Íslandsmót framhaldsskólasveita

Íslandsmót framhaldsskólasveita í skák 2010 hefst sunnudag 28. mars nk. kl. 14 og er fram haldið mánudag 29. mars kl. 18.  Teflt er í húsakynnum Taflfélags Reykjavíkur í Skákhöllinni Faxafeni 12.

Keppnisfyrirkomulag er með svipuðu sniði og áður, hver sveit skal skipuð fjórum nemendum á framhaldsskólastigi (f. 1990 og síðar), auk 1- 4 til vara. Tefldar verða sjö umferðir eftir Monrad- kerfi, ef næg þátttaka fæst. Að öðrum kosti tefla sveitir einfalda umferð allar við allar. Umhugsunartími er ½ klukkustund á skák fyrir hvorn keppanda.

Nánar um mótsreglur sjá vef Skáksambands Íslands (Lög og Reglugerðir, Reglugerð um Íslandsmót framhaldsskólasveita í skák). http://www.skaksamband.is

Fjöldi sveita frá hverjum skóla er ekki takmarkaður. Sendi skóli fleiri en eina sveit skal sterkasta sveitin nefnd A- sveit, næsta B- sveit o.s.frv. Einnig skal raðað innan hverrar sveitar eftir styrkleika þannig að sterkasti skákmaðurinn er á fyrsta borði o.s.frv. - Ekkert þátttökugjald.

Vinsamlegast tilkynnið þátttöku á netfang Taflfélags Reykjavíkur [e-mail]  í síðasta lagi föstudag 26. mars.

Riddararnir lögðu Ása í Rammaslag

Árleg sveitakeppni Ása Skákklúbbs FEB (félags eldri borgara) og Riddarans (skákklúbbs eldri borgara á höfuðborgarsvæðinu) fór fram í 10. sinn Miðvikudaginn 10. mars sl.  í Strandbergi, félagsheimili Hafnarfjarðarkirkju, á vegum hins síðarnefnda.  Að þessu sinni var keppt á 20 borðum sem skipt var í 2 riðla eftir styrkleika.  Allir tefldu við alla i hvorum riðli og því tefldar 200 skákir.  Í tilefni að 10 ára afmæli keppninnar lék Bjartur Logi Guðnason, organisti,  2 stutta þætti úr orgel sónötu Mendelsons á  hið stóra, hljómmikla og rómantíska orgel Hafnarfjarðarkirkju, sem blés keppendum baráttuanda í brjóst.

Keppnin var afar tvísýn,  jafnt var í hálfleik, en síðan tóku Riddararnir forustuna og héldu henni allt til loka og unnu sannfærandi sigur með 108 vinningum gegn 92.  

 Í A-riðli urðu úrslitin : 53.5 v - 46.5 v. fyrir Riddarann og í B-riðli 54.5v. - 45.5v.

"Æsir í Ásgarði"  óx mjög ásmegin í fyrra er þeir tóku upp sitt nýja heiti, og unna þá viðureignina eftir nokkurt hlé.                            

Bestum árangri í A-riðli náði fyrir Æsi: Gunnar Kr. Gunnarsson, með 8 v af 10; Jóhann Örn Sigurjónsson, 7.5 ; Björn Þorsteinsson með 7 og Magnús Sólmundarson 6.5 v. 

Fyrir Riddarann: Guðfinnur R. Kjartansson, með 7, en hann gerði sér lítið fyrir og vann þá Magnús, Jóhann og Björn hvern á fætur öðrum, sem segja má að hafi ráðið úrslitum í A-riðli,  Össur Kristinsson einnig með 7, Sigurður Herlufsen með 6.5 og þeir Ingimar Jónsson og Sæbjörn G. Larsen með 6.

Í B-flokki voru það þeir: Magnús V. Pétursson og Egill Sigurðsson sem náðu flestum vinningum fyrir Æsi, með 7.5 og Halldór Skaftason með 5; en fyrir Riddarann þeir:

Björn Víkingur Þórðarson; Leifur Eiríksson, Eiríkur Viggósson og Ársæll Júlíusson (90 ára) allir með 6.5 v. En þeir Bjarni Linnet og Einar S. Einarsson fylgdu kjölfarið með 6v.

Keppt er um veglegan farandbikar sem Magnús Pétursson, forstjóri í  Jóa Útherja, hefur gefið til keppninnar.    Úrslitin keppninnar frá upphafi hafa orðið þessi:

  Ár          ÆSIR          Riddarinn          

2001        ??.?              -

2002        27.5 v          47.5 v

2003        47.5 v          27.5 v

2004        34.5 v          55.5 v

2005        27.5 v          47.5 v

2006        35.0 v          55.0 v

2007        48.5 v          59.5 v

2008        61.0 v          86.0 v

2009        56.0 v          52.0 v

                                2010        92.0 v         108.0 v          

Taflæfingar þessara tveggja skáklúbba eldri borgara á höfuðborgarsvæðinu eru haldnar hjá FEB, í Ásgarði, Stangarhyl, á þriðjudögum kl. 13-16.30 (7 umferðir   15 mín. skákir)  og hjá Riddaranum, í Vonarhöfn, Strandbergi, félagsheimili Hafnarfjarðarkirkju,  á miðvikudögum kl. 13-17 (11 umferðir, 10 mín. skákir).    Allir velkomnir.

