Sevilla: Guðmundur með fullt hús eftir 4 umferðir

Alþjóðlegi meistarinn Guðmundur Kjartansson (2408) hefur byrjað sérdeilis vel á alþjóðlegu skákmóti í Sevilla á Spáni. Eftir fjórar umferðir hefur hann fullt hús og er efstur ásamt fjórum öðrum.

Hingað til hefur Guðmundur teflt við stiglægri andstæðinga en það breytist á morgun þegar hann teflir við enska stórmeistarann Stewart Haslinger (2535).

223 skákmenn taka þátt í mótinu og þar af eru 11 stórmeistarar og 13 alþjóðlegir meistarar. Guðmundur er nr. 19 í stigaröð keppenda. Ekki er að sjá að beinar útsendingar séu frá mótinu. Mótið er 9 umferðir.

• Heimasíða mótsins
• Chess-Results

Prag: Hannes með sigur í dag

Stórmeistarinn Hannes Hlífar Stefánsson (2512) vann í dag indversku skákkonuna Bhakti Kulkarni (2238), sem er stórmeistari kvenna á Prague Open. Hann hefur nú unnið tvær skákir í röð eftir slaka byrjun á mótinu.

Hannes hefur 5 vinninga og er í 10.-26. sæti.

Alls tekur 51 skákmaður þátt í mótinu og þar af eru 5 stórmeistarar. Hannes er nr. 3 í stigaröð keppenda.

• Heimasíða mótsins
• Chess-Results
• Beinar útsendingar (hefjast almennt kl. 15)

Wijk aan Zee: Karjakin, Anand og Carlsen unnu í dag - Karjakin efstur

Karjakin vann Wang Hao, Anand sigraðri Caruano og Carlsen lagði van Wely en 3. umferð ofurmótsins í Wijk aan Zee fór fram í dag. Öðrum skákum lauk með jafntefli. Karjakin er efstur með 2,5 vinning en Anand, Carlsen og Harikrishna koma næstir með 2 vinninga.

Í 4. umferð, sem fram fer á morgun, mætast meðal annars: Carlsen - Harikrishna og Aronian - Anand.

Úrslit 3. umferðar:

Carlsen, M. - van Wely, L.	1-0
Harikrishna, P. - Aronian, L.	½-½
Anand, V. - Caruana, F.	1-0
Sokolov, I. - Giri, A.	½-½
Leko, P. - Nakamura, H.	½-½
Karjakin, S. - Wang, H.	1-0
Hou, Y. - L'Ami, E.	½-½

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

Riddarinn - Guðfinnur gefur hvorki grið né frið

Riddarar reitaða borðsins háðu sínar vikulegu burtreiðar á hvítum reitum og svörtum í vikunni sem leið.  Góður hópur vaskra skákvíkinga var mættur til tafls af Stór-Hafnarfjarðarsvæðinu sem teygði sig alla leið austur á Stöðvarfjörð að þessu sinni.

Ekki verður annað sagt en menn leggi mikið á sig til að svala skákþorsta sínum og njóta góðrar afslöppunar og hvíldar frá daglegu amstri. Fátt er meira spennandi fyrir suma en að  reyna að brjóta  andstæðinga sína á bak aftur, ginna þá í mátnet og njóta síðan sigurvímunnar og augnabliksins um stund. Til þess er talsvert á sig leggjandi því það að tefla skák getur líka verið krefjandi kvalræði á stundum, hálfgerð píslarganga eins og dæmin sanna.  

Sá sem hvað harðast gengur fram í þessu er Ísfirðingurinn brottflutti, hinn glaðbeitti Guðfinnur R. Kjartansson, sem um er kveðið í nýlegri drápu „Gefur hvorki grið né frið en geysist fram og heggur lið". Og „Um varir leikur gráðugt  glott sem gefur ei til kynna gott"  og að endingu „Af ofsóknum (hans) mun loksins lát er lúinn kóngur verður mát".  

