þeirra náð eftirtektarverðum árangri. Reykjavíkurskákmótið er frábær og nauðsynlegur vettvangur fyrir ungu kynslóðina en margir fulltrúar hennar fá sitt fyrsta tækifæri á að tefla á alþjóðlegu móti þar. Það tækifæri nýtti t.d. Óskar Víkingur Davíðsson, átta ára, sem er yngsti keppandinn í hálfrar aldar sögu mótanna.

 

 

Víkingaklúbburinn kom sá og sigraði á íslandsmóti skákfélaga og er sigurvænlegur fyrir síðari hlutann sem fram fer í mars nk. Þar keppir hann við Skákfélagið GM Helli og Taflfélag Vestmannaeyja um sigur á mótinu en síðastnefnda félagið hefur forystu á mótinu.

 

 

Gengið á EM landsliða var í samræmi við væntingar. Hvor tveggja sveitanna, karla og kvenna,  var nánast á pari. Hannes Hlífar stóð sig vel og Tinna fór á kostum í kvennaliðinu. Minni hræringar voru í aðdraganda keppninnar en oft áður en Bragi Þorfinnsson dró sig þó úr hópnum af persónulegum ástæðum.

 

 

Þátttaka var góð á skákmótum hérlendis eins og undanfarin ár. Það er einnig ánægjulegt að sjá hversu miklu duglegri íslenskir skákmenn eru að tefla á erlendri grundu en oft áður. Útrásin er hafin aftur!

 

 

Íslendingum af yngri kynslóðinni gekk afar vel á árinu á Norðurlandamótum. Þar náðist nánast fullt hús. Íslendingar fengu flesta vinninga allra á NM einstaklinga, Rimaskóli varð Norðurlandameistari grunnskólasveita og Álfhólsskóli hampaði sama titli í barnaskólamótinu. Vignir Vatnar Stefánsson varð Norðurlandameistari í yngsta flokki og Nansý Davíðsdóttir varð Norðurlandameistari í yngsta flokki stúlkna.

 

 

Unglingastarf flestra taflfélaga er ölflugt og það var gríðarleg viðurkenning fyrir unglingastarf þegar Helgi Árnason var verðlaunaður af Velferðarsjóði barna fyrir það öfluga starf sem verið rekið í Grafarvoginum.

Eins og venjulega hefur ritstjóri valið hina og þessa viðburði ársins. Örugglega gleymist eitthvað í upptalningunni sem sett er fram á léttan og jákvæðan hátt og án mikillar heimildavinnu.

Óvæntasta frétt ársins

Það hlýtur að vera sameining Hellis og Goðans Máta. Hún kom afar flatt upp á skákheim og endaði með kærumálum fyrir Dómstóli SÍ. Í kærunni var því haldið fram að sameingin kæmi of seint fram þar sem stutt væri í Íslandsmót skákfélaga, þ.e. eftir að félagsskiptafrestur væri útrunninn. Sameiningin var dæmd gild af dómstóli SÍ og úr varð stærsta taflfélag landsins.

Skák ársins

 

 

Að þessu sinni bar engin skák fullkomlega af öðrum að mati ritstjóra en valið í fyrra var t.d. auðvelt.

Skák Loft Baldvinssonar gegn Braga Þorfinnssyni á Íslandsmótinu í skák í Turninum kemur þó upp í hugann. Ekki fullkomin skák - en endalokin mjög snotur og úrslitin afar óvænt.

Dagur Arngrímsson og Guðmundur Kjartansson áttu báðir góðar skákir í fyrstu umferð EM einstaklinga.

Ég hallast að skák Lofts og Braga. Sennilega minnisstæðasta skákin og jafnfram ein óvæntu úrslit ársins - ef ekki þau allra óvæntustu.

Umdeildasti landsliðsmaður ársins

Pistlahöfundur tók þátt í landskeppninni við Færeyinga þar sem Norðanmenn og Austanmenn hafa yfirleitt verið í aðalhlutverki. Undirrituðum var boðið að fljóta með þar sem hann féll vel inn í stigabilið og hafði lengi ætlað að sækja heim sinn góða vin, Finnbjörn Vang, forseta Færeyska skáksambandsins.

Allt varð brjálað á Skákhorninu!

Erlendi klúbbur ársins

Jutes of Kent                                  

Innlendi klúbbur ársins

 

 

F3-klúbburinn er klúbbur ársins. Góðar viðtökur meðal íslenskra skákáhugamanna og ljóst að öflug starfsem verður á næsta ári. Sjá nánar hér og skráningu í klúbbinn hér.