Myndaalbúm keppninnar

                                                                                                                                            

Ivanchuk efstur á Amber-mótinu

Úkraínski stórmeistarinn Vassily Ivanchuk er efstur með 7,5 vinning að lokinni fimmtu umferð Amber-mótsins sem fram fór í dag í Nice í Frakklandi.  Í 2.-3. sæti með 7 vinninga eru Carlsen og Gelfand.  Ivanchuk er efstur í atskákinni en Carlsen er efstur í blindskákinni.

Úrslit 5. umferðar:

Blind	Dominguez-Gelfand	0-1
	Gashimov-Grischuk	½-½
	Kramnik-Ponomariov	1-0
Blind	Karjakin-Carlsen	0-1
	Aronian-Svidler	0-1
	Smeets-Ivanchuk	½-½
At	Gelfand-Dominguez	1-0
	Grischuk-Gashimov	0-1
	Ponomariov-Kramnik	0-1
At	Carlsen-Karjakin	0-1
	Svidler-Aronian	1-0
	Ivanchuk-Smeets	1-0

Blindskákin

1.  Carlsen    4    
2.  Gelfand    3½
    Grischuk   3½
    Ivanchuk   3½
5.  Gashimov   2½
    Karjakin   2½
    Kramnik    2½
    Ponomariov 2½
    Svidler    2½
10. Aronian    1½
11. Smeets     1    
12. Dominguez  ½

Atskákin

1.  Ivanchuk   4    
2.  Gelfand    3½
    Kramnik    3½
4.  Carlsen    3    
    Svidler    3    
6.  Gashimov   2½
7.  Aronian    2    
    Grischuk   2    
    Karjakin   2    
    Ponomariov 2    
11. Dominguez  1½
12. Smeets     1   
 

Samanlagt

1.  Ivanchuk   7½
2.  Carlsen    7    
    Gelfand    7    
4.  Kramnik    6    
5.  Grischuk   5½
    Svidler    5½
7.  Gashimov   5    
8.  Karjakin   4½
    Ponomariov 4½
10. Aronian    3½
11. Dominguez  2    
    Smeets     2    

Heimasíða mótsins

Morgunblaðið: Þá er það heimsfrétt!

*Margt ber fyrir augu og eyru þegar rölt er milli taflborða á skákmóti *Mikið er spáð og spekúlerað og jafnvel vitnað í vísur fyrri móta

Grein eftir Pétur Blöndal sem birtist í Morgunblaðinu 3. mars og birt hér með leyfi höfundar.  Einnig fylgja með skákskýringar Helga Ólafssonar á skák Hjörvars Steins og Kogan sem birtist í sama tölublaði Morgunblaðsins.  Pétur, Helgi og Morgunblaðið fá þakkir fyrir.

Skákmótið er hafið. Klukkurnar farnar að tifa. En efsti maður mótsins, Ivan Sokolov, situr enn fyrir framan tölvuna í kaffistofu Ráðhússins og sýnir ekki á sér fararsnið, þó að mínúturnar fjari undan honum. „Hann gerir þetta alltaf," segir Gunnar Björnsson, forseti Skáksambandsins, og kippir sér ekkert upp við þessa sjón.

Irina Krush stendur enn í röðinni og bíður eftir salatdisknum. Hún hefur blandað sér í slag stórmeistaranna, er í sjötta til sextánda sæti fyrir daginn. Í salnum eru áhorfendur ekki síður í djúpum þönkum en keppendurnir. Einn situr og les The Brief Wondrous Life of Oscar Wao eftir Junot Díaz. Svo er þarna stöðumælavörður - kannski til að fylgjast með klukkunum. Einn er með sexpensara í fagurgulri skyrtu. Og inni á milli áhorfenda sitja keppendur í djúpum þönkum. Nú er það Hannes Hlífar Stefánsson, sem horfir þaðan á stöðuna í skákunum, þar á meðal sinni. Hann er með peð upp í skiptamun. Engu að síður hefur mótherji hans hugsað í tuttugu mínútur samfleytt um næsta leik.

„Þetta er hnífjafnt," hvíslar Gústaf Steingrímsson, skákmaður Ufsans, að blaðamanni.

„Við vorum að skoða þetta í vinnunni, hentum þessu upp í tölvu, og þetta eru allt þekktir leikir. Nema síðasti leikur Hannesar, kóngur á h8, venjulega er honum leikið á f7."

„Þetta er á uppleið," hvíslar Björn Þorfinnsson, sem mætir blaðamanni á rölti um salinn.