Segja má að þetta hafi verið dæmigert fyrir skákmót Riddarans í síðustu viku og frammistöðu GRK þar enda þótt við býsna harðsnúna mótherja væri að etja svona innanum og samanvið.  Guðfinnur gaf engin grið,  barðist grimmt og vann mótið með glæsibrag með 9 vinningum af 11 mögulegum. Með vinningi meira en Ingimar Halldórsson, sem jafnan selur sig dýrt og er  oftast í fyrsta sæti.  Sigurður E. Kristjánsson var býsna drjúgur eins og fyrri daginn og nældi sér í glás af vinningum með góðri hjálp andstæðinganna. Harðjaxlarnir Stefán Þormar og Össur Kristinsson máttu hafa sig alla við til að halda sjó og verða á meðal 5 efstu eins og oftast.

Sjá má nánari úrslit á meðf. mótstöflu.

 

 

Guðfinnur Err sem stundum er nefndur „Viðeyjarundrið", eftir að hann kom sjálfum sér og öðrum mjög á óvart með því að verða fyrir ofan tvo fyrrverandi Íslandsmeistara í Viðeyjarmótinu 2010, var vel að sigrinum kominn.  Hann stýrir mótum Riddarans og Gallerýsins jafnan með annarri hendi eða „einari" eins og hann  orðar það um leið og hann teflir, sem virðist ekki há honum. Hann fer oftast létt með að landa sigri eða halda jöfnu -  án þess að blása úr nös. 

Næst verður att kappi í Riddaranum á miðvikudaginn kemur kl. 13 -17  (11 umf.x10m)

ESE- Skákþankar 14.01.13

Wijk aan Zee: Hjörvar vann Romanishin

Alþjóðlegi meistarinn Hjörvar Steinn Grétarsson (2516) vann úkraínska stórmeistarann Oleg Romanishin (2521) í 3. umferð c-flokks Wijk aan Zee sem fram fór í dag. Hjörvar er nú efstur ásamt stórmeisturunum Fernando Peralto (2617), Argentínu, Sabino Brunello (2572), Ítalíu, og Krikor Mekhitarian (2543), Brasilíu, með 2½ vinning.

Í 4. umferð, sem fram fer á morgun, teflir Hjörvar við hollenska FIDE-meistarann Miguoel Admiraal (2321).

Í c-flokki eru meðalstigin 2476 skákstig en 14 skákmenn tefla þar allir við alla. Hjörvar er nr. 6 í stigaröð keppenda.

• Heimasíða mótsins
• Beinar útsendingar (hefjast almennt kl. 12:30)

Metin falla í Hörpu í febrúar: Fjöldi meistara skráður til leiks á N1 Reykjavíkurskákmótið

 

N1 Reykjavíkurskákmótið fer fram 19.-27. febrúar í Hörpu sem þykir einn glæsilegasti skákstaður heims. Reykjavíkurmótið var fyrst haldið 1964 og er eitt elsta og virtasta skákmót veraldar. Keppendur á síðasta ári voru um 200, sem var met en flest bendir til að þeir verði enn fleiri núna. Útlit er fyrir að fleiri met falli í Hörpu í febrúar: Nú eru skráðir til leiks skákmenn frá 42 löndum og af 180 keppendum sem þegar eru skráðir er 31 stórmeistari.

 

 

N1 Reykjavíkurskákmótið fer fram 19.-27. febrúar í Hörpu sem þykir einn glæsilegasti skákstaður heims. Reykjavíkurmótið var fyrst haldið 1964 og er eitt elsta og virtasta skákmót veraldar. Keppendur á síðasta ári voru um 200, sem var met en flest bendir til að þeir verði enn fleiri núna. Útlit er fyrir að fleiri met falli í Hörpu í febrúar: Nú eru skráðir til leiks skákmenn frá 42 löndum og af 180 keppendum sem þegar eru skráðir er 31 stórmeistari.

