Skák.is

Bloggfærslur mánaðarins, september 2010

23.9.2010 | 21:21

Ingimundur og Erlingur efstir

Ingimundur Sigurmundsson (1775) og Erlingur Jensson (1690) eru efstir með fullt hús að lokinni 2. og 3. umferð Meistaramóts Selfoss og nágrennis sem fram fóru í gærkveldi.

Staðan:

SNo.	Name	Rtg	Pts	SB.
3	Ingimundur Sigurmundsson	1775	3	4,00
6	Erlingur Jensson	1690	3	2,50
8	Grantas Grigorianas	1740	2	1,50
4	Magnús Matthíasson	1670	1½	1,75
7	Magnús Gunnarsson	1990	1½	0,75
1	Úlfhéðinn Sigurmundsson	1785	1	0,00
9	Ingvar Örn Birgisson	1820	1	0,00
10	Emil Sigurðsson	1790	1	0,00
2	Erlingur Atli Pálmarsson	1425	0	0,00
5	Magnús Garðarsson	1465	0	0,00

Spil og leikir | Slóð | Facebook | Athugasemdir (0)

23.9.2010 | 14:45

Tap gegn Grikkjum og Víetnömum

Íslensku liðin töpuðu bæði í 3. umferð Ólympíuskákmótsins sem fram fór í dag. Liðið í opnum flokki tapaði fyrir stórmeistarasveit Grikkja 1-3, þar sem Hannes Hlífar Stefánsson og Héðinn Steingrímsson gerðu jafntefli. Kvennaliðið náði góðum úrslitum gegn mjög sterkri sveit Víetnama en, tapaði með minnsta mun. Lenka Ptácníková vann mjög laglegan sigur á fyrstu borði og Jóhanna Björg Jóhannsdóttir gerði jafntefli í hörkuskák. Góð úrslit gegn sterkri sveit.

Fjórða umferð Ólympíuskákmótsins hefst kl. 9 í fyrramálið.

Spil og leikir | Breytt s.d. kl. 21:12 | Slóð | Facebook | Athugasemdir (0)

23.9.2010 | 10:24

Ól í skák: Pistill nr. 5

Það var fínt gengi hjá íslensku liðunum í gær. Strákarnir gerðu gott 2-2 jafntefli gegn Svíum og stelpurnar unnu Íra 3,5-0,5. Karpov er mættur á svæðið og spennan fyrir FIDE-kosningarnar eykst.

Byrjum á strákunum. Nú er það þannig að ég hef ekki séð skákirnar en mér skilst að lukkan hafi fremur verið með þeim. Bjössi lenti fljótlega í erfiðleikum gegn Grandelius og tapaði. Mér skilst reyndar að nærri lokunum hafi Bjössi verið með fína stöðu. Héðinn gerði jafntefli gegn Agrest en Rybka segir að Svíinn hafi getað náð upp hartnær unnu tafli. Að sögn Braga hafði hann verra alla skákina nema eftir 2 síðustu leiki Cisak. Eftir næstsíðasta leikinn hafði Bragi örlítið betra og eftir lokaleikinn unnið! Hannes gerði jafntefli gegn Berg þar sem hinn síðarnefndi gat fórnað skiptamun og náð upp vænlegri stöðu. Okkur grunar að Berg hafi viljað hafa öryggið á oddinum þar sem hann hafi metið sigursénsa Svíanna mikla á þeim punkti. Semsagt gott jafntefli!

Hjá stelpunum gekk á ýmsu. Lenka vann sína skák auðveldlega, Hallgerður einnig fremur auðveldlega. Tinna fékk skítastöðu. Hún greip til þess ráð fórna manni til að hrista upp í stöðunni og það gekk upp þar sem andstæðingurinn tók ekki manninn og talaði um flotta fléttu hjá Tinnu eftir skákina! Sigurlaug hélt annars uppi fjörinu í gær. Sigurlaug fórnaði peði og einhvern veginn smá versnaði staðan og var Sigurlaug um tíma þremur peðum undir. Sigurlaug seiglaðist hins vegar áfram og náði að halda jafntefli. Góður sigur gegn Írum!

