Jólaskák í Vin í dag!

Jólaskákmót verður haldið í Vin, athvarfi Rauða krossins Hverfisgötu 47, klukkan 13 í dag, mánudag. Tefldar verða sex umferðir með 7 mínútna umhugsunartíma og boðið upp á ljúffengar veitingar.

Blómlegt skáklíf er í Vin, sem er athvarf fyrir fólk með geðraskanir. Þar eru vikulegar skákæfingar og einu sinni í mánuði eru haldin hraðskákmót, sem njóta mikilla vinsælda hjá skákáhugamönnum úr öllum áttum.

Á Jólaskákmótinu í dag verða veitt ýmis verðlaun, m.a. fyrir bestan árangur eldri borgara, kvenna og barna á grunnskólaaldri, auk þess sem nokkrir félagsmenn úr Skákfélagi Vinjar verða heiðraðir.

Allir eru velkomnir í Vin og eru keppendur hvattir til að mæta tímanlega. Þátttaka er ókeypis. Að mótinu standa Skákfélag Vinjar og Skákakademían.

Bragi verðskuldaður Íslandsmeistari, Stefán sigraði á ,,stórmeistaramótinu" en Oliver Aron var ein aðalstjarnan

Bragi Þorfinnsson er sannarlega verðskuldaður Íslandsmeistari í hraðskák 2012, en hann varð efstur á Friðriksmótinu í Landsbankanum, ásamt Hjörvari Steini Grétarssyni og Jóni Viktori Gunnarssyni. Bragi sigraði 4 stórmeistara af 5 sem hann mætti: Jóhann Hjartarson, Stefán Kristjánsson, Henrik Danielsen og Hannes H. Stefánsson.

Hjörvar Steinn tefldi við 4 stórmeistara og hlaut 3 vinninga gegn þeim. Hann sigraði Þröst Þórhallsson og Stefán Kristjánsson, en gerði jafntefli við Hannes Hlífar og Jóhann.

Jón Viktor mætti 3 stórmeisturum og hlaut 2 vinninga. Hann sigraði Helga Áss og Jón L. Árnason, en tapaði fyrir Jóhanni Hjartarsyni.

Árangur Braga á mótinu jafngildir 2538 stigum, Hjörvar tefldi upp á 2505 og Jón Viktor 2422.

Áhugavert er að skoða ,,stórmeistarakeppnina" innan mótsins en hvorki fleiri né færri en 8 stórmeistarar voru mættir til leiks, og heyrir til tíðinda að enginn þeirra náði einu af efstu sætunum þremur.

Stefán Kristjánsson sigraði í stórmeistarakeppninni, hlaut 3,5 vinning af 5. Hann sigraði Helga Ólafsson, Jón L. og Hannes Hlífar, gerði jafntefli við Henrik Danielsen en tapaði fyrir Jóhanni. Stefán tapaði auk þess fyrir Braga og og Hjörvari.

Hannes Hlífar tefldi við 4 kollega sína. Hann sigraði Helga og Þröst, gerði jafntefli við Henrik en tapaði fyrir Stefáni. Hannes tapaði líka fyrir Braga, sem fyrr sagði.

Henrik Danielsen tefldi við 3 aðra stórmeistara og gerði jafnmörg jafntefli, gegn Jóhanni, Stefáni og Hannesi. Hann tapaði fyrir Braga og Einari Hjalta Jenssyni.

Jóhann Hjartarson hlaut sömuleiðis 1,5 vinning af 3 gegn öðrum stórmeisturum. Hann tapaði fyrir Helga, sigraði Stefán og gerði jafntefli við Henrik. Þá mátti hann einnig lúta í gras fyrir nýja Íslandsmeistaranum.

Helgi Ólafsson tapaði fyrir Stefáni og Hannesi, en sigraði Jóhann Hjartarson. Þriðja tapskák Helga á mótinu var gegn Birni Þorfinnssyni.

Jón L. tefldi aðeins við tvo kollega, sigraði Þröst en tapaði fyrir Stefáni. Þá tapaði hinn gamalreyndi stórmeistari einnig fyrir Stefáni Bergssyni og Jóni Viktori.

Þröstur mátti sætta sig við tap í þeim tveimur skákum sem hann tefldi við aðra stórmeistara, gegn Jóni L. og Hannesi. Þröstur tapaði líka fyrir Hjörvari Steini og Magnúsi Erni Úlfarssyni.

