Rógvi skákmeistari Færeyja

Rógvi Egilstoft Nielsen (2176) sigraði í landsliðsbólki færeyska meistaramótsins í skák sem fram fór um páskana.  Rógvi er þar með Færeyjameistari og tryggir sér jafnframt sæti í ólympíuliði Færeyinga í Istanbul í haust.   

Lokastaða landsliðsbólks:

• 1. Rógvi Egilstoft Nielsen (2171) 4 v. af 5
• 2. Herluf Hansen (2049) 3,5 v
• 3. FM Carl Eli Nolsøe Samuelsen (2260) 3,5 v.
• 4. Høgni Egilstoft Nielsen (2014) 1,5 v.
• 5. Finnbjørn Vang (2059) 1,5 v.
• 6. Rani Nolsoe (2052) 1 v.

Heimasíða færeyska skáksambandsins

Chess-Results

Guðmundur með vinningsforskot fyrir lokaumferð áskorendaflokks

Alþjóðlegi meistarinn Guðmundur Kjartansson (2357) hefur vinnings forskot í áskorendaflokki Íslandsmótsins í skák eftir áttundu og næstsíðustu umferð sem fram fór í dag.  Í dag vann hann Patrek Maron Magnússon (1974) og hefur 7,5 vinning.  Einar Hjalti Jensson (2245) er annar með 6,5 vinning en Lenka Ptácníková (2289) og Nökkvi Sverrisson (1928) eru í 3.-4. sæti með 6 vinninga.  Lokaumferðin fer fram á morgun, páskadag, og hefst kl. 14.

Guðmundur, hefur með frammistöðunni tryggt keppnisrétt í landsliðsflokki 2013 en áður hafði hann fengið boð um þátttöku í mótinu í ár en tveir efstu menn áskorendafloks geta valið hvort þeir þiggja sæti í ár í landsliðsflokki eða á næsta ári.  

Guðmundur Gíslason (2346) fær keppnisrétt í landsliðsflokki í ljósi árangurs nafna síns en hann var fyrsti varamaður í flokkinn. Hver verður 12. og síðasti maður inn í landsliðsflokkinn kemur í ljós eftir lokaumferð áskorendaflokks á morgun.   

Öll úrslit 8. umferðar má finna hér.

Pörun níundu og síðustu umferðar má finna hér.

Í lokaumferðinni verða eftirtaldar skákir sýndar beint:

• Grímur Björn Kristinsson (5,5) - Guðmundur (7,5)
• Nökkvi (6,0) - Einar Hjalti (6,5)
• Lenka (6,0) - Patrekur (5,5)
• Haraldur Baldursson (5,5) - Magnús Magnússon (5,0)

Góð þátttaka er á mótinu en 54 skákmenn taka þátt.  Meðal keppenda eru alþjóðlegi meistarinn Guðmundur Kjartansson, Lenka Ptácníková, stórmeistari kvenna og Einar Hjalti Jensson, sem eins og kunnugt er náði áfanga að alþjóðlegum meistaratitli á N1 Reykjavíkurskákmótinu.  Tvö efstu sætin á mótinu nú gefa sæti í landsliðsflokki 2012 eða 2013. 

• Heimasíða mótsins
• Beinar útsendingar
• Chess-Results
• Myndaalbúm (OS og GB)

 

Stúlkur í þremur efstu sætunum!

Stúlkur urðu í þremur efstu sætunum á 44 krakka Bónus-barnaskákmóti sem leiðangursmenn Hróksins og Kalak héldu í dag. Hin 16 ára Sikkerninnguaq Lorentzen sýndi gríðarlegt öryggi og sigraði í öllum 6 skákum sínum. Í öðru sæti varð systir hennar, Sara, og Isabella Simonsen hreppti bronsið.

Í flokki fullorðinna sigraði Lars Simonsen með 11,5 vinning af 12 mögulegum, en næstir komu frændurnir Emil og Esajas Arqe.

Allir keppendur dagsins voru leystir út með páskaeggjum frá Bónus, en aðrir sem gáfu vinninga í dag voru Sögur útgáfa, Fjallið hvíta og Telepost. Þá gaf Ísspor bikara og verðlaunapeninga.

