Skemmtilegar skákæfingar í Vin

Skáklífið blómstrar í Vin, athvarfi Rauða krossins við Hverfisgötu 47. Í dag var hefðbundin mánudagsæfing og var góð mæting hjá gömlum og nýjum liðsmönnum.

Æfingar eru alla mánudaga klukkan 13, en í næstu viku verður sú breyting að æfingin verður þriðjudginn 23. október. Það er vegna þess að nú er verið að undirbúa stórfellda andlitslyftingu á borð- og setustofum, og því verður Vin lokað í nokkra daga.

Mánudaginn 29. október er svo röðin komin að hraðskákmóti í Vin, en slík mót eru haldin einu sinni í mánuði yfir vetrartímann og njóta mikilla vinsælda skákmanna á öllum aldri.

Allir eru velkomnir á skákæfingar og mót í Vin, og vel er tekið á móti nýjum gestum.

Myndir frá æfingu dagsins (Hrafn Jökulsson og Rafn Jónsson)

Friðrik í beinni frá minningarmóti um Larsen í Álaborg

Fyrsti stórmeistari Íslendinga, Friðrik Ólafsson (2431), situr nú að tafli á minningarmóti um Bent Larsen sem fram fer í Álaborg í Danmörku. Um er að ræða öldungamót og er Friðrik stigahæstur keppenda. Í fyrstu umferð, sem nú er í gangi teflir Friðrik við belgíska FIDE-meistarann Jan Rooze (2286). 

61 skákmaður tekur þátt í mótinu og þar á meðal 4 stórmeistarar.  Það eru auk Friðriks; Miso Cebalo (2416), Króatíu, Oleg Chernikov (2415), Rússlandi og þýska goðsögnin Wolfgang Uhlmann (2325). Tefldar eru 7 umferðir.

• Heimasíða mótsins 
• Beinar útsendingar (hefjast kl. 9)

Hraðskákmót TR fer fram á sunnudag

Hraðskákmót Taflfélags Reykjavíkur verður haldið í húsnæði félagsins að Faxafeni 12 sunnudaginn 21. október kl. 14:00

Tefldar verða 2x7 umferðir eftir Swiss Perfect kerfi. Umhugsunartími 5 mín á skák.

Þátttökugjald kr 500 fyrir 16 ára og eldri, en frítt fyrir 15 ára og yngri.

Þrenn verðlaun verða i boði.

Að loknu hraðskákmótinu fer fram verðlaunaafhending fyrir Tölvuteksmótið 2012 - Haustmót T.R.

Núverandi Hraðskákmeistari T.R. er Halldór Pálsson.

Skákgleði á Borgarbókasafni

Það var glatt á hjalla á Borgabókasafninu í gær. Skákakademían stóð þá fyrir skákkynningu meðal barna og ungmenna. Fjölmargar fjölskyldur nýttu sér tækifærið og komu þau mörg systkinin að tefla og fræðast um hvaðeina varðandi skákíþróttina.

Foreldrum voru kynntar æfingar og skáknámskeið í Reykjavík og nágrenni. Yngsti þátttakandinn var hinn rúmlega 3 ára gamli Natan sem tefldi slavneska vörn! Að loknum deginum var safninu fært tafl að gjöf, og er nú hægt að tefla á Borgarbókasafninu.

Skákvæðing bókasafnana heldur áfram á næstunni og næsta sunnudag frá 14-15 býður Skákakademían upp á skákkennslu á bókasafni Árbæjar, Ársafni. Kennslan verður svo fram í desember á sunnudögum, alltaf frá 14-15.

Myndaalbúm (HJ)

Hraðkvöld hjá Helli í kvöld

Taflfélagið Hellir heldur hraðkvöld mánudaginn 15. október nk. og hefst taflið kl. 20:00. Ef þátttaka er næg er stefnt að því að tefla í tveimur jafnsterkum riðlum allir við alla með 5 eða 7 mínútna umhugsunartíma. Að því loknu verður tekinn bráðabani milli þeirra sem eru í sömu sætum í hvorum riðli. Ef þetta næst ekki verður hefðbundið hraðkvöld. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Einnig verður dreginn út af handahófi annar keppandi, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákæfingar hefjast á Akranesi í dag

Mánudaginn 15. október ætlar Taflfélag Akraness að byrja aftur með skákæfingar eftir gott sumarhlé. Munu þær verða á mánudagskvöldum í vetur klukkan 20.00 í Fjölbrautarskóla Vesturlands. Það kostar ekkert að vera með en frjáls framlög eru auðvitað alltaf vel þeginn. Akurnesingar og nærsveitungar sem og aðrir landsmenn eru því hér með hvattir til að sýna sig og máta aðra á Akranesi í framtíðinni.

