Skák.is

Bloggfærslur mánaðarins, febrúar 2012

5.2.2012 | 20:00

Skákþáttur Morgunblaðsins: Mikil spenna fyrir lokaumferðina á Skákþingi Reykjavíkur

Keppni á Skákþingi Reykjavíkur hefur þróast með nokkuð öðrum hætti en búast mátti við. Þrír stigahæstu keppendur mótsins, Hjörvar Steinn Grétarsson og bræðurnir Bragi og Björn Þorfinnssynir sem allir áttu sæti í síðasta ólympíuliði Íslands hafa vissulega einhverja möguleika á sigri en Guðmundur Kjartansson og Ingvar Þ. Jóhannesson hafa hinsvegar skipst á að halda forystunni. Fyrir lokaumferðina á föstudagskvöldið var staðan þessi:

1. Ingvar Þ. Jóhannesson 7 v. af 8 2. Guðmundur Kjartansson 6 ½ v. 3.-6. Hjörvar Steinn Grétarsson, Bragi Þorfinnsson, Björn Þorfinnsson og Einar Hjalti Jensson 6 v.

Guðmundur lagði Braga að velli í 7. umferð en Björn bróðir náði fram hefndum fyrir yngri bróður sinn í næstu umferð og því ríkti mikil óvissa um það hver bæri sigur úr býtum en sex skákmenn áttu fræðilega möguleika á titlinum þegar lokaumferðin hófst. Þá áttust við sex efstu menn: Ingvar var settur á móti Braga Þorfinnssyni og hafði hvítt, Guðmundur var með hvítt gegn Hjörvari Steini og Einar Hjalti með hvítt gegn Birni. Miðað við hvernig viðureignir hafa raðast í þessu móti hefði alveg mátt hafa ellefu umferðir sem breytir þó engu um það að frammistaða Ingvars og Guðmundar hefur verið stórgóð og Ingvar vitanlega sá keppandi sem mest hefur komið á óvart.

Af mörgum skemmtilegum skákum mótsins stendur viðureign Guðmundar Kjartanssonar við Braga Þorfinnsson upp úr en þar vann Guðmundur eftir afar beinskeytta atlögu í byrjun tafls:

Guðmundur Kjartansson - Bragi Þorfinnsson

Slavnesk vörn

1. d4 d5 2. c4 c6 3. Rf3 Rf6 4. Rc3 dxc4 5. a4 Bf5 6. Rh4 Bc8 7. Rf3 Bf5 8. Rh4 Bc8 9. e3 e5 10. Bxc4 exd4 11. exd4

Þessi byrjun er m.a. þekkt úr skák Kasparovs og Tal frá heimsbikarmótinu í Reykjavík 1988.

11.... Be7 12. Db3 0-0 13. Rf3 Db6 14. Da2 Bg4?

Ónákvæmur leikur. Guðmundur taldi 14.... Ra6 best. Eftir 15. Re5 Rb4! 16. Bxf7+ Kh8 17. Db3 Dxd4 er svarta staðan ekki verri.

15. Re5! Dxd4 16. Rxf7 Rd5 17. 0-0 Ra6

Ekki 17.... Hxf7 18. Rxd5 cxd5 19. Bxd5 Bh5 20. Dxb7 og vinnur.

18. Be3! Rxe3 19. fxe3 Dxe3+ 20. Kh1 Rb4 21. Db3 b5 22. axb5 cxb5 23. Bd5!

Bráðsnjall leikur. Í fljótu bragði virðist leikurinn ekki ganga upp því eftir 23.... Rxd5 24. Dxd5 Be6! fellur riddarinn á f7. Guðmundur hafði annað í huga, 24. Rxd5!! Dxb3 25. Rxe7 mát!

23.... Hab8 24. Rh6+! Kh8 25. Rxg4

Skyndilega er hvítur manni yfir. Úrvinnslan vefst ekki fyrir Guðmundi.