Skákdólgur ársins

 

 

Kristján Örn Elíasson.

Öðlingur ársins

 

 

Áskell Örn Kárason stóð sig afar vel bæði á NM og EM öðlinga (60+). Hann er eins og gott rauðvín. Batnar með aldrinum!

Framganga Áskels er til vitnis um að öll erum við efnileg fram eftir öllum aldri. Árangurinn ræðst af ástundun, leikgleði og  óbilandi trú á sjálfum sér!  

Stökk ársins

 

 

Við tilurð GM Hellis losnaði sæti í efstu deild.

Sætið tók sveit Vinaskákfélagið sem þar fór alla leiðina úr þriðju deild upp í þá fyrstu! Og það brosandi!

Útrás ársins

 

 

Eftir mögur ár í taflmennsku erlendis tóku íslenskir skákmenn við sér og tefldu sem aldrei fyrr á erlendri grundu. Sérstaklega skal Czech Open nefnt þar sem á annan tug íslenskir tefldu. Guðmundur Kjartansson og Dagur Arngrímsson eru sem fyrr svo manna virkastir við þá iðju ytra.

Hornskeyti ársins

 

 

Hjörvar Steinn Grétarsson á hornskeyti ársins þegar hann þakkaði allmörgum aðilum innan skákhreyfingarinnar fyrir stuðninginn á vegferð sinni að stórmeistaratitlinum.

Þakkarskeytið lýsir miklum þroska og jákvæðu hugarfari sem talsverð spurn er eftir á Horninu.

Hornskeyti ársins má finna hér.

Lið ársins

 

 

EM-liðin héldu sínu en gerðu engar rósir á EM landsliða. Lið ársins hlýtur að vera sveit Víkingaklúbbsins sem vann öruggan og sanngjarnan sigur á Íslandsmóti skákfélaga. 

Liðsheiti ársins

 

 

Lið Pálma R. Péturssonar og félaga á Atskákmóti Icelandair Sikileysku ólífurnar. Ekki hægt að toppa það!

Vefstjóri ársins

 

 

Ingvar Þór Jóhannesson er orðinn ómissandi hluti af íslensku skáklífi þegar kemur að góðum vefsíðum móta. Frábær penni þess fyrir utan.

Pistlahöfundur ársins

 

 

Björn Þorfinnsson fór mikinn á Facebook-síðu sinni í kringum heimsmeistaraeinvígið. Slík voru tilþrif drengsins að Kastljósið leitaði til hans varðandi umfjöllun um einvígið. 

Heimsmeistari ársins

Magnus Carlsen.

 

Félagaskipti ársins

Hjörvar Steinn Grétarsson hlýtur að eiga félagaskipti ársins þegar hann skipti úr uppeldisfélaginu, Taflfélaginu Helli, yfir í Víkingaklúbbinn.

Félagaskiptin sættu tíðindum og komu af stað umræðu um uppeldisbætur.

Margir halda því fram að félagaskipti Hjörvars hafi verið kveikjan að sameiningu Goðans Máta og Hellis.

Efnilegasti skákmaður ársins

 

 

Margir ungir og efnilegir skákmenn hafa sprottið upp hér á landi síðustu ár. Þar eru að mínu mati tveir skákmenn fremstir meðal jafningja.

Annar þeirra er Vignir Vatnar Stefánsson. Vignir var sigursæll á árinu. Hækkaði mest allra á stigum og hampaði Norðurlandameistaratitli í yngsta flokki. Hann stóð einnig vel á EM unglinga og á HM áhugamanna.

 

 

Hinn er Oliver Aron Jóhannesson sem hefur bætt sig jafnt og þétt síðustu misseri. Oliver hefur unnið nánast allt sem hægt er að vinna hérlendis í sínum aldursflokkum. Hann vann bæði Meistaramót Hellis og Unglingameistaramót Íslands svo að dæmi séu tekin.

Svo sýndi Áskell Örn það á liðnu ári að það er lengi hægt að vera efnilegur!

Skákkona ársins

 

 

Skákkona ársins er Lenka Ptácníková. Hún var í senn Íslandsmeistari kvenna og fór fyrir kvennalandsliðnu með sóma í Varsjá.

Tinna Kristín Finnbogadóttir tefldi einnig afar frísklega  í Varsjá.

