Dagur vann stórmeistara í dag

Alþjóðlegi meistarinn Dagur Arngrímsson (2381) vann ungverska stórmeistarann Attila Czebe (2492) í sjöundu umferð First Saturday-mótsins sem fram fór í dag. Í gær tapaði hann hins vegar fyrir danska alþjóðlega meistaranum Mads Andersen (2479). Dagur hefur 4,5 vinning og er í öðru sæti.

Ungverski stórmeistarinn Krisztian Szabo (2561) er efstur með 5,5 vinning. Í áttundu og næstsíðustu umferð, sem fram fer á morgun, teflir hann við bandaríska alþjóðlega meistarann Erik Andrew Kislik (2368).

Tíu keppendur taka þátt í mótinu og tefla allir við alla. Meðalstig mótsins eru 2415 skákstig og er Dagur nr. 7 í stigaröð keppenda.

• Heimasíða mótsins
• Chess-Results

Gagnaveitumótið - Haustmót TR hófst í dag

Gagnaveitumótið - Haustmót TR hófst í dag. 51 skákmaður tekur þátt í mótinu. Teflt er í þremur lokuðum 10 manna flokkum og svo einum opnum flokki þar sem 21 skákmaður tekur þátt. Meðal keppenda á mótinu eru stórmeistarinn Stefán Kristjánsson (2491), alþjóðlegi meistarinn Jón Viktor Gunnarsson (2409) og FIDE-meistarinn Einar Hjalti Jensson (2305).

A-flokkurinn er óvenju sterkur í ár. Nánast allar sterkustu skákkonur landsins taka og þátt nema Lenka Ptácníková og tefla b- og c-flokki.

Björn Jónsson, formaður TR, setti mótið í dag og bauð velkominn Birgir Rafn Þráinsson, framkvæmdastjóra Gagnaveitu Reykjavíkur, helsta styrktaraðila mótsins, sem lék fyrsta leikinn í skák Stefáns Kristjánssonar og Sverris Arnar Björnssonar.

A-flokkur:

Sterkustu skákmennirnir sem nefndir voru að ofan unnu allir. Jóhann H. Ragnarsson (2037) vann Gylfa Þórhallsson (2154). Skák Norðurlandameistaranna úr Rimaskóla, Dags Ragnarssonar (2040) og Olivers Aron Jóhannessonar (2007) var frestað.

B-flokkur:

Keppendur eru á stigabilinu 1817-2002. Landsliðskonurnar Hallgerður Helga Þorsteinsdóttir (1949), Jóhanna Björg Jóhannsdóttir (1911) og Tinna Kristín Finnbogadóttir (1879) eru meðal keppenda.

Hallgerður og Jóhanna voru meðal sigurvegara dagsins.

C-flokkur:

Keppendur eru á stigabilinu 1562-1892. Landsliðskonan Elsa María Kristínardóttir (1787) er meðal keppenda en meðal annarra keppenda eru Sigurlaug R. Friðþjófsdóttir (1735) og Hrund Hauksdóttir (1679).

Elsa og Sigurjón Haraldsson (1768) voru einu sigurvegar umferðarinnar.

D-flokkur:

21 skákmaður tekur þátt og er Ragnar Árnason (1537) stigahæstur þeirra.

Björn Hólm Birkisson (1231) vann Ragnar en að öðru leiti unnu þeir stigahærri þá stigalægri.

• Heimasíða TR
• Chess-Results 
• Myndaalbúm (GB)

Riddarinn: Þrír höfðingjar og heiðursriddarar fallnir frá á stuttum tíma

Skarð er fyrir skildi í röðum RIDDARANS því 3 aldnir félagar og öflugir ástríðuskákmenn - riddarar reitaða borðsins -  eru horfnir af skákborði lífsins á innan við ári.  Skákin var þeirra líf og yndi allt til æviloka og andi þeirra muna svífa áfram yfir vötnunum í Vonarhöfn þegar öldungar hittast þar til tafls.

BJARNI LINNET (88) er látinn fyrir stuttu.  ÁRSÆLL JÚLÍUSSON (94) lést fyrir mánuði síðan og SIGURBERG H. ELENTÍNUSSON (85) fyrir nokkrum mánuðum, verkfræðingurinn og töflugerðarmaðurinn góði sem hefur áður verið minnst hér.  Það er því mikill söknuður að mönnum kveðinn í skákliði Riddarans, skákklúbbs eldri borgarara sem hittist til tafls vikulega allan ársins hring í Strandbergi, Safnaðarheimilli Hafnarfjarðarkirkju.

