Hækkuð verðlaun á KORNAX-mótinu - Skákþingi Reykjavíkur

Í samræmi við merkisafmæli Taflfélags Reykjavíkur hefur verið ákveðið að hækka fyrstu verðlaun KORNAX mótsins úr kr. 50.000 í kr. 110.000.   Jafnframt hefur stjórn Skáksambands Íslands samþykkt að sigurvegari mótsins fái beinan rétt til þátttöku í landsliðsflokki á Íslandsmótinu í skák nú í vor.

Að auki verða veitt bókaverðlaun fyrir bestan árangur skákmanna undir 1600 stigum sem og bestan árangur stigalausra.

Önnur verðlaun verða óbreytt.

Skráning fer fram á heimasíðu TR.

Upplýsingar um skráða keppendur má finna hér.

Alþjóðlegt unglingamót Hellis fer fram næstu helgi

Alþjóðlegt unglingamót Hellis hefst nk. fimmtudag 7. janúar 2010. Teflt verður í Nýju stúkunni á Kópavogsvelli. Mótið verður 6 umferðir með tímamörkin 90 mínútur á skákina + 30 sekúndur á hvern leik. Dagskráin er sem hér segir:

Dagskrá:

• Fimmtudagur  7/1   Umferð 1: 19.30-24
• Föstudagur 8/1:      Umferð 2: 10-15
• Föstudagur 8/1:      Umferð 3: 17-22
• Laugardagur 9/1:    Umferð 4: 10-15
• Laugardagur 9/1:    Umferð 5: 17-22
• Sunnudagur 10/1:    Umferð 6: 9.00-14

Keppendur eru minntir á að mæta tímanlega í skákirnar. Dagskráin getur tekið smávægilegum breytingum.

Lokahóf og verðlaunaafhendin hefjast strax og síðustu skák lýkur.

Skráðir keppendur eru núna:

• Mattis Dolk                               1987
• Harald Berggren Torell               1983
• Angelina Fransson                     1877
• Frans Dahlstedt                         1871
• Linda Astrom                            1786
• Axel Akerman 
• Nökkvi Sverrisson                     1784
• Mikael Johann Karlsson             1714
• Johanna Björg Jóhannsdóttir     1705
• Eiríkur Örn Brynjarsson             1653
• Jón Kristinn Þorgeirsson            1647
• Emil Sigurðarson                      1609
• Páll Andrason                           1587
• Dagur Kjartansson                   1485
• Birkir Karl Sigurðsson               1446
• Brynjar Steingrímsson              1437

Verðlaun í mótinu eru: 

• 1. verðlaun: 30.000 ISK
• 2^. verðlaun: 20.000 ISK
• 3. verðlaun: 10.000 ISK
• 4. verðlaun:   5.000 ISK
• 5. verðlaun:   5.000 ISK

Styrktaraðilar mótsins eru Skákstyrktarsjóður Kópavogs og Skáksamband Íslands.

Guðmundur tapaði í næstsíðustu umferð í Hastings

Alþjóðlegi meistarinn Guðmundur Kjartansson (2391) tapaði fyrir enska FIDE-meistarann Robert Eames (2276) í áttundu og næstsíðustu umferð Hastings-mótsins, sem fór í dag.  Guðmundur hefur 4½ vinning og er í 28.-46. sæti.

Í níundu og síðustu umferð, sem fram fer á morgun, teflir Guðmundur við enska FIDE-meistarann Dave Ledger (2227). 

Efstir með 6½ vinning er stórmeistararnir  Andrei Istratescu (2624), Rúmeníu, og Mark Hebden (2522), Englandi. 

111 skákmenn taka þátt í Masters-flokknum og þar 9 stórmeistarar og  12 alþjóðlegir meistarar.  Guðmundur er 15. stigahæsti keppandinn.

• Heimasíða mótsins
• Skákirnar í beinni

 

Stórmeistaramót T.R. í samstarfi við CCP og MP banka

Í tilefni af 110 ára afmælisárs Taflfélags Reykjavíkur stendur félagið, ásamt CCP og MP Banka, að veglegu stórmeistaramóti laugardaginn 9. janúar.