Skákmaður ársins

Það er ekki mikill vafi á því hver sé skákmaður ársins 2013.

 

 

Hannes Hlífar Stefánsson stóð sig best Íslendinga á N1 Reykjavíkurskákmótinu, var einnig bestur Íslendinga á EM landsliða, hækkaði um 48 skákstig á árinu, vann nokkur alþjóðleg skákmót, var geysivirkur með um 100 skákir á árinu, og varð Íslandsmeistari í skák í tólfta sinn.

Vélmennið (The robot) hefur snúið aftur!

Endurkoma ársins

 

 

Endurkomu ársins átti Friðrik Ólafsson þegar hann tefldi á Reykjavíkurskákmótinu 2013 eftir aldarfjórðungshlé og gerði m.a. jafntefli við David Navara!

 

 

Ég ætla að nota tækifæri til að hæla Jóni Þorvaldssyni sem hefur verið ákaflega iðinn við draga „gamla jaxla" aftur að taflborðinu. Menn sem hafa lítið sést á lengri mótum og er mikill fengur að fyrir skákheim allan. Það er afar virðingarvert framtak og gott fyrir íslenskt skáklíf. 

Viðburður ársins

 

 

Liðið ár var viðburðarríkt. Mörgum finnst Atskákmót Icelandair afar skemmtilegt mót og það mátti skynja á tali margra að móti loknu um daginn að þetta væri allra skemmtilegasta styttra mót ársins. Sú breyting að ljúka mótinu á einum degi hlaut einnig góðar undirtektir.

 

 

Skákdagurinn tókst vel. Margir skemmtilegir viðburðir og gaman að sjá skákstarfið blómstra um land allt.

 

 

Stórmeistaramót CCP var afar vel heppnað mót og ánægjulegt að gefa titilveiðurum landsins slík tækifæri. Rós í hnappagat Björns Jónssonar, nýs formanns félagsins, sem byrjað hefur af krafti.

 

 

Landskeppnin við Kína sem haldin var í Arion banka tókst einnig frábærlega.

Viðburður ársins hlýtur að vera N1 Reykjavíkurskákmótið sem fram fór í Hörpu. Enn var þátttökumet slegið. Spurning hvort það verði slegið aftur í ár.

Skákstaður ársins

Það er fátt skemmtilegra en að tefla í nýjum, skemmtilegum salarkynnum. Gaman var að vera efstu hæð í Turninum, ófrágenginni og hrárri umgjörð með útsýni til allra átta.Skáksalurinn í Hotel Natura (gamli Kristalsalurinn) yljar manni. Harpa hlýtur samt að vera skáksalur ársins.

 

Skáksíða ársins

Skák.is

Myndasmiður ársins

Hrafn Jökulsson er langbesti skákmyndsmiður landsing og á margar myndirnar með þessum pistli.

Tímarit ársins

 

 

Tímaritið Skák

Taflfélag ársins

Nokkur félög koma til greina sem taflfélag ársins.

Skákfélagið GM Hellir er fjölmennasta félag landsins eftir sameiningu og fátt vakti meiri athygli og deilur en sameining Hellis og Goðans Máta á liðnu ári. Félagið hefur öfluga og reynda félagsmenn og  fjölbreyttustu dagskrána, ekki síst í ljósi landfræðilegar sérstöðu sinnar.

Vinaskákfélagið hefur mestu útgeislun íslenskra félaga,  mikla og góða nærveru og heldur afar skemmtilega viðburði. Það var líka til marks um góðan liðsanda og sjálfstraust að taka sætið í efstu deild.

Taflfélag Reykjavíkur hefur byrjað af fítonskrafti með nýjum formanni. Stórmeistaramót CCP var öflug nýjung og félagið sigraði á Íslandsmóti unglingasveita.

 

 

Félag ársins er að mínu mati Víkingaklúbburinn. Félagið varð Íslandsmeistari á sínu fyrsta ári í efstu deild, var eina íslenska félagið sem tók þátt á EM 2013 og rekur auk þess orðið býsna öfluga æskulýðsstarfsemi í Víkinni frábæru húsnæði sem þeir hafa á að skipa.

Mikill kraftur í Gunnari Frey Rúnarssyni og félögum. Félagið hefur ekki reynst vera sú loftbóla  sem margir spáðu heldur virðist vera komið til vera.