Fyrir hönd Taflfélags Akraness,

Valgarð Ingibergsson

Tómas Veigar skákmeistari SA

Í dag fór fram síðusta umferð haustmóts SA - Arionbankamótsins. Eins og ráð var fyrir gert var lokaumferðin æsispennandi, enda mótið afar jafnt. Tómas Veigar hafði hálfs vinnings forystu þegar sest var að tafli, en vitað var að hann átti við ramman reip að draga þar sem Sveinbjörn var sem byggir á rúmlega hálfrar aldar reynslu í viðskiptum við kerlinguna Caissu. 

Skammt á hæla Tómasi kom svo hjörð blóðþystra skákjöfra og ætluðu allir sér sigur í skákum dagsins. Smám saman náðu keppinautar hans að knýja fram vinning í sínum skákum; Sigurður A lagði að velli lærisvein sinn Jón Kristin og nafni hans Eiríksson fékk fórnað drottningu sinni guðunum fyrir mátsókn gegn Ólafi Kristjánssyni. Þá vann Ólafsson Smári sitt riddaraendatafl gegn Simanovits hinum bráðgjöra. Voru þeir félaga því þrír komnir í forystu með 5 vinninga og Tómas með altmeister enn í tvísýnum fangbrögðum. Æddi sá síðarnefndi á Veigarinn með peðaflóði miklu og allskyns hótunum. Svo lyktaði þó bardaganum að þegar Sveinbjörn átti kost á því að stilla upp jafnri stöðu og hugsanlega knýja fram skiptan hlut (sem hefði þýtt fjórskipaða forystu og umfangsmikla úrslitakeppni), þá varð honum hugsað um of til sælustunda með skákgyðjunni og náði ekki að þrýsta á klukkuhnappinn í tæka tíð. Varð hann að hlíta þeim grimmu örlögum sem ástmenn Caissu hafa löngum þurft að búa við - að tapa skákinni. Þar með var Tómas Veigar orðinn skákmeistari félagsins í fyrsta sinn. Er hann vel að þeim titli kominn.

• Heimasíða mótsins
• Chess-Results

Jón Viktor hefur tryggt sér sigur á Tölvuteksmótinu

Alþjóðlegi meistarinn Jón Viktor Gunnarsson (2410) vann Jóhann H. Ragnarsson (2081) í áttundu og næstsíðustu umferð Tölvuteksmótsins - Haustmóts TR sem fram fór í dag. Jón Viktor hefur 7 vinninga og hefur tryggt sér sigur á mótinu. Lenka Ptácníková (2264), sem vann Sverri Örn Björnsson (2154) er í öðru sæti með 5½ vinning og Einar Hjalti Jensson (2305), sem vann Gylfa Þórhallsson (2156) er þriðji með 5 vinninga.

Sem fyrr eru Rimskælingar í efstu sætum b-flokksins. Jón Trausti Harðarson (1813) og Dagur Ragnarsson (1916) eru efstir með 5½ vinning en Oliver Aron Jóhannesson (2018) er þriðji með 5 vinninga. Staða Dags er best þar sem hann mætir Nökkva Sverrissyni (2012), sem er hættur í mótinu, í lokaumferðinni og er því öruggur með a.m.k. deilt efsta sæti.

Dawid Kolka (1603) er efstur í opnum flokki með 6 vinninga. Hilmir Freyr Heimisson (1711), Bjarnsteinn Þórsson (1335) og Vignir Vatnar Stefánsson (1596) eru í 2.-4. sæti með 5½ vinning.