Átta af sterkustu skákmönnum þjóðarinnar taka þátt, sex stórmeistarar og tveir alþjóðlegir meistarar. Mótið fer fram í höfuðstöðvum CCP að Grandagarði 8 og hefst klukkan 13.

Nánari upplýsingar er að finna á heimasíðu mótsins.

Atkvöld hjá Helli í kvöld

Taflfélagið Hellir heldur atkvöld mánudaginn  4. janúar 2010 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með tuttugu mínútna umhugsun.

Sigurvegarinn fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákárið 2009 gert upp

Þá er enn einu skákárinu lokið.  Skákárið 2009 var gott skákár.  Þrátt fyrir kreppu var haldið glæsilegt Reykjavíkurskákmótið í Listasafni Reykjavíkur haldið af Skákakademíu Reykjavíkur sem setti skemmtilegan svip á skáklífið á árinu.  Fyrsta Reykjavíkurmótið sem haldið er á oddatöluári, merkilegt nokk á krepputíma.  Skákmennirnir létu regndropa, flugvélagný og vindhviður sér um vind um eyru þjóta.  

Héðinn Steingrímsson og Hannes Hlífar Stefánsson komu komu sáu og sigruðu.  Henrik sigraði á fjörlegu Íslandsmóti í Bolungarvík.  Hans fyrsti Íslandsmeistaratitill.   Bolvíkingar sigruðu á Íslandsmóti skákfélaga með miklum yfirburðum.   Rétt eins í fyrri hlutanum gekk mikið á síðari hlutanum, þegar Glitnir var tekinn yfir, en í seinni hlutanum voru SPRON og Icebank teknir yfir.   Davíð Oddsson varð svo ritstjóri Moggans en það á kannski ekki erindi í áramótapistil skákmanna...............og þó......því skömmu síðar voru hinir stórgóðu skákpistlar Helga Ólafssonar endurvaktir í blaði allra.... 

Nýr forseti SÍ tók við á átakalitlum aðalfundi sambandsins.   Helgi og Davíð Ólafsson voru ráðnir landsliðsþjálfarar karla- og kvennaliðsins.   Frammistaðan á EM landsliða var ekki góð en að þessu sinni var enginn stórmeistari með en stefnt er að því að senda sterkasta liðið á ÓL í haust.   Guðmundur Kjartansson kom mjög sterkur og kláraði alþjóðlegan meistaratitil og tók svo stórmeistaraáfanga!  Róbert Lagerman átti einnig gott ár og tók áfanga að alþjóðlegum meistaratitli.  

Í áramótapistlinum í fyrra hvatti ég til þess að tekin yrði á áhætta á EM landsliða eftir slakt gengi á ÓL 2008.  Það var svo gert en ekki gekk sveitinni vel.  Þar spilaði inní að strákarnir sem fóru út voru aðeins fjórir vegna forfalla á síðustu stundu.   Einnig nefndi ég hugmynd um einvald.  Sú hugmynd var þó ekki farin en þó að hluta til því það liggur fyrir að bæði Helgi og Davíð hafa eitt „wild card" og þurfa því ekki að horfa á stig eingöngu við val á ólympíuliðinu.   Það verður gaman að fylgjast með ÓL nú.  Sjálfur hef ég góða tilfinningu fyrir mótið og veit að bæði Helgi og Davíð hafa mikinn metnað með liðin og ætla sér fljótlega að kalla saman landsliðshópana.   Stjórn SÍ hefur ákveðið að freista þess að fá hinn reynda þjálfara Yusubov til landsins í vor. 

Gert hefur verið átak í því að flytja mót á landsbyggðina.  Landsliðsflokkur var haldinn í Bolungarvík og Íslandsmót unglinga á Akureyri.  Eftir áramót munu mót á vegum SÍ bæði verða haldin í Vestmannaeyjum og Borgarnesi. 

