Skákvakan í Skorradal 2012

SkákvökuMaraþon fór fram að Óðali EinarsEsss  í Skorradal dagana 4.-5. maí og var þetta í 8 sinn sem slík hátíð er þar haldin.  Að þessu sinni voru þátttakendur 6 talsins auk húsráðanda. Matarveisla og ljúfeng drykkjarföng voru með í farangrinum svo enginn þyrfti að líða skort, hvorki þurran né blautan,   á meðan á martröðinni stóð.  Keppt var meistaratitil Skorra þræls Skallgríms,  flottan farandgrip og jafnframt um áletrun Grænlandssteininn gullnu letri.

Kappteflið hófst kl. 17 á föstudag eftir að allir keppendur voru búnir að gíra sig upp og í brók fyrir slaginn.  Því lauk svo ekki  fyrr en klukkan sex árdegis eftir að birta tók  og  morgunroði sólar var farinn að lita Mófellsfjall og Kerlingarhornið handan vatnsins.

Þá höfðu verið tefldar 28 umferðir á  mann x7 eða alls  196 skákir í striklotu, svokallaðar 10 mín. hvatskákir, þar sem vart má á milli sjá hver sé einna snjallastur eða fari með sigur af hólmi, fyrr en í nauðir rekur, svefnhöfgi eða tímahrak lætur að sér kveða, svo alvarlega menn verða að gefa skákina.   

Að lokum kom þó að því að ótvíræð og skýr úrslit fengust, byggð á samanlögðum vinningafjölda eftir 13 klukkustunda harða baráttu og æsilega taflmennsku og  voru þau á þennan veg:

HellisheiðarSeníið (Stefán Þormar Guðmundsson) 23 v  
Viðeyjarundrið (Guðfinnur R. Kjartansson) 21.5 v
RauðagerðisGoðsögnin ( Guðm. G. Þórarinsson)   20 v
Fléttumeistarinn ( Páll G. Jónsson)  15 v.
VonarstjarnaVandamanna (Kristján Stefánsson) 13 v.
BjartastaVonin (Kristinn Bjarnason) 11.5. v.
ErkiRiddarinn ( Einar S. Einarsson) 8 v.

Stefán Þormar var síðan krýndur Skorradalsmeistari við hátíðlega athöfn við FischersSæti, mosavaxinn stein í brekkunni ofan við bústaðinn þar sem meistarinn tyllti sér niður hér um árið til að kasta mæðinni.  Guðfinnur vann hins vegar kappteflið um Grænlandsteininn í fimmta sinn af sex sem um hann hefur verið keppt, en einungis Grænlandsfarar geta unnið hann og þar með til eignar.    

Myndaalbúm (ESE)

Bragi og Ingvar með jafntefli í lokaumferðinni

Bragi Þorfinnsson (2421) og Ingvar Þór Jóhannesson (2331) gerðu báðir jafntefli í lokaumferð bresku deildakeppninnar sem fram fór í dag.  Bragi, sem tefldi á fyrsta borði fyrir Jukes of Kent, gerði jafntefli við alseríska stórmeistarann Aimen Rizouk (2532) og Ingvar gerði jafntefli við enska skákmanninn Alexander Longson (2272).  Sveit Braga og Ingvars vann lokaumferðina 4,5-3,5 og hefur tryggt sér keppnisrétt í EM taflfélaga.

• Breska deildakeppnin
• Beinar útsendingar

Búdapest: Dagur með jafntefli í 2. umferð

Dagur Arngrímsson (2381) gerði jafntefli við ítalska alþjóðlega meistarann Federico Manca (2424) í 2. umferð First Saturday-mótsins sem fram fór í dag.  Dagur hefur 1 vinning.

Í 3. umferð, sem fram fer á morgun, teflir Dagur við austurríska alþjóðlega meistarann Walther Wittman (2276). 

12 skákmenn tefla í SM-flokki og eru meðalstigin 2393 skákstig.  Til að fá stórmeistaraáfanga þarf 8,5 vinning í 11 skákum. 