„Ég var miður mín í tvær umferðir eftir að hafa klúðrað hróksendatafli á móti frönskum stórmeistara, þar sem ég var tveim peðum yfir. Ég missti það niður í endatafl."

Hann dæsir.

„Þetta getur verið erfitt fyrir sálina. En vonandi vinn ég tvær síðustu. Þá verður þetta allt í lagi."

Hann horfir yfir salinn.

„Það verður spennandi ef Nyzhnyk vinnur. Þá er það heimsfrétt! Það er alltaf gott fyrir skákmót þegar það gerist."

Svo snýr hann sér við og tautar um leið: „Jæja, ég verð að fara, sá enski er búinn að leika."

Hann hafði sigur þennan daginn. En ekki Nyzhnyk. Drengnum 13 ára frá Úkraínu nægir þó að vinna í dag til að ná þriðja áfanganum og verða fjórði yngsti stórmeistari frá upphafi.

Það yrði heimsfrétt.

Róbert Lagerman blæs til sóknar eins og vant er, lætur það ekki trufla sig að hann er með svart. Romanishin er í jakkafötum og virðulegur á svip að vanda. Jafnvel þegar hann lendir í tímahraki á móti Braga Þorfinnssyni í einni mest spennandi skák kvöldsins. Það þarf ekki að koma á óvart að maður með slíkt jafnaðargeð geri jafntefli.

Stráklingarnir Svanberg Már Pálsson og Páll Andrason eru komnir í endatafl á meðan miðtaflið stendur enn yfir á öðrum borðum. Innan skamms sitja þeir á kaffistofunni og fara yfir af hverju skákinni lauk með jafntefli.

Þriðji stráklingurinn, Emil Sigurðarson, sest augnablik með þeim, þó að skák hans standi enn yfir í salnum. Hann stingur upp á leik. „Djísús, sá ég þetta ekki!" heyrist í öðrum hinna.

„Jafntefli," kallar hinn þegar mamma hans gengur í hús.

Björn Þorfinnsson slæst í hópinn: „Þú leikur bara hérna og hérna og hérna. Hvað ætlar hann þá að gera?" Þeir horfa á stöðuna. Þegja bara. „Þetta var close!" segir Björn svo og labbar brosandi burtu. Hann hefur um annað að hugsa.

„Hún er spennandi skákin hjá Hannesi," segir Gunnar Björnsson, sem mættur er aftur í hús, eftir að hafa skroppið í vinnuna.

„Hann fann reyndar helvíti sniðuga leið út úr þessu Nataf. Hann fórnaði bara skiptamuninum til baka. Þannig að þetta er jafnteflislegt, en Hannes er þó með ívið betri stöðu."

Stórmeistarinn Jóhann Hjartarson er mættur.

Skákskýringar að hefjast.

Að því gefnu að borgarfulltrúarnir taki sér ekki of langt matarhlé, því skákskýringarnar eiga að fara fram í matsalnum. Það hefur bæst við áhorfendafjöldann.

Þetta er þjóðaríþróttin.

Og nú fylgist Nataf með úr salnum á meðan Hannes Hlífar situr við skákborðið. „Þetta er nú samt ekkert einfalt," segir Jóhann íhugull. Hann er að fara yfir skák Hannesar og Natafs. Remúlaðilyktin enn í loftinu eftir borgarstjórnina.

„En óneitanlega lítur þetta mjög vel út á svartan. Nú er Hannes með peði yfir og með mátmöguleika með hrók, riddara og peði." Hann kemst með sigri í efsta sætið, þar sem Ivan Sokolov tróndi áður.

„Það fór illa fyrir Sokolov eins og þið sáuð," segir Jóhann.

„Þetta var alveg svakaleg kyrking sem hann lenti í. Enda sást undir hælana á honum þegar hann gekk út." Hann hlær.

„Við erum ágætir mátar, en það er langt síðan ég spjallaði við hann. Ætli það séu ekki liðin tvö ár. Og ég náði ekki tali af honum áðan. Ég ætlaði bara að segja að honum hefði ekkert farið fram síðan síðast!" Hann hlær ennþá meira.

„Það á alltaf að strá salti í sárin." Svo lítur hann út í salinn.

„Eigum við kannski að renna yfir skákina hjá Ivan Sokolov? Hvernig svona mikill meistari gat fengið svona vonda stöðu í byrjuninni." Þegar líður á skákina fer Jóhann að aka sér í stólnum, svo óþægileg er staða Sokolovs.

„Það er best að Ivan er ekki hér. Við skulum ekki rekja þetta lengur. Hvernig ætli staðan sé hjá Hannesi. Já, já, peðið fer upp. Ég skil nú ekki af hverju Nataf er ekki búinn að gefa þetta. Kannski við kíkjum á skákina hjá Þresti [Þórhallssyni]. Hann er svona með heldur lakara."