Þetta var síðasta stórmótið í ferðinni að þessu sinni, en sú spurning sem brann á vörum krakkanna var einföld: Verður önnur skákhátíð á næsta ári?

Svarið liggur í augum uppi: Já, svo sannarlega!

Myndaalbúm (HJ)

Guðmundur efstur í áskorendaflokki - Patrekur vann Einar

Alþjóðlegi meistarinn Guðmundur Kjartansson (2357) er efstur með 6,5 vinning að lokinni sjöundu umferð áskorendaflokks Íslandsmótsins í skák sem fram fór í kvöld.    Patrekur Maron Magnússon (1974) sem vann glæsisigur á Einari Hjalta Jenssyni (2245) er í 2.-3 sæti ásamt Einari með 5,5 vinning.    Áttunda og næstsíðasta umferð fer fram á morgun og hefst kl. 14. Úrslit sjöundu umferðar má finna hér.

Stöðu mótsins má finna hér.  

Pörun áttundu og næstsíðustu umferðar má finna hér.

Í áttundu umferð verða eftirtaldar skákir sýndar beint:

• Guðmundur - Patrekur
• Einar Hjalti - Dagur Ragnarsson
• Magnús Magnússon - Lenka
• Páll Sigurðsson - Nökkvi Sverrisson

Góð þátttaka er á mótinu en 54 skákmenn taka þátt.  Meðal keppenda eru alþjóðlegi meistarinn Guðmundur Kjartansson, Lenka Ptácníková, stórmeistari kvenna og Einar Hjalti Jensson, sem eins og kunnugt er náði áfanga að alþjóðlegum meistaratitli á N1 Reykjavíkurskákmótinu.  Tvö efstu sætin á mótinu nú gefa sæti í landsliðsflokki 2012 eða 2013. 

• Heimasíða mótsins
• Beinar útsendingar
• Chess-Results
• Myndaalbúm (OS og GB)

 

Guðmundur og Einar Hjalti efstir í áskorendaflokki

Guðmundur Kjartansson (2357) og Einar Hjalti Jensson (2245) eru efstir og jafnir með 5,5 vinning að lokinni sjöttu umferð áskorendaflokks Íslandsmótsins í skák sem fram fór í dag.  Guðmundur vann Nökkva Sverrisson í mikilli maraþonskák (168 leikir) en Einar lagði Lenku Ptácníkovú (2289).  Haraldur Baldursson (1991) sem vann Pál Sigurðsson (2003) er þriðji með 5 vinninga.  Patrekur Maron Magnússon (1974) og Tinna Kristín Finnbogadóttir (1810) eru í 4.-5. sæti með 4,5 vinning.

Sjöunda umferð hefst nú kl. 17:00.

Úrslit sjöttu umferðar má finna hér. Stöðu mótsins má finna hér.  

Pörun sjöundu umferðar má finna hér.

Í sjöundu umferð verða eftirtaldar skákir sýndar beint:

• Haraldur - Guðmundur
• Patrekur Maron - Einar Hjalti
• Páll - Tinna Kristín
• Lenka - Einar Valdimarsson

Góð þátttaka er á mótinu en 54 skákmenn taka þátt.  Meðal keppenda eru alþjóðlegi meistarinn Guðmundur Kjartansson, Lenka Ptácníková, stórmeistari kvenna og Einar Hjalti Jensson, sem eins og kunnugt er náði áfanga að alþjóðlegum meistaratitli á N1 Reykjavíkurskákmótinu.  Tvö efstu sætin á mótinu nú gefa sæti í landsliðsflokki 2012 eða 2013. 

• Heimasíða mótsins
• Beinar útsendingar
• Chess-Results
• Myndaalbúm (OS og GB)

 

Tímaritið Skák til sölu á aðeins á 2.000 kr.

 

Tímaritið Skák kom út í mars í fyrsta skipti um langt árabil. Um er að ræða árstímarit þar sem farið væri yfir liðið ár og fjallað um helstu viðburði eins og Reykjavíkurskákmótið, EM landsliða, Skákþing Íslands, Íslandsmót skákfélaga, unglingastarf o.s.frv.   Rétt er líka að benda á frábæra grein Braga Kristjónssonar um kynni hans við Bobby Fischer.   Blaðið er um 100 blaðsíður í glæsilegu broti.

