Héðinn með jafntefli í fyrstu umferð

Stórmeistarinn Héðinn Steingrímsson (2562) gerði jafntefli við pólska stórmeistarann Mateusz Bartel (2627)  í fyrstu umferð þýsku deildakeppninnar (Bundesligan) sem fram fór í dag.  Farið er yfir skákina á Skákhorninu.   Í 2. umferð, sem fram fer á morgun, er alþjóðlegi meistarinn Michael Richter (2484) líklegasti andstæðingur Héðins sem tefldi á þriðja borði í dag en Héðinn teflir fyrir Hansa Dortmund.  Umferðin hefst kl. 12 og er hægt að fylgjast með henni í beinni.

 

• Heimasíða mótsins
• Beinar útsendingar

 

Sigurður Arnarson sigraði í mótaröðinni

Í gærkvöldi var þriðja kvöld mótaraðar SA. Níu skákmenn voru mættir við rásmarkið þegar flautað var til leiks. Þeir tefldu alls 16 skákir hver og var röð efstu manna þessi:

 

1	Sigurður Arnarson	15
2	Jón Kristinn Þorgeirsson	13
3	Haki Jóhannesson	9
4-6	Andri Freyr Björgvinsson	7,5
	Karl Egill Steingrímsson	7,5
	Sveinbjörn Sigurðsson	7,5

Eins og sjá má stóð baráttan um efsta sætið milli þeirra Sigurðar og Jóns Kristins og lauk með sigri þess fyrrnefnda, sem aðeins tapaði einni skák. Þeir félagar hafa líka náð drjúgri forystu í mótaröðinni sjálfri eftir þrjú mót. Þar er stað efstu manna sem hér segir:

 

Jón Kristinn Þorgeirsson	30,5
Sigurður Arnarson	30
Haki Jóhannesson	22
Sveinbjörn Sigurðsson	20,5
Atli Benediktsson	14
Andri Freyr Björgvinsson	12,5

Héðinn teflir í þýsku deildakeppninni um helgina - beinar útsendingar

Stórmeistarinn Héðinn Steingrímsson (2562) teflir 3 skákir í Þýsku deildakeppninni (Bundesliga) um helgina.  Héðinn teflir á 4. borði fyrir Hansa Dortmund.  Allar skákir í 1. deild eru í beinni útsendingu og geta því íslenskir skákáhugamenn fylgst með Íslandsmeistaranum að tafli um helgina.   

Umferðirnar eru sem hér segir (líklegir andstæðingar Héðins í sviga):

• 1. umferð, föstudaginn, 14. október, kl. 14 (SM Mateusz Bartel (2627))
• 2. umferð, laugardaginn, 15. október, kl. 12 (SM Mladen Muse (2443))
• 3. umferð, sunnudaginn, 16. október, kl. 8 (SM Uwe Boensch (2530))

Heimasíða mótsins

Beinar útsendingar frá skákunum

 

Anatoly Karpov nýr félagsmaður Taflfélags Reykjavíkur og heiðursgestur félagsins dagana 6.-9. október 2011

 

Taflfélag Reykjavíkur átti 111 ára afmæli 6. október sl. Mikið var um dýrðir, því fyrrum heimsmeistari í skák Anatoly Karpov var heiðursgestur í afmælishófinu sem jafnframt var móttaka til heiðurs honum, en hann lenti fyrr um daginn á Keflavíkurflugvelli.

Með Karpov í för var Vasily Papin 23 ára stórmeistari frá Rússlandi. Koma Karpovs í T.R. á fimmtudaginn var sannkölluð söguleg stund og vera hans hér í Reykjavík síðustu daga er án efa einn af merkustu viðburðum íslensks skáklífs til lengri tíma litið.

Dagskrá Karpovs var þétt skipuð og hugmyndin var að hann skyldi koma víða við. Í stuttu máli sagt varð heimsókn hans mjög gleðileg og heppnaðist í alla staði vel. Karpov var mjög skemmtilegur í viðmóti, áhugasamur, kíminn og með góða nærveru. Hann gaf sér góðan tíma í hvern einasta dagskrárlið og nærstaddir gátu notið frásagnar hans, taflmennsku og skákskýringa við hin ýmsu tækifæri. 

