Jólaskákmót Bjargarinnar

Föstudaginn 26. nóvember fer fram Jólaskákmót Bjargarinnar 2010. Þetta er innanfélagsmót Bjargarinnar sem þýðir að það eru einungis félagar Bjargarinnar sem hafa þátttökurétt.

Það verða glæsilegir bókavinningar fyrir alla sem taka þátt og verðlaunapeningar fyrir efstu þrjú sætin. Umhugsunartími er 10 mínútur á hvorn keppanda og keppa allir við alla.

Þátttökugjald er 250 krónur til þess að standa straum af kostnaði við verðlaunapeninganna. Skákstjóri verður hinn vinsæli og málglaði formaður Hressra Hróka Emil Ólafsson.

 

TORG-skákmót Fjölnis

TORG - skákmót Fjölnis verður haldið laugardaginn 27. nóvember í verslunarmiðstöðinni Hverafold 5 í Grafarvogi. Mótið hefst kl. 11:00 og því lýkur með glæsilegri verðlaunaafhendingu og happadrætti kl. 13:00. Mótið var afar fjölsótt í fyrra en þá tóku rúmlega 60 grunnskólanemendur þátt,  þar á meðal allir þeir bestu og efnilegustu. Tefldar verða sex umferðir og umhugsunartíminn er sjö mínútur.

Það er skákdeild Fjölnis sem heldur mótið en fyrirtækin á Torginu í Hverafold gefa vinninga og veitingar. Allt stefnir í að fjöldi verðlauna verði rúmlega 30 og eiga því þátttakendur góða von um verðlaun eða happadrættisvinninga. NETTÓ Hverafold býður öllum þátttakendum upp á ókeypis veitingar í skákhléi auk þess sem verslunin gefur vinninga og þrjá eignarbikara til þeirra sem verða efstir í sínum flokki.

Önnur fyrirtæki sem gefa vinninga eru Pizzan, Foldaskálinn (hamborgaratilboð), Arion banki, Runni - Stúdíóblóm, Hárgreiðslustofan Höfuðlausnir, Bókabúðin Grafarvogi og Smíðabær. Skákdeild Fjölnis hvetur alla áhugasama skákmenn á öllum grunnskólaaldri að gera sér ferð í Grafarvoginn laugardagsmorguninn 27. nóvember og taka þátt í TORG - skákmótinu þar sem teflt er á opnu rými verslunarmiðstöðvarinnar, gestum og gangandi til yndisauka. Skráning á staðnum. Þátttakendur beðnir um að koma tímanlega til skráningar.

Hjörvar atskákmeistari Reykjavíkur og Hellis

Hjörvar Steinn Grétarsson (2433) varð í gær atskákmeistari Reykjavíkur og Hellis.   Hjörvar fékk fullt hús vinninga í sex skákum.  Örn Leó Jóhannsson (1838) varð annar með 4½ vinning.  Sex skákmenn urðu jafnir í 3. sæti.

Lokastaðan:

 

Rk.		Name	Rtg	Pts.
1		Gretarsson Hjorvar Steinn	2433	6
2		Johannsson Orn Leo	1838	4,5
3	IM	Bjarnason Saevar	2151	4
4		Eliasson Kristjan Orn	1972	4
5		Sigurdsson Birkir Karl	1478	4
6		Finnsson Gunnar	1757	4
7		Kristinardottir Elsa Maria	1702	4
8		Traustason Ingi Tandri	1834	4
9		Sigurdsson Johann Helgi	2057	3,5
10		Lee Gudmundur Kristinn	1542	3,5
11		Thorsteinsdottir Hallgerdur	1982	3
12		Vigfusson Vigfus	1999	3
13		Brynjarsson Helgi	2008	2,5
14		Ulfljotsson Jon	1860	2,5
15		Thorarensen Adalsteinn	1747	2,5
16		Brynjarsson Eirikur Orn	1629	2,5
17		Jonsson Rafn	1763	2,5
18		Kristinsson Kristinn Andri	0	2
19		Karlsson Snorri Sigurdur	1633	2
20		Daday Csara	0	2
21		Jonsson Robert Leo	1180	2
22		Kristbergsson Bjorgvin	1250	1,5
23		Einarsson Oskar Long	0	1,5
24		Davidsdotir Nancy	0	1

 

Jólaskákmót í Hótel Glym

Hrókurinn og Hótel Glymur standa fyrir jólaskákmóti sunnudaginn 12. desember klukkan 14. Verðlaun eru veitt í mörgum flokkum, m.a. fyrir bestan árangur grunnskólabarna, kvenna, eldri borgara og stigalausra. Sigurvegari mótsins fær ýmsa góða vinninga, meðal annars gistingu fyrir tvo á Hótel Glym og splunkunýjar jólabækur.
 
Tefldar verða níu umferðir með sjö mínútna umhugsunartíma. Þátttaka er ókeypis.
 
Í Hótel Glym er fyrsta flokks aðstaða til tafliðkunar, fagurt útsýni og frábærar veitingar. Hótelið er staðsett í norðanverðum firðinum og þangað er innan við hálftíma akstur frá Reykjavík.
 