Hægt er að skrá sig fyrir blaðinu hér.  Blaðið verður sent í pósti um hæl og greiðsluseðill birtist í heimabanka áskrifenda.   

Getraun dagsins: Hvaða ungi skákmaður er við vinstri öxl Fischers?  Svar sendist sem athugasemd við færslu.  

EM: Loks lokapistill

Þá er loks komið að lokapistli EM einstaklinga - eitthvað sem ég ætlaði að vera löngu búinn að koma frá mér.   Gengi íslensku skákmannanna hefði mátt vera betra en hvorki Hannes né Héðinn náðu sér á strik í mótinu.   Mikið hefur verið rætt um dómgæslu á mótinu þá sérstaklega um 40 leikja regluna, Zero-tolerance og dresskóða og sýnist sitt hverjum.   Rússar gjörsamlega stálu senunni á mótinu og höfðu algjöra yfirburði.  Einnig er vert að benda á viðtal við Emil Sutovsky þar sem hann gagnrýnir ýmislegt við framkvæmd mótsins.

Íslendingarnir

Hvorki Hannes Hlífar Stefánsson né Héðinn Steingrímsson náðu sér á strik á EM.   Hannes hlaut 6 vinninga í 11 skákum og Héðinn 5,5 vinning.  Báðir tapa þeir stigum; Hannes tapar 2 stigum en Héðinn tapar 13 stigum.  Einhvern hefur það verið þannig að Íslendingum hefur aldrei gengið vel á EM einstaklinga, hverju sem um sætir.  Það var aðeins í fyrstu og síðustu umferð sem þeir báðir unnu í sömu umferð.

Hannes varð fyrir því veikjast í upphafi mótsins.  Hann fékk útbrot og fór á spítala.  Mótshaldarar höfðu að þessu miklar áhyggjur, miklu meiri en Hannes sjálfur.  Aldrei kom í ljóst af hverju þau stöfuðu en hurfu þegar á mótið leið. 

Héðinn byrjaði ágætlega en átti slæman miðkafla.  Báðir luku þeir þó mótinu á góðan hátt með góðum sigrum.  Héðinn vann góðan sigur í aðeins 25 leikjum.  

Umræða um afreksmál gýs öðru hverju upp á Íslandi, eðlilega.  Bent hefur verið á SÍ geri lítið fyrir sína afreksmenn.  Þess má geta að SÍ sendi 2 skákmenn EM einstaklinga.  Til samanburðar áttu hvorki Norðmenn né Færeyjar þarna fulltrúa, Finnar, Svíar og Danir einn hver og samkvæmt mínum heimildum voru Svíinn (Grandelius) og Daninn (Skytte) á eigin vegum.  Í Danaveldi er það meira að segja þannig að EM rekst á Danska meistaramótið í skák, eitthvað sem SÍ kom í veg fyrir með því að flytja til Skákþingið.

Toppbaráttan

Rússinn Dmitry Jakovenko (2729) sigraði á EM einstaklinga.  Sigur hans þarf ekki að koma á óvart enda þriðji stigahæsti keppandi mótsins.   Jakovenko var hins aldrei efstur fyrr en eftir lokaumferðina en hann vann 3 síðustu skákirnar og hlaut 8,5 vinning.

12 skákmenn hlutu 8 vinninga.   Frakkinn Fressinet (2693) hlaut silfrið og Rússinn Malakhov (2705) fékk bronsið.   Meðal þeirra sem voru jafnir þeim voru Bologan (2687), Kryvo (2666) og Smeets (2685).  Sá síðastefndi eftir hörmulega byrjun en frábæran endasprett.

22 skákmenn hlutu 7,5 vinning og komust 9 þeirra áfram á HM.  Meðal þeirra sem komust áfram voru Jones (2635), Dreev (2698) og Jobava (2706), sem var síðastur til að komast áfram.   Meðal þeirra 13 sem sátu eftir voru Sokolov (2653) og Georgiev (2671). 