Karpov í Salaskóla

Dagskráin hjá Karpov hófst föstudagsmorguninn  7. október í Salaskóla í Kópavogi. Taflfélag Reykjavíkur bauð Hafsteini Karlssyni skólastjóra að fá fyrrum heimsmeistarann í heimsókn og tók hann mjög vel í það. Okkur þótti vel við hæfi að Karpov hitti fulltrúa frá þeim tveimur grunnskólum landsins sem kveðið hefur mest að í skólaskák hin síðustu ár. Nýbökuðum Norðurlandameisturum Rimaskóla ásamt skólastjóra þeirra Helga Árnasyni var því einnig boðið að taka þátt í dagskránni með Karpov í Salaskóla. Karpov tefldi eina skák við nemanda úr hvoru skákliði fyrir sig. Fyrstur til að tefla við Karpov var Hilmir Freyr Heimisson, nemandi í skákliði Salaskóla. Því næst var það Hrund Hauksdóttir úr skákliði Rimaskóla sem tefldi við fyrrum heimsmeistarann.

 

Bæði tvö tefldu góðar skákir og Karpov fór nokkrum orðum um skákirnar í lokin. Öllum krökkunum úr skákliðunum tveimur gafst síðan kostur á að spyrja Karpov spurninga eins og á eins konar blaðamannafundi. Nokkrir krakkar nýttu sér það tækifæri og Karpov svaraði þeim með bros og vör og hafði gaman af. Hann spurði síðan sjálfur nokkurra spurninga, þannig að úr þessu varð hið besta samtal!

Í lokin voru svo teknar hópmyndir með hvoru liði fyrir sig ásamt skólastjórunum og Karpov. Þessi heimsókn vakti mikla athygli í Salaskóla og mikla lukku meðal skákkrakkanna úr Rimaskóla og Salaskóla.

Karpov í Laugardalshöll

Karpov hafði mikinn áhuga á að sjá Laugardalshöll þar sem einvígi Spasskís og Fischers fór fram og skruppum við í heimsókn með meistarann þangað.  Það kom honum á óvart hve höllin er stór og hafði hann á orði að það hlyti að hafa verið magnað að tefla þar fyrir fullu húsi.  Hann kímdi þegar honum var tjáð að næstfjölmennasti skákviðburður íslandssögunnar á eftir einvíginu ´72 hefði einnig farið fram í Höllinni, nefnilega bardaginn um íslandsmeistaratitilinn í skákhnefaleikum 2011!

Karpov í CCP

Eftir hádegi heimsótti Karpov CCP og skoðaði starfsemi fyrirtækisins. Þótti honum mikið til flaggskips fyrirtækisins koma, leiksins EVE online, og sá margt líkt með leiknum og skákinni.  Báðir leikirnir byggjast á strategískri hugsun og hernaðarkænsku.  Í lok heimsóknar hans í fyrirtækið tefldi hann við ríkjandi skákhnefaleikameistara Íslands, Björn Jónsson og hafði sigur eftir mikinn barning, en í þetta sinn fór sá barningur fram á klukkunni!

Karpov og Friðrik Ólafsson í T.R.

Kl. 16.30 settust svo Karpov og Friðrik Ólafsson stórmeistari að tafli í sýningarskák í T.R. Umhugsunartíminn var 15 mín. á mann. Þeir tefldu rúmlega 20 leiki áður en þeir sættust á jafntefli. Hópur fólks var á staðnum og fylgdist síðan með skákskýringum meistaranna á gamla viðarskákskýringarborðinu, sem hafði verið smíðað fyrir einvígi Friðriks og Bent Larsens 1956.

Kom í ljós að mikil undiralda hafði verið í skákinni og staðan mjög flókin. Enda tóku þeir sér dágóðan tíma í skákskýringarnar og sýndu áhorfendum inn í hugarheim sinn, hvaða áætlanir höfðu verið í gangi og hvaða afbrigði höfðu verið í boði. Þetta var einstakur viðburður fyrir skákáhugamenn!