Þröstur heldur þó út manna lengst. Enda í essinu sínu með tvo riddara í endatafli. En verður að lokum að játa sig sigraðan. Í horni matsalarins eru seldar skákbækur. Þar eru teóríurnar. Og það rifjast upp fyrir Jóhanni: „Ágúst Þór Árnason skákmeistari og hæstaréttarlögmaður sló fram fyrriparti á helgarskákmóti á Sauðárkróki í kringum 1980: Enga leiki æskan skilur, allt af bókum lærir hún.

Þá svaraði Benóný á augabragði - ég varð vitni að þessu:

Það er eins og blindabylur blási fram af hæðarbrún."

 

-----------------------------------------

Herkví

Skákskýringar Helga Ólafssonar sem birtist í Morgunblaðinu 3. mars sl.

Það eru til nokkrar frægar stöður úr skáksögunni þar sem aðstaða taflmannanna á skákborðinu hefur orðið svo ólánleg að lengi er í minnum haft. Í þrettándu einvígisskák Spasskí og Fischer í Laugardalshöllinni '72 lenti hrókur Fischer í herkví á g8. Biskup, studdur af peði á g7, lokaði hann inni á f8. Á hinum hluta borðsins var Spasskí umsetinn framsækinni peðfylkingu. Önnur frípeð átti áskorandinn á dreif en kóngur hans komst þó hvorki lönd né strönd. En svo lagði hann á fljótið og þurfti til þess að fórna þeim fótgönguliða sem lengst var kominn að uppkomureitnum. Síðar villtist Spasskí af réttri leið, hrókurinn slapp úr herkvínni og hinn geðþekki heimsmeistari varð að fella kónginn. Í Höllinni ríkti um skeið þess konar samúð með Spasskí að minnti á harmleik. Jafnvel yfirdómarinn Lothar Schmid reyndi að hughreysta hann og var það nú kannski ekki hans hlutverk.

Ég er ekki viss um að áhorfendur í Ráðhúsi Reykjavíkur hafi verið í slíkum þönkum þegar Hjörvar Steinn Grétarsson króaði hrók hins öfluga ísraelska stórmeistara Arturs Kogan af í sjöttu umferð Reykjavíkurskákmótsins. Miklu fremur að menn hafi brosað í kampinn og Kogan tók þessum neyðarlegu endalokum af karlmennsku. En sigur Hjörvars var einn margra góðra sem íslensku skákmennirnir hafa unnið á mótinu:

24. Reykjavíkurskákmótið:

Artur Kogan - Hjörvar Steinn Grétarsson

Nimzo-indversk vörn

1. d4 Rf6 2. Rf3 e6 3. c4 Bb4 4. Rc3 c5 5. e3 O-O 6. Bd3 d5 7. O-O Rbd7 8. cxd5 exd5 9. Re5 He8 10. f4 Rf8 11. Df3 Re6 12. a3 Ba5 13. f5 Rg5 14. Dg3 Bxc3 15. Dxg5 Hxe5!

Lætur skiptamun af hendi. Hvítur hefði sennilega betur tekið á c3.

16. dxe5 Bxe5 17. Hb1 Dd6 18. Dh4 Bd7 19. Bd2 He8 20. Kh1 b5 21. Hf3 Bc6 22. Hh3 h6 23. b3 c4 24. Bb4 Dc7 25. Bc2 Bb7 26. Be1 Dc6 27. Df2 a6

Styrkir stöðu sína í rólegheitum, 27. ... d4 kom einnig til greina.

28. Df3 Re4 29. Bxe4 dxe4 30. Dd1 c3 31. Hc1 Hc8 32. Dc2 Dd5! 33. Bg3 Hjörvar hafði vonast eftir 33. Bg3 sem hann hugðist svara með 33. ... Dd3! 34. Hxd3 exd3 35. Dxd3 c2! og vinnur.

33. ... Bxg3 34. Hxg3 Dd2 35. f6 g6 36. h4 Dxc2 37. Hxc2 Bd5 38. b4 Bb3 39. Hc1 Be6!

Hrókurinn á g3 er lentur í herkví.

40. Hc2 Kf8 41. Kg1 Ke8 42. Hc1 Bf5 43. Kf2 Kd7 44. Ke1 c2 45. Kd2 Ke6 46. Hxc2 Hxc2 47. Kxc2 Kxf6 48. a4 Ke5 49. axb5 axb5 50. Kc3 f6 51. Kd2 g5 52. Kc3 g4

53. Kd2 Be6 54. Kc3 f5 55. Kd2 Bc4 56. Kc2 Kd5 57. Kc3 Bf1 58. Kb3 Be2 59. Kc3 Bd1 60. Kd2 Ba4 61. Kc3 h5

Leikþröng.

62. Kb2 Kc4 63. Ka3 Kc3

- Þessa stöðu væri hægt að vinna án biskupsins. Kogan gafst upp.