BJARNI LINNET var póstmeistari og símstöðvarstjóri í Kópavogi á sínum tíma og  áður í Hafnarfirði. Frækinn frjálsíþróttamaður einkum í stökkvum og grindahlaupum. Hann var annar besti stangarstökkvari landsins á sinni tíð á eftir Torfa Bryngeirssyni á sinni bambusstöng, báðir Vestmannaeyingar að uppruna og þaulæfðir í sprangi.

Bjarni var  frumkvöðull að stofnun Skákfélags Hafnarfjarðar og formaður þessum um  tíma þegar taflfélag bæjarins var endurreist 1974 til að blása nýju lífi í skáklíf staðarins.  Einnig átti hann sæti í varastjórn Skáksambands Íslands á árunum 1976-78. Þá átti Bjarni frumkvæði ásamt Sr. Gunnþóri Þ. Ingasyni  að stofnun RIDDARANS - Bjarna Riddara - árið 1998, Skákklúbbs eldri borgara á StórHafnarfjarðarsvæðinu, þar sem hann tefldi  sjálfum sér og öðrum til yndisauka um árabil. Brosmildur mjög á hverju sem gekk í skákinni.  

ÁRSÆLL JÚLÍUSSON starfaði hjá hinu opinbera m.a. í Ríkisbókhaldinu eftir að hann kom heim frá Svíþjóð þar sem hann var búsettur um langt skeið.  Hann var afar útsjónarsamur og  traustur skákmaður og tefldi fyrir Stjórnarráðið í firmakeppnum á sínum tíma.  Einkar ljúfur og skemmtilegur karl og iðinn við kolann á skáksviðinu svo lengi sem heilsan leyfði. Síðast tefldi hann í Mjóddarmóti Hellis fyrir 3 árum þá 91 árs að aldri og í Riddaranum nokkrum sinnum eftir það. 

Þessir föllnu höfðingjar, valinkunnu sómamenn og slyngu skákmenn, höfðu allir verið slegnir til stór- og heiðursriddara með pomp og prakt í virðingar- og þakklætisskyni fyrir störf þeirra og þátttöku í skákklúbbi Riddarans, hugkvæmni þeirra, háttvísi og snilli á skákborðinu.

Blessuð sé þeirra góða minning.

ESE

PS. Útför Bjarna Linnet fer fram frá Fossvogskapellu kl. 15 á þriðjudaginn kemur.. Hann verður jarðsunginn af Sr. Gunnþóri.

Rimaskóli - Norðurlandameistari fjórða árið í röð!

 

Sveit Rimaskóla: Hjörvar Steinn Grétarsson (liðsstjóri), Kristófer Jóel Jóhannesson, Dagur Ragnarsson, Nansý Davíðsdóttir, Oliver Aron Jóhannesson, Jón Trausti Harðarson og Helgi Árnason (skólastjóri).

Eins og áður hefur fram hér á Skák.is varð Rimaskóli í dag Norðurlandameistari grunnskólasveita. Sveitin hlaut 16,5 vinning í 20 skákum og varð vinningi fyrir ofan Danina sem veittu þeim harða keppni. Þetta er í fjórða árið í röð sem sveit frá Rimaskóla vinnur Norðurlandameistaratitil - þá ýmist grunnskóla- eða barnaskólaflokki. Einstæður árangur hjá þessum öfluga skákskóla.

 

Skáksveit Rimaskóla skipuðu:

1. Dagur Ragnarsson 3,5 v. af 5
2. Oliver Aron Jóhannesson 4 v. af 5
3. Jón Trausti Harðarson 5 v. af 5
4. Nansý Davíðsdóttir 4 v. af 5
5. Kristófer Jóel Jóhannesson tefldi ekki.

Oliver og Jón Trausti fengu borðaverðlaun fyrir bestan árangur á 2. og 3. borði. Þetta var fjórði Norðurlandameistaratitill Dags, Olivers og Jón Trausta. Dagur og Jón Trausti eru á sínu síðasta ári - hafa hafið nám í MH.

Liðsstjóri liðsins var Hjörvar Steinn Grétarsson, alþjóðlegur meistari og landsliðsmaður. Hjörvar er gamall nemandi Rimaskóla og varð tvöfaldur Norðurlandameistari með Rimaskóla. Fararstjóri hópsins var Helgi Árnason, skólastjóri.

• Heimasíða mótsins
• Myndaalbúm mótsins (HÁ)

Friðrik og Áskell gerðu jafntefli - Kristiansen efstur

Stórmeistarinn Friðrik Ólafsson (2407) og Áskell Örn Kárason (2205) gerðu stutt jafntefli í áttundu og næstsíðustu umferð NM öldunga sem fram fór í dag í Borgundarhólmi. Þeir félagarnir eru í 2.-4. sæti með 5,5 vinning ásamt Jörn Sloth (2330) vinningi á eftir Jens Kristiansen (2403) sem er einn efstur.

