Rafmögnuð spenna í Hörpu: 4. umferð að ná hámarki

Vindurinn gnauðar í Hörpu þegar fjórða umferð N1 Reykjavíkurskákmótsins er að ná hámarki. Fjölmargir áhorfendur eru mættir til að fylgjast með meisturunum.

Friðrik Ólafsson fyrsti stórmeistari Íslendinga og fv. forseti FIDE leit við nú seinnipartinn og bar lof á glæsilegt mót. Friðrik tók þátt í fyrsta Reykjavíkurmótinu fyrir 46 árum og hefur í þrígang sigrað á mótinu.

Stefán Kristjánsson teflir hörkuskák við stórmeistarann Gawain Jones og Hannes H. Stefánsson og Joachim Thomassen grúfa sig yfir mjög flókna stöðu.

Caruana og L´Ami skylmast á 1. borði í skák þar sem allt getur gerst, og heimsmeistarinn Hou Yifan freistar þess að komast aftur á sigurbraut í skák sinni við alþjóðlega meistarann Adam Hunt.

Fjölmargar spennandi skák eru í gangi á N1 Reykjavíkurskákmótinu og er 12 þeirra sendar út beint á netinu. Sjón eru sögu ríkari og eru skákáhugamenn hvattir til að koma og taka þátt í skákveislunni.

Jóhann Hjartarson stórmeistari verður með skákskýringar í hliðarsal og fer yfir stöðuna hjá meisturunum.

Nansý og Hilmir í úrslitum Gagnaveitumótsins - Reykjavík BarnaBlitz 2012

Það var hart barist í undanúrslitum Gagnaveitumótsins - Reykjavík BarnaBlitz 2012, sem fram fóru í Hörpu á föstudag.

Hilmir Freyr Heimisson sigraði Vigni Vatnar Stefánsson 2-0 og Nansý Davíðsdóttir sigraði Baldur Theodor Petersson, einnig 2-0.

Bæði einvígi voru hörkuskemmtileg og æsispennandi, og ungu meistararnir kunnu vel við sig á sviðinu í Hörpu, þar sem meistarar á borð við Hue Yifan, Caruana og Navara leika venjulega listir sínar.

Hilmir Freyr og Nansý tefla til úrslita á Gagnaveitumótinu - Reykjavik BarnaBlitz á morgun, áður en 5. umferð N1 Reykjavíkurmótsins hefst.

Bein útsending frá 3. umferð N1 Reykjavíkurmótsins

Watch live streaming video from reykjavikopen at livestream.com

Firmakeppni Fjölnis - Verkísmótið 2012

Það styttist í að Firmakeppni Fjölnis í skák, með stuðningi verkfræðistofunnar Verkís, hefjist í Ráðhúsi Reykjavíkur.

Margir skákmenn og nokkur fyrirtæki hafa komið að máli við undirbúningsnefnd mótsins um hvort ekki væri möguleiki á að rýmka til með reglurnar og fá þannig fleiri fyrirtæki og fleiri skákmenn til að koma að á mótinu.

Undirbúningsnefndin hefur ákveðið að verða við þessum óskum þótt stutt sé í mótshaldið, enda um mikla veislu að ræða þegar horft er til verðlauna fyrir bestu skáksveitirnar og einstaklingana. Nú hvetjum við íslenska skákmenn til að bregðast fljótt og vel við breyttum þátttökureglum og þeir kanni möguleika sína á að mynda sveit/ir  sem fellur undir eftirfarandi skilyrði:

Fyrirkomulag

-          Hvert fyrirtæki sendir fjögurra manna skáksveit til leiks. Leyfilegt er að hafa varamenn.

-          Liðsmenn skulu starfa hjá viðkomandi fyrirtæki eða stofnun.

-          Leyfilegt er að tefla fram sameinuðu liði tveggja fyrirtækja.

-          Einn lánsmaður er leyfður í hverju liði.

-          Hvert lið má tefla fram einum titilhafa þ.e. GM eða IM, eða tveimur FM.

 

-          Teflt verður í Ráðhúsi Reykjavíkur, 14. og 15. mars nk. kl. 16:00 - 19:00

-          Veitingar í hléi í frá Saffran og Icelandic Glacial.

 

1. Verðlaun:  Flug til Evrópu með Iceland Express fyrir 4 liðsmenn og liðsstjóra - öll gjöld innifalin!

2.  Verðlaun: Glæný ljósmyndabók frá Sögum útgáfu og geisladisk frá 12 tónum.

3.  Verðlaun: Verðlaun: Ljósmyndabókin frá Sögum útgáfu.

 

Sérverðlaun, GSM snjallsími frá Símanum, að verðmæti 100.000 kr., verða veitt fyrir bestan árangur einstaklings á mótinu. Einnig verða vinningar dregnir af handahófi úr hópi allra þátttakenda.

Skákdeild Fjölnis stendur að mótinu en verkfræðistofan Verkís, sem fagnar 80 ára starfsafmæli í ár er aðalstyrktaraðili mótsins.

Þátttökugjald hvers fyrirtækis/stofnunar er 50.000 kr. Tilkynnið þátttöku sem fyrst á [e-mail].