Sú sem tefldi við Hallgerði er væntanlega einn elsti keppandinn hér en hún var rúmlega sjötug og sagði Sigurlaug strax hafa séð fyrir sér hana Birnu Norðdahl. Hann var nokkuð óörugg og átti það til að ýta á klukkuna með annarri hönd en hún lék. Einnig stoppaði hún klukkuna á einum tímapunkti þar sem sólin skein í augun á henni og lék ólöglegum leik í restina, þá reyndar með koltapað. Hallgerður tók hins vegar alveg rétta taktík á þetta, hélt sínu jafnaðargerði og lét þetta engin áhrif á sig hafa.

Skákstjórarnir eru annars sér kapítuli eins og svo oft áður. Skákstjórinn í fyrstu umferð (Einstein) skyldi t.d. ekki þegar aðalskákstjórinn sagði „start the clocks" og talaði bara rússnesku. Sú í gær talaði svo bara spænsku og var að reyna tjá sig við mig á því tungumáli gær. ....með engum árangri. Einn skákstjóri er á hverja viðureign.

Eins og fram hefur komið eru aðstæður allar til fyrirmyndar og það litla sem hefur verið ólagi hefur lagað! Koddarnir pirruðu suma en haldið var í súpermarkaðinn í gær og koddar keyptir þá sem vildu. Héðinn og Sigurlaug voru hins vegar það klók að þau tóku með sér kodda frá Íslandi. Einnig færðu Rússarnir reykherbergið þannig að nú þarf ekki lengur að labba í gegnum það þegar farið er á klósettið.

Við stelpurnar vorum samferða Ivan Sokolov í gær á skákstað Hann var í rokna stuði. Allt í einu stekkur hann upp í rútunni og kallar „There are cows on the road" en mætti bara undrunarandlitum. Hann endurtók sig með miklum látum og menn kíkja. Jú mikið rétt. Það var verið að reka beljur yfir þjóðveginn! „How can they do it? There is something between". Ivan tók sig svo til og vann Adams í gær. Hallgerður átti svo komment dagsins þegar hún spurði hver þetta væri (þ.e. Ivan).

Ég hitti Oliver vin minn úr flugvélinni (ég geri ráð fyrir að menn hafi lesið fyrri pistla). Hann teflir fyrir blinda og sjónskerta. Í fyrstu umferð tefldu þeir við Rússa II, í 2. umferð við Rúanda og mæta svo Aserum í dag! Enginn millivegur!

Susan Polgar er víst mætt á staðinn samkvæmt blogginu hennar. Þar var talað um „biggest upset" og úrslitin í viðureign Íslands og Svía nefnd þar ásamt nokkrum öðrum. Þótt að Svíarnir hafi verið stigahærri vil ég nú ekki kalla þetta „big upset" . Ég gerði athugasemd við bloggið hennar og spurði afhverju þetta væri „big upset". Fékk svar frá nafnlausum (Anonymous) sem svaraði á skemmtilegan hátt „Sweden had 4 GMs in the match while Iceland had 2 weak Ims" Þorfinnur, aní komments? J

Karpov mun víst vera mættur á svæðið en í gær var verið að setja upp bás fyrir hann. Kirsan hefur haft bás frá upphafi og hefur verið að gefa gjafir, einhverjar töskur. Á pokunum með gjöfunum stendur: Kirsan + hjartamerki = FIDE. Ekki höfum við Íslendingarnir þegið þessar gjafir.