[e-mail]

Páll sigraði á hraðkvöldi Hellis

Páll Andrason sigraði örugglega á hraðkvöldi sem haldið var 15. mars sl. Páll fékk 6,5v í sjö skákum og leyfði aðeins eitt jafntefli við Örn Leó. Jöfn í öðru og þriðja sæti voru svo Elsa María Kristínardóttir og Geir Guðbrandsson með 5v. Páll fékk svo að draga í happdrættinu og þrátt fyrir yfirlýsingu um að hann ætlaði að draga Birki þá dró hann Jón Úlfljótsson. Jón hefur undanfarið verið fengsæll á þessum æfingum og er kominn með efnivið í góða pizzuveislu.

 Lokastaðan á hraðkvöldinu:

• 1.   Páll Andrason                            6,5v/7
• 2.   Elsa María Kristínardóttir           5v
• 3.   Geir Guðbrandsson                    5v
• 4.   Örn Leó Jóhannsson                  4,5v
• 5.   Jóhann Bernhard Jóhannsson    4,5v
• 6.   Dagur Kjartansson                     4v
• 7.   Birkir Karl Sigurðsson                 4v
• 8.   Jón Úlfljótsson                            3,5v
• 9.   Vigfús Ó. Vigfússon                    3,5v
• 10.  Björgvin Kristbergsson              3,5v
• 11.  Jón Trausti Harðarson                3v
• 12.  Heimir Páll Ragnarsson              3v
• 13.  Róbert Leó Jónsson                   2v
• 14.  Dawid Kolka                               2v
• 15.  Pétur Jóhannesson                    1v
• 16.  Kristinn Andri Kristinsson            1v

Fimmtudagsmót hjá TR í kvöld

Að venju fer fram fimmtudagsmót T.R. í kvöld kl. 19.30.  Tefldar verða 7
umferðir með 7 mínútna umhugsunartíma.  Mótin
fara fram í félagsheimili T.R., skákhöllinni að Faxafeni 12, og opnar
húsið kl. 19.10.  Glæsilegur verðlaunapeningur er í boði fyrir
sigurvegarann.Mótin
eru öllum opin og er aðgangseyrir kr. 500 fyrir 16 ára og eldri en
frítt er fyrir 15 ára og yngri.  Boðið er upp á kaffi ásamt léttum
veitingum án endurgjalds.

íslandsmót barnaskólamót fer fram á sunnudag - skráningarfrestur rennur út í dag

Íslandsmót barnaskólasveita 2010 fer fram í Vetrargarðinum, Smáralind, sunnudaginn 21.mars. Mótshaldið er í höndum Skákakakademíu Reykjavíkur í nánu samstarfi við Skáksamband Íslands.

Tefldar verða 8 umferðir eftir Monrad-kerfi - umhugsunartími 10 mín. á skák fyrir hvern keppenda.

Hver skóli getur sent fleiri en eina sveit - en hver sveit er skipuð fjórum nemendum 1.-7.b ekkjar grunnskóla en að auki mega allt að tveir varamenn skipa hverja sveit. Keppendur skulu vera fæddir 1997 eða síðar.

Mótið hefst kl. kl.12.30 og skulu keppendur vera mættir í síðasta lagi kl. 12.15. Gert er ráð fyrir að mótshaldið taki rúmlega 4 klukkustundir.

Sigurvegari mótsins hlýtur rétt til þátttöku á Norðurlandamóti barnaskólasveita sem fram fer í september næstkomandi. Viðkomandi skóli ber ábyrgð á skipulagningu og fjármögnun ferðarinnar en Skáksamband Íslands mun aðstoða við þjálfun keppenda.

Skráning fer fram hjá Skáksambandi Íslands í síma 568-9141, virka daga 10-13 og í tölvupósti [e-mail]. Skráningu skal lokið í síðasta lagi fimmtudaginn 18. mars. Með skráningu skóla skal fylgja nafn liðstjóra og netfang hans.

Þegar nær dregur mótinu verður liðstjórum sendar nákvæmar upplýsingar varðandi framkvæmd mótsins.

Frábær þátttaka á öðlingamóti

Frábær þátttaka er á Skákmóti öðlinga sem hófst í félagsheimili TR í kvöld en 40 öðlingar taka þátt.  Hingað til hafa mest 24 skákmenn tekið þátt svo metið er slegið allhressilega!  Meðal keppenda eru t.d. sex suðurnesjamenn og fjórir keppendur koma frá Selfossi.  Mótið hefur jafnframt sennilega aldrei verið sterkara. 

Í fyrstu umferð urðu úrslit nokkuð hefðbundin en þó var eitthvað um óvænt úrslit.  Birgir Rafn Þráinsson gerði jafntefli við Björn Þorsteinsson, Árni Thoroddsen gerði jafntefli við Magnús Gunnarsson og Haukur Halldórsson sigraði Sigurð H. Jónsson. 

Einni skák var frestað veikinda og pörun 2. umferðar mun ekki liggja fyrir fyrr en að henni lokinni, á laugardag.