Helgi Áss Grétarsson var eini stórmeistarinn sem ekki tefldi við neinn af kollegum sínum. Hann tapaði  fjórum skákum, gegn þeim Þorsteini Þorsteinssyni, Birni Þorfinnssyni, Jóni Viktori og Oliver Aron Jóhannessyni.

Sá síðastnefndi var svo sannarlega ein aðalstjarna mótsins. Þessi 14 ára Rimaskólapiltur lét sér ekki nægja að leggja stórmeistara að velli, hann sigraði líka FIDE-meistarana Róbert Lagerman, Guðmund Gíslason og Tómas Björnsson. Árangur Olivers Arons jafngildir 2342 skákstigum!

Hér er hægt að rýna betur í úrslitin og frammistöðu einstakra manna á þessu bráðskemmtilega og vel heppnaða móti.

Myndaalbúm (HJ)

Stórmeistararnir áttu ekki roð í alþjóðlegu meistarana - Bragi Þorfinnsson Íslandsmeistari í hraðskák

 

 

Átta stórmeistarar voru með á Friðriksmóti Landsbankans - Íslandsmótinu í hraðskák, sem fram fór í dag í útibúi bankans á Austurstræti. Þeir áttu hins vegar ekki roð við alþjóðlegu meisturunum en þrír slíkir urðu efstir og jafnir þeir; Bragi Þorfinnsson (2484), Hjörvar Steinn Grétarsson (2516) og Jón Viktor Gunnarsson (2413). Eftir stigaútreikning var Bragi úrskurðaður sigurvegari og varð því Íslandsmeistari í hraðskák í fyrsta sinn.

 

 

Áttatíu skákmenn tóku þátt í þessu afar vel skipaða og fjölmenna móti. Oliver Aron Jóhannesson (1998) vakti mikla athygli fyrir frábæra frammistöðu en hann lagði meðal annars stórmeistarann Helga Áss Grétarsson (2464) að velli. Oliver var einnig hæstur að vinningum þeirra sem hafa minna en 2200 og 2000 skákstig en þar sem hver keppandi má bara fá ein aukaverðlaun varð hann að láta duga unglingaverðlaunin. Stigaverðlaunin hlutu Dagur Ragnarsson, í flokki skákmanna undir 2200 skákstigum, og Jorge Fonsesca, í flokki skákmanna undir 2000 skákstigum. Lenka Ptácníková hlaut kvennaverðlaun og Gunnar Nikulásson var útdreginn í happdrætti mótsins og fékk vinning upp á 10.000 kr.

Í verðlaunaafhendingunni klöppuðu svo áhorfendur sérstaklega fyrir Friðriki Ólafssyni þegar ljóst var að hann hefði tryggt sigur heldri borgara á skákkonum í Tekklandi.

 

Gunnar Björnsson og Ólafur S. Ásgrímsson voru skákstjórar. Þorsteinn Þorsteinsson, útibússtjóri í útibúinu afhendi svo verðlaunahöfunum sigurlaunin en hann lék jafnframt fyrsta leik mótsins í skák Jóhanns Hjartarson og Mikaels Jóhanns Karlssonar.

 

 

Hrafn Jökulsson á heiðurinn á glæsilegu myndaalbúm mótsins.

Röð efstu manna:

• 1. AM Bragi Þorfinnsson (2484) 8,5 v.
• 2. AM Hjörvar Steinn Grétarsson (2516) 8,5 v.
• 3. AM Jón Viktor Gunnarsson (2413) 8,5 v.
• 4.-8. SM Jóhann Hjartarson (2592), AM Björn Þorfinnsson (2386), SM Hannes Hlífar Stefánsson (2512), SM Helgi Ólafsson (2547) og AM Arnar Gunnarsson (2440) 8 v.
• 9.-12. SM Henrik Danielsen (2507), SM Stefán Kristjánsson (2486), SM Jón L. Árnason (2498) og FM Einar Hjalti Jensson (2284) 7,5 v.

Heildarúrslit má finna á Chess-Results.