Meðal þeirra sem fengu enn færri vinninga voru Kuzubov (2615), Caruana (2767), Nyzhnik (2585), Navara (2700), Cheparionov (2664) og Giri (2717) en sá síðastnefndi átti hræðilegt mót og var í gúanóinu stóran hluta mótsins.

Ég ræddi við Ivan Sokolov töluvert á meðan mótinu stóð og leiðinlegt að þessi mikli Íslandsvinur og baráttuhundur skyldi ekki komast í gegnum nálaraugað að þessu sinni.   Enda var hann ekki par sáttur við málalokinn.

Af 23 keppendum sem komumst áfram voru 11 Rússar!  Frá öðrum löndum komust 1-2.   Athyglisvert í ljósi þess hversu illa Rússum hefur gengið í landskeppnum.  Rússarnir þarna komast ekki í landslið þeirra að kannski Jakovenko undanskyldum!

Þess má geta að EM 2013, sem haldið verður í Legnica í Póllandi 5.-17. apríl verður einnig undakeppni fyrir HM svo allir þeir sem ekki komumst áfram geta fengið annan séns!  Íslandsmeistarinn á Íslandsmótinu sem fram fer í Stúkunni síðar í mánuðnum fær sjálfkrafa keppnisrétt á mótinu.

Reglur og dómgæsla

Mikið hefur rætt um mikið um dómgæslu og reglur í keppninni.   Bendi aftur á athyglisvert viðtal við Emil Sutovsky þegar sem hann gagnrýnir ýmislegt sem hann telur betur megi fara.  Meðal annars hversu lág verðlaunin voru, 90.000 evrur en þau voru 150.000 fyrir nokkrum árum síðan.

Á mótinu áttu reglur um dresskóða að gilda.  Ég gat engan veginn séð að farið færið eftir þeim og litlar kröfur um klæðaburð gerðar.  Klæðaburður á N1 Reykjavíkurskákmótinu var mun betri en þar voru einföld tilmæli gefin til keppenda.

Zero-tolerance reglunni var beitt í nokkrum tilfellum.  Sú regla hefur einnig verið gagnrýnd.   Rökin á bakvið regluna byggjast að mér skilst á áhuga manna að komast með skákina á Ólympíuleikina.   Þar eiga menn erfitt með að skilja að hægt sé að mæta of seint í íþróttaviðburð.  Ef til vill mætti leysa þetta á sama hátt, þ.e. með tilmælum.   Þarna sér maður einnig ákveðna hættu, þ.e. að skákmenn freisti þess að mæta of seint í skákir, t.d. með svörtu í skák gegn skákmanni sem gengur mjög vel, eigi menn ekki séns á verðlaunum.   Einföld tilmæli gætu einnig lagað þetta, já eða e.t.v. hógvær sekt (t.d. 100 evrur). 

40 leikja reglan var hins vegar reglan sem stal athyglinni.  40 leikja reglan er allrar athygli verð og verður til þess að skákir eru mikla frekar tefldar í botn.  Ivan kvartaði yfir því að mótið væri erfiðara í staðinn, ekki hægt að semja nein stutt jafntefli!   Taktísk jafntefli eru líka úr sögunni.

Hins vegar sú ákvörðun að dæma tap á báða í skák Baron og Safari þegar þeir þrátefldu, var of stór að mínu mati.   Reglan verður að vera þannig að menn geti þráteflt, annað gengur gegn FIDE-lögunum. Vona að ECU læri af þeim mistökum.

Að öðru leyti gekk mótshaldið vel.  Mótshaldarar kunnu sitt fag, en ég set samt mótið einni kategoríu neðar en mótið í Porto Carras þar sem fagmennskan var enn meiri.    Í samanburði við N1 Reykjavíkurskákmótið getum við borið höfuðið hátt að öðru leyti en hávaðamálum.   Betri taflmenn, en á neðri borðum voru plastmenn þarna, borðin ekki dúkuð þarna úti, betri stólar hér o.s.frv.  

Það var líka mikill lúxus fyrir skákmenn að búa á hótelinu þar sem teflt var á.  Og Plovdid er fínn staður.  

