Dómstóll SÍ staðfestir niðurstöður mótsstjórnar Íslandsmóts skákfélaga - TR-b telst sigurvegari 2. deildar

Dómstóll SÍ hefur komist að niðurstöðu í tveimur málum. Í báðum tilfellum var úrskurður mótsstjórnar Íslandsmóts skákfélaga samþykktur. Þetta verður til þess að b-sveit Taflfélags Reykjavíkur telst sigurvegari 2. deildar og ávinnur sér keppnisrétt í fyrstu deild á kostnað Skákdeildar Fjölnis.

Annars vegar var um að ræðu kæru Taflfélags Reykjavíkur vegna Alexander Arehchenko, Taflfélagi Bolungarvíkur, þar sem þess var krafist að hann væri úrskurðaður ólöglegur. Niðurstaða Dómstólsins var sú að Arehchenko væri löglegur þar sem nafn hans væri á keppendaskránni.

Dómstóll SÍ staðfesti úrskurð mótsstjórnar Íslandsmóts skákfélaga um að Robert Ris, Skákdeild Fjölnis, væri ólöglegur í viðureign félaganna í lokaumferð mótsins þar sem nafn hans vantaði á keppendaskránna. Fjölnir vann þá viðureign 4,5-1,5 en skv. lögum SÍ teljast úrslitin nú vera 4,5-1,5 TR í vil. Það þýðir að TR telst nú sigurvegari 2. deildar, færist úr þriðja sæti, Goðinn-Mátar fellur niður í 2. sætið og Fjölnir niður í það þriðja. B-sveit TR fær því sæti í efstu deild að ári en ekki Fjölnir. 

Dómarnir fylgja með sem PDF-viðhengi.

Skrár tengdar þessari bloggfærslu:

• Dómstóll SÍ - TR vs. TB
• Dómstóll SÍ - TR vs. Fjölnir

Sævar, Þorvarður og Hrafn efstir á öðlingamóti

Sævar Bjarnason (2132), Þorvarður Fannar Ólafsson (2225) og Hrafn Loftsson (2204) eru efstir og jafnir með 3½ vinning að lokinni fjórðu umferð skákmóts öðlinga sem fram fór í gær. Þorvarður gerði jafntefli við Sigurð Daða Sigfússon (2324), Hrafn vann Þór Má Valtýsson (2040) en Sævar lagði Vigfús Ó. Vigfússon (1988).

Öll úrslit fjórðu umferðar má nálgast hér.

Stöðu mótsins má nálgast hér.

Fimmta umferð fer fram nk. miðvikudagskvöld. Þá mætast meðal annars: Þorvarður-Hrafn og Sævar-Sigurður Daði.

Pörun fimmtu umferðar má í heild nálgast hér. 

• Heimasíða TR
• Chess-Results

Sigurganga Vignis Vatnars heldur áfram

Eins og áður hefur verið frá greint var skákkvöldið í Gallerýinu í síðustu viku einkar velheppnað sérstaklega fyrir suma.  Barist var grimmt enda að miklu að keppa þar sem vegleg Geirfuglsegg voru í verðlaun. Til stóð að keppa eftir aldursflokkum 80-60-40-20-10 ára og yngri. En þar sem svo fór að yngsti keppandinn Vignir Vatnar Stefánsson aðeins 10 ára sigraði í mótinu  og vann í öllum flokkum var úrskurðað að hann hlyti verðlaunin ekki bara fyrir sigur í flokki 80 ára og yngri - heldur 10 ára eldri.  Hann hlaut 9½ vinning af 11 mögulegum í keppni við aldna reynslubolta og nokkra harðsnúna yngri skákmenn.

