N1 Reykjavíkurskákmótið í ljósvakamiðlum

N1 Reykjavíkurskákmótið var mikið í ljósvakamiðlum í dag.   Um það var fjallað meðal annars í fréttum Stöðvar 2, Ríkissjónvarpsins og í Síðdegisútvarpi Rásar 2.

• Umfjöllun Stöðvar 2 
• Umfjöllun RÚV (ca. 24.50)
• Umfjöllun Síðdegisútvarps Rásar 2

Dagur Ragnarsson vann alþjóðlegan meistara

Fyrsta umferð N1 Reykjavíkurmótsins fór fram í dag.  Um 200 keppendur taka þátt í mótinu sem fram fer í glæsilegri umgjörð í Hörpu.  Mikill stigamunur var á milli manna og því lítið um óvænt úrslit.  En þó leyndust þau inn á milli.  Hinn ungi og efnilegi skákmaður Dagur Ragnarsson (1858) vann kanadíska alþjóðlega meistarann David Cummings (2341).   Sauðkræklingurinn Jón Arnljótsson (1781) sem er að tefla á sínu fyrsta alþjóðlega móti gerði jafntefli við langsterkustu skákkonu þjóðarinnar Lenku Ptácníková (2289). 

Önnur umferð fer fram á morgun og hefst kl. 16:30.  Þá minnkar styrkleikamunurinn töluvert en er samt mikill.  Þá mætast m.a.:

• Róbert Lagerman - Hou Yifan
• Fabiano Caruana - Sigurður Daði Sigfússon 
• Guðmundur Gíslason - David Navara
• Yuriy Kryvoruchko - Ingvar Þór Jóhannesson

Skákskýringar á skákstað hefjast kl. 19 og pallborðsumræður í umsjón Williams og félaga hefjast kl. 21.

• Heimasíða mótsins
• Beinar útsendingar
• Pallborðið og vefútsending
• Chess-Results

Útsendingin frá pallborði Williams og Björns

Fyrsta pallborðið á N1 Reykjavíkurskákmótinu fór fram í dag.   Simon Williams og Björn Þorfinnsson fóru hreinlega á kostum og er skorað á skákákhugamenn að renna í gegnum það.

Pallborðið á morgun hefst kl. 21 og er hægt að fylgjast með því beint á slóðinni:  http://www.livestream.com/reykjavikopen.

Pallborðin eru í umsjón Williams, Björns og Ingvars Þórs Jóhannessonar og er stefnt að því að fá reglulega aðra áhugaverða gesti.  

 

Watch live streaming video from reykjavikopen at livestream.com

Gunnar Freyr sigraði á Vin-Open

Tuttugu og tveir þátttakendur skráðiu sig til leiks á Vin-Open í gær. Margir góðir gestir kíktu inn, m.a. forvígismenn Skáksambands Íslands og Skákakademíunnar sem hafa í nógu að snúast þessa dagana.

Íslandsvinurinn og stórmeistarinn Ivan Sokolov heimsótti Vin og tefldi upphitunarskák við 1.borðs mann Vinjargengisins, Hauk Angantýsson.  Sokolov hafði sigur á endanum en það var ekkert gefið eftir.

Þá voru tefldar sex umferðir með sjö mínútna umhugsunartíma, undir styrkri stjórn fyrirliðans Hrannars Jónssonar.  Eftir fjórðu umferð var hlé gert  enda eplakaka og ís sem  biðu í eldhúsinu, svona til að róa fólk niður.

Eftir baráttuna var ljóst að Gunnar Freyr Rúnarsson, Víkingaklúbbsformaður, hafði sigrað með 6 vinninga.  Efstu menn hlutu bókavinninga og svo var happadrætti þannig að flestir fóru þvílíkt sáttir heim.

1.       Gunnar Freyr Rúnars     6

2.        Omar Salama                  5

3.         Vigfús Vigfússon            4,5

4.         Jorge Fonseca                4

5.          Hrannar Jónsson          4 

6.         Hörður Garðarsson       4

7.         Emil Sigurðarson           4

8.         Ingi Tandri Traustas      3,5

9.         Thomas Wasenaus       3,5

Aðrir komu í humátt á eftir.

Myndband frá setningu og fyrstu umferð N1 Reykjavíkurmótsins

Veislan er hafin í Hörpu: Heimsmeistarinn teflir við Guðlaugu Þorsteinsdóttur

N1 Reykjavíkurskákmótið í Hörpu hófst með glæsibrag, þegar Óttarr Proppé borgarfulltrúi lék fyrsta leikinn fyrir Hue Yifan heimsmeistara kvenna gegn Guðlaugu Þorsteinsdóttur, sem er margfaldur Íslandsmeistari.

Um 200 keppendur frá 36 löndum eru skráðir til leiks á mótinu og hafa aldrei verið fleiri, í nærfellt hálfrar aldar sögu Reykjavíkurmótsins.

Gunnar Björnsson forseti Skáksambandsins bauð keppendur og gesti velkomna í Hörpu. Hann sagði N1 Reykjavíkurmótið væri haldið í anda einkunnarorða skákhreyfingarinnar: Við erum ein fjölskylda.

Gunnar þakkaði stuðning Reykjavíkurborgar og ríkisstjórnar við mótshaldið, og þeim fjölmörgu einkafyrirtækjum sem leggja Skáksambandinu lið, með N1 og Icelandair í broddi fylkingar.

Katrín Jakobsdóttir menntamálaráðherra flutti ávarp og óskaði skákhreyfingunni til hamingju með merkisviðburð. Hún sagði mikið fagnaðarefni að skákin væri í mikilli sókn á Íslandi, ekki síst meðal ungu kynslóðarinnar. 