Í aðdraganda N1 Reykjavíkurskákmótsins fer fram landskeppni við firnasterkt landslið Kína og munu kínversku meistararnir síðan tefla í Hörpu. Alls eru 11 Kínverjar skráðir til leiks með ofurstórmeistarann Ding Liren í broddi fylkingar. Hann er aðeins tvítugur en hefur þrisvar orðið Kínameistari í skák. Af öðrum kínverskum keppendum má nefna undrabörnin Wei Yi, 13 ára, sem er stigahæsti skákmaður heims undir 14 ára, og hina 17 ára gömlu Guo Qi, heimsmeistara stúlkna 20 ára og yngri.

 
Fleiri heimsmeistarar munu leika listir sínar á N1 Reykjavíkurskákmótinu: Tyrkinn Alexander Ipatov er heimsmeistari 20 ára og yngri og Dinara Saduakassova frá Kasakstan er heimsmeistari stúlkna 16 ára og yngri.

 
Þá er sérstakt fagnaðarefni að enski snillingurinn Nigel Short, sem teflt hefur um heimsmeistaratitilinn, hefur boðað komu sína á N1 Reykjavíkurskákmótið, sem og Ivan Sokolov, en hann er sigursælasti meistari sem teflt hefur á Íslandi.

 

 

Margar snjallar skákkonur munu setja svip á mótið, m.a. Tania Sachdev frá Indlandi og frá Sopiko Guramishvili frá Georgíu.

 

 

 

Keppendur koma einnig frá Tógó, Sri Lanka, Namibíu og Íran svo nokkur dæmi séu nefnd.

 

 

Í heimavarnarliðinu verða margir af sterkustu skákmönnum okkar, m.a. Hannes H. Stefánsson sem sigrað hefur oftar á Reykjavíkurskákmótinu en nokkur annar, stórmeistararnir Henrik Danielsen, Stefán Kristjánsson og Íslandsmeistarinn Þröstur Þórhallsson, auk efnilegasta skákmanns Íslands, Hjörvars Steins Grétarssonar. Mikill fjöldi áhugamanna á öllum aldri og af báðum kynjum tekur líka þátt í mótinu, yngstur allra er Vignir Vatnar Stefánsson, nýbakaður Íslandsmeistari barna.

 

 

Samhliða N1 Reykjavíkurskákmótinu verður efnt til fjölda skákviðburða, m.a. hraðskákmóts, spurningakeppni, málþings og meira að segja ,,landsleiks" í knattspyrnu milli íslensku og erlendu keppendanna.
 
 Það verður gaman í Hörpu 19.-27. febrúar!

• Heimasíða mótsins 
• Chess-Results

Hraðkvöld hjá Helli í kvöld

Taflfélagið Hellir heldur hraðkvöld mánudaginn 14. janúar nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþing Akureyrar hófst í dag

Fyrst var telf um titilinn "Skákmeistari Akureyrar" árið 1938 og árlega allar götur síðan. Í fyrra hafði Hjörleifur Halldórsson sigur og er han enn meðal keppenda á 75. skákþinginu sem hófst nú í dag. Keppendur í meistaraflokki eru 10 talsins og lauk fjórum skákum í dag:

• Jakob Sævar Sigurðsson-Karl Egill Steingrímsson 0-1
• Sigurður Arnarson-Jón Kristinn Þorgeirsson         1/2
• Andri Freyr Björgvinsson-Hjörleifur Halldórsson   1/2
• Haraldur Haraldsson-Hreinn Hrafnsson                1-0
• Skák Rúnars Ísleifssonar og Símonar Þórhallssonar verður tefld á morgun.

Það vekur athygli að sjá nú meðal keppenda Harald Haraldsson, sem áður gerði garðinn frægan með TR og Mjölni sáluga en hefur ekki teflt kappskák í meira en áratug. Ekki virtist hann þó hafa gleymt miklu, vann góðan sigur í lipurri sóknarskák.