Árið 2014

Árið 2014 byrjar vel. Þátttaka á Skákþingi Reykjavíkur er frábær en þar taka 75 skákmenn sem er mesta þátttaka í því móti að ég held jafnvel frá árinu 2000!

Framundan er svo Gestamót GM Hellis sem byrjar fimmtudaginn 9. janúar. Þar verður fróðlegt að sjá hvaða "gömlu jaxlar" dusta rykið af skákborðinu!

Afmælismót N1 Reykjavíkurskákmótsins sem á nú hálfrar aldar afmæli hefst svo 4. mars. Margir sterkir skákmenn taka þar þátt og útsendingar á Netinu verða glæsilegri en nokkurn tíma áður.

Árið 2014 er ætlað að verða ár kvennaskákar sem skákáhugamenn eiga eftir að taka eftir á komandi vikum!

Í öllum þessum upptalningu gleymi ég örugglega einhverju sem hefði verið vert að nefna. Ég vona að mér fyrirgefist það.

Gleðilegt nýtt ár og þakkir fyrir hið liðna!

Gunnar Björnsson

Íslandsmót barna fer fram á laugardag í Rimaskóla

Íslandsmót barna í skák fer fram í Rimaskóla laugardaginn 11. janúar og hefst klukkan 12. Þátttökurétt hafa börnfædd 2003 og síðar og sigurvegarinn fær sæmdarheitið Íslandsmeistari barna 2014 og keppnisrétt á Norðurlandamótið í skólaskák sem haldið verður í Danmörku um miðjan febrúar, nánar tiltekið í Legolandi!
 
Alls verða tefldar 9 umferðir með 10 mínútna umhugsunartíma. Eftir 5 umferðir verður keppendum fækkað þannig að þeir sem hafa 3 vinninga eða fleiri halda áfram keppninni um Íslandsmeistaratitilinn en þeir sem hafa færri en 3 vinninga hafa lokið þátttöku.

Peðaskákmót verður haldið samhliða mótinu og hefst klukkan 13:00. Það er ætlað fyrir leikskólabörn og þau allra yngstu í grunnskólum sem eru ekki tilbúin fyrir Íslandsmótið.

Skákdeild Fjölnis verður með veitingasölu á meðan mótinu stendur.

Þetta er í 21. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. Núverandi Íslandsmeistari barna er Vignir Vatnar Stefánsson.
 
Skáksamband Íslands og Skákakademían annast framkvæmd mótsins. Keppendur eru hvattir til að skrá sig sem fyrst hér á Skák.is. Fram þarf að koma fullt nafn, grunnskóli og fæðingarár. Þátttökugjald er 1.000 kr (1.500 að hámarki á systkini) og greiðist á mótsstað fyrir upphaf umferðar. 

Veitt eru sérstök verðlaun fyrir bestan árangur í hverjum árgangi.

Upplýsingar um þegar skráða keppendur má finna hér.

Sigurvegarar á Íslandsmóti barna frá upphafi:
 

• 1994 Sigurður Páll Steindórsson
• 1995 Hlynur Hafliðason
• 1996 Guðjón H. Valgarðsson
• 1997 Dagur Arngrímsson
• 1998 Guðmundur Kjartansson
• 1999 Víðir Smári Petersen
• 2000 Viðar Berndsen
• 2001 Jón Heiðar Sigurðsson
• 2002 Sverrir Þorgeirsson
• 2003 Hjörvar Steinn Grétarsson
• 2004 Svanberg Már Pálsson
• 2005 Nökkvi Sverrisson
• 2006 Dagur Andri Friðgeirsson
• 2007 Kristófer Gautason
• 2008 Kristófer Gautason
• 2009 Jón Kristinn Þorgeirsson
• 2010 Jón Kristinn Þorgeirsson
• 2011 Dawid Kolka
• 2012 Nansý Davíðsdóttir
• 2013 Vignir Vatnar Stefánsson

 

Myndaannáll TR

Á heimasíðu TR hefur verið tekinn saman skemmtilegur myndaannáll um liðið starfsár sem var blómlegt hjá félaginu.

Hann má nálgast hér.

Atkvöld hjá GM Helli í kvöld

Fyrsta skákvöld Mjóddinni hjá Skákfélaginu GM Hellir verður atkvöld mánudaginn  6. janúar 2014. og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili GM Hellis í Álfabakka 14a í Mjóddinni. 