Þátttaka á skákmótum er í uppsveiflu og hvert þátttökumetið hefur verið slegið í ár.  Aldrei fleiri með á Reykjavíkurmóti, Öðlingamóti TR og glæsilegt þátttökumet slegið á Jólapakkamóti Hellis.  Kreppan er ekki alslæm fyrir skákina þrátt fyrir að hún hafi yfir töluvert minni fjármunum yfir að ráða.  Það verður þá bara nýta þá betur.  Fólk hefur meira tíma og ég held að skákin sé inn!   Ritstjórinn er bjartsýnn fyrir skákárið 2010!

Eins og venjulega hefur ritstjóri valið hina og þessa viðburði ársins.  Sjálfsagt gleymist eitthvað í upptalningunni og biðst ég fyrirfram afsökunar á því.  Upptalningin á léttu nótunum og bak við hana liggja engin geimvísindi.  

Óvæntasta frétt ársins

Það hlýtur að vera sigur Jorge Fonseca á Jóhanni Hjartarsyni á Íslandsmóti skákfélaga en um þau úrslit var fjallað í flestum fjölmiðlum stigamunur á þeim meisturum um 600 skákstig.  

Skák ársins 

Ágætis samantekt um bestu skákir ársins má finna á Skákhorninu.   Ég ætla mér ekki að gera á milli þeirra skáka sem þar eru nefndar enda sýnist mér að Halldór Grétar ætli að standa fyrir formlegri kosningu.   

Deila ársins

Engar forsetakosningar í ár eins og í fyrra.  Að sjálfsögðu var deilt á horninu og tveir hornverjar settir í ársbann.   Ritstjórinn skammaður fyrir að vera  ekki nógu hlutlaus í pistlum um Íslandsmót skákfélaga.  Semsagt sama vín á sömu gömlu kútunum.  Svo var deilt um hvort fresta skákum og sumum fannst sem menn gætu verið fullsmásmugulegir varðandi neitanir um frestanir þegar mót rækjust á.  

Deila ársins tengist þó félagaskiptum ársins.

Lið ársins:

Lið Bolungarvíkur á Íslandsmóti skákfélaga 2009-10 hlýtur að vera lið ársins.   Liðið sigraði með yfirburðum og sveit Bolvíkinga setti skemmtilegan svip á keppnina nú.  

Félagaskipti ársins

Stefán Kristjánsson hlýtur að eiga félagaskipti ársins.  Stefán gekk til liðs við Bolvíkinga í haust fyrir Íslandsmót skákfélaga en svo aftur úr félaginu eftir fyrri hlutann eftir deilur við eigin liðsmenn eftir gagnrýni Bolvíkinga á fjarveru hans í einni umferð Íslandsmótsins.  

Efnilegasti skákmaður ársins

Friðrik Þjálfi Stefánsson hækkaði mest allra á alþjóðlegum skákstigum á skákárinu 2009 eða um heil 112 skákstig.  Eins og venjulega eru ungir og efnilegir skákmenn í næstu sætum en í næstu sætum voru Tinna Kristín Finnbogadóttir (90)g, Sverrir Þorgeirsson (82), Hjörvar Steinn Grétarsson (79), Sigríður Björg Helgadóttir (79), Patrekur Maron Magnússon (75) og Bjarni Jens Kristinsson (74)   Þess má geta að Bjarni Jens og Patrekur Maron voru þeir skákmenn sem hækkaðu mest á árinu 2008 og hafa því hækkað um 200 stig á 2 árum. 

Rauðhærðir ungir skákmenn settu svip sinn á árið.  

Jón Kristinn Þorgeirsson frá Akureyri stóð sig best íslenskra keppenda á EM/HM unglinga á árinu og var ekki fjarri því að verða Íslandmeistari unglinga, 15 ára og yngri, þrátt fyrir að vera aðeins 10 ára.