Mótinu verður svo fram haldið n.k. fimmtudag kl. 18.00. Þá leiða saman hesta sína þeir Rúnar og Jakbo, Karl og Sigurður, Jón Kristinn og Andri, Hjörleifur og Haraldur og Símon og Hreinn.

• Heimasíða SA
• Chess-Results

Wijk aan Zee: Öllum skákum 2. umferðar lauk með jafntefli

Öllum skákum 2. umferðar a-flokks Wijk aan Zee lauk með jafntefli en mikil spenna var í mörgum skákunum. Íslandsvinurinn Ivan Sokolov var klaufi að vinna ekki Nakamura og Carlsen slapp með skrekinn gegn Aronian. Pentala Harikrishna (2698) og Sergey Karjakin (2780) eru því efstir en þeir eru þeir einu sem unnið hafa skák!

Úrslit 2. umferðar:

van Wely, L. - Hou, Y.	½-½
L'Ami, E. - Karjakin, S.	½-½
Wang, H. - Leko, P.	½-½
Nakamura, H. - Sokolov, I.	½-½
Giri, A. - Anand, V.	½-½
Caruana, F. - Harikrishna, P.	½-½
Aronian, L. - Carlsen, M.	½-½

 

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

Skákþáttur Morgunblaðsins: Guðmundur í banastuði í Hastings

Það hefur verið gaman að fylgjast með Guðmundi Kjartanssyni á hinu fornfræga skákmóti í Hastings sem lýkur nú um helgina. Hvílíkur baráttukraftur! Eftir fimm umferðir af tíu var hann kominn með 4 vinninga af fimm og árangur uppá 2728 elo-stig og hafði unnið tvo stórmeistara frá Úkraínu. Hann átti einnig góða sigurmöguleika í skákum sínum í þriðju og fjórðu umferð en maraþonviðureigninni við Englendinginn Jonathan Hawkins lauk eftir 108 leiki og meira en 8 klst. baráttu. Vissulega kom babb í bátinn í sjöttu umferð þegar hann tapaði fyrir Litháanum Sarunas Sulskis en í byrjun þeirra skákar „henti" Guðmundur þrem peðum í andstæðing sinn en sveigði svo biskup sinn í vitlausa átt í krítískri stöðu og tapaði. Hann er jafn Hjörvari Steini Grétarssyni, í 9. - 22. sæti af 92 keppendum en Hjörvar hefur ekki verið að fást við jafn öfluga andstæðinga auk þess sem herjað hefur á hann magapest sem varð til þess að hann fékk „½ vinnings-yfirsetu" á gamlársdag. Margt getur þó gerst á lokasprettinum.

Samantekt á skak.is sem birt var um áramótin leiddi í ljós að Guðmundur hækkaði meira í stigum á síðasta ári en flestir íslenskir skákmenn. Það þarf ekki að koma á óvart því hann var iðinn við kolann; eftir að hafa teflt á Indlandi í ársbyrjun tók við Reykjavíkurskákmótið, Íslandsmót og þar á eftir átta mánaða dvöl í ýmsum löndum Suður-Ameríku þar sem hann tefldi á fjölmörgum mótum. Á síðasta mótinu sem fram fór í Kosta Ríka varð hann að hætta eftir sjö umferðir til þess að komast heim til Íslands fyrir jólin en hafði þá hlotið 6 ½ vinning. Ekki var jólafríið langt, þann 27. desember hófst Hastings-mótið.

Það er ekki víst að stigaháir andstæðingar Guðmundar hafi vitað að þeir voru að mæta skákmanni í góðri æfingu:

Hastings; 5. umferð:

Guðmundur Kjartansson - Andreij Vovk ( Úkraínu )

Kóngsindversk vörn

1.d4 Rf6 2. c4 g6 3. Rc3 Bg7 4. e4 d6 5. Rf3 O-O 6. Be2 e5 7. O-O Rc6 8. d5 Re7 9. Re1 Rd7 10. Be3 f5 11. f3 f4 12. Bf2 g5

Fræg lína úr „60 minnisverðum skákum", að þetta afbrigði leiði óverjandi mátsókn yfir hvítan, er ekki sönn! En þessu trúðu menn samt lengi eða þar til Viktor Kortsnoj tók afbrigðið upp og vann nokkrar frægar skákir árið 1987.