Aukaverðlaun hlutu:

• Kvennaverðlaun: Lenka Ptácníková 6,5 v.
• Unglingaverðlaun: Oliver Aron Jóhannesson 7 v.
• Undir 2200: Dagur Ragnarsson 6 v.
• Undir 2000: Jorge Fonsesca 6 v.
• Útdreginn heppinn keppandi: Gunnar Nikulásson

Tenglar:

• Úrslitin á Chess-Results
• Myndaalbúm (HJ)
• Frétt Stöðvar 2
• Frétt RÚV (26:40) 

Friðrik tryggði sigur heldri borgara gegn skákkonum

 

Friðrik Ólafsson (2419) fór mikinn í lokaumferðum skákkeppni á milli heldri borgara og skákkvenna sem lauk í dag í Podebrady í Tékklandi. Í lokaumferðinni, sem fram fór í dag, vann Friðrik rússnesku skákkonuna Alina Kaslinskaya (2344), sem verður meðal keppenda á N1 Reykjavíkurskákmótinu, í glæsilegri skák. Heldri borgarar unnu umferð dagsins 3-1 og keppnina samtals 17-15. Merkilegt, ekki síst í ljósi þess að þeir voru 5 vinningum undir eftir 3 umferðir. Heldri borgarinnar unnu hins vegar síðustu fimm umferðirnar! Friðrik hlaut 4 vinninga af 8 mögulegum og vakti athygli fyrir kröftuga og mjög skemmtilega taflmennsku.

Í liði heldri skákmanna voru auk Friðriks þeir Romanish (2530), Hort (2455) og Uhlmann (2310) en kvennaliðið skipupu þær Gunina (2514),  Sachdev (2400), Kaslinskaya (2344) og Havlikova (2310). Tefld var tvöföld umferð, þ.e. allir heldri skákmennirnir tefldu tvisvar við hverja skákkonu.

• Heimasíða mótsins 
• Beinar útsendingar

Skákþáttur Morgunblaðsins: Magnús Carlsen hefur slegið stigamet Kasparovs

Þegar fjórum umferðum er lokið af stórmótinu London Classic, þar sem notast er við þriggja stiga regluna, hefur Magnús Carlsson náð forystu með 3½ vinning eða 10 stig og hefur tekist það sem fáir töldu mögulegt, að slá stigamet Garrí Kasparovs frá árinu 1999 uppá 2851 elo-stig. Stig Magnúsar voru á fimmtudaginn reiknuð uppá 2857 elo.

Ýmsir fullyrða að kerfislæg villa hafi hreiðrað um sig í kerfinu, þar sé árviss verðbólga uppá sjö elo-stig og allur samanburður milli þessara aðila sé ómarkviss. Þess utan hafi Kasparov náð óbirtum stigum uppá 2856,7 og á bak við árangur hans voru sjö heimsmeistaraeinvígi og nær óslitin sigurganga í meira en 20 ár. Og tilþrif hans við skákborðið voru á flesta hátt stórfenglegri en þau sem Norðmaðurinn býður uppá.

Magnús Carlsson sem varð 22 ára þann 30. nóvember sl. hefur enn ekki náð að sanna sig á vettvangi heimsmeistarakeppninnar. Handhafi titilsins, Anand, kemur þó ekki vel út úr neinum samanburði. Hann er búinn að gera jafntefli í öllum skákum sínum í London og hefur aðeins unnið tvær kappskákir á þessu ári og ekki unnið skák í síðustu 17 tilraunum. Skákir hans eru einkennilega bragðdaufar og skákheimurinn saknar að sumu leyti þessara stórbrotnu karaktera sem riðu um héruð hér áður fyrr.

Hinn dagfarsprúði Magnús teflir af mikilli hörku og til sigurs hvort sem hann hefur hvítt eða svart. Hann er útsjónarsamur í vörn og tekst oft að leggja andstæðinga sína að velli í tvísýnum endatöflum. Í fyrstu umferð Lundúna-mótsins vann hann Luc McShane. Englendingurinn vann viðureign þeirra á þessu sama móti í fyrra og aftur náði hann að byggja upp vænlega stöðu, en gáði ekki að sér á mikilvægu augnabliki og Magnús náði að losa sig út úr þröngri stöðu og eftir það saumaði hann hægt og bítandi að McShane:

Luc McShane - Magnús Carlsen

Spænskur leikur

1.e4 e5 2. Rf3 Rc6 3. Bb5 Rf6 4. O-O Rxe4 5. He1

Berlínar-afbrigðið sem kemur upp eftir 5. d4 Rd6 6. Bxc6 dxc6 7. dxe5 Rf5 8. Dxd8+ Kxd8 virðist henta skákstíl Norðmannsins betur.