Hjörvar Steinn Grétarsson er hins vegar efnilegasti skákmaður landsins 2009 að mati ritstjóra.   Hjörvar varð skákmeistari Reykjavíkur, sigraði á Haustmóti TR og áskorendaflokki og varð unglingameistari Íslands.  Ekki framhjá honum gengið og verður gaman að fylgjast með Hjörvari í landsliðsflokki í vor. 

Skákkona ársins

Sá skákmaður sem hækkaði mest fyrir utan þá sem nefnir eru hér að ofan er Lenka Ptácníková en hún hækkaði um heil 66 skákstig.   Lenka varð Íslandsmeistari kvenna, og stóð sig afskaplega vel t.d. bæði á Haustmóti TR þar sem hún endaði í 2.-3. sæti og í Olomouc.    

Lenka er skákkona ársins 2009.

Skákmaður ársins

Erfitt er að velja skákmann ársins 2009.  Héðinn og Hannes sigruðu á Reykjavíkurskákmótinu en voru ekki áberandi að öðru leyti.   Henrik varð Íslandsmeistari og hefur gengið vel á síðari hluta ársins og ég veit að hann á töluvert inni á stigum.  Guðmundur Kjartansson átti gott skákár og brilleraði á skoska meistaramótinu þar sem hann tók stórmeistaraáfanga og átti góð mjög góð mót á árinu en átti einnig slæm mót. 

Það er mat ritstjóra að Henrik sá skákmaður ársins 2009!

Endurkoma ársins

Endurkomu ársins á Tímaritið Skák sem vaknaði af löngum dvala í umsjón Taflfélags Bolungarvíkur undir ritstjórn Halldórs Grétars Einarssonar.  Frábært framtak. 

Viðburður ársins

Reykjavíkurmótið 2009 tókst vel þrátt fyrir sérstakar aðstæður.  

Bolvíkingar stóðu fyrir alþjóðlegu skákmóti í kringum Íslandsmót skákfélaga.  Skemmtilegt mót þrátt fyrir mikið af stuttum jafnteflum!   Róbert fór mikinn og tók áfangann.

Nærri 300 krakkar voru í Jólapakkamóti Hellis og færri komust að en vildu á Friðriksmóti Landsbankans. 

Reykjavíkurmótið hlýtur að vera mótið sem stendur upp úr og er atburður ársins 2009.

Taflfélag ársins

Taflfélag Bolungarvíkur hlýtur að vera taflfélag landsins.  Hömpuðu Íslandsmeistaratitli skákfélaga, héldu Íslandsmótið í skák, sigruðu í Hraðskákkeppni taflfélaga, endurvöktu Tímaritið Skák og héldu alþjóðlegt skákmót! 

Engin spurning.   

Félagsmálamaður ársins

Í fyrra valdi ritstjóri Guðmund Daðason formann TB, sem félagsmálamann ársins og Guðmundur kemur aftur vel til greina.  Einnig mætti nefna þá Skákakademíumenn Björn Þorfinnsson og Stefán Bergsson en þeir hafa sett skemmtilega blæ á árið með skemmtilegu Reykjavíkurmóti, og áttu mikinn þátt í góðri þátttöku á Jólapakkamóti Hellis og maður skynjar mikinn kraft í æskulýðsstarfinu í Reykjavík og reyndar um allt land og Akademían á sinn þátt í því.    Svo gæti ég nefnt Hermann Aðalsteinsson, formann Goðans, en það er aðdáunarvert hversu hratt þetta félag hefur vaxið á örfáum árum.

Ég ætla hins vegar að velja Karl Gauta Hjaltason formann Taflfélags Vestmannaeyja sem félagsmálamann ársins.   Krafturinn sem einkennir Eyjamenn síðustu ár hefur verið eftirtektarverður.    Félagið er efst á Íslandsmóti skákfélaga, félagið stóð fyrir NM barnaskólasveita síðasta haust og gerði það afskaplega vel, það get ég vottað sem skákstjóri þess og fáar skáksíður eru uppfærðar jafn oft og á jafn fjörlegan hátt og heimasíða félagsins.   Og í vor verður Íslandsmót barna, 10 ára yngri, haldið í Eyjum og ég veit að það verður gert vel!