Á mánudagskvöldið var hélt hinn ungi sveinn áfram ótrúlegri sigurgöngu sinni og nú í hinum öfluga KR-klúbbi vestur í Frostaskjóli, ljónagryfjunni sjálfri, þar sem ein allra svakalegustu hraðskákmót landsins eru háð vikulega allan ársins hring, 13 umferðir takk með 7 mínútna umhugsunartíma á skákina.  Eins og sjá má á meðf. mótstöflu rúllaði sá stutti mótinu upp, vann flesta andstæðinga sín og gerði aðeins þrjú jafntefli og sigraði  glæsilega með  11.5 vinningi af 13 mögulegum. Þetta verður að teljast býsna vel af sér vikið og því ekki út í loftið að tala um "ungstirnið undraverða" þar sem Vignir Vatnar fer. 

 

 

Innan tíðar leggur sveinninn ungi upp í skákleiðangur til Rúmeníu til keppni á World Amateur Chess Championship  á vegum FIDE fer fram í Iasi, fallegri borg austur við  Svartahaf 21.-30. apríl nk. Sama mót og hinn stórefnilegi Oliver Aron Jóhannesson var næstum búinn að vinna á í fyrra.  Mótið er ætlað áhugaskákmönnum á öllum aldri undir 2000 stigum hvaðanæva að úr heiminum.  Það verður gaman að fylgjast með árangri Vignis þar enda stefnan sett hátt til undirbúnings Heimsmeistarakeppni ungmenna í ýmsum aldursflokkum í haust.

Teflt verður í Gallerý Skák í dag þegar degi hallar.  Ýtt á klukkurnar kl. 18 / ESE

Mikil spenna fyrir Íslandsmót barnaskólasveita!

Íslandsmót barnaskólasveita fer fram um helgina og er búist við æsispennandi keppni sveitar Álfhólsskóla, sem er ríkjandi meistari, og hinnar sigursælu skáksveitar Rimaskóla. Fleiri skólar geta blandað sér í toppbaráttuna, og er búist við fjölmörgum skáksveitum á þetta skemmtilega mót sem er fyrir nemendur í 1. til 7. bekk. Fjórir liðsmenn skipa hverja sveit og verða tefldar 9 umferðir með 15 mínútna umhugsunartíma. Íslandsmótið, sem haldið er í Rimaskóla, hefst klukkan 13, laugardaginn 13. apríl, og heldur áfram klukkan 11 á sunnudag.

Álfhólsskóli sigraði á Íslandsmótinu 2012 eftir harða keppni við Rimaskóla og náði í kjölfarið silfurverðlaunum á Norðurlandamótinu í haust. Vel er staðið að skáklífinu í Álfhólsskóla og fór skáksveit skólans t.d. í æfingaferð til Tékklands í fyrrasumar. Landsliðspilturinn Dawid Kolka teflir á 1. borði, en af öðrum knáum liðsmönnum má nefna Felix Steinþórsson, Guðmund Agnar Bragason og Odd Unnsteinsson.

Vösk sveit Rimaskóla mun án nokkurs vafa gera harða atlögu að titlinum. Landsliðsstúlkan Nansý Davíðsdóttir leiðir sveitina, og er gert ráð fyrir Joshúa litli bróðir hennar tefli á 4. borði. Aðrir í liðinu verða væntanlega Jóhann Arnar Finnsson, Svandís Rós Ríkharðsdóttir og Kristófer Halldór Kjartansson.

Fleiri skáksveitir munu örugglega láta að sér kveða. Margra augu munu beinast að hinni kornungu sveit Ölduselsskóla en allir liðsmenn hennar eru í 2. til 4. bekk. Meðal liðsmanna er Óskar Víkingur Davíðsson sem fór á kostum á Íslandsmóti skákfélaga á dögunum og lagði alla andstæðinga sína að velli, og voru flestir mun eldri en hann. Þá verður gaman að fylgjast með skáksveitum Salaskóla, þar sem gríðarlega gott starf er unnið, og hefur skólinn verið meðal þeirra bestu síðasta áratuginn.