5. ... Rd6 6. Rxe5 Be7 7. Bf1 Rf5 8. Rf3 O-O 9. d4 d5 10. g3 Bf6 11. c3 He8 12. Hxe8+ Dxe8 13. Bf4 Dd8 14. Bd3 Rfe7 15. Ra3 a6 16. Rc2 Bf5 17. Bxf5 Rxf5 18. g4 Rfe7 19. Re3 g6 20. Df1 Dd7 21. Dh3 Bg7 22. Dg3 Hc8 23. g5 Rd8 24. Be5 Re6 25. Bf6!

Eftir þennan sterka leik á svartur erfitt með að losa um sig. Hann þolir alls ekki uppskipti á f6.

25. ... He8 26. Re5 Dd6 27. Kh1?

Ónákvæmur leikur. Sjálfsagt var 27. H4 og svartur á erfitt með að losa um sig.

27. ... Rxg5!

Grípur tækifærið. Svartur fær losað um sig og hefur aðeins betri peðastöðu eftir uppskiptin.

28. Bxg5 f6 29. Bxf6 Dxf6 30. He1 c6 31. Kg2 Rc8 32. R3g4 Dd8 33. Rd3 Hxe1 34. Rxe1 Rd6 35. Rd3 Rf5

Og nú er svartur kominn með aðeins betra tafl.

36. Dh3 Bf8 37. Re3 Dg5+ 38. Kf1 Rxe3+ 39. fxe3 Kg7 40. Rf4 Df6 41. Ke2 Bd6 42. Dg4 Kf7 43. h3 h5 44. Dc8 De7 45. Rd3 Kf6 46. b3 Kg5! 47. c4 Kh4!

Kóngurinn ræðst inn. Virðist djörf ákvörðun í endatafli með drottningum á borðinu en peðin skýla honum vel og riddarinn er skrefstuttur.

48. c5 Bg3 49. b4 Df7 50. a4 g5 51. Kd2 Bh2 52. Re1 Kg3 53. Rc2 Bg1 54. Dd8 Kh4 55. Dc8 Bf2 56. Ke2 Kg3 57. Dd8 Df5 58. Kd2 Kxh3 59. b5 g4 60. bxc6 bxc6 61. Rb4 g3 62. Rd3 g2

- og hvítur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 9. desember

Skákþættir Morgunblaðsins

[Event "London Chess Classic"] [Site "London ENG"] [Date "2012.12.01"] [EventDate "2012.12.01"] [Round "1"] [Result "0-1"] [White "Luke McShane"] [Black "Magnus Carlsen"] [ECO "C67"] [WhiteElo "?"] [BlackElo "?"] [PlyCount "124"] 1.e4 e5 2.Nf3 Nc6 3.Bb5 Nf6 4.O-O Nxe4 5.Re1 Nd6 6.Nxe5 Be7 7.Bf1 Nf5 8.Nf3 O-O 9.d4 d5 10.g3 Bf6 11.c3 Re8 12.Rxe8+ Qxe8 13.Bf4 Qd8 14.Bd3 Nfe7 15.Na3 a6 16.Nc2 Bf5 17.Bxf5 Nxf5 18.g4 Nfe7 19.Ne3 g6 20.Qf1 Qd7 21.Qh3 Bg7 22.Qg3 Rc8 23.g5 Nd8 24.Be5 Ne6 25.Bf6 Re8 26.Ne5 Qd6 27.Kh1 Nxg5 28.Bxg5 f6 29.Bxf6 Qxf6 30.Re1 c6 31.Kg2 Nc8 32.N3g4 Qd8 33.Nd3 Rxe1 34.Nxe1 Nd6 35.Nd3 Nf5 36.Qh3 Bf8 37.Ne3 Qg5+ 38.Kf1 Nxe3+ 39.fxe3 Kg7 40.Nf4 Qf6 41.Ke2 Bd6 42.Qg4 Kf7 43.h3 h5 44.Qc8 Qe7 45.Nd3 Kf6 46.b3 Kg5 47.c4 Kh4 48.c5 Bg3 49.b4 Qf7 50.a4 g5 51.Kd2 Bh2 52.Ne1 Kg3 53.Nc2 Bg1 54.Qd8 Kh4 55.Qc8 Bf2 56.Ke2 Kg3 57.Qd8 Qf5 58.Kd2 Kxh3 59.b5 g4 60.bxc6 bxc6 61.Nb4 g3 62.Nd3 g2 0-1

