Henrik í 3.-6. sæti í Osló eftir tvö jafntefli

Stórmeistarinn Henrik Danielsen (2514) er í 3.-6. sæti eftir tvö jafntefli í 6. og 7. umferð á minningarmótinu um Svein Johannessen sem fram fóru í dag í Osló í Noregi.  Henrik hefur 5 vinninga en mótinu lýkur á morgun með 8. og 9. umferð.   

Jafnteflin í dag voru gegn stórmeisturunum Mark Hebden (2539), Englandi, og Tiger Hillarp Persson (2542), Svíþjóð.  Í áttundu og næstsíðustu umferð, sem fram fer í fyrramálið, teflir Henrik við danska alþjóðlega meistarann Nikolaj Mikkelsen (2409).

Hebden er efstur með 6 vinninga og norski stórmeistarinn Jon Ludvig Hammer (2610) er annar með 5,5 vinning.   

Alls taka 60 skákmenn þátt í mótinu og þar af 6 stórmeistarar.  Henrik er fjórði stigahæsti þátttakandi mótsins.  Mótið er níu umferðir en tekur aðeins fimm daga.

• Heimasíða mótsins
• Tournament Services

 

 

Carlsen sigrar enn - fjórði sigurinn í röð!

Magnus Carlsen (2813) er óstöðvandi á Medias-mótinu í Rúmeníu.  Í sjöundu umferð, sem fram fór í dag, sigraði hann Radjabov (2740).  Magnus byrjaði rólega með þremur jafnteflum en setti þá í fluggír.   Gelfand (2741) er annar, vinningi á eftir Magnúsi eftir sigur á Nisipeanu (2672).

Staðan:

• 1. Carlsen (2813) 5½ v.
• 2. Gelfand (2741) 4½ v.
• 3. Radjabov (2740) 3½ v.
• 4.-6. Nisipeanu (2672), Ponomariov (2733) og Wang Yue (2752) 2½ v.

Sex skákmenn taka þátt og tefld er tvöföld umferð.  Meðalstig eru 2742 skákstig sem gerir þetta eitt sterkasta skákmót ársins.  

• Heimasíða mótsins 
• Skákirnar í beinni (hefjast kl. 12:30)

Lenka sigraði í fyrri einvígisskákinni

Lenka Ptácníková (2267) sigraði Jóhönnu Björg Jóhannsdóttur (1738) í fyrri einvígisskák þeirra um Íslandsmeistaratitil kvenna í skák.   Lenka hafði svart.  Síðari einvígisskákin fer fram á morgun.

• Heimasíða SÍ
• Myndaalbúm mótins
• Chess-Results

Skákþáttur Morgunblaðsins: Afmælismót Friðriks Ólafssonar haldið í Djúpavík

Fyrr á þessu ári, nánar tiltekið hinn 26. janúar sl., varð fyrsti íslenski stórmeistarinn Friðrik Ólafsson 75 ára. Af því tilefni mun Hrókurinn efna til afmælishátíðar sem fram fer í Djúpavík og Norðurfirði í Árneshreppi um næstu helgi. Aðalmótið fer fram laugardaginn 19. júní í gömlu síldarverksmiðjunni í Djúpavík. Heiðursgestur er afmælisbarnið sjálft Friðrik Ólafsson en búist er við þátttöku fjölmargra öflugra skákmanna.

Baldur Möller Norðurlandameistari 1948 og 1950 lét þau orð eitt sinn falla að líta mætti á Friðrik sem brúna milli gamla tímans og hins nýja. Friðrik haslaði sér ótrauður völl á alþjóðavettvangi snemma á sjötta ártug síðustu aldar og vann hvert afrekið á fætur öðru. Tilþrifin á millisvæðamótinu í Portoroz 1958 þar sem Friðrik komst í hóp áskorenda eru enn í minnum höfð. „Friðriks-kynslóðin,“ eins og hún var samansett í hugum manna hér á landi kom þar fram að hluta með Tal fremstan í flokki, Petrosjan, Fischer, Gligoric og Larsen.

Meðal Íslenskra skákmanna voru aðeins Ingi R. Jóhannsson og mörgum árum síðar Guðmundur Sigurjónsson sem áttu einhverja möguleika gegn Friðriki á sjötta og sjöunda áratug síðustu aldar.