Úrslit 1. umferðar:

 

Name	Result	Name
Thorsteinsson Thorsteinn	1 - 0	Gudmundsson Einar S
Ulfljotsson Jon	0 - 1	Gudmundsson Kristjan
Halldorsson Bragi	1 - 0	Gudmundsson Sveinbjorn G
Thrainsson Birgir Rafn	½ - ½	Thorsteinsson Bjorn
Ragnarsson Johann	1 - 0	Hreinsson Kristjan
Thoroddsen Arni	½ - ½	Gunnarsson Magnus
Hjartarson Bjarni	½ - ½	Jensson Johannes
Einarsson Thorleifur	0 - 1	Bjornsson Eirikur K
Palsson Halldor	1 - 0	Jonsson Loftur H
Halldorsson Haukur	1 - 0	Jonsson Sigurdur H
Isolfsson Eggert	1 - 0	Kristinsson Magnus
Schmidhauser Ulrich	0 - 1	Matthiasson Magnus
Fridthjofsdottir Sigurl  Regin	1 - 0	Kristbergsson Bjorgvin
Johannesson Petur	0 - 1	Sigurmundsson Ulfhedinn
Sigurmundsson Ingimundur	1 - 0	Adalsteinsson Birgir
Bjornsson Gudmundur	0 - 1	Breidfjord Palmar
Thorarensen Adalsteinn	1 - 0	Ingason Gudmundur
Vikingsson Halldor	0 - 1	Jonsson Pall G
Eliasson Jon Steinn	0 - 1	Gardarsson Halldor
Bergmann Haukur		Sigurdsson Pall

Keppendalistinn:

 

No.		Name	Rtg	Club/City
1	FM	Thorsteinsson Thorsteinn	2271	TV
2		Gudmundsson Kristjan	2259	TG
3		Halldorsson Bragi	2230	Hellir
4		Thorsteinsson Bjorn	2226	TR
5		Bergmann Haukur	2142	SR
6		Ragnarsson Johann	2124	TG
7		Gunnarsson Magnus	2124	SSON
8		Hjartarson Bjarni	2112	Fjölnir
9		Bjornsson Eirikur K	2013	TR
10		Gardarsson Halldor	1978	TR
11		Palsson Halldor	1947	TR
12		Sigurdsson Pall	1881	TG
13		Jonsson Sigurdur H	1862	SR
14		Isolfsson Eggert	1845	TR
15		Matthiasson Magnus	1838	SSON
16		Fridthjofsdottir Sigurl  Regin	1810	TR
17		Sigurmundsson Ulfhedinn	1775	SSON
18		Sigurmundsson Ingimundur	1760	SSON
19		Breidfjord Palmar	1746	SR
20		Thorarensen Adalsteinn	1741	TR
21		Jonsson Pall G	1710	KR
22		Gudmundsson Einar S	1705	SR
23		Ulfljotsson Jon	1695	Víkingaklúbburinn
24		Gudmundsson Sveinbjorn G	1665	SR
25		Thrainsson Birgir Rafn	1636	Hellir
26		Hreinsson Kristjan	1610	KR
27		Thoroddsen Arni	1555	KR
28		Jensson Johannes	1535
29		Einarsson Thorleifur	1525	SR
30		Jonsson Loftur H	1510	SR
31		Halldorsson Haukur	1500	Vinjar
32		Kristinsson Magnus	1415	TR
33		Schmidhauser Ulrich	1375	TR
34		Kristbergsson Bjorgvin	1165	TR
35		Johannesson Petur	1020	TR
36		Adalsteinsson Birgir	0
37		Bjornsson Gudmundur	0
38		Ingason Gudmundur	0	KR
39		Vikingsson Halldor	0
40		Eliasson Jon Steinn	0	KR

 

• Heimasíða TR
• Chess-Results

EM: Hannes og Henrik enduðu með sigri - Nepomniachtchi og Cramling Evrópumeistarar

Stórmeistararnir Hannes Hlífar Stefánsson (2574) og Henrik Danielsen (2494) unnu báðir í lokaumferð EM einstaklinga sem fram fór í Rijeka í Króatíu í dag.    Hannes sigraði þýska alþjóðlega meistarann Mathias Womacka (2452) en Henrik vann makedónska alþjóðlega meistarann Dusan Lekic (2396).   Ian Nepomniachtchi (2656) og Pia Cramling (2523) urðu Evrópumeistarar.   

Hannes hlaut 6,5 vinning og Henrik 6 vinninga.  Hannes hækkar um 3 stig fyrir frammistöðu sína sem samsvaraði 2589 skákstigum en Henrik lækkar um 2 stig fyrir frammistöðu sína sem samsvaraði 2443 skákstigum.

Hinn 19 ára, rússneski stórmeistari Ian Nepomniachtchi (2656) varð Evrópumeistari en hann var aðeins 35. stigahæsti keppandinn.  Í 2.-3. sæti urðu stórmeistararnir Baadur Jobava (2695), sem leiddi lengst af, og Artyom Timofeev (2655), Rússlandi. Tíu skákmenn komust beint áfram á Heimsbikarmótið (World Cup) en 30 skákmenn þurfa að tefla atskák til úrslit um 12 laus sæti og þar á meðal eru Íslandsvinirnir Movsesian og Sokolov. 