Sigurvegarinn á atkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna
möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþing Reykjavíkur 2014 hafið - Metþátttaka

 

 

75 keppendur hófu í dag leik á 83. Skákþingi Reykjavíkur og er það mesta þátttaka í a.m.k. fimmtán ár og líklega þarf að fara 5-10 ár lengra aftur í tímann til að finna Skákþing með sambærilegum fjölda keppenda.  Mótið er vel skipað og styrkleikabreiddin er góð þar sem er að finna allt frá ungum byrjendum sem eru að stíga sín fyrstu skref í skákinni upp í margreynda alþjóðlega meistara.  Þetta er einkennismerki Skákþingsins; það er öllum opið og skákmönnum af öllum styrkleikum gefst þannig færi á að spreyta sig gegn mörgum af sterkustu skákmönnum þjóðarinnar.

Tveir alþjóðlegir meistarar, einn stórmeistari kvenna og og þrír Fide meistarar eru á meðal keppenda, þeirra stigahæstur alþjóðlegi meistarinn Jón Viktor Gunnarsson (2412).  Næstur honum er Fide meistarinn Sigurbjörn Björnsson (2375) og Fide meistarinn Einar Hjalti Jensson (2347) er þriðji í stigaröðinni.  Alls hafa 16 keppendur meira en 2000 Elo stig, sex keppendur hafa 1800-2000 stig og tíu keppendur hafa 1600-1800 stig.

Skákþingið hófst með setningarræðu formanns T.R., Björns Jónssonar, þar sem hann m.a. setti sögu mótsins í samhengi við fæðingarár fyrsta stórmeistara Íslendinga, Friðriks Ólafssonar, sem var þremur árum eftir að fyrsta Skákþingið var haldið árið 1932.  Þá bauð hann alla þátttakendur velkomna og bar fram sérstakar þakkir til sterkustu skákmannanna sem telja það ekki eftir sér að „leggja stigin sín að veði" ár eftir ár í opnum mótum sem þessum en án þeirra gæti Skákþingið ekki orðið eins stórt í sniðum og raunin er.

 

Við setningarathöfnina veitti Björn jafnframt verðlaun fyrir Jólahraðskákmót T.R. þar sem Jóhann Ingvason sigraði, Vignir Vatnar Stefánsson varð annar og Elsa María Kristínardóttir varð þriðja ásamt Erni Leó Jóhannssyni.  Þá veitti hann Pétri Jóhannessyni sérstaka viðurkenningu fyrir dygga þátttöku í mótum félagsins í áraraðir en áður hafði félagi Péturs, Björgvin Kristbergsson, fengið samskonar viðurkenningu.  Að því loknu kallaði formaðurinn yngsta keppanda mótsins upp, hinn sex ára Adam Omarsson, til að leika fyrsta leik mótsins í viðureign alþjóðlega meistarans Jóns Viktors og Siurans Estanislau Plantada.  Þess má geta að Adam er sonur skákhjónanna Lenku Ptacnikovu stórmeistara kvenna, og Omars Salama.

 

Því næst hóf keppnisandinn innreið sína í salakynni T.R. og baráttan hófst á 37 skákborðum.  Þar sem um opið mót er að ræða er stigamunur keppenda í fyrstu umferð mjög mikill og að þessu sinni litu engin óvænt úrslit dagsins ljós ef frá er skilið tap Veroniku Steinunnar Magnúsdóttur gegn Jóni Þór Helgasyni sem er stigalaus.  Það var þó ekkert gefið í skákunum og nú sem endra nær notuðu keppendur gjarnan tímann milli leikja til að rölta um vígvöllin til að líta á aðrar orrustur, gæða sér á ljúffengum kræsingum í Birnukaffi og kíkja í leiðinni á úrvalið hjá Sigurbirni bóksala sem hefur farið mikinn í skákbókasölu sinni undanfarin misseri.

Pörun fyrir aðra umferð, sem fer fram á miðvikudagskvöld, er ljós en þá mætast m.a. alþjóðlegi meistarinn Jón Viktor Gunnarsson og Örn Leó, Fide meistarinn Sigurbjörn og Ingvar Örn Birgisson, sem og Fide meistarinn Einar Hjalti og Vignir Bjarnason.  Áhorfendur eru velkomnir, aðgangur er ókeypis og veitingar fást gegn vægu gjaldi.  Taflmennskan hefst kl. 19.30.