Setning Íslandsmóts skákfélaga

Síðasti dagskrárliður Karpovs þennan dag, var setning Íslandsmóts skákfélaga í Rimaskóla um kl. 20. Það var ljóst frá upphafi að Karpov myndi ekki setjast að tafli fyrir T.R. á Íslandsmóti skákfélaga í þetta skipti, en við gáfum það náttúrulega ekkert upp frekar en önnur lið sem héldu sinni liðsskipan fyrir sig! Karpov tók því þátt í setningunni með því að halda ávarp, afhenda verðlaun fyrir Landsmótið í skólaskák og leika fyrsta leiknum á öllum (fjórum) fyrstu borðunum í 1. deild. Þetta gerði hann allt saman með bros á vör og augljóst var að þeim 400 skákmönnum sem saman komnir voru í Rimaskóla þetta kvöld þótti mikið til koma að sjá fyrrverandi heimsmeistarann með eigin augum.

Ferð að leiði Fischers í Laugdælakirkjugarði

Laugardagurinn 8. október var tekinn snemma. Í slagviðri og úrhellisrigningu var haldið af stað yfir heiðina að Laugdælakirkju við Selfoss. Þegar í kirkjugarðinn var komið, birti til með sólargeislum og regnboga. Karpov lagði blóm á leiði Fischers og svo var minningarstund inni í kirkjunni.

Karpov í heimsókn hjá UNICEF

Eftir ferðina austur var haldið tilbaka til Reykjavíkur þar sem heimsókn hjá UNICEF á Íslandi var næst á dagskrá. Karpov er sérlegur sendiherra samtakana í mið og austur Evrópu. Gaf hann sér góðan tíma til að kynna sér starfsemi UNICEF á Íslandi og fannst mikið koma til þess merka starfs sem unnið er af samtökunum hér á landi.

Karpov á skákæfingu barna og unglinga í T.R.

Laugardagsæfingin hjá T.R. krökkunum hófst kl. 14. Sum hver komu þangað rakleiðis frá 2. umferð á Íslandsmóti skákfélaga í Rimaskóla. Torfi skákþjálfari sýndi krökkunum skák með Karpov, en skákir Karpovs hafa einmitt verið til umræðu á skákæfingum síðastliðnar vikur. Rétt fyrir kl. þrjú var svo boðið upp á hressingu, Svala, snúða og kex. Rúmlega 40 krakkar voru á æfingunni og nokkuð af foreldrum og mikil eftirvænting í loftinu.

Kl. 15.20 kom svo fyrrverandi heimsmeistarinn inn í salinn og krakkarnir tóku vel á móti honum með dynjandi lófaklappi! Þau skoruðu síðan á meistarann í skák á sýningarborðinu. Karpov var með hvítt en krakkarnir með svart. Karpov lék og krakkarnir réttu upp hönd ef þau vildu koma með leik. Torfi benti síðan á einhverja upprétta höndina og leiknum var leikið. Þegar komið var út í peðsendatafl og krakkarnir peði undir gáfu þau skákina, enda vissu þau að Karpov er enginn aukvisi í endatöflum!

Því næst fengu allir krakkarnir og þeir foreldrar sem vildu mynd til minningar um heimsókn Karpovs í T.R. Karpov áritaði svo hverja einustu mynd og hafði mikið gaman af áhuga krakkanna!

Karpov í heimsókn á Bessastöðum

Strax eftir Laugardagsæfinguna var brunað á Bessastaði í heimsókn til forseta Íslands, Ólafs Ragnars Grímssonar. Það má því með sanni segja að Karpov hafi farið vítt og breitt þennan daginn!

