Hraðkvöld hjá Helli í kvöld

Taflfélagið Hellir heldur hraðkvöld mánudaginn 6. maí nk. og hefst taflið kl. 20:00. Tefldar verða 7 umferðir með sjö mínútna umhugsunartíma.  Teflt er í félagsheimili Hellis í Álfabakka 14a í Mjóddinni. Þetta er síðasta hraðkvöldið á vormisseri og munu keppendur gæða sér á afgöngum frá Stigamóti Hellis milli umferða.

Sigurvegarinn á hraðkvöldinu fær í verðlaun pizzu frá Dominos Pizzum. Einnig verður dreginn út af handahófi annar keppandi, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákmót í Rauðakrosshúsinu í dag

Skákfélag Vinjar heldur mót í hressilegu umhverfi í Rauðakrosshúsinu, Borgartúni 25, mánudaginn 6. júni. Mæting er um kl. 13 í skráningu því mótið hefst 13:15.

Tefldar verða sex umferðir með sjö mínútna umhugsunartíma og til að stýra herlegheitunum hefur verið leitað til nýkjörinna stjórnarmanna Skáksambandsins, Ingibjörgu Eddu Birgisdóttur og Róberts Lagerman.

Bókavinningar fyrir efstu sæti og happadrætti þannig að allir eiga séns.

Það verður pottþétt rjúkandi kaffi á boðstólnum hjá þeim í Borgartúninu.

Þú ert þvílíkt velkomin/n.

Skákþáttur Morgunblaðsins: Aljékín og efniviður Manntafls

Nokkur fengur fannst greinarhöfundi að því á sínum tíma að rekast á viðureign sem rakin er í sögunni Manntafl eftir Stefan Zweig. Lýsingin á viðureign nokkurra farþega með hinn dularfulla hr. B í broddi fylkingar við heimsmeistarann Czentovic undir þiljum á skipsferð til Suður-Ameríku er snilld. Að höfundur skuli hafi valið skák sem Aljékín tefldi árið 1922 sem efnivið opnar þá spurningu hvort Ajékín hafi lagt höfundi meira eitthvað meira til en þessa viðureign. Líkt og Zweig hraktist Aljékín undan báðum heimsstríðunum, upplifði októberbyltinguna 1917 og valdatöku bolsévika:

1892: Alexander Aljékín fæðist í Moskvu. Foreldrar af aðalsættum.

1916: Særist í bardögum fyrri heimsstyrjaldar. „Blindskákir" við hermenn gera spítaladvölina léttbærari

1919: Handtekinn sem njósnari hvítliða og bíður þess að vera tekinn af lífi í fangelsi Che-Ka í Odessa. Hermálaráðherrann Leon Trotsky þyrmir lífi hans.

1921: Flyst til Frakklands.

1928: Lýstur óvinur Sovétríkjanna af Krylenko forseta sovéska skáksambandsins.

1939: Staddur á Ólympíuskákmótinu í Buenos Aires þegar seinni heimsstyrjöldin brýst út.

1941: Greinar fullar fjandskapar við gyðinga birtast undir nafni hans í dagblaðinu Pariser Zeitung. Aljékín neitar síðar að hafa skrifað greinarnar.

1943: Verður viðskila við fjórðu eiginkonu sína.

1946: Stutt eftir að hafa móttekið einvígisáskorun frá Mikhail Botvinnik finnst Aljékín látinn við grunsamlegar aðstæður á hótelherbergi í strandbænum Estoril í Portúgal.

Viðureign Aljékín og Bogoljubow sem rímar skemmtilega við söguþráð Manntafls:

Pistyan 1922:

Aljékín - Bogolijubow

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O Be7 6. Rc3 b5 7. Bb3 d6 8. a4 b4 9. Rd5 Ra5 10. Ba2 Rxd5 11. Bxd5 c6 12. Ba2 c5 13. c3 Hb8 14. Bd5 O-O 15. d4 exd4 16. cxd4 c4 17. Be3 Be6 18. Bxe6 fxe6 19. d5 e5 20. Hc1 Dd7 21. Rg5 Bxg5 22. Bxg5 Hbc8 23. De2 h6 24. Bh4 Hf7 25. Bg3 Dxa4 26. f4 exf4 27. Bxf4 Db5 28. Bxh6 c3 29. Dg4 Dd7 30. Dxd7 Hxd7 31. bxc3 bxc3 32. Bd2 Hdc7 33. Bf4 Rb3 34. Bxd6 Hf7 35. Hxf7 Rxc1 36. Hf1 Rd3 37. Ba3 c2 38. d6

