Skákþáttur Morgunblaðsins: Hemmi Gunn og skákin

Fáir greiddu götu listamanna betur en Hermann Gunnarsson. Það var eins og rauður þráður í starfi hans og kom sennilega best fram í þáttunum „Á tali" þar sem alltaf var opið fyrir nýja og ferska krafta. Við fráfall hans er vert minnast þáttar Hemma við að auka hlut skákarinnar í sjónvarpi. Uppúr 1990 þegar undirritaður var að bera fram hugmyndir um skák-útsendingar hjá RÚV hitti ég Hermann á göngum sjónvarpsins og hann bauð strax fram aðstoð sína. Útsendingar frá úrslitum At-skákmóts Íslands fóru fram árum saman hjá RÚV og einnig á Stöð 2, SÝN og Skjá 1. Með hjálp kostunaraðila voru síðar fengin í sjónvarpssal Garrí Kasparov, Anatolí Karpov, og Judit Polgar. Hermann náði góðu sambandi við þessa höfuðsnillinga skákarinnar og á „Reykjavik rapid 2004" komu fram Magnús Carlsen og Lev Aronjan. Oft var Jón L. Árnason stórmeistari með í þessum útsendingum og Hermann bar snemma fram þá ósk að Egill Eðvarðsson yrði stjórnandi útsendinga. Skáksamband Íslands heiðraði Hermann sérstaklega fyrir framlag hans á þessu sviði.

Hermann var býsna slyngur skákmaður, tefldi stundum fyrir Skattstofuna í Skákkeppni stofnana, tók þátt í fjölmörgum skákmótum með styttri umhugsunartíma. Síðasta mót hans var hraðskákmót Vals sem fram fór í Lollastúku á Valsvellinum í apríl sl. Halldór í Henson vinur hans dró fram „Hrókinn", gamlan grip úr timbri sem fyrst var keppt um árið 1959. Á yngri árum var Hermann stundum meðal áhorfenda á skákmótum í Breiðfirðingabúð. Hann var alvörugefinn og íbygginn þegar hann tefldi. Ef hann vann lék hann á als oddi - og ef hann tapaði þá lék hann líka á als oddi.

Veturinn 1997 efndi greinarhöfundur til skáknámskeiðs fyrir vini og kunningja og Hemmi mætti til leiks. Á námskeiðinu var mikil áhersla lögð á gambíta: kóngsbragð, miðbragð og íslenska gambítinn. Eitt kvöldið var haldið „þema-fjöltefli". Af skákinni sem við tefldum að dæma og birtist í þætti Jóns L. í DV, virðist ákveðin léttúð hafa ríkt og taflmennskan stenst ekki nákvæma skoðun. Hermann tók á móti fórnum í anda „rómantíska tímabilsins" með bros á vör og vann að lokum:

Helgi Ólafsson - Hermann Gunnarsson

Kóngsbragð

1. e4 e5 2. f4 exf4 3. Rf3 g5 4. Bc4 d6 5. 0-0 Bg7 6. d4 Bg4 7. g3 Bh3 8. Bxf7+ Kxf7 9. Rxg5+ Dxg5 10. Hxf4+ Rf6 11. Rc3 Kg6!? 12. Hf5 Dxf5 13. exf5+ Bxf5 14. Re2 Rbd7 15. Rf4+ Kf7 16. c3 Hae8 17. Db3+ Kf8 18. Bd2 Re4 19. Hf1!? Rxd2 20. Re6+ Ke7

Hvítur er búinn að fara alltof geyst og 20. ... Kg8 vinnur létt.

21. Dd1 Rxf1 22. Rxg7 Re3 23. Df3 Hef8 24. Dxe3+ Kf6 25. Dh6+ Bg6 26. d5 Re5 27. Re6 He8 28. Dg7+ Kf5 29. Dxc7 Bf7 30. Rg7+ Kg4 31. Dxd6 Rf3+ 32. Kf2 Re5 33. h3+ Kg5 34. Rxe8??

„Stílbrot," skrifar Jón L. Og það eru orð að sönnu. Eftir 34. h4+! Kg4 35. Kg2! hótar hvítur 36. Db4+ o.s.frv. og á unnið tafl.

