Gunnar Gunnarsson teflir fjöltefli í KR í dag

Á laugardaginn, 26. janúar, verður Skákdagurinn haldinn hátíðlegur víða um land. Skákdagurinn er til heiðurs Friðrik Ólafssyni sem á afmæli þennan dag.

Börnum og ungmennum býðst að tefla í fjöltefli við Gunnar Gunnarsson fyrrum Íslandsmeistara í bæði skák og knattspyrnu.

Fjölteflið fer fram í skákherberginu í Frostaskjóli á 2. hæð og hefst 11:00 og er mæting 10:50.

Skráning fer fram á [e-mail]

Veitt verða verðlaun fyrir hvern þann sem nær að leggja Gunnar að velli.

Bíó - skákæfing Fjölnis hefst kl. 11

Í tilefni af Íslenska skákdeginum 26. janúar, afmælisdegi Friðriks Ólafssonar, heldur Skákdeild Fjölnis Bíó - skákæfingu í Rimaskóla og hefst hún kl. 11:00 í Rimaskóla. Gengið inn um íþróttahús. Öll verðlaun fyrir frammistöðu á skákmóti og skákkennslu verða í formi bíómiða. Fjöldi vinninga verður 10+

Davíð Kjartansson skákmeistari Reykjavíkur

Davíð Kjartansson (2323) varð í kvöld skákmeistari Reykjavíkur eftir hörkubaráttu við Omar Samla (2265). Fyrir umferð kvöldsins höfðu þeir unnu alla nema í innbyrðis skák þegar þeir gerðu jafntefli.  Það átti eftir að breytast í lokaumferðinni þegar þeir mættu Akureyringunum Mikaeli Jóhanni Karlssyni (1960) og Þór Má Valtýssyni (2023). Davíð gerði jafntefli við Þór en Mikael gerði sér lítið fyrir og vann Omar. Mikael reyndist þar með þeim hjónum heldur betur erfiðum en hann vann Lenku í næstsíðustu umferð.

Davíð varð því efstur með 8 vinninga og Omar annar með 7,5 vinning. Mikael náði svo þriðja sætinu með frábærum endaspretti en hann hlaut 7 vinninga.

Gerð verður betur grein fyrir mótinu á næstunni og þar með talið hverjir hlutu aukaverðlaun mótsins.

Úrslit níundu og síðustu umferðar má finna hér.

Röð efstu manna:

• 1. Davíð Kjartansson (2323) 8 v.
• 2. Omar Salama (2265) 7,5 v.
• 3. Mikael Jóhann Kjartansson (1960) 7 v.
• 4.-5. Einar Hjalti Jensson (2301) og Halldór Pálsson (2074) 6,5 v.
• 6.-10. Lenka Ptácníková (2281), Daði Ómarsson (2218), Þór Már Valtýsson (2023), Jóhann H. Ragnarsson (2043) og Júlíus Friðjónsson (21859

Lokastöðu mótsins má finna hér.

 

• Heimasíða TR (beinar útsendingar)
• Myndaablúm (GB)
• Chess-Results

Bragi vann Stórskákmót Toyota í dag

Í dag héldu heldri skákmenn á Stór Reykjavíkursvæðinu sitt Toyota skákmót. Mótið fór fram í höfuðstöðvum Toyota í Garðabæ. Þetta var í fimmta sinn sem  Toyota á Íslandi býður okkur eldri skákmönnum til skákveislu í höfuðstöðvum sínum.Teflt er um svo kallaðan Toyota farandbikar og mörg önnur verðlaun, sem öll eru gefin af Toyota á Íslandi.

Í upphafi móts fengu allir þátttakendur afhenta gjöf frá fyrirtækinu. Úlfar Steindórsson setti mótið og bauð keppendur velkomna til leiks. Gunnar Björnsson  forseti Skáksambandsins var mættur á skákstað og lék fyrsta leikinn hjá Magnúsi V Péturssyni.

Þrjá tíu og sex skákmenn mættu til leiks, margir mjög sterkir vígamenn, með margra ártuga reynslu af manndrápum á hvítum reitum og svörtum og strax var ljóst að það yrði hart barist um efstu sætin.

Að sjálfsögðu tefldu allir til heiðurs Friðriki Ólafssyni okkar fyrsta stórmeistara,sem á afmæli á morgun. Öll þessi vika er helguð honum. Menn fóru samt rólega af stað í fyrstu umferðum.

Bragi Halldórsson vann þetta mót með 8½ vinning af 9 mögulegum. Jóhann Örn Sigurjónsson varð í öðru sæti með 7½ vinning. Jón Þ. Þór varð síðan í þriðja sæti með 7 vinninga. Bragi leyfði aðeins eitt jafntefli, það var í fyrstu umferð  við Jón Þ Þór.

Í mótslok afhenti Úlfar forstjóri síðan öll verðlaun. Alls fengu nítján efstu menn verðlaun.

Æsir skáfélag F E B í Reykjavík sáu um framkvæmd mótsins og þeir þakka Toyota mönnum kærlega fyrir móttökurnar í dag og velvild í garð eldri skákmanna undanfarin ár.

Finnur Kr Finnsson og Þorsteinn Guðlaugsson sáu um mótsstjórn.

Myndaalbúm (ESE að mestu)

Úrslit dagsins má sjá í meðfylgjandi töflu:

 

 

 

Gíbraltar: Guðmundur með 3 vinninga eftir 4 umferðir

Alþjóðlegi meistarinn, Guðmundur Kjartansson (2408) hefur unnið tvær skákir í röð á alþjóðlega Gíbraltar-skákmótinu. Í gær vann þýska skákmanninn Claus Seyfried (2077) en í dag sigraði hann norsku skákkonuna Olga Dolzhikova (2239), sem er stórmeistari kvenna.

