Jón Kristinn sigurvegari TM-mótaraðar SA

Fyrir skemmstu fór fram lokaumferðin í TM-mótaröðinni sem Skákfélag Akureyrar hefur staðið fyrir. 11 öflugir skákmenn áttust við á svörtum reitum og hvítum. Fyrir umferðina var Jón Kristinn Þorgeirsson með eins og hálfs vinnings forskot á Sigurð Arnarson sem kom næstur.  Í þriðja sæti var Sigurður Eiríksson. Þeir voru allir mættir og röðuðu sér í þrjú efstu sætin. Arnarson varð efstur með 9 vinninga en þeir Eiríksson og Þorgeirsson urðu jafnir í 2. - 3. sæti með 8,5 vinninga. Það dugði Jóni til sigurs í mótaröðinni og er hann vel að því kominn.

Staðan í lokamótinu var:

• Sigurður Arnarson 9 vinningar
• Sigurður Eiríksson og Jón Kristinn Þorgeirsson 8,5 vinningar
• Einar Garðar 6,5 vinningar
• Haki Jóhannesson 5,5 vinningar
• Símon Þórhallsson 4 vinningar
• Rúnar Ísleifsson 3.5 vinningar
• Logi Rúnar 3 vinningar
• Karl 2,5 vinningar
• Bragi 2 vinningar
• Atli 1 vinningur

Með frammistöðu sinni tókst Haka að komast upp fyrir formanninn, Áskel Örn, sem ekki tók þátt í lokamótinu.

Staða efstu manna í Mótaröðinni varð þessi:

1. Jón Kristinn Þorgeirsson 69,5
2. Sigurður Arnarson 68,5
3. Sigurður Eiríksson 55
4. Haki Jóhannesson 40,5
5. Áskell Örn Kárason 40
6. Einar Garðar Hjaltason 40
7. Sveinbjörn Sigurðsson 37,5
8. Smári Ólafsson 36,5
9. Ólafur Kristjánsson 31
10. Símon Þórhallsson 29
11. Andri Freyr Björgvinsson 26
12. Rúnar Ísleifsson 23

Jólahraðskákmót TR

Jólahraðskákmót Taflfélags Reykjavíkur verður haldið fimmtudaginn 27. desember kl. 19.30.  Tefldar verða 2x7 umferðir með 5 mínútna umhugsunartíma.  Mótið fer fram í húsnæði T.R. að Faxafeni 12.  Þátttökugjald er kr. 500 en frítt fyrir 15 ára og yngri. Verðlaun fyrir þrjú efstu sætin.

Davíð Kjartansson hraðskákmeistari Víkingaklúbbsins 2012

Hörkuspennandi hraðskákmeistaramóti Víkingaklúbbsins 2012 lauk með látum í Víkingsheimilinu í kvöld. Mættir voru átján vaskir keppendur, m.a fyrrum hraðskákmeistari, unglingar, Íslandsmeistari kvenna í skák auk nokkra Víkingaskákmanna. Fidemeistararnir Davíð Kjartansson og Magnús Örn Úlfarsson voru í sérflokki framan af móti, en Davíð var á skrefinu undan og náði að sigra annað árið í röð. 

Lárus Knútsson náði þriðja sætinu eftir hörkukeppni, en mótið var gríðarlega vel skipað.  Páll Andrason varð efstur unglinga, Elsa María efst kvenna.  Magnús Skagameistari Magnússon varð efstu öldunga 45. ára og eldri, en Magnús Örn Úlfarsson efstur í flokki 35-45 ára.  Tefldar voru 2x7 umferðir með 5. mínútna umhugsunartíma.  Knattspyrnufélgið Víkingur og Víkingaklúbburinn hafa verið í góðu samstarfi í vetur og æfingar hafa verið hálfsmánaðarlega í Víkingsheimilinu, auk þess sem barnaæfingar hafa einnig verið haldnar annan hvern miðvikudag.  

ÚRSLIT:

* 1 Davíð Kjartansson 12.5 v.
* 2 Magnús Örn Úlfarsson 11.0
* 3 Lárus Knútsson 9.0
* 4 Tómas Björnsson 8.5
* 5 Páll Andrason 8
* 6 Magnús Magnússon 8
* 7 Gunnar Fr. Rúnarsson 7.5
* 8 Hannes Hrólfsson 7.0
* 9 Sigurður Ingason 7.0
* 10 Ægir Hallgrímsson 7.0
* 11 Örn Leó Jóhannsson 6.5
* 12 Haraldur Baldursson 6.5
* 13 Stefán Þór Sigurjónsson 6.0
* 14 Þorvarður Fannar Ólafsson 6.0
* 15 Elsa María 5.5
* 16 Björn Grétar 5.0
* 17 Magnús Sigurðsson 3.5
* 18 Gunnar Ingibergsson 1.5


Hraðskákmeistari Víkingaklúbbsin 2012: Davíð Kjartansson
Hraðskákmeistari kvenna: Elsa María
Hraðskákmeistari unglinga:  Páll Andrason
Hraðskákmeistari öldunga M1:  Magnús Örn Úlfarsson
Hraðskákmeistari öldunga M2:  Magnús Magnússon

Heimasíða Víkingaklúbbsins

Pálmi hraðskákmeistari Garðabæjar

Pálmi R. Pétursson (2118) vann öruggan sigur á Hraðskákmóti Garðabæjar sem fram fór í gær. Pálmi vann alla níu andstæðinga sína, fékk þremur vinningum meira en næstu menn.  Pálmi er því hraðskákmeistari Garðabæjar. Ögmundur Kristinsson (2032), Arnaldur Loftsson (2094) og Leifur Ingi Vilmundarson (1948) komu næstir með 6 vinninga.