Nánari fréttir verða sagðar af mótinu næstu daga, en áhugasamir eru beðnir að skrá sig til þátttöku sem fyrst hjá [e-mail].

Verkís sigraði Firmakeppni Saust

Firmakeppninni Skáksambands Austurlands 2010 lauk sunnud. 21. nóv.   Alls tóku 13 firmu þátt. Í úrslitalotuna komust 6 firmu og varð  Verkís, Egilsstöðum hlutskarpast  með 9½ vinning (af 10).  Fyrir það tefldi Sverrir Gestsson.

Efstu firmu:
1. Verkís, Egilsstöðum  /  Sverrir Gestsson     9½ vinning
2. Rafteymi  Egilsstöðum / Magnús Valgeirsson  5½ v.
3. Rafey, Egilsstöðum /  Jón Björnsson      5 vinninga
4. Bygg & hænur, Egilsstöðum / Hákon Sófusson 4½ v.
5. Gistihúsið Egilsstöðum / Guðm. Ingvi Jóhannsson 4v.

Atskákmót Reykjavíkur fer fram í kvöld

Atskákmót Reykjavíkur sem jafnframt er atskákmót Hellis fer fram mánudaginn 22. nóvember.  Mótið fer fram í félagsheimili Hellis, Álfabakka 14a í Mjódd. Tefldar verða 6 umferðir með Monrad-kerfi og hefur hvor keppandi 15 mínútur á skák. Mótið hefst kl. 19:30.

Verði tveir jafnir í baráttunni um annan hvorn titilinn verður teflt tveggja skáka hraðskákeinvígi. Verði jafnt að því loknu verður tefldur hraðskákbráðabani. Verði fleiri en tveir jafnir verður tefld einföld umferð, hraðskák. Verði enn jafnt, þá bráðabani.   

Núverandi atskákmeistari Reykjavíkur og atskákmeistari Hellis er Andri Áss Grétarsson.

Verðlaun:

• 1. 10.000
• 2. 5.000  
• 3. 3.000

Þátttökugjöld:

• 16 ára og eldri: 800 kr
• 15 ára og yngri: 400

Skákþáttur Morgunblaðsins: Fyrsti heimsmeistari Íslendinga fimmtugur

Haustið 1977 sneri Jón Loftur Árnason frá Cagnes sur mer, Frakklandsmegin við Miðjarðarhafið, nýkrýndur heimsmeistari sveina 16 ára og yngri og engir smákarlar skáksögunnar sem hann atti kappi við: Garrí Kasparov og Nigel Short. Mér er til efs að nokkur íslenskur afreksmaður hafi hlotið þvílíka umfjöllun fjölmiðla og fylgdi í kjölfar þessa sigurs. Þetta ár varð hann einnig skákmeistari Íslands 16 ára, sá yngsti í skáksögunni. Í dag, 13. nóvember, fagnar Jón L. fimmtíu ára afmæli sínu.

 

Ég er ekki viss um að Jón hafi endilega látið sig dreyma um þann heimsmeistaratitil sem Kasparov féll í skaut átta árum síðar en afrek hans á skáksviðinu á löngum ferli eru ótal mörg: stórmeistari 1986, um tíma í hópi 50 stigahæstu skákmanna heims, Íslandsmeistari 1977, 1982 og 1989, sigurvegari á alþjóðlega Reykjavíkurmótinu 1988 og 1990, meðlimur í sigursælustu skáksveit Íslendinga fyrr og síðar o.s.frv.

Það er einhver sjaldséður rómantískur þokki yfir bestu skákum Jóns L. Í ótal mótum og flokkakeppnum lágu leiðir okkar saman. Ólympíuskákmótin hygg ég að hafi verið í sérstöku uppáhaldi hjá honum. Þar stóð hann alltaf fyrir sínu og yfirleitt miklu meira en það. Frægum ósigri fyrir Englendingum í Dubai ´86 svaraði hann með því að launa þeim lambið gráa - tvisvar! 3:1-sigurinn í Manila ´92 gegn nánast sama liði og í Dubai var alveg sérstaklega sætur. Í Novi Sad tveim árum fyrr lagði John Nunn að velli. Skákin lýsir manni sem nær að „endurnýja" sig fyrir mikilvæga viðureign. Spurningin var m.a. þessi: hvaða vopn á að velja þegar teflt er við skákmann sem kann allt og tapar í hæsta lagi 3-4 skákum á ári og hefur í ofanálag ritað þykka doðranta um allar þær byrjanir sem hann teflir? Fyrir skákina fékk Jón léða bók sem Nunn hafði skrifað um Marshall-árásina. Jón hafði ekki áhuga á að þræða krákustíga þess afbrigðis; miklu frekar vildi hann vita hvað Nunn hefði að segja um ýmsar minna kannaðar leiðir. Nunn hafði stundum komið með merkilegar uppástungur sem reyndust honum síðar erfiðar viðfangs. Í sigurskák Jóns er hvert einasta smáskref í byrjun tafls þrungið þekkingu og næmu sálfræðilegu innsæi:

Ol - Novi Sad 1990:

Jón L. Árnason - John Nunn

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O Be7 6. He1 b5 7. Bb3 O-O 8. a4

Hindrar Marshall-árásina sem kemur upp eftir 8. c3 d5.