Átta stórmeistarar með í Friðriksmóti Landsbankans sem hefst kl. 13

 

Hvorki meira né minna en átta stórmeistarar taka þátt í Friðriksmóti Landsbankans - Íslandsmótinu í hraðskák sem fram fer í dag í útibúi bankans í Austurstræti. Sjálfur Friðrik Ólafsson, er reyndar vant við látinn þar sem hann er tefla með úrvalsliði heldri borgara gegn skákkonum í Tékklandi en biður fyrir kærri kveðju til keppenda og gesta.

Hér er um ræða bæði langsterka og fjölmennasta hraðskákmót ársins. Aðalskák hverrar umferðar verður varpað á risaskjá og veitingar eru á skákstað bæði fyrir keppendur og gesti. 

Stórmeistararnir átta eru: Jóhann Hjartarson (2592), Helgi Ólafsson (2547), Hannes Hlífar Stefánsson (2512), Henrik Danielsen (2507), Jón L. Árnason (2498), Stefán Kristjánsson (2486), Helgi Áss Grétarsson (2464) og, sjálfur Íslandsmeistarinn í skák, Þröstur Þórhallsson (2441). Sex alþjóðlegir meistarar taka þátt og þeirra á meðal landsliðsmaðurinn Hjörvar Steinn Grétarsson (2516). Keppendalistann í heild sinni má finna á Chess-Results.

Mótið hefst kl. 13 og stendur til kl. 16.30. Tefldar verða 11 umferðir með 7 mínútna umhugsunartíma. Efsti keppandi mótsins verður Íslandsmeistari í hraðskák. Verði tveir eða fleiri efstir ræður stigaútreikningur. Sigurvegari mótsins í fyrra og núverandi Íslandsmeistari í hraðskák er Henrik Danielsen.

Hægt er að skrá sig á biðlista á mótið en upplýsingar um stöðu skráninga má finna hér. Skráðir keppendur, sem ekki geta verið með eru beðnir um að láta vita með tölvupósti í netfangið [e-mail] til að aðrir geti komist að.

Verðlaun eru sem hér segir:

• 1) 100.000 kr.
• 2)   60.000 kr.
• 3)   50.000 kr.
• 4)   30.000 kr.
• 5)   20.000 kr.

Aðalverðlaun skiptast séu menn jafnir að vinningum.  

Aukaverðlaun:

• Efsti unglingurinn 16 ára og yngri: 10.000 kr.
• Efsta konan: 10.000 kr.
• Efsti maður með 2200 stig og minna: 10.000 kr.
• Efsti maður með 2000 stig og minna: 10.000 kr.
• Útdreginn heppinn keppandi: 10.000 kr.

Aukaverðlaun eru miðað við nýjustu útgefin íslensk skákstig. Reiknuð eru stig séu menn jafnir og efstir. 

Þetta er níunda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga.

Fyrri sigurvegarar:

• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

Skákgyðjan í jólaskapi: Stuð vors lands í Vin á mánudaginn!

Það er hægt að bóka góða stemmningu, gómsætar veitingar og vegleg verðlaun á Jólaskákmóti Vinjar, Hverfisgötu 47, sem haldið verður á mánudaginn klukkan 13. Tefldar verða sex umferðir með 7 mínútna umhugsunartíma.

Sigurvegarinn fær veglegan bikar og nafnbótina ,,Jólasveinninn 2012" og auk þess eru veitt verðlaun í ýmsum flokkum. Sigurlaunin eru heldur ekki af lakari endanum: Stórbókin ,,Stuð vors lands" eftir dr. Gunna, sem geymir samanlagða poppsögu Íslands og er einn af kjörgripum jólabókaflóðsins.