• Úrslit, staða og pörun
• Myndir
• Mótstöflur SÞR
• Skákmeistarar Reykjavíkur

Jakob Sævar efstur á skákþingi GM-Hellis norðursvæði eftir fjórar umferðir

Jakob Sævar Sigurðsson heldur efsta sætinu með þrjá og hálfan vinning á skákþingi GM-Hellis norðursvæði, að loknum fjórum umferðum, en Jakob gerði jafntefli við Smára bróður sinn í dag. Tómas Veigar, sem vann Sigurð G Daníelsson, er í öðru sæti með 3 vinninga. Smári, Ævar og Hermann koma næstir með tvo og hálfan vinning. Mótinu verður framhaldið laugardaginn 11. janúar, en þá verða lokaumferðirnar tvær tefldar.

 

Úrslit í 4. umferð. 

	Sigurðsson Smári	½ - ½		Sigurðsson Jakob Sævar
	Daníelsson Sigurður G	0 - 1		Sigurðarson Tómas Veigar
	Viðarsson Hlynur Snær	½ - ½		Akason Aevar
	Aðalsteinsson Hermann	1 - 0		Ásmundsson Sigurbjörn
	Kristjánsson Bjarni Jón	1 - 0		Statkiewicz Jakub Piotr
	Hermannsson Jón Aðalsteinn	1 - 0		Þórarinsson Helgi James

 

 Staðan eftir fjórar umferðir. 

	Sigurðsson Jakob Sævar	1824	GM Hellir	3.5
	Sigurðarson Tómas Veigar	1990	Víkingaklúbburinn	3.0
	Sigurðsson Smári	1913	GM Hellir	2.5
	Akason Aevar	1456	GM-Hellir	2.5
	Aðalsteinsson Hermann	1333	GM Hellir	2.5
	Viðarsson Hlynur Snær	1071	GM Hellir	2.5
	Daníelsson Sigurður G	1971	GM Hellir	2.0
	Kristjánsson Bjarni Jón	1061	GM Hellir	2.0
	Ásmundsson Sigurbjörn	1185	GM Hellir	1.5
	Hermannsson Jón Aðalsteinn	0	GM Hellir	1.0
	Statkiewicz Jakub Piotr	0	GM Hellir	1.0
	Þórarinsson Helgi James	0	GM Hellir	0.0

Pörun 5. umferðar laugardaginn 11. jan kl 11:00 

	Sigurðsson Jakob Sævar	3½	-	2½		Aðalsteinsson Hermann
	Sigurðarson Tómas Veigar	3	-	2½		Viðarsson Hlynur Snær
	Akason Aevar	2½	-	2½		Sigurðsson Smári
	Kristjánsson Bjarni Jón	2	-	2		Daníelsson Sigurður G
	Ásmundsson Sigurbjörn	1½	-	0		Þórarinsson Helgi James
	Statkiewicz Jakub Piotr	1	-	1		Hermannsson Jón Aðalsteinn

• Heimasíða GM Hellis
• Mótið á chess-results.

Skákþáttur Morgunblaðsins: Teflt á netinu

Talið er að nálega milljarður manns hafi fylgst með eða haft einhverja vitneskju um heimsmeistaraeinvígi Magnúsar Carlsens og Wisvanathans Anands í Indlandi á dögunum. Þetta er býsna stór hluti mannkyns en tölurnar eru m.a. fengnar með uppsöfnuðu áhorfi frá viðburðinum í Chennai. Norska þjóðin sat sem límd fyrir framan skjáinn og hafi einhverjir haft áhyggjur af hægu tempói skáklistarinnar er vert að minnast þess að þessi sama þjóð lét sér vel líka fremur tilbreytingasnauðar sjónvarpsútsendingar frá stafni skips sem sigldi á sex dögum um firði Noregs sumarið 2011. Ólíklegasta fólk fylgdist með útsendingum einvígisins sem voru matreiddar með snilldarlegum hætti þannig að allir gátu skilið hvar vinningsmöguleikar lágu, hversu öflugir leikirnir væru, hverjir væru helstu möguleikar o.s.frv.

Skákin hefur fyrir löngu markað sér ákveðna stöðu innan hugbúnaðargeirans og hefur þá sérstöðu fram yfir langflestar keppnisgreinar að hægt er að stunda hana á netinu. Í dag, sunnudaginn 29. desember, fer fram á ICC Íslandsmótið í netskák en þar hefur hinn nýráðni hótelstjóri á Nesjavöllum, Davíð Kjartansson, titil að verja. Mótið var haldið fyrst árið 1996. Tímamörk verða 4-2.