„En þegar McConnor snerti peðið til þess að ýta því upp á efsta reit, var gripið í handlegginn á honum, og við heyrðum rödd, sem hvíslaði lágt en ákaft: „Í guðs bænum! Ekki gera þetta!...Er þér komið upp drottningu, drepur hann hana samstundis með biskupnum á c1 og þér drepið aftur með riddaranum. En þá kemst hann með frípeð sitt á d7.... Þetta er næstum alveg taflstaðan sem Aljékín náði fyrstur manna í skákinni við Bogoljubow á stórmeistaramótinu í Pistyan árið 1922" .... Eigum við þá að fara með kónginn á g8 á h7? Já, já. Um að geta að hörfa. McConnor hlýddi og við slógum í glasið" *

38. ... Kh7

Czentovic kom hægt og bítandi að borðinu eins og hans var vandi og leit sem snöggvast á mótleik okkar. Síðan lék hann peðinu á kóngsvæng, nákvæmlega eins og hinn ókenndi bjargvættur okkar hafði sagt fyrir."

39. h4

„Fram með hrókinn, fram með hrókinn, c8 á c4 og þá verður hann að valda peðið„

39. ... Hc4! 40. e5 Rxe5 41. Bb2 Hc8 42. Hc1 Rd7 43. Kf2 Kg6 44. Ke3 Hc6 45. Bd4 Rf6 46. Kd3 Hxd6 47. Hxc2 - Jafntefli.

* Úr Manntafli eftir Stefan Zweig

- þýð. Þórarinn Guðnason.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 29. maí 2011.

Skákþættir Morgunblaðsins

[Event "Bad Pistyan it, CZE"] [Site "Bad Pistyan it, CZE"] [Date "1922.??.??"] [EventDate "?"] [Round "15"] [Result "1/2-1/2"] [White "Alexander Alekhine"] [Black "Efim Bogoljubov"] [ECO "C84"] [WhiteElo "?"] [BlackElo "?"] [PlyCount "93"] 1. e4 e5 2. Nf3 Nc6 3. Bb5 a6 4. Ba4 Nf6 5. O-O Be7 6. Nc3 b5 7. Bb3 d6 8. a4 b4 9. Nd5 Na5 10. Ba2 Nxd5 11. Bxd5 c6 12. Ba2 c5 13. c3 Rb8 14. Bd5 O-O 15. d4 exd4 16. cxd4 c4 17. Be3 Be6 18. Bxe6 fxe6 19. d5 e5 20. Rc1 Qd7 21. Ng5 Bxg5 22. Bxg5 Rbc8 23. Qe2 h6 24. Bh4 Rf7 25. Bg3 Qxa4 26. f4 exf4 27. Bxf4 Qb5 28. Bxh6 c3 29. Qg4 Qd7 30. Qxd7 Rxd7 31. bxc3 bxc3 32. Bd2 Rdc7 33. Bf4 Nb3 34. Bxd6 Rf7 35. Rxf7 Nxc1 36. Rf1 Nd3 37. Ba3 c2 38. d6 Kh7 39. h4 Rc4 40. e5 Nxe5 41. Bb2 Rc8 42. Rc1 Nd7 43. Kf2 Kg6 44. Ke3 Rc6 45. Bd4 Nf6 46. Kd3 Rxd6 47. Rxc2 1/2-1/2

Henrik vann í lokaumferðinni og endaði í 2.-3. sæti í Óðinsvéum

Stórmeistarinn Henrik Danielsen (2545) vann Þjóðverjann Jonathan Carlstedt (2308) í níundu og síðustu umferð Meistaramóts Fjónar sem lauk í Óðinsvéum í dag.  Henrik vann báðar skákir dagsins. Henrik hlaut 6½ vinning og endaði í 2.-3. sæti á mótinu ásamt svissneska stórmeistaranum Vadim Milov (2648).  Sænski stórmeistarinn Hans Tikkanen (2560) sigraði á mótinu en hann hlaut 7½ vinning.