KK gladdi keppendur og gesti með leik og söng, svo stemmningin var stórkostleg í Hörpu þegar stóra stundin rann upp: N1 Reykjavíkurskákmótið er komið á fulla ferð.

N1 Reykjavíkurskákmótið hefst í dag í Hörpu kl. 16

 

Margir af sterkustu skákmönnum heims tefla á alþjóðlega Reykjavíkurskákmótinu sem fram fer í Hörpu 6. til 13. mars. Um 200 keppendur frá um 40 löndum eru skráðir til leiks og hafa aldrei verið fleiri í næstum hálfrar aldar sögu mótsins.  Mótið er það 27. röðinni. 

 

Augu skákheimsins munu beinast að Hörpu, því tvö efnilegustu ungmenni veraldar verða meðal keppenda: Kínverska stúlkan Hou Yifan, 18 ára, sem varð heimsmeistari kvenna aðeins 15 ára, og Fabiano Caruana, sem kominn er í 7. sæti heimslistans, þrátt fyrir að vera aðeins 19 ára. Caruana er jafnframt stigahæsti skákmaður sem nokkru sinni hefur teflt á Reykjavíkurmótinu.

Af öðrum gestum má nefna Tékkann David Navara, sem er næststigahæstur, og Bosníumanninn Ivan Sokolov sem er sá erlendur meistari sem unnið hefur flesta sigra á Íslandi.

Enn má nefna pólska meistarann  Piotr Dukaczewski sem komist hefur í fremstu röð, þrátt fyrir að vera blindur. Það sannar að skákin er fyrir alla - og íslenski keppendalistinn endurspeglar það.  

Flestra augu beinast að Hannesi Hlífari Stefánssyni sem sigrað hefur 5 sinnum á Reykjavíkurmótinu og Hjörvari Steini Grétarssyni efnilegasta skákmanni Íslands. Fjölmargir áhugamenn á öllum aldri etja kappi við meistarana, allt frá grunnskólabörnum til kennara, prentara og lækna.

Skáksamband Íslands stendur að mótinu og er mikil vinna lögð í að umgjörð mótsins verði sem glæsilegust.  Góð aðstaða verður fyrir áhorfendur sem geta fylgst með skákum meistaranna á risaskjá, og stórmeistararnir Friðrik Ólafsson, Helgi Ólafsson, Jóhann Hjartarson og Jón L.  annast skákskýringar.  Í lok hverrar umferðar verða pallborðsumræður í  umsjón stórmeistarans Simon Williams sem þykir einn skemmtilegasti skákskýrandi heims.

Ýmsir sérviðburðir verða samhliða mótinu.  Má þar nefna opið hraðskákmót í Viðey, málþing um skákkennslu, spurningakeppni um skák, barnaskákmót og fyrirlestrar um skákrannsóknir, svo nokkuð sé nefnt.

Mótið hefst í dag kl. 16.  Í setningarathöfn mótsins spilar KK tvö lög og ræður flytja Gunnar Björnsson, forseti Skáksambands Íslands,  Katrín Jakobsdóttir, menntamálaráðherra, og Óttarr Ólafur Proppé, borgarfulltrúi og stjórnarformaður Skákakademíu Reykjavíkur sem jafnframt setur mótið og leikur fyrsta leikinn í skák Hou Yifan, heimsmeistara kvenna.   

• Heimasíða mótsins
• Beinar útsendingar (12 skákir beint og pallborð kl. 21)
• Myndaalbúm mótsins (Hrafn Jökulsson)
• Chess-Results

Myndir frá stelpuskákdeginum

Hou Yifan tefldi tvö fjöltefli á sunnudag í Sjóminjasafninu á Granda.  Ekki riðu íslenskir skákmenn feitum hesti gegn heimsmeistaranum sem hlaut 25,5 vinning í 26 skákum.  Það var aðeins Kristófer Jóel Jóhannesson sem náði jafntefli gegn heimsmeistaranum.   Hrafn Jökulsson tók myndir sem finna má í myndaalbúmi.

Íslandsmeistarar Bolvíkinga

 

 

Taflfélag Bolungarvíkur sigraði með miklum yfirburðum á Íslandsmóti skákfélaga en síðari hlutinn fór ákaflega vel fram síðustu helgi á Selfossi undir öruggri verkstjórn Magnúsar Matthíassonar, formanns Skákfélags Selfoss og nágrennis og hans félagsmanna. 

Lokastöðuna í einstökum deildum má finna á Chess-Results.

 

Skák-bikarsyrpa OB.LA.DI. OB.LA.DA. heldur áfram í kvöld

Skák-bikarsyrpa OB.LA.DI. OB.LA.DA. heldur áfram í kveld.  Taflið hefst kl. 19.00 og er teflt að Frakkarstíg 25.  Teflt er eftir sérstöku OBLADI forgjafarkerfi á skákklukkunni.  Mótstjóri er Róbert Lagerman sími 6969658.

Allir velkomnir, og aldrei of seint að vera með.  Góð verðlaun, í einstökum mótum og enn glæsilegri verðlaun í úrslitum, sem verða um páskana, enginn mótsgjöld.

Heildarstaðan í Bikarsyrpu Ob.la.di. Ob.la.da. eftir tvö mót.

Nafn Vinningar

1.Róbert Harðarson 14
2.Jón Birgir Einarsson 11.5
3.Lárus Ari Knútsson 8,5
4.Hrafn Jökulsson 7
5.Halldór Pálsson 4,5
6.Kjartan Guðmundsson 4,5
7.Jóhann Þorvarðarson 4
8.Hrannar Jónsson 4
9.Friðrik Ólafsson 2,5
10.Arnar Valgeirsson 1,5
11.Davíð Steingrímsson 1