25.... Dd4 26. Bf3 h5 27. Had1 Df4 28. Re2 Dg5 29. Rf2 a5 30. Rd4 Hfd8 31. Df7 Bf6 32. Re4 Dd5 33. Re6

- og svartur gafst upp.

Aronjan með vinnings forskot í Wijk aan Zee

Eftir góða byrjun hefur Magnúsi Carlssyni fatast flugið á stórmótinu i Wijk aan Zee sem lýkur um helgina. Hann tapaði óvænt með hvítu fyrir Karjakin í 8. umferð. Armeninn Lev Aronjan hefur hvergi misstigið sig og heldur vinningsforskoti fyrir lokasprettinn:

1. Aronjan 7 ½ v. af 10 2. Ivantsjúk 6 ½ v. 3.-4. Carlsen og Radjabov 6 v. 5.-6. Nakamura og Caruana 5 ½ v.

Keppendur í efsta flokki eru 14 talsins.

Helgi Ólafsson helol@simnet.is

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 29. janúar 2012.

Skákþættir Morgunblaðsins

Spil og leikir | Breytt 28.1.2012 kl. 20:27 | Slóð | Facebook | Athugasemdir (0)

5.2.2012 | 19:43

Jakob Sævar og Hjörleifur efstir á Skákþingi Akureyrar

Jakob Sævar Sigurðsson og Hjörleifur Halldórsson eru efstir á Skákþingi Akureyrar að lokinni 5. umferðar sem fram fór í dag.

Úrslit dagsins:

Andri Freyr-Jakob Sævar jafntefli
Hjörleifur-Smári jafntefli
Jón Kristinn-Hjörtur 1-0
Jón M-Símon 0-1

Þá er lokið frestaðri skák Hjartar og Jóns M og vann sá fyrrnefndi þá skák. Staðan þegar tveimur umferðum er ólokið:

1-2. Jakob Sævar og Hjörleifur 4; 3-4. Smári og Jón Kristinn 3,5; 5-6. Andri Freyr og Símon 2; 7. Hjörtur 1; 8. Jón M 0

Spil og leikir | Slóð | Facebook | Athugasemdir (0)

5.2.2012 | 18:58

KORNAX aukakeppnin - Guðmundur vann Braga

Guðmundur Kjartansson (2326) vann Braga Þorfinnsson (2426) í 3. umferð aukakeppni KORNAX mótsins - Skákþings Reykjavíkur sem fram fór í dag. Björn Þorfinnsson (2406), sem sat fyir, leiðir hins í keppninni. Keppninni verður framhaldið á miðvikudagskvöld þegar bræðurnir mætast.

Staðan:

Björn Þorfinnsson (2406) 1,5 v. af 2
Guðmundur Kjartansson (2326) 1 v. af 2
Bragi Þorfinnsson (2426) 0,5 v. af 2

Tefld verður tvöföld umferð og verður teflt á sunnudögum kl. 14 og á miðvikudögum og föstudögum kl. 19.30. Teflt er í T.R.

Spil og leikir | Slóð | Facebook | Athugasemdir (0)

5.2.2012 | 18:50

Héðinn tapaði fyrir Ragger - Henrik með jafntefli við Pedersen

Stórmeistarinn Héðinn Steingrímsson (2562) tapaði fyrir austurríska stórmeistaranum Markus Ragger (2655) í níundu umferð þýsku deildakeppninnar (Bundesligunnar) sem fram fór í dag.

Henrik Danielsen (2536), sem teflir í neðri deildum, gerði jafntefli við danska FIDE-meistarann Steffen Pedersen (2432).

Keppninni verður framhaldið helgina 25.-26. febrúar.

Spil og leikir | Slóð | Facebook | Athugasemdir (0)

5.2.2012 | 09:31

Myndir frá Íslandsmóti stúlknasveita

Hrafn Jökulsson, besti ljósmyndari íslenskrar skákhreyfingar, tók allmargar myndir frá Íslandsmót grunnskólasveita, stúlknasveita í Rimaskóla í gær. Myndirnar má finna í myndaalbúmi mótins. Minnt er á Íslandsmót stúlkna sem hefst kl. 13 í dag.