Skákklúbbarnir á netinu eru býsna margir en ég hygg að ICC, sem stendur fyrir Internet chess club, hljóti að teljast vinsælasta vefsvæðið. Þangað hafa annað veifið vanið komur sínar allir sterkustu skákmenn heims. Vinsælustu tímamörkin eru sennilega 3-0 og „bullet" sem er 1-0 sem þýðir ein mínúta og enginn aukatími. Það skemmtilega við taflmennsku á netinu er að heimskunnir stórmeistarar og afar öflugir skákmenn gefa oft kost á því að taka eina „bröndótta" við ýmsa aðra spámenn. Nýlega barst mér skák þar sem „skákmeistari Rússlands 2012", landsliðsmaður sem háði úrslitaeinvígið við Vladimir Kramnik í heimsbikarkeppni FIDE sl. sumar, tefldi við Hilmar Viggósson, kunnan skákmeistara sem átti fast sæti í sigursælli sveit Landsbanka Íslands þegar vinsældir Skákkeppni stofnana risu sem hæst.

ICC 2009:

Hilmar Viggósson - Dmitry Andreikin

Nimzo-indversk vörn

1. d4 Rf6 2. c4 e6 3. Rf3 b6 4. Rc3 Bb7 5. g3 Bb4 6. Bg2 Bxc3+ 7. bxc3 d6 8. 0-0 h6 9. d5 exd5 10. Rd4 c5 11. Rf5 Dd7 12. g4!

Vinnur h5-reitinn fyrir riddarann.

12.... Rxg4?!

Hæpið. Betra er 12.... O-O 13. cxd5 og ef 13.... Rxg4 þá kemur 14. e4 Rf6 15. Bf4 með góðum færum fyrir peðið.

13. Rxg7+ Kf8 14. Rh5 Hg8 15. Kh1 dxc4 16. e4 Rc6 17. h3 Rge5 18. Rf6 De6. 19. Rxg8 Kxg8 20. Hg1 Kh7 21. f4 Rd3 22. Be3 Hg8 23. Dh5 Re7 24. f5 Df6 25. Haf1 Hxg2?

Lítur ágætlega út en ýmsir rólegir leikir voru betri þar sem svarta staðan er býsna traust.

26. Kxg2 Bxe4+ 27. Kh2 Rxf5

- Stöðumynd -

Svartur hefur fjögur peð fyrir annan liðsmun. Kóngsstaðan er viðsjárverð og riddarar svarts eru hættulegir. Nú eru góð ráð dýr.

28. Bxh6!

Ekki eins dýr og þér haldið! Þessi biskupfórn splundrar kóngsstöðu svarts. En Hilmar varð að hafa séð fyrir 30. leikinn.

28.... Dxh6 29. Dxf7+ Rg7 30. Hxg7+! Dxg7 31. Dh5+ Dh6 32. Hf7+ Kg8 33. Dxh6 Kxf7 34. Dxd6 b5 35. Dd7+ Kf6 36. Dd8+ Ke5 37. Kg3 b4 38. Dh8+

- og svartur gafst upp. Eftir 38.... Kd5 kemur 39. Dg8+ og 40. Dxc4. Skemmtilega skák en tímamörk voru 3-0.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 29. desember 2013

Skákþættir Morgunblaðsins

Barna- og unglingaæfingar GM Hellis hefjast í Mjóddinni á morgun

Barna- og unglingaæfingar GM Hellis í Mjóddinni hefjast aftur eftir jólafrí mánudaginn 6. janúar 2014. Taflið byrjar kl. 17:15 og fyrirkomulagið verður það sama og fyrir áramót. Þessi fyrsta æfing ársins er aðeins fyrir félagsmenn í Skákfélaginu GM Helli þar sem unnið verður í verkefnahópum að mismunandi æfingum ásamt því að tefla.

Æfingarnar verða haldnar í félagsheimili GM Hellis í Álfabakka 14a, Mjódd. Engin þátttökugjöld. Inngangur er við hliðina á Subway en salur félagsins er á þriðju hæð hússins. Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til. Umsjón með æfingunum hefur Vigfús Ó. Vigfússon.

Dæma- og verkefnatíma fyrir félagsmenn byrjuð á laugardaginn og var farið í hróksendatöfl og taktískar æfingar. Þessum æfingum verður svo fram haldið næstu laugardaga.