Skáksíða ársins

Skák.is

Atvik ársins

Ingvar Þór Jóhannesson tók þátt í tveimur mótum á sama tíma í haust og fékk ekki frestun í fyrstu umferð Haustmóts TR.  Ingvar tók sig og tefldi tvær skákir í einu!   Hann tefldi við Lenku í Haustmóti TR og labbaði þar út í miðri skák, fór upp í Bridgesamband þar sem alþjóðlegt skákmót Bolvíkinga fór fram og lék nokkra leiki gegn sænska FIDE-meistaranum Daniel Semcesen, fór svo aftur upp í TR, gerði jafntefli við Lenku, snéri aftur til baka og vann Semcesen!

Mynd ársins

Mynd ársins er af þeim TV-félögum Einari Kr. og Sævari.  Skák er skemmtileg!

Ummæli ársins:

Henrik Danielsen þegar hann sagðist hoppa á trampólín á meðan hann horfði á æfingarmyndbönd!

Spurning ársins

Hana átti Þorkell Björnsson íþróttafréttamaður RÚV þegar hann spurði forseta SÍ hvort skákmenn væru nördar.  Hvernig dettur manninum í hug þessi vitleysa! 

Hornverji ársins

Að öðrum ólöstuðum var þetta ár Áskels Arnar Kárasonar sem fór oft á tíðum á kostum á horninu.  Þann 17. september gaf hann út eftirfarandi yfirlýsingu:

Until further notice lýsi eg því hér með yfir að eg mun einungis tjá mig á horninu með gaspri, útúrsnúningum og vafasömum fullyrðingum. Allar málefnalegar athugasemdir verða geymdar til betri tíma.

Að endingu legg eg til að Taflfélagið Hellir verði lagt í eyði. 

Áskell fylgdi svo yfirlýsingunni glæsilega á eftir með skemmtilegasta skeyti ársins 2009 á horninu að mínu mati síðar sama dag:

Það segir sig sjálft; á hinsta degi mun eiga sér stað ógurlegt einvígi milli Hellismafíunnar og Bergzófrekskjunnar. Í þeim átökum mun gervallur skákheimur tortímast, nema eitt lítið peð á h7, sem lifir af hildarleikinn. Af því mun spretta KA-skrímslið mikla (KArason/KAsparov/KArpov) og tortíma öllum skákmönnum nema þeim sem þegar hafa skráð sig í Skákfélag Akureyrar, Goðann og Skákfélag Hindisvíkur. Sælir félagar, við sjáumst afur á hinsta degi. Takið h7-reitinn frá! 

Kannski að Þorkell íþróttafréttamaður hafi lesið þetta skeyti áður en spurði forsetann?

Að lokum

Skákárið 2009 var prýðilegt.  Skákáhugi landans er að aukast og framundan er Reykjavíkurmót, spennandi Íslandsmót skákfélaga þar sem mörg félög berjast um Íslandsmeistaratitilinn og Skákþing Íslands um páska sem mig grunar að vera sterkasta Íslandsmót í mörg herrans ár og svo ólympíumót í haust.

Held að það boði gott að þessi færsla er sú milljónasta færslan á moggablogginu!

Gleðilegt nýtt skákár!

Gunnar Björnsson

Guðmundur tapaði fyrir Hebden í Hastings

Alþjóðlegi meistarinn Guðmundur Kjartansson (2391) tapaði fyrir enska stórmeistaranum Mark Hebden (2522)í hörkuskák í sjöundu umferð Hastings-mótsins, sem fram fór í dag.   Guðmundur hefur 4½ vinning og er í 14.-24. sæti.

Töluvert er fjallað um skák Guðmundar í dag á Skákhorninu.  

Í áttundu og næstsíðustu umferð, sem fram fer á morgun, teflir Guðmundur við enska FIDE-meistarann Robert Eames (2276).  