Úrslit 8. umferðar í a-flokki:

 

Name	Rtg	Res.	Name	Rtg
Mikael Jóhann Karlsson	1933	½  -  ½	Kjartan Maack	2132
Einar Hjalti Jensson	2305	1  -  0	Gylfi Þór Þórhallsson	2156
Jóhann Hjörtur Ragnarsson	2081	0  -  1	Jón Viktor Gunnarsson	2410
Sævar Jóhann Bjarnason	2090	1  -  0	Daði Ómarsson	2206
Sverrir Örn Björnsson	2154	0  -  1	Lenka Ptácníková	2264

 

Staðan:

Rank		Name	Rtg	Club	Pts
1	IM	Jón Viktor Gunnarsson	2410	TB	7
2	WGM	Lenka Ptácníková	2264	Hellir	5½
3	FM	Einar Hjalti Jensson	2305	Goðinn	5
4	IM	Sævar Jóhann Bjarnason	2090	Vinjar	4½
5		Daði Ómarsson	2206	TR	3½
6		Mikael Jóhann Karlsson	1933	SA	3
7		Jóhann Hjörtur Ragnarsson	2081	TG	3
8		Gylfi Þór Þórhallsson	2156	SA	2½
9		Kjartan Maack	2132	TR	2½
10		Sverrir Örn Björnsson	2154	Haukar	2½

B-flokkur:

Röð efstu manna:

• 1.-2. Jón Trausti Harðarson (1813) og Dagur Ragnarsson (1916) 5½ v.
• 3. Oliver Aron Jóhannesson (2018) 5 v.

Nánar á Chess-Results

C-flokkur (opinn flokkur):

Röð efstu manna:

• 1. Dawid Kolka (1603) 6 v.
• 2.-4. Hilmir Freyr Heimisson (1711), Bjarnsteinn Þórsson (1335) og Vignir Vatnar Stefánsson 5½ v.

Sjá nánar á Chess-Results.

• Heimasíða TR
• Chess-Results
• Myndaalbúm (GB, ÞB og BJ)
• Myndaalbúm (TR-síða)

Skákþáttur Morgunblaðsins: Caruana langefstur í Sao Paulo

Indverski heimsmeistarinn Wisvanathan Anand hefur lítið verið í sviðsljósinu eftir fremur ósannfærandi titilvörn í einvíginu við Boris Gelfand í Moskvu sl. vor. Í hugum margra hefur Magnús Carlsen tekið stöðu hans sem fremsti skákmaður heims og á nýbirtum stigalista FIDE er Norðmaðurinn langefstur með 2843 stig.

Anand verður að láta sér lynda 7. sætið með 2780 stig. Á ofurmóti sem nú stendur yfir og er skipt á milli borganna Sao Paulo í Brasilíu og Bilbao á Spáni gefst Anand tækifæri til að sanna styrk sinn í keppni við Magnús, Aronjan, Caruana, Vallejo Pons og Karjakin. Eftir Brasilíu- hluta mótsins hefur hann gert jafntefli í öllum fimm skákum sínum.

Fabiano Caruana hefur óvænt náð miklu forskoti með 4 vinninga af fimm mögulegum. Heppnin hefur fylgt honum í nokkrum skákum, t.d. tókst honum að snúa við harla ógæfulegu endatafli gegn Magnúsi Carlsen í 1. umferð. Hann lætur ekki mikið yfir sér þessi ungi skákmaður sem varð efstur á síðasta Reykjavíkurskákmóti en hefur hægt og bítandi verið að þokast upp stigalistann og gæti eftir mótið náð á topp fimm listann:

Fabiano Caruana - Vallejo Pons

Frönsk vörn

1.e4 e6 2. d4 d5 3. e5

„Framrásin" nýtur sífellt meiri vinsælda. 3. Rc3 og 3. Rd2 er þó algengari leikur.

3. ... c5 4. c3 Rc6 5. Rf3 Db6 6. a3 Rh6 7. b4 cxd4 8. cxd4 Rf5 9. Be3 Bd7 10. Bd3 Rxe3 11. fxe3 g6 12. Rc3?!

Öruggara virðist 12. Rd2 ásamt - Rb3 við tækifæri. Kannski hefur Caruana sést yfir næsta leik hvíts.

12. ... Rxb4! 13. axb4 Bxb4 14. O-O Bxc3 15. Hc1 Hc8 16. Rg5! O-O 17. Dg4

Þó hvítur sé tveim peðum undir hefur hann allgóð færi. „Houdini" metur stöðuna jafna.

17. ... Bd2 18. Dh3 h5 19. Hxc8 Bxc8 20. Df3!