Ég fékk athyglisvera yfirhalningu fyrir Geoffrey Borg, Maltverja sem er í stjórn FIDE og ECU og Kirsan-maður. „You don´t have a choice, as a western state you have to vote for Karpov". Hljómaði eins og við værum ekki að kjósa eftir því hvernig við mætum einstaklingana heldur verið þetta einhver skylda. Ég sagðist ekki vilja setja málið upp á þennan hátt en vildi ekki ræða þetta frekar við hann. Borg segist stefna á heimsókn ásamt Kirsan til Reykjavíkur, væntanlega þá í kringum MP Reykjavíkurskákmótið. Hann talaði ávallt eins og Kirsan væri þegar öruggur um sigur.

Spennan er farin að aukast fyrir þingið. Það vekur athygli að Weinsacker sem býður sig fram til forseta Evrópska skáksambandsins mætir ekki fyrr en 28. september en Danilov og Ali eru fyrir löngu komnir og byrjaðir að mingla á fullu. Danilov hefur reyndar aldrei spjallað við mig, telur mig sjálfsagt vonlaust targret.

Ég er með kynningarblað fyrir MP Reykjavíkurskákmótið og hef komið því m.a. á básana hjá Tyrkjunum og Norðmönnunum en ég er hérna með ein 1.000 eintök! Þingið hefst á morgun en til að byrja með eru bara nefndarfundir. Ég hef ekki að hyggju að sækja þá en stefni á setninguna sem er í fyrramálið, til að reyna að grípa andrúmsloftið. Sjálfar kosningarnar eru 28. september, held ég, bæði hjá FIDE og ECU.

Undirritaður á afmæli í dag. Stelpurnar sungu fyrir mig á ganginum, ásamt Bjössa, en hinir strákarnir létu ekki sjá sig. Ég fékk svo afmælisgjöf frá henni Nataliyu, umsjónarkonu okkar, sem hefur sinnt okkur af stakri natni. Hún gaf mér Babúsku! Rússarnir klikka ekki og fylgjast greinilega með afmælisdögum gestanna.

Sem fyrr eru allir í góðu standi og allt eins og það á vera. Þakka fyrir allar afmæliskveðjurnar.

Kveðja úr blaðamannaherbergi sem er sveittara nú en nokkru sinni.

Gunnar Björnsson

Spil og leikir | Breytt s.d. kl. 10:26 | Slóð | Facebook | Athugasemdir (1)

23.9.2010 | 09:45

Þriðja umferð Ólympíuskákmótsins hafin

Þriðja umferð Ólympíuskákmótsins er hafin, hófst kl. 9 í morgun. Liðið í opna flokknum teflir við sterka sveit Grikkja en stelpurnar tefla við Víetnama.

Hægt er að horfa a báðar viðureignirnar beint.

Ísland - Grikkland (beint)

Ísland - Víetnam (beint)

Spil og leikir | Breytt s.d. kl. 09:52 | Slóð | Facebook | Athugasemdir (0)

23.9.2010 | 09:37

Fimmtudagsmót hjá TR í kvöld

Fimmtudagsmót T.R. fer að venju fram í kvöld og hefst kl. 19.30. Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12, og opnar húsið kl. 19.10. Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri. Boðið er upp á kaffi ásamt léttum veitingum án endurgjalds.

Fimmtudagsmótin

Spil og leikir | Slóð | Facebook | Athugasemdir (0)

23.9.2010 | 03:50

Eiríkur sigraði á hraðkvöldi

Eiríkur Björnsson sigraði á jöfnu og spennandi hraðkvöldi Hellis sem fram fór 20. september sl. Eiríkur fékk 6v í sjö skákum og tapaði ekki skák en gerði tvö jafntefli. Annar varð Vigfús Ó. Vigfússon með 5,5v og þriðja var Elsa María Kristínardóttir með 5v.