13. Hc1

Kortsnoj lék ýmist 13. b4, 13. Rb5 eða 13. a4. Þessi eðlilegi leikur kom þó síðar við sögu hjá honum

13. ... Rg6 14. Rb5 b6

Kortsnoj sýndi fram á að ef svartur leikur 14. .. a6 kemur 15. Ra7 ásamt -b4 og - c5.

15. b4 a6 16. Rc3 Hf7 17. Rd3 Bf8 18. c5 Hg7 19. cxd6 Bxd6 20. Rb2 Rf6 21. Rc4 Bxb4 22. d6! Bxc3

23. dxc7!

Bráðsnjall millileikur sem Guðmundur hafði tekið með í reikninginn þegar hann lék 22. d6.

23. ... Dxd1 24. Hfxd1 Hxc7

Eftir 24. ... Ba5 kemur 25. Hd8+ og 26. d6 og vinnur.

25. Bxb6 Hc6 26. Hxc3 Be6 27. Hdc1 Hb8 28. Ba5 Bd7 29. a3 Kg7 30. Bb4 g4 31. Rd6 Hxc3 32. Bxc3 h5 33. Rf5 Kh7 34. Bb4!

Það er erfitt að finna varnir fyrir svartan eftir þennan leik. Peðsóknin á kóngsvæng skilar engu og hrókurinn er á leið inn eftir c-línunni.

34. ... Bb5 35. Bxb5 Hxb5 36. Hc7+ Kh8 37. Hc6!

Vinnur mann.

37. ... a5 38. Be1 Hb1 39. Kf1 Rd7 40. Hxg6 Rc5 41. Hd6 Hb3 42. Bf2 Rd3 43. Bh4 Hxa3 44. Hd7 Kg8 45. Rh6 Kf8 46. Bf6 Ha1 47. Ke2 gxf3 48. gxf3 He1 49. Kd2

- og Vovk gafst upp.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 6. janúar 2013.

Skákþættir Morgunblaðsins

[Event "Hastings Chess Congress"] [Site "Hastings ENG"] [Date "2013.01.01"] [EventDate "2012.12.28"] [Round "5"] [Result "1-0"] [White "G Kjartansson"] [Black "A Vovk"] [ECO "E98"] [WhiteElo "2404"] [BlackElo "2567"] [PlyCount "98"] 1. d4 Nf6 2. c4 g6 3. Nc3 Bg7 4. e4 d6 5. Nf3 O-O 6. Be2 e5 7. O-O Nc6 8. d5 Ne7 9. Ne1 Nd7 10. Be3 f5 11. f3 f4 12. Bf2 g5 13. Rc1 Ng6 14. Nb5 b6 15. b4 a6 16. Nc3 Rf7 17. Nd3 Bf8 18. c5 Rg7 19. cxd6 Bxd6 20. Nb2 Nf6 21. Nc4 Bxb4 22. d6 Bxc3 23. dxc7 Qxd1 24. Rfxd1 Rxc7 25. Bxb6 Rc6 26. Rxc3 Be6 27. Rdc1 Rb8 28. Ba5 Bd7 29. a3 Kg7 30. Bb4 g4 31. Nd6 Rxc3 32. Bxc3 h5 33. Nf5+ Kh7 34. Bb4 Bb5 35. Bxb5 Rxb5 36. Rc7+ Kh8 37. Rc6 a5 38. Be1 Rb1 39. Kf1 Nd7 40. Rxg6 Nc5 41. Rd6 Rb3 42. Bf2 Nd3 43. Bh4 Rxa3 44. Rd7 Kg8 45. Nh6+ Kf8 46. Bf6 Ra1+ 47. Ke2 gxf3+ 48. gxf3 Re1+ 49. Kd2 1-0