• First Saturday-mótið
• Chess-Results

Verkísmótið - góð viðbót við skákmótaflóruna!

Það stefnir í óvenju spennandi og skemmtilegt skákmót í Ráðhúsinu á miðvikudaginn kemur kl: 16. Margir stigalausir skákmenn munu þar tefla sitt jómfrúarskákmót, en aðrir munu taka fram taflið eftir áratuga hlé.

Þá mun vakningin í kringum mótið leiða til þess að skáksett verða sett í kaffistofuna á mörgum fyrirtækjum með það fyrir augum að byggja upp áhuga og verða með að ári.

Í þessum pistli verða tvær sveitanna kynntar, sveit Símans og Morgunblaðsins.

Síminn líkt og Morgunblaðið teflir eingöngu fram eigin starfsmönnum. Sveit Símans skipa þeir Kristján Halldórsson (1.795), Vignir Bjarnason (1.823), Brynjólfur Bragason og Sigþór Björgvinsson. Þeir Kristján og Vignir hafa reynslu af taflmennsku í skákmótum, en Brynjólfur og Sigþór eru stigalausir. Sveit Símans er með samtals 4.618 stig (stigalausir reiknast með 1.000 stig), sem að þýðir að hún er nokkuð undir 5.500 stiga þakinu. Að sögn Símamanna er ætlunin að hafa gaman af taflmennsku í mótinu.

Morgunblaðið teflir fram þeim Jóni Árna Jónssyni (2.051), Baldri A. Kristinssyni (2.047), Pétri Blöndal (1.270) og Ómari Óskarssyni. Sveitin er samtals með 5368 stig og því nær stigaþakinu en sveit Símans.

Jón Árni er að norðan og teflir með Mátum. Baldur var mjög virkur skákmaður áður fyrr, en hefur látið sér nægja að tefla á Íslandsmóti Skákfélaga í seinni tið. Baldur hefur reynst skákmönnum betur en margur veit, en hann sér um tæknimálin á blog.is vefjunum, þar með talið þessum vef. Pétur þekkja skákáhugamenn vel, enda er hann duglegur að skrifa um skák. Hann hefur aðeins einu sinni tekið þátt í opinberu skákmóti. Ómar er stigalaus.

Pétur þekkja skákáhugamenn vel, enda er hann duglegur að skrifa um skák. Hann hefur aðeins einu sinni tekið þátt í opinberu skákmóti. Ómar er stigalaus.

Ekki eru öll lið skipuð svonefndum stigamönnum. Mótið hentar ágætlega skákáhugamönnum og starfsmönnum, sem að vilja upplifa þátttöku í skemmtilegu skákmóti saman.

Besti árangur m.v. styrkleika er m.a. verðlaunaður og er þar hvert lið að keppa við sjálft sig. 

Mótið er skemmtileg viðbót við þau mót sem að haldin eru hér á landi. Það höfðar m.a.a til skákáhugamanna, sem að hingað til hafa ekki fundið skákmót við sitt hæfi í mótaflórunni.

Það er skoðun mótshaldara að mikilvægt sé að auka skákáhuga meðal almennings. Ein leið til þess er að efla skákáhuga innan fyrirtækja. Segja má að Verkísmótið hafi þegar náð talsverðum árangri og að eitt lítið skref hafi verið tekið í þá átt að efla skákáhuga í landinu!

Sjáumst sem skákmenn eða áhorfendur í Ráðhúsinu á miðvikudaginn kl: 16.

 

Æsir og S A 60+ kepptu í Vatnsdal

Hin árlega keppni eldri skákmanna frá SA Akureyri ogvÆsir skákfélagi F E B í Reykjavík fór fram um helgina .   Liðin mættust í Flóðvangi í Vatnsdal um hádegi á laugardag.  Keppt var í tveimur riðlum A og B sex í A og fimm í B með 15 mín umhugsunartíma.