34. ... Hxe8 35. c4 Rd3+ 36. Kf3 Re5+ 37. Kg2 Bg6 38. b3 Rd3 39. Dd7 He5 40. Kf1??

Eftir þennan afleik tapast skákin. „Nú verða óvænt endalok," skrifar Jón L.

40. ... He1+ 41. Kg2 Be4+ 42. Kh2 Hh1 mát!

Eftir námskeiðið fengu þátttakendur skákirnar úr fjölteflinu í hendur með skýringum. Á góðri stundu nokkru síðar kom Hermann með plaggið til mín útprentað, rétti fram penna og sagði: „Skrifaðu: Algjör klassi hjá nemanda."

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 30. júní 2013.

Skákþættir Morgunblaðsins

Rúnar sigraði á afmælismóti Áskels Arnar

Afmælisfögnuður Áskels Arnar Kárasonar á Litlu-Laugum þann 5. júlí hófst með skákmóti eins og vera ber. 14 keppendur skráðu sig til leiks og voru tefldar 7 umferðir eftir svissnesku kerfi. Skákstjóri var Hermann Aðalsteinsson, sem fékk frí frá kvöldmjöltum í þetta sinn. 

Úrslit urðu sem hér segir:

1. Rúnar Sigurpálsson                   7
2. Áskell Örn Kárason                  4,5
3. Smári Ólafsson                       4,5
4. Jón Kristinn Þorgeirsson           4,5
5. Kári Arnór Kárason                   4
6. Rúnar Ísleifsson                        4
7. Símon Þórhallsson                    4
8. Karl E. Steingrímsson               4
9. Haki Jóhannesson                     3,5
10. Hermann Aðalsteinsson            3
11. Grétar Eyþórsson                     3
12. Þorgeir Smári Jónsson              2
13. Sigurður A. Þórarinsson            1
14. Örvar Sigurðsson                      0

Að móti loknu var sungið og dansað.

Heimasíða SA

 

Opna skoska: Hjörvar vann í fyrstu umferð

Alþjóðlegi meistarinn Hjörvar Steinn Grétarsson (2511) vann skoska skákmanninn Clement Sreeves (2251) í fyrstu umferð opna skoska meistaramótsins sem hófst í Helensburgh í gær. Í gær mætir hann enska alþjóðlega meistaranum Lawrance Trent (2420). Skák Hjörvars verður sýnd beint á vefsíðu mótsins en skákin hefst kl. 12.

Um það bil 75 skákmenn taka þátt í aðalmótinu. Þar af eru 9 stórmeistarar og 8 alþjóðlegir meistarar. Hjörvar er nr. 5 stigaröð keppenda. 

• Heimasíða mótsins
• Beinar útsendingar (hefjast almennt kl. 12)

Guðmundur og Héðinn unnu í 3. umferð

Guðmundur Kjartansson (2444) og Héðinn Steingrímsson (2557) unnu báðir í 3. umferð alþjóðlega mótsins í Benasque á Spáni sem fram fór í gær. Andstæðingar þeirra voru á stigabilinu (2100-2176).  Guðmundur hefur fullt hús en Héðinn hefur 2,5 vinning.

Í fjórðu umferð, sem fram fer í dag, teflir Guðmundur við spænska stórmeistarann Viktor Moskalenko (2529) en Héðinn við serbneska alþjóðlega meistarann Slobodan Kovacevic (2332).

Þátt taka 428 skákmenn frá 37 löndum. Þar af eru 36 stórmeistarar og 25 alþjóðlegir meistarar. Héðinn er nr. 15 í stigaröð keppenda en Guðmundur er nr. 44. Tíu skákir eru sýndar beint í hverri umferð.

• Heimasíða mótsins
• Chess-Results
• Beinar útsendingar (hefjast almennt kl. 14)

Þingeyingar öruggir sigurvegar Landsmóts UMFÍ

Héraðssamband Þingeyinga (HSÞ) vann öruggan sigur á Landsmóti UMFÍ sem fram fór í gær og í dag á Selfossi. Félagsmenn Goðans-Máta skipuðu sveit Þingeyinga og fóru stórmeistararnir Þröstur Þórhallsson og Helgi Áss Grétarsson þar fremstir í flokki.