Lokastaðan á hraðkvöldinu:

1.   Eiríkur Björnsson,                6v/7
2.   Vigfús Ó. Vigfússon,            5.5
3.   Elsa María Kristínardótti,     5
4. Páll Andrason,                     4.5
5.   Eiríkur Örn Brynjarsson,      4.5
6. Gunnar Nikulásson,             4.5
7. Birkir Karl Sigurðsson,          4.5
8.   Guðmundur Kristinn Lee,     4
9.   Stefán Már Pétursson,         4
10. Dawid Kolka,                        4
11. Kristinn Andri Kristinsson,    4
12. Örn Leó Jóhannsson,           3.5
13. Jón Úlfljótsson,                    3
14. Vignir Vatnar Stefánsson,    3
15. Jón Trausti Harðarson,         3
16. Björgvin Kristbergsson,        3
17. Brynjar Steingrímsson,         3
18. Estanislao Plantada,            3
19. Pétur Jóhannesson,             2
20. Arnar Valgerisson,               1.5
21. Jón Gauti Magnússon,         1.5

Spil og leikir | Slóð | Facebook | Athugasemdir (0)

22.9.2010 | 20:27

Ól í skák: Sterkir andstæðingar í 3. umferð - Grikkir og Víetnamar

Íslensku liðin mæta bæði sterkum sveitum í þriðju umferð Ólympíuskákmótsins sem fram fer á morgun. Liðið í opnum flokki mætir stórmeistarasveit Grikkja og kvennasveitin mætir sterkri sveit Víetnma.

Umferðin hefst kl. 9. Rétt er að minna á beinar útsendingar frá öllum skákum mótsins.

Liðsuppstillingar liðsins liggja fyrir í nótt og tengill á beinar útsendingar íslensku sveitanna verða tilbúnir í upphafi umferðar.

Lið Grikkja:

Bo.		Name	Rtg
1	GM	Papaioannou Ioannis	2622
2	GM	Banikas Hristos	2590
3	GM	Mastrovasilis Dimitrios	2569
4	GM	Halkias Stelios	2577
5	GM	Mastrovasilis Athanasios	2556

Meðalstig Grikkjanna eru 2590 en til samanburðar eru meðalstig íslensku sveitarinnar 2489 skákstig.

Lið Vítenama:

Bo.		Name	Rtg
1	WGM	Hoang Thi Bao Tram	2285
2	WIM	Pham Le Thao Nguyen	2304
3	WIM	Nguyen Thi Mai Hung	2258
4	WGM	Nguyen Thi Thanh An	2306
5	WIM	Hoang Thi Nhu Y	2214

Meðalstíig Víetnama eru 2288 skákstig en til samanburðar eru meðalstig íslenska liðsins 1968 skákstig.

Spil og leikir | Breytt s.d. kl. 20:33 | Slóð | Facebook | Athugasemdir (0)

22.9.2010 | 15:12

Jafntefli gegn Svíum - sigur gegn Írum

Íslenska liðið í opnum flokki gerði 2-2 jafntefli við sveit Svía í 2. umferð Ólympíuskákmótsins sem fram fór í Khanty Mansiysk Síberíu í dag. Bragi Þorfinnsson vann stórmeistarann Slavko Cisak, Hannes Hlífar Stefánsson og Héðinn Steingrímsson gerðu jafntefli við Emanuel Berg og Evgenij Agrest en Björn Þorfinnsson tapaði fyrir Nils Grandelius sem virðist ætla að vera Íslendingum erfiður í skauti. Góð úrslit enda Svíarnir stigahærri á öllum borðum. Íslenska kvennaliðið vann öruggan 3,5-0,5 sigur á Írum. Lenka Ptácníková, Hallgerður Helga Þorsteinsdóttir, Tinna Kristín Finnbogadóttir unnu en Sigurlaug R. Friðþjófsdóttir náði seiglujafntefli.

Þriðja umferð Ólympíuskákmótsins hefst kl. 9 í fyrramálið.