Í A riðli fóru leikar þannig að Æsir fengu 20½ vinning en SA 15½. Í B riðli fengu Æsir 17½  vinning  en  SA 12½. Þannig að Æsir sigruðu með 38 vinningum gegn 28.

Eftir veislu kvöldverð var startað léttu hraðskákmóti þar sem tuttugu skákmenn tóku þátt, tefldar voru 9 umferðir með 7 mín. umh.

Þar urðu efstir þeir Jón Friðjónsson og Ólafur Kristjánsson með 8 vinninga, næstir komu Björn Þorsteinsson og Jón Þ Þór með 6 vinninga,hinir fengu færri vinninga.

Eftir morgunmat á sunnudag var síðan keppt í hraðskák lið gegn liði ellefu skákmenn í hvoru liði. Þar fóru leikar þannig að Akureyringar fengu 62 vinninga gegn 59 vinningum Reykvíkinga.

Heildar úrslit:

Æsir 97 vinninga

S A  90     ---

Þetta var í tíunda skipti sem þessi lið keppa í þriðja skipti sem þau mætast í veiðihúsinu í Vatnsdal.

Karl Steingrímsson og hans frú sáu um veislu mat og kaffi og kruðirí fyrir okkur og kunna sunnanmenn þeim bestu þakkir fyrir.

Hraðkvöld hjá Helli í kvöld

Taflfélagið Hellir heldur hraðkvöld mánudaginn 7. maí nk. og hefst taflið kl. 20:00. Tefldar verða 7 umferðir með sjö mínútna umhugsunartíma.  Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Einnig verður dreginn út af handahófi annar keppandi, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Bragi með sigur í bresku - Ingvar með jafntefli

Bragi Þorfinnsson (2421) vann í dag enska FIDE-meistarann Jonathan Rogers (2349) í bresku deildakeppninni.   Ingvar Þór Jóhannesson (2331) gerði hins vegar jafntefli við Samuel Franklin (2298).  Klúbbur þeirra, Jukes of Kent, gerði í dag jafntefli 4-4 við áþekka sveit.  Lokaumferðin fer fram á morgun en því miður verða þeir félagar þá ekki í beinni útsendingu.   

• Breska deildakeppnin
• Beinar útsendingar

Skákþáttur Morgunblaðsins: Einvígi þarf um Íslandsmeistaratitilinn

Bragi Þorfinnsson og Þröstur Þórhallsson munu í næsta mánuði heyja fjögurra skáka einvígi um Íslandsmeistaratitilinn í skák. Sá sem vinnur verður Íslandsmeistari í fyrsta sinn og öðlast sjálfkrafa rétt á að tefla í ólympíuliði Íslands á Ólympíumótinu í Istanbúl sem hefst í lok ágúst nk. Úrslit Íslandsmótsins sem fram fór við góðar aðstæður í stúku Kópavogsvallar urðu þessi:

1.-2. Þröstur Þórhallsson og Bragi Þorfinnsson 7 ½ v.(af 11) 3.-4. Dagur Arngrímsson og Henrik Danielssen 7 v. 5.-7. Davíð Kjartansson, Hannes Hlífar Stefánsson og Stefán Kristjánsson 5 ½ v. 8. Guðmundur Kjartansson 5 v. 9.-10. Björn Þorfinnsson og Sigurbjörn Björnsson 11.-12. Guðmundur Gíslason og Einar Hjalti Jensson 3 ½ v.

Fjórir efstu menn geta vel við unað. Bragi hefur verið traustur undanfarið og frammistaða Þrastar þarf ekki á koma á óvart. Henrik var með forystu lengst en gaf eftir í lokin. Slök frammistaða Hannesar og Stefáns vekur hinsvegar athygli en sá síðarnefndi hefur verið alltof metnaðarlaus á skáksviðinu undanfarin ár. Davíð Kjartansson þyrfti að tefla meira og taflmennska Guðmundar Kjartanssonar var of gloppótt.