Heimsóknin á Bessastöðum varð einnig síðasti dagskrárliðurinn, því Karpov þurfti síðan með stuttum fyrirvara að hætta við fjölteflið í Ráðhúsinu sem áætlað var daginn eftir. Ástæðan var sú að forseti Rússlands hafði boðað hann til sín til að veita honum viðurkenningu í tilefni af sextugsafmæli hans fyrr á árinu. Karpov fór því af landi brott á sunnudagsmorgninum 9. október en landi hans Vasily Papin tefldi fjölteflið í hans stað í Ráðhúsinu  eftir síðustu umferð Íslandsmóts skákfélaga.

Einstakur viðburður

Það má með sanni segja að koma Karpovs til Íslands um síðustu helgi hafi verið einstakur viðburður í íslensku skáklífi. Við í Taflfélagi Reykjavíkur erum mjög ánægð og stolt yfir því að hann hafi gengið í félagið og strax þar á eftir komið í heimsókn og heiðrað félagið með nærveru sinni á 111 ára  afmælinu! Þetta er draumi líkast!

Taflfélag Reykjavíkur hefur breiða starfsemi og áherslurnar eru margvíslegar eins og umfangsmikið barna-og unglingastarf, umfangsmikið skákmótahald og metnaður í að T.R. sé með keppnislið í fremstu röð, eins og það hefur haft í áratugi.

Síðast en ekki síst er Taflfélag Reykjavíkur eitt af elstu starfandi menningarfélögum landsins. Koma Karpovs er því í hæsta máta menningarlegur viðburður fyrir utan það að vera einn merkasti viðburður í skáklífi landsins frá upphafi. Vera hans hér í Reykjavík vakti mikla athygli einnig fyrir utan skákheiminn. Þannig sýndu fjölmiðlar, bæði sjónvarp og dagblöð, veru hans hér mikinn áhuga og greint var frá dagskrá hans og tekin greinagóð viðtöl við hann.

 

Við erum þess fullviss að koma Karpovs muni lengi lifa í minningu þeirra sem hittu hann dagana 6.-9. október. Við erum þess einnig fullviss að heimsókn hans í T.R. muni hafa áhrif um ókomin ár.

Stjórn Taflfélags Reykjavíkur þakkar fyrirtækjunum CCP og MP banka fyrir frábært samstarf og fyrir að leggja sitt á vogarskálarnar og gera okkur þannig kleift að láta hugmyndina, um að fá fyrrum heimsmeistara í skák Anatoly Karpov til Íslands, verða að veruleika. 

Pistlahöfundur: Sigurlaug Regína Friðþjófsdóttir, formaður T.R.

Stefán teflir á EM landsliða

Nýjasti stórmeistari okkar Íslendinga, Stefán Kristjánsson (2485) tekur sæti í landsliði Íslands sem teflir á EM landsliða í Grikklandi 2.-12. nóvember nk.  Stefán tekur sæti Hannesar Hlífars Stefánssonar (2562) sem dregur sig út úr liðinu af persónulegum ástæðum.

Lið Íslands skipa:

• 1. SM Héðinn Steingrímsson (2562)
• 2. SM Henrik Danielsen (2543)
• 3. SM Stefán Kristjánsson (2485)
• 4. FM Hjörvar Steinn Grétarsson (2442)
• 5. AM Bragi Þorfinnsson (2427)

 

Heimasíða mótsins

Chess-Results

Jón Kristinn efstur á Haustmóti SA

Önnur umferð á haustmótinu var tefld í gær.  Úrslit urðu þessi:

• Jón Kristinn-Hersteinn    1-0
• Haukur-Sveinn                0-1
• Andri-Jakob Sævar      1/2-1/2
• Sigurður-Smári            1/2-1/2

Þá er lokið frestaðri skák Smára og Hersteins úr 1. umferð með sigri Smára.

Eftir tvær umferðir er aðeins einn keppandi með fullt hús, Jón Kristinn Þorgeirsson.

Þeir Andri Freyr og Smári hafa 1,5 vinning og Sveinn Arnarsson, Sigurður Arnarson og Jakob Sævar hafa náð 1 vinningi í hús.

Þriðja umferð verður tefld á sunnudag.

Í kvöld verður svo telft í hinni sívinsælu MÓTARÖÐ og hefst taflið kl. 20.