18 skákmenn tóku þátt.

Lokastöðuna má finna í Chess-Results.

Fréttaskeyti Skákakademíunnar

Nýtt Fréttaskeyti Skákakademíunnar kom út í dag. Meðal efnis er:

• Stór stund í Hringnum: Skákbörnin söfnuðu vel yfir milljón! 
• Hjörvar Steinn Grétarsson: Skákin hefur gefið mér meira en nokkuð annað í þessu lífi
• Jólaskákmót í Vin á mánudaginn!
• Fróðleiksmoli vikunnar: Fræga fólkið sem teflir skák

Skrár tengdar þessari bloggfærslu:

• Fréttaskeytti Skákakademíunnar 14. desember

,,Þetta snerist um besta málstað sem hægt er að hugsa sér!"

Krakkarnir í Skákakademíunni komu færandi hendi á fimmtudag í Barnaspítala Hringsins með afrakstur úr maraþoni sem börn og ungmenni tefldu í Kringlunni á dögunum. Leikstofan fékk að gjöf tvær nýjar fartölvur, litli skólinn í Hringnum fékk 2 nýjar fartölvur og Barnaspítalasjóður Hringsins fékk 925.000 króna framlag.

Það var Donika Kolica, 15 ára talsmaður krakkanna, sem færði Valgerði Einarsdóttur formanni Hringsins framlagið, að viðstöddum nokkrum af skákkrökkunum, fulltrúum spítalans og skákhreyfingarinnar.

Skákakademían heimsækir leikstofu Hringsins vikulega og teflir við börnin sem þar leita sér lækninga. Starfið er mjög gefandi og hefur skapað margar ánægju- og gleðistundir.

Valgerður Einarsdóttir þakkaði Skákakademíunni kærlega fyrir þetta góða framtak, sem hún sagði að kæmi sér afar vel. Barnaspítalasjóðurinn stendur að miklu leyti straum af tækjakaupum Hringsins og er eitt öflugasta velferðarfélag landsins.

Donika Kolica sagði að krökkunum hefði þótt virkilega gott og gaman að tefla í þágu svo göfugs málefnis og að góð stemmning hefði verið í maraþoninu. Sjálf tefldi hún óteljandi skákir við gesti og gangandi, sem reiddu fram frjáls framlög. Aðspurð um úrslitin sagði hin efnilega skákkona: ,,Úrslitin voru algert aukaatriði. Þetta snerist um besta málstað sem hægt er að hugsa sér."

• Fréttir RÚV 
• Myndaalbúm (HJ)

Friðrik vann Evrópumeistarann

Eftir rólega byrjun hefur Friðrik Ólafsson (2419) heldur betur hrokkið í gang í Tékklandi þar sem hann teflir í liði heldri borgara gegn skákkonum. Í dag vann Evrópumeistara kvenna og einn ólympíumeistara Rússa í kvennaflokki í vel tefldri skák. Annar sigur Friðriks í röð. Heldri borgararnir unnu umferð dagsins 3-1 og hafa nú 9 vinninga gegn 11 vinningum kvennanna. 

Á morgun teflir Friðrik við indversku skákkonuna Tania Sachdev (2400).

Í liði heldri skákmanna eru auk Friðriks þeir Romanish (2530), Hort (2455) og Uhlmann (2310) en kvennaliðið skipa þær Gunina (2514),  Sachdev (2400), Kaslinskaya (2344) og Havlikova (2310). Tefld er tvöföld umferð, þ.e. allir heldri skákmennirnir tefla tvisvar við hverja skákkonu.

• Heimasíða mótsins 
• Beinar útsendingar (hefjast almennt kl. 14).

Riddarinn: Minningarskákmót Sigurbergs H. Elentínussonar

Riddarar reitaða borðsins minntust fallins félaga og skákforystumanns á taflfundi sínum í gær með því að helga mótið minningu hans um leið og aðstandendum var vottuð samúð frá þeim stóra hópi sem skákinni unna.     