Ungmennasamband Kjalarnesþings (UMSK), sem var að mestu skipuð félagsmönnum Taflfélags Garðabæjar, endaði í öðru sæti og Fjölnir endaði í þriðja sæti.

Sigursveig Þingeyinga:

1. Þröstur Þórhallsson 3 v. af 3
2. Helgi Áss Grétarsson 3 v. af 3
3. Einar Hjalti Jensson 5,5 v. af 8
4. Ásgeir Ásbjörnsson 3,5 v. af 5
5. Arnar Þorsteinsson 3 v. af 3
6. Tómas Björnsson 6 v. af 6
7. Jón Þorvaldsson 2 v. af 2
8. Arngrímur Gunnhallsson 1 v. af 2

Sigursveit Kjalnesinga skipuðu félagsmenn Taflfélags Garðabæjar  auk þess sem Jóhanna Björg Jóhannsdóttir úr Helli reyndist drjúgur liðsauki.

Lið Kjalnesinga:

1. Jóhann H. Ragnarsson 1,5 v af 4
2. Jón Þór Bergþórsson 5,5 v. af 8
3. Guðlaug Þorsteinsdóttir 6 v. af 8
4. Jóhanna Björg Jóhannsdóttir 6 v. 7
5. Páll Sigurðsson 2,5 v. af 5

Lið Fjölnis

Það skipuðu félagsmenn Fjölnis eðli málsins samkvæmt! Sveitina skipuðu:

1. Jón Árni Halldórsson 5 v. af 8
2. Erlingur Þorsteinsson 0 v. af 2
3. Oliver Aron Jóhannesson 5,5 v. af 8
4. Dagur Ragnarsson 6,5 v. af 8
5. Jón Trausti Harðarson 2 v. af 6

Fráfarandi meistarar, UMFB (Bolvíkingar) tóku ekki þátt.

Lokastaðan:

Rk.	Team	TB1	TB2
1	HSÞ	27	15
2	UMSK 1	21,5	12
3	Fjölnir	19	10
4	ÍBA	18	11
5	UMFN	17	10
6	HSK 1	13,5	6
7	UÍA	12,5	6
8	UMSK 2	8,5	2
9	HSK 2	7	0

 

Chess-Results

Jon Ludvig Hammer skákmeistari Noregs

Jon Ludvig Hammer (2599) varð í dag skákmeistari Noregs í fyrsta sinn en mótið var haldið í Lillehammer 29. júní-6. júlí. Hammer hlaut 7 vinninga í 9 skákum. Annar varð alþjóðlegi meistarinn Frode Elsness (2484) en hann hlaut 6 vinninga. Í 3.-6. sæti með 5,5 vinning urðu alþjóðlegi meistarinn Atle Grönn (2358) og stórmeistararnir Leif Erlend Johannessen (2506), Rune Djurhuus (2448) og Berge Östenstad (2429).

22 skákmenn tóku þátt í efsta flokki og tefldu 9 umferðir. Nærri 500 keppendur tóku þátt á Noregsmótinu en teflt er í mörgum flokkum.

• Heimasíða mótsins
• Úrslitaþjónusta

Benasque: Guðmundur vann í 2. umferð

Alþjóðlegi meistarinn Guðmundur Kjartansson (2444) vann í 2. umferð alþjóðlegs móts í Benasque sem fram fór í dag. Guðmundur hefur fullt hús. Stórmeistarinn Héðinn Steingrímsson (2557) gerði hins vegar jafntefli. Héðinn hefur 1,5 vinning. Andstæðingar þeirra voru á stigabilinu (2100-2176). 

Á morgun tefla þeir félagar enn við stiglægri andstæðinga (2060-2179). 

Þátt taka 428 skákmenn frá 37 löndum. Þar af eru 36 stórmeistarar og 25 alþjóðlegir meistarar. Héðinn er nr. 15 í stigaröð keppenda en Guðmundur er nr. 44. Tíu skákir eru sýndar beint í hverri umferð.