• Heimasíða SA
• Chess-Results

Enn fleiri pistlar um Íslandsmót skákfélaga

Enn fjölgar pistlum um Íslandsmót skákfélaga.  Hermann Goði Aðalsteinsson hefur skrifað pistil formanns þar sem hann fjallar um b- og c-sveitir Goðans.  Áskell Örn Kárason hefur skrifað pistil um gengi SA og Gunnar Freyr Rúnarsson hefur skrifað pistil um gengi Víkingana.  

Nýir pistlar

• Goðapistill formanns
• SA-pistill
• Víkingapistill

Eldri pistlar

• Ritstjórapistill
• Bolapistill
• Eyjapistill
• Goðapistill
• Krókspistill
• SSON-pistill

Stórmót í þágu Vinjar fer fram í TR í kvöld

Í tilefni Alþjóðlegs geðheilbrigðisdags verður blásið til móts í sal TR við Faxafen klukkan 19:30, fimmtudaginn 13. okt. Skráning hefst strax uppúr klukkan 19:00.  Taflfélagið Hellir,  Taflfélag Reykjavíkur og Skákfélag Vinjar sameina krafta sína, líkt og í fyrra og þá varð úr magnað kvöld með 79 þátttakendum.  Klukkan sjö verður stofnað Vinafélag til styrktar Vin en um það má lesa hér.

Tefldar verða sex umferðir með sjö mínútna umhugsunartíma og skákstjóri er Gunnar Björnsson, forseti Skáksambandsins með dyggri aðstoð Sigurlaugar Regínu Friðþjófsdóttur, formanns TR.

Forlagið gefur glæsilega vinninga og veitt verða níu verðlaun. Allir þátttakendur eiga möguleika á bókaverðlaunum auk verðlaunapenings um háls en verðlaun verða veitt fyrir:

• 3 efstu sætin og efsta sætið  í flokkunum:
• 60 ára og eldri
• Kvenna
• 13-18 ára (fædd 1993-98)
• 12 ára og yngri (fædd 1999 of eftir)
• Stigalausir
• Auk þess  er bókavinningur fyrir óvæntasta vinningin að mati skákstjóra.

Þetta er í sjöunda skipti sem mót í tilefni Alþjóðlegs geðheilbrigðisdags (sem reyndar er haldinn hátíðlegur um allan heim þann 10. okt) er haldið og hefur þátttaka aukist ár frá ári og algjört met sl ár þegar þessi þrjú félög sameinuðust um mótshaldið. En áður hefur mótið farið fram í Ráðhúsinu, Perlunni og í Mjódd. 

Félögin hvetja allt skákáhugafólk, á öllum aldri, að vera með því gott er að muna að það er engin heilsa án geðheilsu. Og svo er ekkert þátttökugjald.

Guðmundur efstur á Haustmóti TR

Guðmundur Kjartansson (2314) er efstur á Haustmóti TR með 5 vinninga að lokinni 6. umferð sem fram fór í kvöld.  Guðmundur vann Björn Jónsson (2045).  Davíð Kjartanssyni (2291), sem vann Þorvarð F. Ólafsson (2174) er annar með 4½ vinning.   Sverrir Örn Björnsson (2158) og Jóhann H. Ragnarsson (2068) eru í 3.-4. sæti með 4 vinninga en sá fyrrnefndi vann þann síðarnefnda.  

Sjöunda umferð fer fram föstudaginn 14. október og hefst kl. 19:30. 

A-flokkur:

Úrslit 6. umferðar:

 

1	Bergsson Stefan	½ - ½	Bjornsson Tomas
2	Bjornsson Sverrir Orn	1 - 0	Ragnarsson Johann
3	Kjartansson Gudmundur	1 - 0	Jonsson Bjorn
4	Baldursson Haraldur	1 - 0	Valtysson Thor
5	Kjartansson David	1 - 0	Olafsson Thorvardur

Staðan:

 