SIGURBERG H. ELENTÍNUSSON, verkfræðingur, hvarf til austursins eilífa 2. desember, 85 ára að aldri. Hann var einn af stofnendum Skákfélags Hafnarfjarðar þegar það var endurreist á áttunda áratugnum og virkur í stjórn þess og starfi ásamt Bjarna Linnet og fleiri góðum mönnum. Sigurberg var öflugur skákmaður og tefldi í meistaramótum þar í bæ enda haft unun af skák frá unga aldri, ásamt öðrum hugðarefnum. Hann var flinkur skákstjóri og töflugerðarmaður sem var mikilsvirði áður en tölvurnar komu til sögunnar. Eftir að hann fór minnka við sig vinnu og að draga sig í hlé frá annríki hversdagsins gekk hann til liðs við RIDDARANN, skákklúbb eldri borgara á Stór- Hafnarfjarðarsvæðinu, sem hittast til tafls einu sinni viku árið um kring í skjóli Hafnarfjarðarkirkju.   

Sigurbergs var minnst með nokkrum orðum þegar mótið var sett, höfð stutt þögn og tendrað á kerti sem lýsti á meðan á taflinu stóð. Vitnað var til orða sem til hans voru töluð fyrir þremur árum þegar honum voru þökkuð velunninn störf í þágu klúbbsins og skáklistarinnar.  Þá var ákveðið í tengslum við nýársmót klúbbsins með fulltingi allra klúbbfélaga að heiðra Sigurberg með því að sæma hann heiðursriddaranafnbót í virðingar- og þakklætisskyni fyrir störf hans og þátttöku í klúbbnum allt frá stofnun hans haustið 1998. Síðan var hann með viðeigandi hætti, að viðstöddum Sr. Gunnþór Ingasyni, verndara klúbbsins, sleginn til stór- og heiðursriddara af virðingu og þakklæti fyrir:    1) Framlag hans til klúbbsins;      2. Drengskap hans og fórnfýsi;

3) Hugkvæmni hans og háttvísi;  4) Snilli hans á skákborðinu.  Því til staðfestu var honum síðan afhent riddarastytta með áletruðu nafni sínu ásamt viðurkenningarskjali.

Sigurberg var í hópi stofnfélaga Riddarans og í stjórn hans alla tíð. Hann hélt utan um úrslit og heildarárangur félaganna yfir árið og reiknaði út vísindalega . Mestu máli skipti þó að hann tefldi þar sleitulaust sjálfum sér og öðrum til ánægju og yndisauka um árabil, þar til hann varð að hægja ferðina fyrir um það bil ári síðan.  Sigurberg var öflugur og slyngur skákmaður, jafnframt því að vera traustur félagi og hvers manns hugljúfi í góðum vinahópi.

Nú er staðan breytt á skákborði lífsins. Hinn glaðværi andi Sigurbergs mun þó áfram  svífa yfir vötnunum í skákstofunni Vonarhöfn og fögur minning um einstaklega geðþekkan og  ljúfan mann genginn deyr aldregi.

Friðsöm átaka taflmennska með þungri undiröldu að hætti Sigurbergs setti svip sinn á minningarmótið sem fór vel fram að vanda og var óvenju jafnt að þessu sinni, eins og sjá má á meðf. mótstöflu ásamt myndum af vettvangi sem segja meiri sögu en mörg orð.

 

 

Jólamót Riddarans fer svo fram með hátíðlegum hætti að viku liðinni, miðvikudaginn 19. desember.    

ESE - 13.12.12

Jólaskákmót í Vin á mánudaginn!

Skákfélag Vinjar og Skákakademían bjóða til Jólaskákmóts í Vin, mánudaginn 17. desember klukkan 13. Mótið er öllum opið og sannkallaður jólaandi mun svífa yfir vötnum.

Tefldar verða 6 umferðir með 7 mínútna umhugsunartíma og eru veitt verðlaun í ýmsum flokkum, m.a. fyrir bestan árangur kvenna, barna á grunnskólaaldri, og félagsmanna í Vin.

Davíð Kjartansson sigraði á Jólaskákmótinu í fyrra eftir æsispennandi keppni og hlaut þá afar vegleg verðlaun, 1001 þjóðleið frá Sögum útgáfu.

Saga útgáfa mun einnig gefa vinninga núna og þá ekki af lakara taginu. Aðalverðlaun er hin marglofaða stórbók dr. Gunna um rokksögu Íslands, Stuð vors lands. Af öðrum vinningum má nefna metsölubókina um Gísla á Uppsölum, spennutrylli Óttars M. Norðfjörð, Una, og bækur um helstu goðsagnir fótboltans.

Skákáhugamenn ættu að fjölmenna í Vin á mánudaginn og mæta tímanlega á þetta skemmtilega mót. Ekki spillir að í leikhléi verður að vanda boðið upp á gómsætar veitingar.

Jólapakkamót Hellis fer fram 22. desember

Jólapakkaskákmót Hellis verður haldið laugardaginn 22. desember nk. í Ráðhúsi Reykjavíkur. Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 15. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.
 
Keppt verður í allt að 5 flokkum: Flokki fæddra 1997-1999, flokki fæddra 2000-2001, flokki fæddra 2002-2003 og flokki fæddra 2004 og síðar og peðaskák fyrir þau yngstu. Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.  Skráning á mótið fer fram á heimasíðu Hellis.