Á heimleiðinni var mér það á að fara í gegnum París.  Hélt að ég hefði nægjan tíma 2,5 klst.  En það var áður en ég áttaði mig að það var ekki mikið styttra ferðalag að ferðast á milli „terminala" í París heldur en að ferðast til Keflavíkur frá Reykjavík!   Millilending í París er ekki málið!

Vona að menn hafi haft eitthvað gaman af þessum pistlum.  Næst er það Íslandsmótið í Stúkunni 13.-23. apríl.

Gunnar Björnsson

Guðmundur og Einar Hjalti efstir í áskorendaflokki

Guðmundur Kjartansson (2357) og Einar Hjalti Jensson (2245) eru efstir og jafnir með 4,5 vinning að lokinni fimmtu umferð áskorendaflokks Íslandsmótsins í skák sem fram fór í kvöld.  Guðmundur vann Lenku Ptácníková (2289) en Einar Hjalti lagði Magnús Magnússon (1982).   Fimm skákmenn eru jafnir í 3.-7. sæti með 4 vinninga.  Frídagur er á morgun, skírdag, en föstudagurinn langi stendur aldeilis undir nafni en þá verða tefldar tvær umferðir.    Sú fyrri kl. 11.

Úrslit fimmtu umferðar má finna hér. Stöðu mótsins má finna hér.  

Pörun sjöttu umferðar má finna hér.

Í sjöttu umferð verða eftirtaldar skákir sýndar beint:

• Guðmundur - Nökkvi
• Einar Hjalti - Lenka
• Haraldur - Páll
• Patrekur - Dagur

Góð þátttaka er á mótinu en 54 skákmenn taka þátt.  Meðal keppenda eru alþjóðlegi meistarinn Guðmundur Kjartansson, Lenka Ptácníková, stórmeistari kvenna og Einar Hjalti Jensson, sem eins og kunnugt er náði áfanga að alþjóðlegum meistaratitli á N1 Reykjavíkurskákmótinu.  Tvö efstu sætin á mótinu nú gefa sæti í landsliðsflokki 2012 eða 2013. 

• Heimasíða mótsins
• Beinar útsendingar
• Chess-Results
• Myndaalbúm (OS og GB)

 

Riddarinn - Páskamót: Ingimar Jónsson efstur

Skákfundur Riddarans í gær var tileinkaður Páskunum og keppt um páskaegg frá Nóa-Síríus og önnur dregin út.  Tefldar voru 11 umferðir að vanda og mátti vart lengi milli sjá hver væri einna snjallastur.  Þó fór svo að lokum að skýr úrslit fengust þrátt fyrir óvænt jafntefli hjá efstu mönnum í síðustu umferð gegn stigalægri andstæðingum.

Fór svo að lokum  Ingimar Jónsson  stóð uppi sem sigurvegari með 9 vinninga, Þór Valtýsson varð í öðru sæti með 8.5 og Jóhann Örn Sigurjónsson þriðji með 8.  Allir eru þeir þessir garpar þrautreyndir kappskákmenn og því einkar vel að þeim gómsætu páskaeggjum komnir sem þeir fengu í sigurlaun.

Jón Þ. Þór og Sigurður Herlufsen sem verið hafa sigursælir að undanförnu voru fjarri góðu gamni en aðrir keppendur veittu efstu mönnum harða keppni í þeirra stað  eins og sjá má á meðf. mótstöflu og á www.riddarinn.net  

 

 

Miðvikudagar er tafldagar hjá Riddurum reitaða borðsins sem hittast til tafls  allan ársins hring í Vonarhöfn - í von um vinning, ef ekki á borðinu þá í vinningahappdrætti endrum og eins.   

Myndaalbúm (ESE) 

Aðalfundur SÍ fer fram 19. maí

Á fundi stjórnar SÍ í gær var ákveðið að aðalfundur Skáksambandsins 2012 muni fara fram 19. maí nk.  Formlegt bréf varðandi fundinn mun fara út 18. apríl og þurfa lagabreytingatillögur að hafa borist skrifstofu SÍ fyrir þann tíma.