Í 5. umferð, sem fram fer á morgun, teflir Guðmundur við aðra skákkonu. Að þessu sinni Nana Dzagnidze (2555) frá Georgíu, sem er fimmta stigahæsta skákkona heims.

246 skákmenn taka þátt í mótinu og þar af 48 stórmeistarar. Guðmundur er nr. 66 í stigaröð keppenda.

• Heimasíða mótsins
• Chess-Results

Hjörvar vann í dag

Alþjóðlegi meistarinn Hjörvar Steinn Grétarsson (2516) vann ísraelska stórmeistarann Igor Bitensky (2400) í 11. umferð c-flokks Tata Steel-mótsins sem fram fór í dag. Annar sigur Hjörvars í röð. Hjörvar hefur 6 vinninga og er í 5.-7. sæti.

Í 12. og næstsíðustu umferð, sem fram fer á morgun, teflir Hjörvar við brasilíska stórmeistarann Krikor Mekhitarian (2543).

Stórmeistararnir Sabino Brunello (2572), Ítalíu, og Fernardo Peralto (2617) eru efstir með 9,5 vinning.

Myndir af vettvangi af Hjörvari eru frá Calle Erlandsson.

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Carlsen með vinnings forskot í Wijk aan Zee

Magnus Carlsen (2861) gerði jafntefli við Wang Hao (2752) í 11. umferð Tata Steel-mótsins sem fram fór í kvöld. Aronain (2802), sem vann Nakamura (2769), er annar vinningi á eftir Carlsen. Anand (2802) er þriðji.

Tólfta og næstsíðasta umferð fer fram á morgun.

Úrslit 11. umferðar:

Leko, P. - van Wely, L.	1-0
Karjakin, S. - Sokolov, I.	1-0
Hou, Y. - Anand, V.	½-½
L'Ami, E. - Harikrishna, P.	½-½
Wang, H. - Carlsen, M.	½-½
Nakamura, H. - Aronian, L.	0-1
Giri, A. - Caruana, F.	1-0

Staða efstu manna:

• 1. Carlsen (2861) 8½ v.
• 2. Aronian (2802) 7½ v.
• 3. Anand (2772) 7 v.
• 4.-6. Nakamura, Karjakin (2780) og Leko (2735) 6½
• 7. Harikrishna (2698) 5½

Í a-flokki eru meðalstigi 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

KORNAX-mótið: Bein útsending frá lokaumferðinni

Níunda og síðasta umferð KORNAX-mótsins - Skákþings Reykjavíkur hefst í kvöld kl. 19:30. Venju samkvæmt eru 6 skákir sýndar beint frá umferðinni. Davíð Kjartansson og Omar Salama berjast um titilinn og eru efstir og jafnir fyrir lokaumferðina.

Útsendingu frá umferðinni má nálgast hér.

Skákirnar sem sýndar eru beint eru:

• Omar Salama (7,5) - Mikael Jóhann Karlsson (6)
• Þór Már Valtýsson (5,5) - Davíð Kjartansson (7,5)
• Daði Ómarsson (5,5) - Einar Hjalti Jensson (6)
• Vigfús Óðinn Vigfússon (5,5) - Halldór Pálsson (5,5)
• Lenka Ptacnikova (5) - Haraldur Baldursson (5,5)
• Júlíus Friðjónsson (5) - Sigríður Björg Helgadóttir (5)

 

• Heimasíða TR (beinar útsendingar)
• Myndaablúm (GB)
• Chess-Results

Haraldur með fullt hús á Skákþingi Akureyrar

Það er ekkert lát á sigurgöngu Haraldar Haraldssonará Skákþingi Akureyrar og stefnir að óbreyttu í að hann landi sínum fyrsta Akureyrarmeistaratitli.

Úrslit í fjórðu umferð sem fram fór í gærkveldi urðu úrslit þessi:

• Karl Egill-Haraldur      0-1
• Símon-Hjörleifur        1/2
• Jón Kristinn-Hreinn    1-0
• Jakob-Sigurður         1-0
• Rúnar-Andri Freyr     0-1

Þetta var fjórða sigurskák Haraldar í röð og jók hann á forskot sitt þar sem helsti keppinautur hans, Sigurður Arnarson, tapaði sinni skák. Andri Freyr Björgvinsson, sem er næst stigalægstur keppenda hefur nú skotist upp í annað sætið með 3 vinninga, en Sigurður en þriðji með 2,5.

Mótinu verður fram haldið á sunnudaginn, þegar 5. umferð verður tefld. 

• Heimasíða SA 
• Chess-Results

Skákdagsmótið - skemmtilegt unglingamót á Akureyri

Í tilefni af Skákdeginum 26. janúar verður haldið skákmót fyrir börn í félagsheimili Skákfélags Akureyrar. Mótið er öllum opið sem kunna mannganginn og eru yngri en 18 ára. Teflt verður í tveimur flokkum, 12 ára og yngri (fædd 2000 og fyrr) og 13 ára og eldri.  Þátttaka er ókeypis.

Mótið hefst kl. 13.00 á laugardaginn og stendur í u.þ.b. tvo tíma. Félagsheimili Skákfélagsins er í Íþróttahöllinni - gengið inn að vestan.

Fjölmörg verðlaun í boði.  Engin þörf að skrá sig  - bara mæta á staðinn!