Sögur útgáfa, sá holli vinur Skákfélags Vinjar, gefur fleiri vinninga, m.a. spennutryllinn ,,Una" eftir Óttar Norðfjörð, ,,Svörtu bókina" eftir Veru Illugadóttur og Helga Hrafn Guðmundsson, ,,Gísla á Uppsölum" eftir Ingibjörgu Reynisdóttur og hinar fjörlegu fótboltabækur Illuga Jökulssonar.

Veitt verða verðlaun fyrir efstu þrjú sætin, en auk þess fyrir bestan árangur kvenna, barna á grunnskólaaldri, eldri borgara og liðsmanna Vinjar.

Þá verður tækifærið notað og nokkrir liðsmenn í Skákfélagi Vinjar heiðraðir fyrir framfarir og góða ástundun á árinu.

Að mótinu standa Skákfélag Vinjar og Skákakademían. Allir eru velkomnir í Vin og þátttaka er ókeypis.

Hilmir Freyr sigurvegari Jólamóts Skákakademíu Kópavogs og Skákskólans

 

Hilmir Freyr Heimisson sigraði á Jólamóti Skákakademíu Kópavogs og Skákskóla Íslands sem fram fór í Stúkunni á Kópavogsvelli á föstudaginn. Skákakademía Kópavogs og Skákskólinn haft með sér samstarf undanfarin misseri og hefur Helgi Ólafsson haft yfirumsjón með kennslu og þjálfun á þessum vettvangi. Við upphaf mótsins var hin nýstofnaða skákdeild Breiðabliks kynnt en fulltrúi  hennar, Halldór Grétar Einarsson vann við undirbúning mótsins og sá um skákstjórn ásamt Helga. 

 

Sigurvegarinn  Hilmir Freyr Heimisson var búinn að vinna allar skákir sína eftir fyrstu umferðirnar af sjö en geri síðan stutt jafntefli við Sóley Lind Pálsdóttur í lokaumferðinni. Sóley Lind varð í 2. sæti. Búist var við barátt Hilmis Freys og Vignis Vatnars um efsta sætið en í fyrstu umferð tapaði Vignir Vatnar óvænt fyrir Hafþóri Helgasyni. Lokamótið fór fram í einum flokki en jafnframt keppt var um verðlaun í flokki þeirra sem hafa íslensk eða alþjóðleg elo-stig og jafnframt keppt í flokki stigalausra. Veitt voru ein verðlaun fyrir bestan árangur stúlkna. Lokaniðurstaðan í mótinu varð þessi.

Verðlaunahafar í lokamóti Skákakademíu Kópavogs og Skákskóla Íslands. Mótsstig voru látin skera úr um ef keppendur voru jafnir að vinningum. 

Stigamenn:

1. Hilmar Freyr Heimisson 6 ½ v. 2. Felix Steinþórsdóttir 5 v. 3. Vignir Vatnar Stefánsson 5 v.

Bestur árangur stúlkna:

1. Sóley Lind Pálsdóttir 5 ½   af 7.   - varð í 2. sæti í mótinu

Stigalausir:

1. Jason Andri Gíslason 4 v. 2. Benedikt Árni Björnsson 4 v. 3. Aron Ingi Woodard 4 v.

 

Áður en jólamótið hófst voru afhentar viðurkenningar fyrir lausnir á brons- og silfurverkefnum sem  samstarfsaðilarnir hafa búið til og fengu þeir sem lokið hafa þessum verkefnum bæklinginn og merkin. Fjórir fengu bronsmerki þ.á.m.sigurvegarinn í stigalausa flokknum Jason Andri en flestir voru að kljást við silfurmerkin.  Enn hefur enginn fengið gullmerkið.

Myndaalbúm (GB, HGE og Kó)

Friðrik með jafntefli í dag

Friðrik Ólafsson (2419) gerði stutt jafntefli við tékknesku skákkonuna Kristýna  (2310) í sjöundu og næstsíðustu umferð í keppni heldri borgara og skákkvenna sem fram fór í Tékklandi í dag. Heldri borgararnir unnu umferð dagsins sína fjórðu umferð í röð í dag og hafa nú jafnað metin 14-14 en eftir að hafa verið 5 vinningum undir eftir 3 umferðir.  Wolfgang Uhlmann (2310) var eini sigurvegari dagsins. 

Lokaumferðin fer fram á morgun og hefst klukkustund fyrr en venjulega eða kl. 13. Þá teflir Friðrik við rússnesku skákkonuna Alina Kaslinskaya (2344).