Valdar myndir úr myndaalbúminu má finna hér að neðan:

Ljósmyndarinn sjálfur - Hrafn Jökulsson - tók allar myndirnar nema þessa einu!

Helgi Árnason skólastjóri Rimaskóla ásamt dóttur sinni Sigríði Björg sem var liðsstjóri a-liðsins

Snemma beygist skák-krókurinn!

Hart barist!

Heiðrún Anna Hauksdóttir (systir Hrundar) vann sjálfa Nansý!

Skáksveit Vesturbæjarskóla stóð sig vel á mótinu og komst á efsta borð í lokaumferðinni

Tómas Rasmus, sem hefur gert frábæra hluti í skákstarfi Salaskóla, og heiðursgesturinn Hanna Birna slógu á létta strengi.

Hin fjögur fræknu sagði Hrafn þegar hann smellti þessari af: Andrea, Gunnar, Stefán og Helgi

Spil og leikir | Slóð | Facebook | Athugasemdir (0)

5.2.2012 | 07:00

Íslandsmót stúlkna fer fram í dag

Íslandsmót stúlkna 2012 - einstaklingskeppni fyrir stúlkur á grunnskólaaldri fer fram á sunnudaginn næsta 5. febrúar og hefst taflið klukkan 13:00.

Mótið fer fram í Sjóminjasafninu Víkinni að Grandagarði 8.

Veitt verða verðlaun í tveimur flokkum:

Fæddar 1996-1998
Fæddar 1999 og síðar.

Tefldar verða 7-9 umferðir eftir fjölda keppenda með 10 mínútur á mann.

Víkin er sérstaklega skemmtilegt safn sem geymir sögu sjávarútvegs á Íslandi. Safnið er opið á sunnudögum frá 13-17. Í safninu er glæsileg kaffitería sem verður opin á sunnudaginn og því tilvalið fyrir fjölskyldur ungra skákstelpna að gera sem mest úr deginum.

Skráning fer fram á Skák.is og fyrirspurnum svarað í stefan@skakakademia.is.

Spil og leikir | Breytt 1.2.2012 kl. 18:49 | Slóð | Facebook | Athugasemdir (0)

4.2.2012 | 21:42

Skákir KORNAX mótsins

Skákir KORNAX mótsins eru nú allar aðgengilegar. Það voru Halldór Pálsson og Þórir Benediktsson sem slógu þær inn.

Veljið skák (320 alls):

Spil og leikir | Slóð | Facebook | Athugasemdir (0)

4.2.2012 | 20:29

Héðinn með jafntefli við Parligras

Stórmeistarinn Héðinn Steingrímsson (2562) gerði jafntefli við rúmenska stórmeistarann Mircea-Emilian Parligras (2625) í áttundu umferð þýsku deildabikarkeppninnar sem fram fór í dag. Á morgun teflir Héðinn að öllum líkindum við indverska stórmeistarann Chanda Sandipan (2640). Skákin verður sýnd beint og heft kl. 9.

Spil og leikir | Breytt s.d. kl. 21:40 | Slóð | Facebook | Athugasemdir (0)

4.2.2012 | 20:21

Aldrei fleiri á Íslandsmóti stúlkna: Glæsilegur sigur Rimaskóla

Rimaskóli sigraði með glæsibrag á Íslandsmóti grunnskólasveita í skák, stúlknaflokki, sem fram fór í dag, laugardaginn 4. febrúar.

Stúlkurnar úr Rimaskóla, leiddar áfram af Hrund Hauksdóttur á 1. borði, hlutu 27 vinninga af 28 mögulegum.

Engjaskóli varð í 2. sæti með 22½ vinning og Salaskóli hreppti bronsið, hlaut 17½ vinning.

Alls tóku sautján sveitir þátt í mótinu, fleiri en nokkru sinni áður.

Sigur Rimaskóla var mjög öruggur, eins og lokatölur bera með sér. Hrund Hauksdóttir, sem er í 10. bekk, vann sinn áttunda Íslandsmeistaratitil með skólanum. Hrund sigraði í öllum sjö skákum sínum og fékk verðlaun fyrir bestan árangur á efsta borði.