Dagur Arngrímsson átti gott mót, krafturinn í taflmennsku hans á lokasprettinum bendir til þess að innan skamms muni hann banka uppá hjá landsliði Íslands. Hann var með ½ vinning eftir þrjár umferðir en eftir það fékk hann 6 ½ vinning og lagði að velli alla stigahæstu menn mótsins, Hannes Hlífar, Henrik Danielsen, og Stefán Kristjánsson. Skákin við Stefán var ein sú umtalaðasta.

Dagur Arngrímsson - Stefán Kristjánsson

Nimzoindversk vörn

1. d4 Rf6 2. c4 e6 3. Rc3 Bb4 4. Bg5 b6 5. e4 h6 6. Bxf6 Dxf6 7. Rge2 Bb7 8. a3 Bxc3 9. Rxc3 Rc6 10. Rb5 O-O-O

Tíundi leikur hvíts var ónákvæmur og einnig 10. leikur svarts sem gat einfaldlega hrókað stutt. Eftir 11. d5 Re5 12. Dd2 getur hvítur þó haldið í horfinu.

11. d5 exd5 12. cxd5 Dxb2 13. Dc1!

Þennan öfluga leik virtist Stefán ekki hafa séð. Hann hefði betur sleppt því að skipta upp á peðum í 11. leik þar sem c-línan opnast.

13. ... Dxc1 14. Hxc1 Ra5 15. Rd6+ Kb8 16. Rxf7 Hhe8! 17. Rxd8 Hxe4+ 18. Kd2 Rb3 19. Kc3!

Dagur var vandanum vaxinn. Það var alls ekki gefið að finna þessa leið.

19. ... Rxc1 20. Rxb7 He8 21. Bb5?

Best var 21. Ba6 og hvítur á að vinna. „Houdini bendir t.d. á eftirfarandi leið: 21. ... Re2+ 22. Kd2 Rd4 23. Kd3 Rf5 24. d6 c6 25. g4 Rh4 26. Rc5! bxc5 27. Hb1+ Ka8 28. Bb7+ Kb8 29. Bxc6+ Kc8 30. Bb7+ Kd8 31. Bd5 Kc8 32. Bc4! og mátar. Jafnvel 21. Rd8 var betri leikur.

21. ... Re2+ 22. Kd2 Rf4 23. g3 Rxd5 24. Ba6

Dagur sá að 24. Bxd7 gengur ekki vegna 24. ... Hf8 25. Bc6 Re7 26. Be4 c6 27. Rd6 Hd8! og riddarinn fellur. Nú er komin upp furðuleg staða þar sem riddarinn á b7 reynir að sleppa út.

24. ... c6 25. Rd6 He6 26. He1! Hxe1

Alls ekki 26. ... Hxd6 27. He8+ Kc7 28. Hc8 mát.

27. Kxe1 b5 28. Re8 Rc7 29. Rxc7 Kxc7

Biskupinn á a6 er króaður af. Spurning sem blasti við var þessi: eru peðin á kóngsvæng nægilega fljót í förum? Dagur fann lausnina.

30. f4 Kb6 31. g4 Kxa6 32. g5!

Hér rann upp fyrir mönnum að kóngurinn nær ekki peðunum t.d. 32. ... Kb6 33. g6! Kc5 34. f5 Kd6 35. f6! og hvítt frípeð brýst upp í borð. Svartur gafst upp.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 29. apríl 2012