Friðrik getur því ekki tekið þátt í sjálfu Friðriksmótinu að þessu sinni en heiðrar þó heldur betur mótið og íslenska skákhreyfingu með því að tefla á þessu afar skemmtilega skákmóti.

Í liði heldri skákmanna eru auk Friðriks þeir Romanish (2530), Hort (2455) og Uhlmann (2310) en kvennaliðið skipa þær Gunina (2514),  Sachdev (2400), Kaslinskaya (2344) og Havlikova (2310). Tefld er tvöföld umferð, þ.e. allir heldri skákmennirnir tefla tvisvar við hverja skákkonu.

• Heimasíða mótsins 
• Beinar útsendingar

KR-pistill: Fimm Gunnarar einum of ?

Það ríkti hálfgert stríðástand í Kaplaskjólinu sl. mánudag þegar 26   tafláráttupersónuleikaraskaðirskákgeggjarar streymdu þangað til vikulegra stríðsleika á 64 reitum. Á þeim á bæ grafa menn ekki stríðsaxirnar þó jólin séu í nánd enda allt hamhleypur á skákborðinu sem ekkert fær stöðvað þegar máttækifæri gefast.  Ægir þar saman hágæða taflmennsku, farsakenndum skáktilraunum eða hastarlegum rústabjörgunum allt eftir efnum og ástæðum.

 Til bæta gráu ofan á svart var engu líkara en forseti Skáksambandsins hefði fengið "bráðaskákóþreyjupersónuleikastreituröskunnartilfelli" því hann birtist þar allt í einu óvænt. Með þangaðkomusinni tókst honum af stakri útsjónarsemi að slá  þrjár flugur í einu höggi,  það að heiðra einn öflugasta skákklúbb landsins með nærveru sinni, tefla sér til óbóta og afþreyingar og að komast á pall (fyrir gestrisnisakir?). Fréttaritari var ekki á staðnum og því ekki til vitnis um nánari framgang mála.   

Það vakti sértaka athygli að hvorki meira né minna en 5 GUNNARAR voru með í mótinu,  nánast fimmti hver keppandi. Spurning um hvort ekki verði að setja hámark á þetta,  því það getur reynst sumum ofraun að mæta svo mörgum Gunnurum í röð.  Stundum heyrðust kvartanir yfir því á árum áður þegar keppendur mættu of mörgum nöfnum í sama mótinu svo sem Ólafssonum i tveimur umferðum í röð eða nú Þorfinnssonum.

Fimm nafnar kann að vera er einum of mikið í ljósi þess að í Wikipediu alfræðiorðabókinni er þessi skýring gefin á heitinu Gunnar(r): "Gunnar is a male first name of Nordic origin (Gunnarr)The name Gunnar means fighter, soldier and attacker, but mostly is referred to by the Viking saying which mean Brave and Bold warrior".  Vissulega viðeigandi nafn yfir skákvígamenn eða meistara, sem betra er að vera á verði gegn.   

Gunnar Birgisson, (léttfeti) sigraði með 9.5 vinningi af 13 mögulegum,  Gunnar Björnsson (hellisbúi) í 2.-3. sæti á eftir Sigurði Áss Grétarssyni (spútnik) með 9v, en lægri á stigum, hinn sigursæli öldungur Gunnar Gunnarsson var ekki langt undan, Gunnar Skarphéðinsson og Gunnar Finnsson í miðjum hópi að þessu sinni með 50%, sem þykir gott í jafnmiklu hörkuhraðskákmóti sem þessu.

Sjá meðf. mótstöflu.

 

 

Þrátt fyrir ítarlega athuganir og bollaleggingar hefur lagagúrúnum KriSt formanni ekki tekist að finna lagatæknileg rök eða klæki til þess að aflétta helgihaldi af mánudagskvöldunum 24. desember og 31. desember og því falla áformaðir skákleikar þá daga niður að þessu sinni.  

JÓLAHRAÐskákmót KR fer hins vegar fram með pomp og prakt á mánudagskvöldið kemur þann 17. desember og þá verður eins og jafnan glatt á hjalla ef að líkum lætur. Ýtt verður á viðburðabjölluna kl. 19.30  Jólapakkar og "vinninga" happdrætti.

ESE- skákþankar 15.12.12