Frammistaða Henriks samsvaraði 2462 skákstigum og lækkar hann um 6 fyrir hana.

55 skákmenn tóku þátt í mótinu og þar af 6 stórmeistarar og 8 alþjóðlegir meistarar.  Henrik var nr. 5 í stigaröð keppenda.  Mótið var teflt á aðeins 5 dögum, þ.e. tvær umferðir á dag nema fyrsta daginn. 

• Heimasíða mótsins
• Chess-Results
• Skákir í beinni

Henrik vann í næstsíðustu umferð

Stórmeistarinn Henrik Danielsen (2545) vann danska FIDE-meistaranum Igor Teplyi (2387) í áttundu og næstsíðustu umferð Meistaramóts Fjónar sem fram fór í Óðinsvéum í morgun.  Henrik hefur 5½ vinning og er í 5.-9. sæti.  Lokaumferðin hefst kl. 13:30 og verður skák Henriks sýnd beint.

Sænski stórmeistarinn Hans Tikkanen (2560) er efstur með 6½ vinning.  Í 2.-4. sæti með 6 vinninga eru argentíski stórmeistarinn Pablo Fuente (2555), og alþjóðlegu meistararnir Mikkel Antonsen (2472), Danmörku, og Jonathan Cartstad (2308)

55 skákmenn taka þátt í mótinu og þar af 6 stórmeistarar og 8 alþjóðlegir meistarar.  Henrik er nr. 5 í stigaröð keppenda.  Mótið er teflt á aðeins 5 dögum, þ.e. tvær umferðir á dag nema fyrsta daginn.  Skákirnar hefjast kl. 7 og 13:30.

• Heimasíða mótsins
• Chess-Results
• Skákir í beinni

Svindl á Þýska meistaramótinu í skák

Svindlmál kom upp á Þýska meistaramótinu í skák sem lauk um helgina í Bonn í Þýskalandi.  FIDE-meistarinn Christoph Natsdis varð uppvís að svindli í skák gegn stórmeistaranum Sebastian Siebrecht í lokaumferðinni.  Natsdis notaði skákforrit í smartsíma.  Grunsemdir vöknuðu þegar hann fór á salernið á milli leikja í flókinni stöðu og var þar óeðlilega lengi.  Natsdis hafði náð AM-áfanga óháð úrslitum í lokaumferðinni.

Það er ljóst að uppákomur sem þessar valda mótshöldurum miklum áhyggjum.  Taka þarf á slíkum málum af mikilli festu.    

Stórmeistarinn Igor Khenkin varð þýskur meistari en hann var efstur ásamt Jan Gustafsson en hafði betur eftir stigaútreikning.  

Nánar má lesa um málið á ChessVibes.

Nökkvi hóf First Saturday-mótið með sigri

Þrír íslenskir skákmenn taka þátt í First Saturday-mótinu sem hófst í Búdapest í Ungverjalandi í gær.  Það eru Hjörvar Steinn Grétarsson (2422), sem teflir í SM-flokki, Daði Ómarsson (2225) sem teflir í AM-flokki og Nökkvi Sverrisson (1869) sem teflir í FM-flokki.  Nökkvi vann Slóvenann Nikola Hocevar (2034) í gær en bæði Hjörvar og Daði töpuðu.  Hjörvar fyrir Pólverjanum Pavel Sxablowski (2425) og Daði fyrir ungverska alþjóðlega meistaranum Gabor Pirisi (2243).

Í SM-flokki sem Hjörvar teflir í eru meðalstign 2412 skákstig.  Hjörvar er nr. 6 í stigaröð 10 keppenda.  Í AM-flokki, sem Daði sem teflir í eru meðalstign 2247 skákstig.  Daði er nr. 9 í stigaröð 12 keppenda.  Í FM-flokki sem Nökkvi teflir í eru meðalstigin 2039 skákstig.  Nökkvi er stigalægstur 12 keppenda.