8. ... Bb7 9. d3 d6 10. Rc3 Ra5 11. Ba2 b4 12. Re2 c5

Einnig kom 12. ... b3 til greina sem Jón hefði sennilega svarað að hætti Tal með 13. cxb3 c5 14. b4! cxb4 15. Rg3.

13. c3 bxc3 14. bxc3 c4 15. Rg3 Rd7 16. Ba3! He8?

Eftir þennan sakleysislega leik á svartur í óyfirstíganlegum erfiðleikum. Hann varð að leika 16. ... g6.

17. Rf5! Dc7 18. Rd2! cxd3 19. Dh5! g6

( Sjá stöðumynd )

20. Bxf7+! Kxf7 21. Dxh7+ Kf6 22. He3!?

Kemur hróknum í sóknina. „Rybka" mælir með 22. Dg7+ Ke6 23. Dxg6+ Rf6 24. Rg7+ Kd7 25. Df5+ og 26. Rxe8. En leikur Jóns er erfiðari viðfangs.

22. ... Rf8 23. Dh8+ Kf7

Eina vörnin var 23. ... Ke6.

24. Hf3! gxf5 25. Dh5+ Rg6 26. Dxf5+

- og Nunn gafst upp. Framhaldið gæti orðið 26. ... Kg7 27. Df7+ Kh6 28. Hh3+ o.s.frv. Glæsilegur sigur

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 14. nóvember 2010.

Skákþættir Morgunblaðsins

[Event "Novi Sad (ol) 50/377"] [Site "Novi Sad (ol) 50/377"] [Date "1990.??.??"] [EventDate "?"] [Round "?"] [Result "1-0"] [White "Jon Loftur Arnason"] [Black "John Nunn"] [ECO "C84"] [WhiteElo "?"] [BlackElo "?"] [PlyCount "51"] 1.e4 e5 2.Nf3 Nc6 3.Bb5 a6 4.Ba4 Nf6 5.O-O Be7 6.Re1 b5 7.Bb3 O-O 8.a4 Bb7 9.d3 d6 10.Nc3 Na5 11.Ba2 b4 12.Ne2 c5 13.c3 bxc3 14.bxc3 c4 15.Ng3 Nd7 16.Ba3 Re8 17.Nf5 Qc7 18.Nd2 cxd3 19.Qh5 g6 20.Bxf7+ Kxf7 21.Qxh7+ Kf6 22.Re3 Nf8 23.Qh8+ Kf7 24.Rf3 gxf5 25.Qh5+ Ng6 26.Qxf5+ 1-0

Sigurður efstur á atskákmeistaramóti Akureyrar

Atskákmeistari Akureyrar frá því í fyrra, Sigurður Arnarson leiðir mótið með fullu húsi að loknum fjórum umferðum. Áskell Örn Kárason kemur næstur með 3 vinninga og Atli Benediktsson, Karl Egill Steingrímsson og Sigurður Eiríksson koma næstir með 2½ vinning.

Mótinu verður framhaldið á þriðjudagskvöldið kl: 19:30, en þá verða tefldar síðustu þrjár umferðirnar.

Í næstu umferð mætast

Áskell Örn Kárason - Sigurður Arnarson
Atli Benediktsson - Sigurður Eiríksson
Karl Egill Steingrímsson - Smári Ólafsson
Tómas Veigar - Jón Kristinn Þorgeirsson
Andri Freyr Björgvinsson - Rúnar Ísleifsson
Mikael Jóhann Karlsson - Bragi Pálmason

• Heimasíða SA
• Chess-Results

 

Jón Árni og og Sigurður tefldu í Tékklandi

Jón Árni Halldórsson (2196) og Sigurður Ingason (1887) tóku þátt í alþjóðlegu móti fyrir skemmstu í Brno í Tékklandi.

Jón Árni Halldórsson hlaut 6 vinninga í 9 skákum og endaði í 5.-9. sæti.  Frammistaða hans samsvaraði 2169 skákstigum og hækkar hann um 2 skákstig.  Sigurður hlaut 4 vinninga og endaði í 41.-53. sæti.   Árangur hans samsvaraði 1915 skákstigum og hækkar hann um 5 skákstig.

• Heimasíða mótsins

• Chess-Results

 

Baldur Teodor sigraði á unglingamóti í Stokkhólmi

Baldur Teodor Petersson, sem er íslenskur ungur skákmaður búsettur í Svíþjóð sigraði á unglingamóti í Stokkhólmi í sínum aldursflokki.   Baldur teflir til úrslita í 10 manna flokki sem fram fer 19. desember en mótið nú var hluti af Grand Prix-seríu.

Heimasíða mótsins