Rk.		Name	RtgI	Club/City	Pts.	Rp	rtg+/-
1	IM	Kjartansson Gudmundur	2314	TR	5	2389	5,3
2	FM	Kjartansson David	2291	Víkingar	4,5	2352	7,1
3		Bjornsson Sverrir Orn	2158	Haukar	4	2230	8,6
4		Ragnarsson Johann	2068	TG	4	2244	21,1
5	FM	Bjornsson Tomas	2162	Goðinn	3	2126	-4,5
6		Olafsson Thorvardur	2174	Haukar	2,5	2110	-8,3
7		Bergsson Stefan	2135	SA	2,5	2091	-6
8		Valtysson Thor	2041	SA	1,5	1933	-12,6
		Jonsson Bjorn	2045	TR	1,5	1953	-10,8
10		Baldursson Haraldur	2010	Víkingar	1,5	1993	-2,5

 

Aðrir flokkar: 

Dagur Ragnarsson (1761) er langefstur í b-flokki með 5 vinninga.  Ingi Tandri Traustason (1823), Kristján Örn Elíasson (1906), Mikael Jóhann Karlsson, Stephen Jablon (1965) og Örn Leó Jóhannsson (1931) eru í 2.-6. sæti með 3½ vinning.  Sjá nánar hér.

Birkir Karl Sigurðsson (1597) og Oliver Aron Jóhannesson (1645) eru efstir í c-flokki með 5 vinninga.   Friðgeir Hólm (1667) er í þriðja sæti með 4 vinninga.  Sjá nánar hér.

Vignir Vatnar Stefánsson (1444) er langefstur í d-flokki (opnum flokki) með fullt hús.  Dawid Kolka (1366) og Sóley Lind Pálsdóttir (1345) eru í 2.-3. sæti með 4½ vinning.  Sjá nánar hér.

• Heimasíða mótsins
• Chess-Results
• Myndaalbúm (GB)

Karpov heiðraði minningu Fischers

Meðan á heimsókn Anatoly Karpovs, 12. heimsmeistarans í skák, stóð yfir um helgina gerði hann sér leið að gröf forvera síns að Laugardælum í Ölvusi, Þar sem hann lagði fagran blómvönd að leiði hins látna.  

Með í för var Friðrik Ólafsson, stórmeistari og þeir Guðmundur G. Þórarinsson og Einar S. Einarsson úr Stuðningsnefnd hins fallna meistara, auk Björns Jónssonar og Óttar Felix Haukssonar frá TR, Ívars Kristjánssonar frá CCP og Sören Bech Hansen, fyrrv. forseta Danska skáksambandsins.  

Efnt var til stuttrar minningarstundar í Laugardælakirkju. Sr. Kristinn Ágúst Friðfinnson, sóknarprestur bauð gesti velkomna og ræddi m.a. um að líklega væri þessi litla sveitakirkja skyndilega orðin víðfrægari öðrum kirkjum hérlendis. Einar S. minnist Bobby Fisches í fáeinum orðum og hingað komu hans og kynnti dagsskrána. Síðan voru leikin tvö af uppáhaldlögum hins látna,"My Way" með Frank Sinatra og "Green, green grass of home" sungið af Tom Jones,  Milli laga fór Guðmundur G. með stuttan kafla úr sinni ágætu minningarræðu, "In Memory of a Master", sem hann flutti þegar hin obinbera minningarathöfn Bobby´s fór fram 2 vikum eftir hina snöggbúnu jarðarför
hans. 

Að lokum gafst gestum kostur á að rita nöfn sín í Minningarbók um hinn látna og sjá ýmis gögn og gripi, samúðarkveður ofl. sem bárust í sínum tíma, m.a. frá Boris Spassky, mótherja Bobby Fischers í heimsmeistaraeinvíginu 1972, á þessa leið: "Consider that I am with you. We are all with Bobby and he with us for ever. Bobby was my brother" 

Karpov fór fögrum orðum um land og þjóð og hrósaði Íslendingum fyrir að hafa bjargað Bobby Fischer og forðað honum frá því að deyja í bandarísku fangelsi. 

Greint var frá þessu viðburði í kvöldfréttum Ríkissjónvarpsins.

Myndaalbúm (ESE)