Enginn norðurlandabúi komst áfram en Emanuel Berg stóð sig best þeirra en hann fékk 7 vinninga.  Það er athyglisvert að ekkert norðurlandanna sendi fleiri fulltrúa á opin flokk en litla Ísland.  Svíar áttu einnig tvo fulltrúa en Danir, Finnar og Norðmenn áttu hvern sinn fulltrúa og sumir þeirra fóru á eigin vegum.  

Pia Cramling Evrópumeistari kvenna var eini fulltrúi norðurlandanna í kvennaflokki.   Í öðru sæti varð litháíska skákkonan Viktorija Cmilyte (2485) en Cramling vann hana í lokaumferðinni.  

• Heimasíða mótsins
• Chess-Results
• Skákirnar í beinni
• Chessdom

Morgunblaðið: Undrabörnin frá Perú

Það er ekki á hverjum degi sem tveir heimsmeistarar í skák koma frá sama landinu, hvað þá úr sömu fjölskyldunni. Enda eru Cori-systkinin, sem tefla þessa dagana á Reykjavíkurskákmótinu, þjóðhetjur í sínu heimalandi. Daysi er 16 ára og Jorge 14 ára, en hann er jafnframt yngsti stórmeistari í heiminum. 

Frá ritstjóra:  Á meðan MP Reykjavíkurskákmótinu stóð sinnti Morgunblaðið mótinu afskaplega vel og birti um þær þrjár ítarlegar greinar auk hefðbundinna skákþátta Helga Ólafssonar í sunnudagsmogganum.  Næstu 3 daga verða þessar greinar Morgunblaðsins um mótið birtar hér á Skák.is.  Fyrsta greinin sem birtist í dag birtist í Sunnudagsmogganum 28. febrúar og er eftir Steinunni Þórhallsdóttur og fjallar um Perúsystkinin.  Skák.is kann viðkomandi blaðamönnum og Morgunblaðinu bestu þakkir fyrir!

Það er ekki á hverjum degi sem tveir heimsmeistarar í skák koma frá sama landinu, hvað þá úr sömu fjölskyldunni. Enda eru Cori-systkinin, sem tefla þessa dagana á Reykjavíkurskákmótinu, þjóðhetjur í sínu heimalandi. Daysi er 16 ára og Jorge 14 ára, en hann er jafnframt yngsti stórmeistari í heiminum. 

Tveir heimsmeistarar í skák rölta á móti mér eftir brúnni yfir í Ráðhúsið, á leið til annars mótsdags í MP Reykjavík Open. Þetta eru Daysi og Jorge Cori, 16 og 14 ára systkini frá Perú. Faðir þeirra, Jorge Cori eldri, er í fylgd með börnum sínum og þau heilsa öll blaðamanni með kossi og faðmlagi að suðuramerískum sið.

„Er ísinn traustur?" er það fyrsta sem Jorge Cori eldri spyr blaðamann og svo lýsir hann áhyggjum sínum af velferð fólksins sem hann sá hlaupa á honum í gærkvöldi. Eftir að hafa fullvissað hann um að ekki sé vitað til að nokkur hafi drukknað í Tjörninni náum við ljósmyndarinn að plata þau út á ísinn er umlykur Ráðhúsið og þau fíflast afslöppuð í snjónum, þótt ekki séu nema um 45 mínútur þar til skákir dagsins hefjast.

Snjórinn frábær

Daysi Cori er eini alþjóðlegi kvenstórmeistari í skák í Perú og yngst allra kvenna í Suður-Ameríku til að bera þann titil. Jorge Cori er hins vegar yngsti alþjóðlegi stórmeistari í heimi og var yngstur Ameríkubúa að ná þeim áfanga aðeins 14 ára og tveggja mánaða. Í nóvember í fyrra náðu systkinin bæði þeim merka áfanga að vinna heimsmeistaratitla í skák í sínum aldursflokkum á heimsmeistaramóti unglinga í Tyrklandi.

„Okkur brá svolítið í dag þegar við komum út í hríðina og allan þennan snjó og vindurinn ýtti og togaði í okkur. En mér finnst snjórinn frábær," segir Daysi og litli bróðir hennar samsinnir því.

Þau koma frá borginni Villa Salvador, sem er við Lima, höfuðborg Perú, þar sem allt annað loftslag ríkir. „Við erum að koma frá því að keppa á skákmótum á Frakklandi og Spáni og förum svo aftur til Spánar þegar þessu móti lýkur. Það er skólafrí í Perú núna og við notum það til að keppa og safna ELO-stigum."

Ég spyr þau hvernig líf skákmeistara sé. „Bara venjulegt, nema maður þarf að æfa sig aðeins meira," segir Jorge og flissar.