Skákþættir Morgunblaðsins

[Event "ch-ISL 2012"] [Site "Kopavogur ISL"] [Date "2012.04.19"] [Round "7"] [Board "5"] [White "Arngrimsson, Dagur"] [Black "Kristjansson, Stefan"] [Result "1-0"] [WhiteTitle "IM"] [BlackTitle "GM"] [WhiteElo "2361"] [BlackElo "2500"] [ECO "E30"] [Opening "Nimzo-Indian"] [Variation "Leningrad variation"] [WhiteFideId "2301288"] [BlackFideId "2301172"] [EventDate "2012.04.13"] 1. d4 Nf6 2. c4 e6 3. Nc3 Bb4 4. Bg5 b6 5. e4 h6 6. Bxf6 Qxf6 7. Ne2 Bb7 8. a3 Bxc3+ 9. Nxc3 Nc6 10. Nb5 O-O-O 11. d5 exd5 12. cxd5 Qxb2 13. Qc1 Qxc1+ 14. Rxc1 Na5 15. Nd6+ Kb8 16. Nxf7 Rhe8 17. Nxd8 Rxe4+ 18. Kd2 Nb3+ 19. Kc3 Nxc1 20. Nxb7 Re8 21. Bb5 Ne2+ 22. Kd2 Nf4 23. g3 Nxd5 24. Ba6 c6 25. Nd6 Re6 26. Re1 Rxe1 27. Kxe1 b5 28. Ne8 Nc7 29. Nxc7 Kxc7 30. f4 Kb6 31. g4 Kxa6 32. g5 1-0

Myndir af Landsmótsmeisturum

Landsmótið í skólaskák fór fram í Stórutjarnaskóla í Þingeyjarsveit eins og fram hefur áður komið.  Hér eru nokkrar myndir af helstu leikendum mótsins!

 

Jón Kristinn Þorgeirsson Íslandsmeistari í skólaskák í yngri flokki

 

Skólafélagarnir Dagur Ragnarsson og Oliver Aron Jóhannesson urðu efstir og jafnir í eldri flokki og þurfa að tefla einvígi síðar um titilinn

 

Yngsti keppandinn, Vignir Vatnar Stefánsson, varð í 2. sæti í yngri flokki

 

Símon Þórhallsson var sá keppandi sem kom mest á óvart á mótinu og endaði í 3. sæti í yngri flokki

 

Dagur Kjartansson varð í 3. sæti í eldri flokki

 

 

 

 Ingibjörg Edda Birgisdóttir stóð sig frábærlega á sínu fyrsta ári sem Landsmótsstjóri

 

 

• Heimasíða Goðans
• Chess-Results 
• Myndaalbúm af heimasíðu Goðans (HA)

 

Hannes endaði í 7.-14. sæti í Köben

Hannes Hlífar Stefánsson (2516) endaði í 7.-14. sæti í Copenhagen Chess Challange sem endaði í dag í Kaupamannahöfn.  Hannes hlaut 6 vinninga í 9 umferðum.   Í fyrri umferð dagsins vann Hannes finnska stórmeistarann Heikki Westerinen (2335) en í þeirri síðari gerði hann jafntefli við danska alþjóðlega meistarann Andreas Skytte Hagen (2445).

Henrik Danielsen (2498) hlaut 5,5 vinning og endaði í 15.-19. sæti.  Í dag gerði hann jafntefli við Rússann Vladimir Minko (2188) og tapaði fyrir danska alþjóðlega meistaranum Mads Andersen (2431).

Frammistaða Hannesar samsvaraði 2489 skákstigum og tapar hann 1 stigi.  Frammistaða Henriks samsvaraði 2389 skákstigum og lækkar hann um 12 stig.  

Kjartan Maack (2133) hlaut 5 vinninga, Atli Jóhann Leósson (1715) hlaut 4 vinninga og Óskar Long Einarsson (1591) hlaut 2,5 vinning.

Sex skákmenn urðu efstir og jafnir með 6,5 vinning.  Það voru sænsku stórmeistararnir Stellan Brynell (2489) og Hans Tikkanen (2566), alþjóðlegu meistararnir Helgi Dam Ziska (2450), Færeyjum, Mads Andersen (2431), Danmörku, og Thorstein Michael Haub (2476), Þýskalandi, og Rússinn Vladimir Minko (2188).

66 skákmenn tóku þátt og þar af voru 6 stórmeistarar.  Hannes og Henrik voru nr. 3 og 4 í stigaröð keppenda.  

• Heimasíða mótsins
• Chess-Results
• Beinar útsendingar (borð 1-15)