Lykilstaða, svartur getur varist hótununum 21. Bxg6 og 21. Rxf7 með tvennum hætti og velur lakari kostinn.

20. ... Dd8?

Hann varð að leika 20. .. Dc7 en hefur sennilega óttast 21. Bxg6 Bxe3+ 22. Dxe3 fxg6 23. Hf6! en á að halda velli með því að leika 23. ... Hxf6! 24. exf6 Bd7.

21. Rxf7 Bxe3+ 22. Kh1 Dh4 23. Bxg6 Bg5 24. Bh7+!

Gerir út um taflið, ef 24. ... Kxh7 þá vinnur 25. Rxg5+. Og 24. .. Kg7 er svarað með 25. Dd3! o. s.frv. Vallejo gafst upp.

Glæsilegur sigur Nansýjar Davíðsdóttur í Svíþjóð

Krakkar úr Rimaskóla gerðu ferð til Svíþjóðar á opna mótið í Västerås sem fram fór um síðustu helgi þar sem tefkt var í tveim styrkleikaflokkum.

Hin 10 ára gamla Nansý Davíðsdóttir stal senunni gjörsamlega í neðri flokknum þar sem tefldu 80 skákmenn með 1600 elo stig eða minna. Nansý hlaut 7½ vinning af átta mögulegum og vann öll þau verðlaun sem í boði voru, varð í 1. sæti, vann sérstök kvennaverðlaun, best keppenda undir 16 ára aldri og 13 ára aldri og vann einnig flokkaverðlaun.

Friðrik og Margeir á Íslandsmóti taflfélaga

Taflfélag Bolungarvíkur freistar þess að verja Íslandsmeistartatitil sinn á Íslandsmóti skákfélaga sem hófst í Rimaskóla á föstudagskvöldið. en fjórar fyrstu umferðir mótsins fara fram um helgina. Allmikil leynd hvílir yfir skipan liðanna. Taflfélag Reykjavíkur mun að öllum líkindum koma sterkt til leiks þetta árið og er jafnvel búist við að Friðrik Ólafsson og Margeir Pétursson, muni tefla fyrir sitt gamla félag um helgina.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 7. október 2012.

Skákþættir Morgunblaðsins

[Event "Bilbao Masters"] [Site "Sao Paulo BRA"] [Date "2012.09.28"] [EventDate "2012.09.23"] [Round "4"] [Result "1-0"] [White "Fabiano Caruana"] [Black "Francisco Vallejo-Pons"] [ECO "C02"] [WhiteElo "?"] [BlackElo "?"] [PlyCount "47"] 1.e4 e6 2.d4 d5 3.e5 c5 4.c3 Nc6 5.Nf3 Qb6 6.a3 Nh6 7.b4 cxd4 8.cxd4 Nf5 9.Be3 Bd7 10.Bd3 Nxe3 11.fxe3 g6 12.Nc3 Nxb4 13.axb4 Bxb4 14.O-O Bxc3 15.Rc1 Rc8 16.Ng5 O-O 17.Qg4 Bd2 18.Qh3 h5 19.Rxc8 Bxc8 20.Qf3 Qd8 21.Nxf7 Bxe3+ 22.Kh1 Qh4 23.Bxg6 Bg5 24.Bh7+ 1-0

Henrik með tvo sigra í dag

Henrik Danielsen (2524) gekk vel í dag á BSF Cup, alþjóðlegu móti sem fram fer í Brønshøj í Danmörku, en hann vann báðar skákir dagsins. Í þeirri fyrri vann búlgarska stórmeistarann Nikolai Ninov (2507) og í þeirri síðari Þjóðverjann unga Rasmus Svane (2394).  Henrik hefur 2½ og er í 4.-8. sæti. Danski alþjóðlegi meistarinn, Mads Andersen (2461) er efstur með 4 vinninga.

Á morgun teflir Henrik við danska alþjóðlega meistarann Nikolaj Mikkelsen (2431) og búlgarska stórmeistarann Krasimir Rusev (2549).

10 skákmenn taka þátt í a-flokknum og eru meðalstigin 2467 skákstig.  Henrik er næststigahæstur keppenda.

Tefldar eru tvær skákir á dag alla daga nema fyrsta keppnisdag.  Umferðirnar hefjast kl. 8 og 13:30.

• Heimasíða mótsins
• Beinar útsendingar