Sá danski, Bent Jörgen Larsen var með honum alla leið, allt frá því að þeir hittust fyrst á heimsmeistaramóti unglinga í Birmingham 1951. Á meira en 40 ára tímabili tefldu þeir 30 kappskákir. Sú síðasta var háð á 60 afmælismóti Friðriks í Þjóðarbókhlöðunni 1995. Bent vann og komst þá loks yfir, 15½ : 14½. Framan af á ferli þeirra var Friðrik greinilega fremri þó að hann hefði tapað einvíginu um Norðurlandameistaratitilinn 1956. Merkilegt er tímabil frá einvíginu '56 til viðureignar þeirra á Ólympíumótinu í Havana 1966 er þeir tefla 14 skákir og allar vinnast á svart.

Ég hygg að töfrar Friðriks hafi ekki síst legið í þeirri ógnarspennu sem hann náði að byggja upp í skákum sínum. Ókunnugum virtist hann stundum sólunda tíma sínum í furðulegustu atriði; aðrar skákir voru komnar vel af stað en Friðrik kannski að hugsa fyrsta leikinn. Kringum þetta spannst mikil umræða meðal hinna staðföstu fylgismanna Friðriks: Bergur Pálsson, Magnús Sigurjónsson og Jakob Hafstein svo nokkrir séu nefndir voru yfirleitt mættir og fögnuðu með Friðriki þegar vel gekk og það var oft.

Þegar Friðrik var kosinn forseti FIDE 1978 urðu ákveðin þáttaskil hjá honum hvað taflmennskuna varðaði. Fyrr á árinu höfðu áhorfendur flykkst í Kristalsal Hótel Loftleiða til að fylgjast með honum á Reykjavíkurskákmótinu. Þar laust þeim Bent Larsen enn og aftur saman og niðurstaðan varð einn frækilegasti sigur Friðriks yfir hinum glaðbeitta andstæðingi sínum:

8. Reykjavíkurskákmótið 1978:

Friðrik Ólafsson – Bent Larsen

Aljékíns-vörn

1. e4 Rf6 2. e5 Rd5 3. d4 d6 4. Rf3 g6 5. Bc4 Rb6 6. Bb3 Bg7 7. Rg5 d5 8. 0-0 Rc6 9. c3 Bf5

Hér var sennilega best að leik 9....f6 t.d. 10. exf6 exf6 11. He1+ Kf8 o.s.frv.

10. g4 Bxb1 11. Df3 0-0 12. Hxb1 Dd7

Hér og í næsta leik þráast Larsen við að reka riddarann af höndum sér með 12. ... h6.

13. Bc2 Rd8 14. Dh3 h6 15. f4!

Of seinn!

15....hxg5 16. f5 Re6 17. fxe6 dxe6 18. Bxg5 c5 19. Kh1 cxd4 20. cxd4 Hfc8

( STÖÐUMYND )

21. Bf5! gxf5 22. gxf5 Dc6 23. Hg1! Dc2 24. Hbe1 Kf8 25. f6

– og Larsen gafst upp enda stutt í mátið.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 7. júní 2010.

Skákþættir Morgunblaðsins

Róbert Norðurfjarðarmeistari

Róbert Lagerman sigraði Norðurfjarðarmótinu sem fram fór í dag í Kaffi Norðurfirði.  Mótið markaði loka skákhátíðirnar í Árneshreppi.  Róbert hlaut 5 vinninga í sex skákum og var hálfum vinningi fyrir ofan næstu menn sem voru Jóhann Hjartarson, Hlíðar Þór Hreinsson, Guðmundur Gíslason, Hrafn Jökulsson og Gunnar Björnsson.  Róbert var jafnframt skákstjóri mótsins svo skákstjórinn sló þarna við stórmeistaranum!

Alls tóku 22 skákmenn þátt í mótinu.

Nánari fréttir af skákhátíðinni í heild sinni eru væntanlegar á morgun sem og fjöldi mynda.

 

 

Henrik í 2.-5. sæti eftir tvö jafntefli í dag

Stórmeistarinn Henrik Danielsen (2514)er í 2.-5. sæti á minningarmótinu um Svein Johannessen með 4 vinninga en tvær skákir voru tefldar í dag.   Báðum skákum Henriks lauk með jafntefli. Sú fyrri var gegn norska stórmeistaranum  Jon Ludvig Hammer (2610) og sú síðari gegn danska stórmeistaranum Carsten Hoi (2410).  Henrik mætir enska stórmeistaranum Mark Hebden (2539), sem er efstur með 4,5 vinning, í sjöttu umferð sem fram fer í fyrramálið.