Íslandsmót barnaskólasveita var fyrst haldið 1990 og þá sigraði sögufræg skáksveit Æfingadeildar KHÍ. Flestir liðsmenn þeirrar sveitar skipuðu sér á næstu árum í hóp bestu skákmanna Íslands. Má nefna bræðurna Braga og Björn Þorfinnssyni og Arnar Gunnarsson sem allir eru alþjóðlegir meistarar.

Skráning fer fram hér á Skák.is. Lista yfir þegar skráðar sveitir má finna hér.

Skákþing Norðlendinga 2013 - afmælismót Haraldar Hermannssonar

Skákþing Norðlendinga verður að þessu sinni háð á Sauðárkróki 19. - 21 apríl og verður afmælismót Haraldar Hermannssonar sem verður níræður þegar mótið stendur yfir. Haraldur hefur um langt skeið verið í fararbroddi þeirra sem haldið hafa uppi skáklífi á Norðurlandi og er því vel við hæfi að mótið sé haldið í hans nafni. Haraldur teflir enn þrátt fyrir háan aldur í góðra vina hópi.

Mótið verður 7 umferðir og hefst á föstudagskvöldi klukkan 20:00 með fjórum atskákum. Á laugardegi verða tefldar tvær kappskákir og ein kappskák á sunnudegi, en skákþinginu lýkur með hraðskákmóti. Kappskákirnar verða reiknaðar til alþjóðlegra og íslenskra stiga. Þegar þetta er ritað hafa 14 skákmenn skráð sig til leiks og eru skákmenn hvattir til að skrá sig hið fyrsta í tölvupósti í netfangið [e-mail]  Listi yfir skráða skákmenn verður birtur á heimasíðu Skákfélags Sauðárkróks auk nánari upplýsinga um mótsfyrirkomulag og gistimöguleika á Sauðárkróki.

Athygli er vakin á því að verðlaunafé hefur verið hækkað á mótinu. Þannig eru fyrstu verðlaun 60.000 krónur en heildar verðlaunafé verður a.m.k.  150.000 krónur og getur hækkað enn með aukinni þátttöku. Nánari upplýsingar um mótsfyrirkomulag o.fl. má finna á heimasíðu Skákfélags Sauðárkróks.

Stigamót Hellis fer fram 24.-26. apríl

Stigamót Taflfélagsins Hellis verður haldið í ellefta sinn sinn dagana 24.-26. apríl. Fyrirkomulag mótsins hefur verið mismunandi í gegnum tíðina en að þessu sinni er mótið haldið í kringum sumardaginn fyrsta þannig að keppendur munu eiga frí helgina á eftir.

Góð verðlaun eru í boði á mótinu og mótið er opið öllum. Teflt verður í húsnæði Skáksambands Íslands í Faxafeni 12. Skráning á mótið er á heimasíðu Hellis: http://www.hellir.blog.is. Upplýsingar um þegar skráða keppendur má finna hér.

Þátttökugjöld eru kr. 3.000 fyrir fullorðna og 2.000 kr. fyrir 15 ára og yngri og rennur óskipt í verðlaunasjóð mótsins.  

Núverandi Stigameistari Hellis er Davíð Kjartansson.

Umferðatafla:

• 1.-4. umferð, miðvikudaginn 24. apríl (19:30-23:30)
• 5. umferð, fimmtudaginn 25. apríl (11-15)
• 6. umferð, fimmtudaginn 25. apríl (17-21)
• 7. umferð, föstudaginn 26. apríl (19:30-23:30)

Verðlaun:

• 1. 50% af þátttökugjöldum
• 2. 30% af þátttökugjöldum
• 3. 20% af þátttökugjöldum

Skráning: 

• Vefsíða: http://www.hellir.blog.is
• Sími: 866 0116 (Vigfús eða símsvari)

Tímamörk:

• 1.-4. umferð: 20 mínútur + 5 sekúndur á leik
• 5.-7. umferð: 1½ klst. + 30 sekúndur á leik

Guðmundur byrjar vel í Búdapest

Guðmundur Kjartansson (2443) byrjar prýðilega í AM-flokki First Saturday-mótsins sem nú er í gangi í Búdapest. Eftir fjórar umferðir hefur Guðmundur hlotið 3 vinninga og er einn efstur.