Spil og leikir | Slóð | Facebook | Athugasemdir (0)

22.9.2010 | 10:45

Ól í skák: Fjórði pistill

Það gekk vel og illa í fyrstu umferð Ólympíuskákmótsins. Karlaliðið vann fremur auðveldan sigur á liði Haítíbúa 4-0 en íslenska kvennaliðið tapaði 0-4 fyrir sterku liði Pólverja. Bæði Lenka og Hallgerður höfðu þær vænlega stöðu. Framkvæmd mótsins hefur verið bæði FIDE og mótshöldurum til mikillar fyrirmyndar, þvert oní ýmsar hrakspár. Góð stemming er í íslenska hópnum og tilhlökkun fyrir komandi umferðir.

Helgi Ólafsson, hafði sagt okkar allmargar sögur af fyrri mótshöldum í Rússlandi/Sovétríkjum þar sem gengið hafði á ýmsu. Hér er nánast allt eins og það á vera og meira að segja veðrið leikur við okkur í Síberíu.

En fyrst um umferðina og eins og vera ber er íslenska kvennaliðið í forgrunni hjá ritstjóranum, sem talar nú um „okkur stelpurnar". Við mættum sveit Pólverja. Lenka tefldi stórvel á móti hinni sterku Socko, sem er 20. stigahæsta skákkona heims og hafði sennilega verið komin með betra tafl en lék af sér slysalega manni. Lenka náði samt góðu sprikli og var ekki langt frá því að vera komin með jafnteflissénsa. Hallgerður fékk einnig mjög vænlegt tafl og hefur sennilega verið komin með töluvert betra og gat e.t.v. fórnað manni fyrir vænlegt tafl. Hallgerður vanmat hins vegar sénsa sína og smá saman fékk verra og tapaði. Tinna lék af sér manni fljótlega og átti ekki séns eftir það og Jóhanna tapaði þrátt fyrir skemmtilegt sprikl þegar hún var komin með lakara tafl.

Nú er það svo komið að ég fylgist betur með stelpunum. Mér skilst á Helga að allir strákarnir hafi unnið fremur öruggra sigra. Ekki kemur á óvart að Bjössi hafi lagt töluvert á stöðuna en samt allt undir kóntról!

Stelpurnar mæta írsku stelpunum í dag. Írarnir koma með nokkuð breytt lið miðað við síðustu Ólympíuskákmót og vitum við lítum um þær og fáar skákir með í beisnum. Jóhanna Björg hvílir í dag.

Strákarnir mæta Svíum eins og svo áður. Eins og við gerðum ráð fyrir hvíla þeir Tiger-inn. Athyglisverð viðureign en okkur hefur oft gengið ágætlega á móti Svíum.

Hollendingar mætta Rússlandi IV en það var van Wely, fyrsta borðs maður þeirra, sem var manna reiðastur yfir fjölda rússneskra liða.

Við upphaf fyrstu umferðar í gær setti skákstjórinn mótið, sem er rösk rússnesk kona, sem ég ekki kann deili á. Kirsan labbaði svo á milli borða í fylgd ríkisstjórans og tók í hendur skákstjóranna. Skákstjórinn á okkar borði kom okkur kunnuglega fyrir sjónir en er væntanlega náskyldur Alberti Einstein. Þegar hann kom að borði íslenska karlaliðsins fór ríkisstjórinn að hlæja og sló í bakaði í Hjörvari, fannst greinilega gaman að því að finna þarna annað rauðhært eintak!

Maður hitti auðvitað ýmsa gamla kunningja. Ali, forseti tyrkneska skáksambandsins, og forsetaframbjóðandi í ECU, heilsaði mér eins og við værum fjölskylduvinir. Hann er sannfærður umsigur í forsetakosningunum. Ég hitti einnig Geoffrey Borg, frá Möltu, og spjallaði ég töluvert við hann. Á sama tíma kom þangað forseti nígeríska skáksambandsins og spurði Borg okkur hvort við hefðum hitt Kirsan. Skömmu síðar greip hann Kirsan og lét okkur heilsa kappanum. Ég er ekki frá því að hann hafi tekið innilegra í hendurnar á þeim nígeríska en þeim íslenska.