Með von um jákvæð viðbrögð, stuðning og skemmtilegt samstarf,

 

Undirbúningsnefndin

Tímaritið Skák kemur út í dag

 

 

 

Í dag föstudaginn 9. mars kemur glóðvolgt úr prentun, Tímaritið Skák. Blaðið er stútfullt af efni og má þar nefna umfjöllun um Reykjavíkurskákmótin 2011 og 2012, Skákþing Íslands, Norðurlandamót öldunga,  Íslandsmót skákfélaga og árangur íslenskra skákmanna á erlendri grundu. Einnig má nefna grein um afmælisbarnið Bobby Fischer, áhugaverð skrif um taflmennsku ungra sem aldinna og skáklistaverk eitt mikið. Er þá raunar fátt eitt talið.  

Skákáhugamenn eru hvattir til að tryggja sér eintak en blaðið verður til sölu í Hörpu meðan á Reykjavíkurskákmótinu stendur en þar geta óþolinmóðir áskrifendur einnig nálgast sitt eintak fram á sunnudag. 

Þeir áskrifendur sem ekki eiga heimangengt fá blaðið sent heim en panta má áskrift hér.

Frétt á ChessBase um N1 Reykjavíkurskákmótið

Alina L´ami frá Rúmeníu hefur skrifað góðan, myndrænan og skemmtilegan pistil á  Chessbase um N1 Reykjavíkurskákmótið.

Pistillinn á Chessbase

Pallborðið: Williams og Ingvar þór

Simon Williams og Ingvar Þór Jóhannesson voru í pallborðinu í dag og fóru mikinn.   Pallborðið má nálgast hér að neðan.

 

Watch live streaming video from reykjavikopen at livestream.com

Myndband frá þriðju umferð

Vijay Kumar heldur áfram að senda frá myndböndin.  Nú má finna myndbandið frá 3. umferð.  Þar má m.a. finna viðtöl við Caruana, Navara og Henrik Danielsen.

Reykjavík Barna Blitz: Ungstirnin áfram

Átta manna úrslit í Reykjavik Barna Blitz fóru fram í dag. Spennan var mikil enda nokkur áfangi að komast í gegnum undanrásir taflfélaganna. Hilmir Freyr og Vignir Vatnar komust nokkuð örugglega áfram. Hilmir lagði nafna sinn Hrafnson að velli og Vignir sigraði félaga sinn úr TR Gauta Pál Jónsson. Baldur Teodor Petersson komst áfram eftir bráðabana þar sem Kristófer Jóel lék af sér kóngnum í unninni stöðu. Loks lagði Nansý Davíðsdóttir Dawid Kolka að velli í sviptingamiklu einvígi.

Undanúrslitin fara fram á morgun klukkan 14:00 í Hörpu.

Þá mætast:

Hilmir Freyr - Vignir Vatnar

Baldur Teodor - Nansý Davíðsdóttir

Vignir og Nansý komust einnig í undanúrslit í fyrra og lenti Nansý þá í öðru sæti en Vignir í þriðja.

Myndaalbúm (Hrafn Jökulsson)

Henrik og Stefán með fullt hús á N1 Reykjavíkurskákmótinu

Stórmeistararnir Henrik Danielsen og Stefán Kristjánsson eru meðal efstu manna með fullt hús að lokinni 3. umferð N1 Reykjavíkurmótsins sem fram fór í kvöld.  Henrik vann Dag Ragnarsson, sem hefur verið sá skákmaður sem mest hefur komið á óvart. 

Stefán Kristjánsson vann litháískan FIDE-meistara.   Heimsmeistarinn Hou Yifan mátti sætta við jafntefli við þýska alþjóðlegan meistara í hörkuskák.

Meðal óvæntra úrslita má nefna að Einar Hjalti Jensson gerði sitt annað jafntefli við stórmeistara að þessu sinni við franska stórmeistarann Fabian Libiszewski.  Björn Freyr Björnsson gerði jafntefli við bandaríska stórmeistarann Yuri Shulman.   

Einnig náðu Dagur Kjartansson, Halldór Pálsson, Hrannar Jónsson, Nökkvi Sverrisson og Svandís Rós Ríkharðsdóttir eftirtektarverðum úrslitum.   

Öll úrslit 3. umferðar má finna hér.    

Stöðu mótsins má finna hér.

Fjórða umferð fer fram á morgun og hefst kl. 15.  Þá hefjast skákskýringar í umsjón Jóhanns Hjartarsonar kl. 17:30.  Röðun 4. umferðar má finnast hér.

Í 4. umferð mætast m.a.:     

• Fabiano Caruana - Erwin L´ami
• Ivan Sokolov - Simon Williams
• Robert Hess - Henrik Danielsen
• Stefán Kristjánsson - Gawain Jones
• Adam Hunt - Hou Yifan
• Thomas Trella - Héðinn Steingrímsson
• Hannes Hlífar Stefánsson - Joachim Thomassen

Heimasíður

• Heimasíða mótsins
• Beinar útsendingar
• Pallborðið og vefútsending
• Chess-Results