• Heimasíða First Saturday-mótsins
• Chess-Results

 

Landsmót UMFÍ 50+ á Hvammstanga 24.-26. júní

Landsmót UMFÍ 50 + verður haldið á Hvammstanga helgina 24. - 26. júní. UMFÍ hefur haldið fjölmörg Landsmót í gegnum tíðina. Nú er kominn tími til að þeir sem eru 50 ára og eldri fáið að njóta sín á Landsmóti. Aldrei áður hefur verið haldið Landsmót fyrir 50 ára og eldri því er um stórviðburð að ræða.

Mótið er fjölskylduhátíð með fjölbreyttri dagskrá aðal áhersla er lögð á gleði og hafa gaman. Ásamt keppni í hinum ýmsu íþróttagreinum verða fyrirlestrar og sýningahópar. Allir, jafnt ungir sem eldri, eiga að finna eitthvað við sitt hæfi þessa helgi sem mótið fer fram. 

Framkvæmd mótsins verður í höndum Ungmennafélags Íslands og USVH í samstarfi við sveitarfélagið Húnaþing vestra. Aðrir samstarfsaðilar að mótinu eru Félag áhuga fólks um íþróttir aldraðra og Landssamband eldri borgara. 

Keppnisgreinar á mótinu verða : Línudans,Blak, Bridds, Boccia, Badminton, Frjálsar íþróttir, Fjallaskokk, Hestaíþróttir, Golf, Pútt, Skák, Sund, þríþraut. 

Aðstaða á Hvammstanga til íþróttaiðkana er góð.  Húnaþing vestra rekur íþróttamiðstöð á Hvammstanga. Íþróttahús var byggt við búningsaðstöðu og sundlaug á árunum 2001 og 2002. Íþróttamiðstöð Húnaþings vestra var svo formlega opnuð þann 4. september 2002. Þá er þar risin glæsileg reiðhöll.

Frekari upplýsingar um mótið er að finna á  www.landsmotumfi50.is

Henrik tapaði í sjöundu umferð í Óðinsvéum

Stórmeistarinn Henrik Danielsen (2545) tapaði fyrir argentíska stórmeistaranum Pablo Lafuente (2555) í sjöundu umferð Meistaramóts Fjónar sem fram fór í Óðinsvéum í dag.  Henrik hefur  4½ vinning og er í 8.-15. sæti. Áttunda og næstsíðasta umferð hefst kl. 7 í fyrramálið og verður skák Henriks sýnd beint gegn danska FIDE-meistaranum Igor Teplyi (2387).

Sænski stórmeistarinn Hans Tikkanen (2560) er efstur með 6 vinninga.  Í 2.-4. sæti með 5½ vinning eru Þjóðverjarnir Jonathan Carlstedt (2308), ítalski stórmeistarinn Sabino Brunello (2537) og áðurnefndur Lafuente.  

55 skákmenn taka þátt í mótinu og þar af 6 stórmeistarar og 8 alþjóðlegir meistarar.  Henrik er nr. 5 í stigaröð keppenda.  Mótið er teflt á aðeins 5 dögum, þ.e. tvær umferðir á dag nema fyrsta daginn.  Skákirnar hefjast kl. 7 og 13:30.

• Heimasíða mótsins
• Chess-Results
• Skákir í beinni

Henrik vann í sjöttu umferð í Óðinsvéum

Stórmeistarinn Henrik Danielsen (2545) vann Danann Mads Svendsen (2163) í sjöttu umferð Meistaramóts Fjónar sem fram fór í morgun í Óðinsvéum.  Henrik hefur 4½ vinning og er í 4.-7. sæti.  Sjöunda umferð hefst kl. 13:30 og verður skák Henriks sýnd beint.

Efstir með 5 vinninga eru stórmeistararnir Hans Tikkanen (2560), Svíþjóð, Sabion Brunello (2537) og Þjóðverjinn Jonathan Carlstedt (2308) sem hefur komið mjög á óvart með frammistöðu sinni.

55 skákmenn taka þátt í mótinu og þar af 6 stórmeistarar og 8 alþjóðlegir meistarar.  Henrik er nr. 5 í stigaröð keppenda.  Mótið er teflt á aðeins 5 dögum, þ.e. tvær umferðir á dag nema fyrsta daginn.  Skákirnar hefjast kl. 7 og 13:30.

• Heimasíða mótsins
• Chess-Results
• Skákir í beinni