Skákin færir gleði

Börnin eru orðin þjóðhetjur í heimalandi sínu Perú og ég spyr þau hvort heimsmeistaratitlarnir hafi breytt lífi þeirra. „Jú, þetta hefur fært mikla gleði og hamingju í fjölskyldu okkar og svo þekkir fólk okkur á götum úti, vill taka ljósmyndir og fá eiginhandaráritanir. Við þurfum að leggja tímanlega af stað þegar við förum í bíó og svoleiðis."

Jorge Cori eldri segir mér að þau séu af efnalitlu fólki komin. Hann er sjálfur verkamaður og konan hans skólaliði í grunnskóla. Þau hafi alla tíð þurft að reiða sig á styrki og aðstoð skáksambandsins í Perú, borgaryfirvalda í Villa Salvador og einkaaðila til að börnin geti keppt á mótum, og ótrúlegur árangur þeirra hefur síðan opnað þeim möguleika á betri menntun. Þeim var boðið að stunda nám í einkaskóla, og nýverið var Daysi boðinn styrkur til náms við háskóla í Bandaríkjunum. Styrktaraðilar þeirra í Perú hjálpuðu fjölskyldunni einnig að byggja sér hús. Skáksamband Perú er ekki sterkt miðað við önnur lönd og því ferðast faðirinn einn með börnin á stórmót þegar aðrar þjóðir mæta til leiks með lið þjálfara, sálfræðinga og aðstoðarmanna.

Læra fyrst, æfa svo

Krakkarnir eru á heimavelli þegar þau eru spurð að því hvenær þau hafi byrjað að tefla. „Ég var sex og hún var átta og pabbi kenndi okkur mannganginn. Þá var skákin ekki svo þekkt í Perú en hún er það núna. Þetta hefur ekki alltaf verið auðvelt en okkur finnst bara svo gaman að keppa á mótum og ferðast og hitta nýtt fólk," segir Jorge yngri.

En eru þau ólíkir skákmenn? Daysi grípur orðið og segir að bróðir sinn sé rólegri og skipulagðari leikmaður en hún, en þau pæli lítið í því hvernig þau tefli. Ég spyr hvaða markmið þau hafi sett sér núna eftir heimsmeistaramótið og segir Daysi það vera að verða alþjóðlegur stórmeistari, sem aðeins tíu konur eru núna. Að auki vilji hún ná 2.600 ELO-stigum fyrir lok ársins.

„En það var mitt markmið," segir litli bróðir hlæjandi. „Þú stalst því." Bæði gangast þau við því að vera miklir keppnismenn og fá gríðarlega mikið út úr því að sigra sér eldri og reyndari mótherja.

Hvaðan koma þessir miklu skákhæfileikar? Jorge eldri hlær og svarar til: „Ég spyr sjálfan mig stundum hvernig standi á þessu!" Hann lýsir því að það hafi í raun verið alger tilviljun að skákin kom inn í líf þeirra. „Ég kunni varla mannganginn þegar krakkarnir fóru á sumarnámskeið, og við lærðum þetta saman til að byrja með. Kennarar barnanna tóku strax eftir hæfileikum þeirra og við leyfðum þeim að tefla út í eitt. Við tóku sigrar á skólamótum, héraðsmótum og landsmótum og þau færðust undrahratt upp styrkleikalistann. Þetta er það sem þeim finnst skemmtilegast að gera í lífinu og skákin sprettur svo eðlilega og áreynslulaust fram hjá þeim.

Það hefur verið þannig frá upphafi og er reyndar enn í dag," heldur Jorge eldri áfram, „að þau þurfa að vera búin að læra heima áður en ég hleypi þeim að taflborðinu. Ég legg áherslu á það að þau passi upp á skólann og fái góða menntun, en þeim er alveg sama um það eins og er, skákin er númer eitt, tvö og þrjú. Og það er meðal annars lykillinn að ótrúlegum árangri þeirra, að þau njóta leiksins til hins ýtrasta. Þegar þau eru ekki að keppa á mótum fáum við einkakennara sem kemur á hverjum einasta degi, meira að segja á jólunum. Þá reyndar kvörtuðu börnin og móðir þeirra hástöfum en ég lít svo á að þau fái frí frá skólabókunum þegar við erum á keppnisferðalögum. Skákin er þó að mínu mati góð íþrótt, því hún þjálfar hugsunina, þú munt aldrei hitta skákmann sem er fátækur að því leyti."

Og þetta virðist sannarlega vera fjölskylda í fríi fremur en keppnisíþróttamenn, þar sem ég horfi á eftir undrabörnunum tveimur trítla léttfætt í skáksalinn, meðan faðir þeirra leggur af stað í göngutúr í snjónum. Hann ætlar að skoða sig um í miðbænum, taka út skautasvellið og finna veitingastað til að bjóða krökkunum sínum á í kvöld. „Ég þarf ekkert að standa yfir þeim og greina skákirnar, þau sjá alveg um þetta sjálf."

Steinunn Þórhallsdóttir, Sunnudagsmoggi 28. febrúar