Dagur Arngrímsson (2392), sem teflir í SM-flokki, hefur hins vegar ekki byrjað jafn vel. Eftir jafn margar umferðir hefur hann hlotið 1 vinning og er í 7.-9. sæti.

Meðalstigin í flokki Dags eru 2412 skákstig. Guðmundur er nr. 6 í stigaröð 10 keppenda. Meðalstigin í flokki flokki Guðmundar eru 2299 skákstig er hann næststigahæstur 12 keppenda.

• Heimasíða mótsins
• Chess-Results

Æsir - úrslit síðustu tveggja móta

Meðfylgjandi eru mótstöflur síðustu 2ja skákmóta í Ásgarði þar sem bráðhressir eldri borgarar elda grátt silfur á 64 reitum sér til dundurs á þriðjudögum yfir veturinn. Góð þátttaka er þar jafnan og léttur keppnisandi yfir vötnunum.  Margir sækja bæði mótin þar og einnig í Riddaranum daginn eftir og fá aldrei nóg - því skák er skemmtileg og hin besta heilsubót.

Sumpart sömu sigurvegarar í báðum klúbbunum eins hér sést:

 

 

 

 

Aðalfundur SÍ fer fram 11. maí

Stjórn Skáksambands Íslands boðar hér með til aðalfundar Skáksambandsins í samræmi við 8. gr. laga S.Í.

Fundurinn verður haldinn laugardaginn 11. maí nk. kl. 10.00 fyrir hádegi í Faxafeni 12, Reykjavík.

Dagskrá:  Venjuleg aðalfundarstörf.

Stjórn Skáksambandsins sendir ennfremur með fundarboðinu gögn varðandi skrá yfir fullgilda félagsmenn aðildarfélaga S.Í.  Stjórnir aðildarfélaganna eru vinsamlegast beðnar að útfylla skrár þessar vandlega og senda þær Skáksambandi Íslands í pósth. 8354, 128 Reykjavík eða á netfang [e-mail] fyrir 27. apríl 2013.

Bréf þetta er sent ásamt gögnum í samræmi við 9. gr. laga S.Í., en sú grein hljóðar svo:

 Við atkvæðagreiðslu á aðalfundi á hvert félag eitt atkvæði enda hafi það a.m.k. 10 félagsmenn með lögheimili á Íslandi í Keppendaskrá Skáksambandsins tveim vikum fyrir aðalfund.  Eitt atkvæði bætist við hjá félagi fyrir hverja sveit sem það sendir í Íslandsmót skákfélaga það árið. Við atkvæðagreiðslu um kjörbréf í upphafi fundar skal gilda sú regla, að hvert félag fari ekki með fleiri atkvæði en það hafði á aðalfundi árið áður.  Enginn fulltrúi getur farið með meira en eitt atkvæði á fundinum.  Við atkvæðagreiðslur á aðalfundi ræður einfaldur meirihluti atkvæða, nema um þau mál sem sérstaklega eru tilgreind í þessum lögum.

Einnig skal bent á 6. grein:

Standi aðildarfélag í gjaldfallinni skuld við sambandið hefur það ekki rétt til að eiga fulltrúa á aðalfundi.  Skákdeildir í félögum geta átt aðild að sambandinu, enda hafi þá minnst 10 menn bundist slíkum samtökum.  Heimilt er tveimur eða fleiri aðildarfélögum í sama landshluta að stofna með sér svæðissamband.

Taflfélögunum gefst kostur á að birta stutta skýrslu um starfsemi sína á síðasta starfsári í árrsskýrslu Skáksambands Íslands.  Hafi félögin áhuga á þessu þarf efni að hafa borist skrifstofu S.Í. í síðasta lagi 27. apríl nk.