Sigurður E. Kristjánsson (1912) gerði jafntefli og hefur 4 vinninga.

Níunda og síðasta umferð fer fram á morgun. Þá teflir Friðrik við danska FIDE-meistarann Bent Sörensen (2257) og Áskell við Svíann Ulf Nyberg (2130).

Lokaumferðin fer fram fyrr en venjulega eða kl. 9.

32 skákmenn taka þátt í mótinu frá öllum Norðurlöndunum nema Færeyjum. Þar af eru þrír stórmeistarar og fjórir FIDE-meistarar. Friðrik er stigahæstur keppenda, Áskell er nr. 7 í stigaröðinni og Sigurður nr. 18.

• Heimasíða mótsins
• Beinar útsendingar (hefjast almennt kl. 11)

Rimaskóli Norðurlandameistari grunnskólasveita

Skáksveit Rimaskóla sigraði á Norðurlandamóti grunnskólasveita sem lauk í dag í Hokksund í Noregi í dag. Sveitin vann Svíana í lokaumferðinni 3-1 og hlaut 16,5 vinning í 20 skákum - urðu vinningi fyrir ofan dönsku sveitina.

Skáksveit Norðurlandameistara Rimaskóla skipuðu Dagur Ragnarsson, Oliver Aron Jóhannesson, Jón Trausti Harðarson, Nansý Davíðsóttir og Kristófer Jóel Jóhannesson (varamaður). Liðsstjóri var Hjörvar Steinn Grétarsson. 

Nánari fréttir sem og fleiri myndir væntanlegar síðar í dag.

• Heimasíða mótsins
• Myndaalbúm mótsins (HÁ)

Gagnaveitumótið - beinar útsendingar

Gagnaveitumótið - Haustmót TR hefst kl. 14 í dag. Allar skákir a-flokks mótsins verða sýndar beint. Meðal keppenda í a-flokknum eru stórmeistarinn Stefán Kristjánsson og alþjóðlegi meistarinn Jón Viktor Gunnarsson.

• Beinar útsendingar
• Heimasíða TR
• Chess-Results

Rimaskóli með 1,5 vinnings forskot fyrir lokaumferðina

Skáksveit Rimaskóla vann 3,5-0,5 sigur á norskri sveit í fjórðu og næstsíðustu umferð NM grunnskólasveita sem fram fór í Hokksund í Noregi í morgun. Sveitin hefur nú 1,5 vinnings forskot á skáksveit Dana fyrir lokaumferðina sem fram fer síðar í dag.

Dagur Ragnarsson, Jón Trausti Harðarson og Nansý Davíðsdóttur unnu en Oliver Aron Jóhannesson gerði jafntefli.

Rimaskóli teflir við Svíana í lokaumferðinni.

 

• Heimasíða mótsins
• Myndaalbúm mótsins (HÁ)

Álfhólsskóli Norðurlandameistari barnaskólasveita!

Skáksveit Álfhólsskóla var rétt í þessu að tryggja sér Norðurlandameistaratitil barnaskólasveita. Álfhólsskóli var efstur ásamt norsku sveitina fyrir lokaumferðina og tryggði sér sigur með 4-0 sigri á sænsku sveitinni í lokaumferðinni. Tæpara mátti það ekki vera því norska sveitin vann þá finnsku 3,5-0,5!

Skáksveit Álfhólskóla skipuðu Dawid Kolka, Felix Steinþórsson, Guðmundur Agnar Bragason, Oddur Þór Unnsteinsson og Halldór Atli Kristjánsson (varamaður). Liðsstjóri var Lenka Ptácníková.

Nánari fréttir væntanlegar síðar í dag. Einnig eru myndir frá verðlaunaafhendingunni væntanlegar.

• Heimasíða mótsins og beinar útsendingar
• Myndaalbúm Finnanna
• Myndaalbúm SB
• Chess Results

Nýtt fréttskeyti Skákakademíunnar

Fréttaskeyti Skákakademíunnar kemur nú út á nýjan leik. Í þessu fyrsta tölublaði má m.a. finna viðtal við hinn efnilega Oliver Aron Jóhannesson auk þess sem Þorsteinn Þorsteinsson Taflfélagi Vestmannaeyja er tekinn á beinið.

Skeytið mun koma út annan hvern sunnudagsmorgunn.

Skrár tengdar þessari bloggfærslu:

• Fréttaskeyti Skákakademíunnar - 15. september 2013