• Heimasíða mótsins
• Chess-Results
• Beinar útsendingar (hefjast almennt kl. 14)

Landsmót UMFÍ: Örugg forysta Þingeyinga

Héraðssamband Þingeyinga (HSÞ), sem félagsmenn Goðans-Máta skipa hefur örugga forystu á skákkeppni Landsmóts UMFÍ þegar 5 umferðum af níu er lokið. Þingeyingar hafa 4 vinninga forystu á Ungmennasamband Kjalarnesþings (UMSK), þar sem félagsmenn Taflfélags Garðabæjar eru í aðalhlutverki. Íþróttabandalag Akureyrar (ÍBA), sem félagsmenn Skákfélags Akureyrar skipa er í þriðja sæti.

Núverandi meistarar UMFB (Bolvíkingar) taka ekki þátt. Mótinu lýkur á morgun með umferðum 6-9.

Staðan eftir 5 umferðir

 

Rk.	Team	Games	TB1	TB2	TB3
1	HSÞ	5	17	10	0
2	UMSK 1	4	13	8	0
3	ÍBA	5	12,5	8	0
4	Fjölnir	4	10	5	0
5	UMFN	4	8,5	5	0
6	HSK 1	4	8	4	0
7	HSK 2	5	4,5	0	0
8	UMSK 2	5	3,5	0	0
9	UÍA	4	3	0	0

 

Chess-Results

Skákakademían fékk samfélagsstyrk frá Landsbankanum

 

 

Skákakademían fékk í gær 250.000 kr. styrk úr Samfélagssjóði Landsbankans fyrir starf í Vin. Róbert Lagerman formaður Skákfélags Vinjar tók við styrknum fyrir hönd Akademíunnar.

Í frétt á vefsíðu Landsbankans segir meðal annars:

Landsbankinn veitir að þessu sinni fimmtán milljónir króna í samfélagsstyrki úr Samfélagssjóði bankans. Veittir eru þrjátíu og fjórir styrkir, þrír að upphæð 1 milljón króna hver, sautján að fjárhæð 500 þúsund krónur og fjórtán að fjárhæð 250 þúsund krónur. Yfir 450 umsóknir bárust sjóðnum að þessu sinni.

Samfélagsstyrkjum er einkum ætlað að styðja við þá sem sinna mannúðar- og líknarmálum, menntamálum, rannsóknum og vísindum, verkefnum á sviðum menningar og lista, forvarnar- og æskulýðsstarfi og sértækri útgáfustarfsemi.

Úr Samfélagssjóði Landsbankans eru veittar að lágmarki fjórar tegundir styrkja á hverju ári: samfélagsstyrkir, námsstyrkir, nýsköpunarstyrkir og umhverfisstyrkir en afreksstyrkir eru veittir annað hvert ár.

Dómnefnd um úthlutun samfélagsstyrkja var að þessu sinni skipuð þeim Andra Snæ Magnasyni rithöfundi, Árelíu Eydísi Guðmundsdóttur dósent við Háskóla Íslands og Guðrúnu Agnarsdóttur lækni, en hún var jafnframt formaður nefndarinnar.

Samfélagsstyrkir Landsbankans eru mikilvægur þáttur í stuðningi bankans við samfélagið. Með þeim leggur Landsbankinn einstaklingum, hópum og félagssamtökum lið við verkefni sem jafnan er sinnt af einlægni og ómetanlegum áhuga sem vert er að styðja við.

Skákakademía Reykjavíkur 
til að halda uppi skákstarfi í VIN, sem er athvarf fyrir fólk með geðraskanir. Verkefnið stuðlar að félagsfærni og virkni einstaklinga sem glíma við geðraskanir. 

Benasque: Héðinn og Guðmundur unnu í fyrstu umferð

Stórmeistarinn Héðinn Steingrímsson (2557) og alþjóðlegi meistarinn Guðmundur Kjartansson (2444) eru báðir meðal keppenda á alþjóðlegu móti í Benasque á Spáni sem hófst í dag. Þeir unnu báðir í dag stigalága andstæðinga (1922-1969). Í annarri umferð á morgun tefla þeir við heldur stigahærri andstæðinga (2100-2176).

Þátt taka 428 skákmenn frá 37 löndum. Þar af eru 36 stórmeistarar og 25 alþjóðlegir meistarar. Héðinn er nr. 15 í stigaröð keppenda en Guðmundur er nr. 44. Tíu skákir eru sýndar beint í hverri umferð.

• Heimasíða mótsins
• Chess-Results
• Beinar útsendingar (hefjast almennt kl. 14)