                                                                       Virðingarfyllst,

                                                                       SKÁKSAMBAND ÍSLANDS

Gríðarlega fjölmennt Skólaskákmót Kópavogs

Skólaskákmót Kópavogs fór fram í tveimur hlutum vegna þess hversu fjölmennt það var. Fyrri hlutinn fór fram á föstudag en síðan var mótinu lokið í gær í mánudag þegar keppni nemenda í 3. og 4. bekk fór fram.  Meira en 220 keppendur tóku þátt en keppt var í fjórum flokkum. Teflt var í Álfhólsskóla.

1.-2. bekkur

 

Alls tóku 52 skákmenn þátt í keppni þeirra sem eru í 1. og 2. bekk. Þar hafði Róbert Luu, Álfhólsskóla, sigur með fullu húsi en tefldar voru fimm umferðir. Í öðru sæti varð Ingibert Snær Erlingsson, einnig úr Álfhólsskóla með 4½ vinning og þriðji varð Daniel Sveinsson, sem er líka er Álfhólsskóla, með 4 vinninga.

 

María Jónsdóttir, Salaskóli, varð efst stúlkna, Freyja Birkisdóttir, Smáraskóla, önnur og Vigdís Lilja Kristjánsdóttir, Álfhólsskóla, þriðja.

Lokastöðuna má finna hér.

3.-4. bekkur

 

 

88 skákmenn tóku þátt. Vignir Vatnar Stefánsson, Hörðuvallaskóla, og Tinni Teitsson, Snælandsskóla, komu efstir og jafnir í mark með fullt hús eftir sex umferðir. Vignir vann úrslitaskák þeirra á millum. Þriðji með 5 vinninga eftir stigaútreikning varð Jón Þór Jóhannsson, Salaskóla.

Dagmar Vala Hjörleifsdóttir, Álfhólsskóla, varð efst stúlkna, Elísabet Alda Georgsdóttir, einnig úr Álfhólsskóla, varð önnur og Elín Edda Jóhannsdóttir, Salaskóla, þriðja.

Lokastöðuna má finna hér.

5.-7. bekkur

 

 

60 skákmenn tóku þátt í flokknum. Dawid Pawel Kolka, Álfhólsskóla, sigraði með fullu hús vinninga í sjö skákum. Annar var Bárður Örn Birkisson, Smáraskóla, með 6 vinninga og þriðji varð Jason Andri Gíslason, úr Salaskóla með 5 vinninga. Dawid og Báður Örn hafa tryggt sér keppnisrétt á Kjördæmismóti Reykjaness.

Guðrún Vala, Salaskóla, varð efst stúlkna, Tinna Þrastardóttir, einnig úr Salaskóla önnur, og Móey María Sigþórsdóttir, sem líka er úr Salaskóla, þriðja.

Lokastöðuna má finna hér.

8.-10. bekkur

 

 

Róbert Leó Jónsson, Álfhólsskóla, og Kristófer Orri Guðmundsson, Vatnsendaskóla, urðu efstir og jafnir í elsta flokki með 6 vinninga í 7 skákum. 23 skákmenn tóku þátt. Róbert hafði betur eftir stigaútreikning. Hildur Berglind Jóhannsdóttir, Salaskóla, varð þriðja og efst stúlkna með 5 vinninga Ludvik Árni Guðmundsson, Vatnsendaskóla, fékk þriðja sætið í strákaflokki en hann hlaut einnig 5 vinninga.

Sonja María Friðriksdóttir, Álfhólsskóla, varð önnur stúlkna og Erna Pétursdóttir, Vatnsendaskóla, varð þriðja.

Róbert Leó og Kristófer Orri hafa unnið sér rétt til að tefla á kjördæmamóti Reykjaness.

Lokastöðuna má finna hér.

Myndaalbúm (Tómas Rasmus)