Skák Henrik gegn Hebden verður sýnd beint á vefsíðu mótsins en umferðin hefst kl. 8:30. 

Alls taka 60 skákmenn þátt í mótinu og þar af 6 stórmeistarar.  Henrik er fjórði stigahæsti þátttakandi mótsins.  Mótið er níu umferðir en tekur aðeins fimm daga.

• Heimasíða mótsins
• Tournament Services

 

 

Björn í 5.-12. sæti í Rúmeníu

Tvær umferðir fóru fram á alþjóðlega mótinu í Eforie í Rúmeníu í dag.  Alþjóðlegi meistarinn Björn Þorfinnsson (2390) gerði jafntefli við brasílíska alþjóðlega meistarann Krikor Sevag Mekhitarian (2499) í fyrri skák dagsins og sigraði rúmenska stórmeistarann  Gergely-Andras-Gyula Szabo (2546) í síðari skák dagsins.  Björn hefur 3,5 vinning og er í 5.-12. sæti.

Í fimmtu umferð, sem fram fer á morgun, teflir Björn við ísraelska alþjóðlega meistarann Tamir Nabaty (2493).    Skákin verður sýnd beint á vefsíðu mótsins.  Umferðin hefst kl. 13.   

Mikael Jóhann Karlsson (1726) hefur 2 vinninga, Birkir Karl Sigurðsson (1442), 1,5 vinning og Örn Leó Jóhannsson (1825) hefur 1 vinning.

181 skákmaður tekur þátt í þessu skákmóti.  Þar 17 stórmeistarar og 21 alþjóðlegur meistari.  Björn er númer 34 í stigaröð keppenda.  

• Heimasíða mótsins 
• Chess-Results

 

 

 

Enn sigrar Carlsen í Rúmeníu

Magnus Carlsen (2813) er orðinn sjóðheitur en hann vann sína þriðju skák í röð í dag er hann lagði Ponomariov (2733) í sjöttu umferð alþjóðlega mótsins í Medzina í Rúmeníu.  Öðrum skákum lauk með jafntefli og hefur Magnus nú vinnings forskot á Radjabov (2740) og Gelfand (2741).

Staðan:

• 1. Carlsen (2813) 4½ v.
• 2.-3. Radjabov (2740) og Gelfand (2741) 3½ v.
• 4. Nisipeanu (2672) 2½
• 5.-6. Ponomariov (2733) og Wang Yue (2752) 2 v.

Sex skákmenn taka þátt og tefld er tvöföld umferð.  Meðalstig eru 2742 skákstig sem gerir þetta eitt sterkasta skákmót ársins.  

• Heimasíða mótsins 
• Skákirnar í beinni (hefjast kl. 12:30)

Jóhann sigraði á Friðriksmótinu í Djúpavík

Stórmeistarinn Jóhann Hjartarson sigraði á afmælismóti Friðriks Ólafssonar sem fram fór í Djúpavík í Árneshreppi sem fram fór í dag.  Sigurvegari tveggja síðustu ára, Helgi Ólafsson, varð annar og heiðursgesturinn sjálfur Friðrik Ólafsson varð þriðji.

Mótshaldið tókst mjög vel og mótshöldurum mótsins, Hróknum, til mikillar sóma.

Nánari fréttir og fleiri myndir væntanlegar á morgun eða á mánudag.

 

 

Henrik með fullt hús eftir 3 umferðir í Osló

Stórmeistarinn Henrik Danielsen (2514) er með fullt hús að loknum þremur umferðum á minningarmótinu um  Svein Johannessen sem fram fer í Osló í Noregi.  Í dag voru tefldar 2 umferðir.  Í 2. umferð sigraði hann Norðmanninn Per Omvedt (2123) og í þriðju umferð vann norska FIDE-meistarann Kristian D. Trygstad (2297).

Alls taka 60 skákmenn þátt í mótinu og þar af 6 stórmeistarar.  Henrik er fjórði stigahæsti þátttakandi mótsins.  Mótið er níu umferðir en tekur aðeins fimm daga.

• Heimasíða mótsins
• Tournament Services