Í fyrstu umferð mættust Ísrael og Jemen. Jemenar mættu ekki, væntanlega þar sem land þeirra viðurkennir ekki Ísrael. Mér skilst að aðeins Egyptar að Arabaþjóðunum tefli við Ísraelsmenn. Borg fannst það klúður að raða svona upp, og taldi að skákstjórar ættu í svona tilfellum að hliðra einu liði til eða frá til að koma veg fyrir slík atvit.

Hér á göngunum hittir maður marga gamla kunningja. Pabbi Cori-systkinina brosir alltaf út af eyrum þegar hann sér mig en hann kann ekki stakt orð í ensku svo bros á milli okkar verður að duga.

Ég spjallaði töluvert við Ivan Sokolov í dag sem vill ólmur koma á næsta MP Reykjavíkurskákmót. Ivan er bjartsýnn á gengi Karpovs en ég met stöðu hans fremur slaka. Ivan veit vonandi eitthvað meira en ég.

Allar aðstæður eru hér til fyrirmyndar eins og áður hefur komið fram. Eitt atriði pirrar þó íslensku skákmennina en til að fara á salernið þarf að labba í gegnum reykherbergi. Engir Evrópustaðlar varðandi reykingar hér í Rússlandi.

Við setninguna var lifandi tafl eins og áður hefur komið fram. Þar var tefld ódauðlega skákin sem ég held að allir skákáhugamenn kannist við. Fyrir framan Íslendinga voru skákmenn sem voru að velta því fyrir sér hvað skák þetta væri. Eftir smá umræður sagði einhver „some random game". Ég spái þessu liði ekki góðu gengi hér!

Björn Þorfinnsson var í lyftuferðalagi fyrir fyrstu umferðina. Þar heyrir hann tal enskumælandi manna. Annar segir:

„How is your opponent".

„He is very solid players and rarely loses"

Og bætti svo við

„I am mostly analyzing his match against Kasparov".

Sá sem svaraði svo skemmtilega var Sam Collins, fyrsta borðs maður Íra, sem mættu Rússum. Rússar hvíldu reyndar Kramnik en Collins gerði jafntefli við Grischuk!

Ég sé að það er óraunhæft hjá mér að koma þessum pistlum frá mér fyrir kl. 10. Ég spái að verði frekar á milli 10:30-11:00. Ég bendi á fjölda mynda sem ég hef tekið og finna má í myndaalbúmi á Skák.is. Allar skákir mótsins eru nú sýndar beint og verður settur inn tengill á þær í upphafi hverrar umferðar. Ég bendi einnig á Facebook-síðu mína, http://www.facebook.com/forzeti, þar sem ég stefni á styttri komment. Skákir hverrar umferðar verða svo tengdar á úrslit viðkomandi umferðar.

Eins og fyrr eru allir í góðu standi og viljum við þakka fyrir allar góðu kveðjurnar sem við höfum fengið frá íslensku skákáhugamönnum.

Kveðja úr sveittu blaðamannaherbergi.

Gunnar Björnsson

Spil og leikir | Breytt s.d. kl. 10:47 | Slóð | Facebook | Athugasemdir (0)

22.9.2010 | 09:28

Önnur umferð Ólympíuskákmótsins hafin

Önnur umferð Ólympíuskákmótsins er hafin, hófst kl. 9 í morgun. Hjörvar Steinn Grétarsson hvílir í viðureigninni gegn Svíum og Jóhanna Björg Jóhannsdóttir hvílir hjá konunum gegn Írunum. Hægt er að horfa a báðar viðureignirnar beint.

Ísland - Svíþjóð (beint)

Ísland - Írland (beint)

Spil og leikir | Slóð | Facebook | Athugasemdir (0)

« Fyrri síða | Næsta síða »