Fjórar stúlkur skipuðu hverja sveit og verðlaun fyrir bestan árangur hlutu:

1. Hrund Hauksdóttir (Rimaskóla) 7 v. af 7
2. Nansý Davíðsdóttir og Honey Grace (Engjaskóla) 6 v.
3. Svandís Rós Ríkharsdóttir (Rimaskóla) 7 v.
4. Ásdís Birna Þórarinsdóttir (Rimaskóla) 7 v.

Rimaskóli hefur á síðustu árum sópað til sín verðlaunum á Íslandsmótum og Norðurlandamótum, og þaðan koma mörg af efnilegustu börnum og ungmennum landsins. Helgi Árnason skólastjóri hefur gert Rimaskóla að sannkölluðu stórveldi í íslensku skáklífi, og náð árangri sem vart á sér hliðstæðu.

Engjaskóli hefur líka lagt mikla áherslu á skákkennslu, ekki síst meðal stúlkna, og tefldi fram þremur sveitum á Íslandsmótinu. Maðurinn á bak við árangur Engjaskóla er Jóhann Stefánsson námsráðgjafi sem unnið hefur mikið starf í þágu skáklistarinnar.

Salaskóli, sem varð í 3. sæti á Íslandsmótinu er einn mesti skákskóli Íslands og Norðurlanda. Þar hefur Tómas Rasmus kennari stýrt uppbyggingunni frá stofnun skólans.

Skáksamband Íslands stóð að mótinu, sem heppnaðist sérlega vel, og Skákakademía Reykjavíkur sá um undirbúning og framkvæmd.

Hanna Birna Kristjánsdóttir borgarfulltrúi, sem var heiðursgestur á mótinu, hvatti stúlkurnar til dáða og þakkaði Skáksambandinu, Skákakademíunni og öðrum sem vinna að útbreiðslu skáklistarinnar meðal barna fyrir kraftmikið starf. Hanna Birna brýndi fyrir stelpunum að muna, að allt sem strákar gætu gert, gætu stelpurnar líka -- og jafnvel betur.

Á morgun, sunnudag, heldur skákveislan áfram. Þá verður haldið Íslandsmót stúlkna, einstaklingskeppni, í Sjóminjasafni Reykjavíkur. Mótið, sem hefst klukkan 13, er opið öllum stúlkum á grunnskólaaldri.

Allir eru velkomnir í Sjóminjasafnið að fylgjast með ungu snillingunum.

Lokastaðan á Íslandsmóti grunnskólasveita, stúlknaflokki, árið 2012:

1 Rimaskóli a-sveit 27 vinningar
2 Engjaskóli a-sveit 22½
3 Salaskóli 17½
4 Engjaskóli b-sveit 15½
5 Rimaskóli b-sveit 15½

6 Rimaskóli c-sveit 15
7 Melaskóli 14
8 Foldaskóli 13
9 Smáraskóli 12½
10 Selásskóli 12½
11 Vesturbæjarskóli 12
12 Breiðagerðisskóli 12

13 Engjaskóli c-sveit 12
14 Fossvogsskóli 12
15 Borgaskóli 11½
16 Ingunnarskóli 11
17 Húsaskóli 9½

Spil og leikir | Breytt s.d. kl. 21:23 | Slóð | Facebook | Athugasemdir (0)

4.2.2012 | 13:01

Héðinn í beinni frá Bundesligunni

Stórmeistarinn Héðinn Steingrímsson (2562) verður í beinni útsendingunni frá þýsku deildakeppninni í dag en skák Héðins hefst nú kl. 13. Héðinn mætir rúmenska stórmeistaranum Mircea-Emilian Parligras (2625) í dag.

Skákir þýsku deildakeppninnar í beinni

Spil og leikir | Breytt s.d. kl. 12:51 | Slóð | Facebook | Athugasemdir (0)

« Fyrri síða | Næsta síða »