Efstir með 5,5 vinning eru stórmeistararnir Yuri Drozdovskij (2625), Úkraínu, Zbnynek Hracek (2624), Tékklandi, Andri Istratescu (2624), Rúmeníu, Roman Eduuard (2620), Frakklandi, David Howell (2595) og Hebden, Englandi og enski alþjóðlegi meistarinn Simon Ansell (2387).  

111 skákmenn taka þátt í Masters-flokknum og þar 9 stórmeistarar og  12 alþjóðlegir meistarar.  Guðmundur er 15. stigahæsti keppandinn.

• Heimasíða mótsins
• Skákirnar í beinni

 

KORNAX mótið 2010 - Skákþing Reykjavíkur hefst 10. janúar

KORNAX mótið 2010 - Skákþing Reykjavíkur hefst sunnudaginn 10. janúar kl. 14. Tefldar verða 9 umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14.  Teflt er í húsnæði Taflfélags Reykjavíkur að Faxafeni 12. 

Skráning fer fram á heimasíðu TR og upplýsingar um þegar skráða keppendur má nálgast hér.  

Verðlaun:

• 1. sæti kr. 50.000
• 2. sæti kr. 30.000
• 3. sæti kr. 20.000
• Besti árangur undir 2000 skákstigum kr. 15.000 (íslensk stig gilda)
• Besti árangur undir 1800 skákstigum kr. 15.000 (íslensk stig gilda)

Sigurvegarinn hlýtur auk þess nafnbótina Skákmeistari Reykjavíkur 2010 og farandbikar til varðveislu í eitt ár.  Núverandi Skákmeistari Reykjavíkur er Hjörvar Steinn Grétarsson.

Þátttökugjöld:

• kr. 3.500 fyrir 16 ára og eldri
• kr. 2.000 fyrir 15 ára og yngri

 
Dagskrá:

 

• 1. umferð sunnudag   10. janúar  kl. 14
• 2. umferð miðvikudag 13. janúar  kl. 19.30
• 3. umferð föstudag     15. janúar  kl. 19.30
• 4. umferð sunnudag   17. janúar  kl. 14
• 5. umferð miðvikudag 20. janúar  kl. 19.30
• 6. umferð föstudag      22. janúar  kl. 19.30
• 7. umferð sunnudag    24. janúar  kl. 14
• 8. umferð miðvikudag 27. janúar  kl. 19.30
• 9. umferð föstudag      29. janúar  kl. 19.30

Skákþingið er reiknað til alþjóðlegra skákstiga.

Athugið að skráningu lýkur 15 mínútum fyrir auglýst upphaf móts, þ.e. kl. 13.45.

Hraðskákmót Reykjavíkur verður haldið sunnudaginn 31. janúar og hefst það kl. 14.00. Tefldar verða 2x7 umferðir eftir Monradkerfi.

Guðmundur sigraði í sjöttu umferð í Hastings

Alþjóðlegi meistarinn Guðmundur Kjartansson (2391) sigraði rússneska FIDE-meistarann Boris Furman (2223) í sjöttu umferð Hastings-mótsins sem fram fór í dag.  Guðmundur hefur 4½ vinning og er í 4.-11. sæti, hálfum vinningi á eftir efstu mönnum.  Guðmundur mætir enska stórmeistaranum Mark Hebden (2522) í sjöundu umferð sem fram fer á morgun.  Skákin verður sýnd beint á vefsíðu mótsins en hún hefst kl. 14:15.  

Töluvert er fjallað um skák Guðmundar í dag á Skákhorninu.  

Efstir með 5 vinninga eru stórmeistarnir Yuri Drozdovskij (2625), Úkraínu, Zbynek Hracek (2624), Tékklandi, og Andrei Istratescu (2624), Rúmeníu.

111 skákmenn taka þátt í Masters-flokknum og þar 9 stórmeistarar og  12 alþjóðlegir meistarar.  Guðmundur er 15. stigahæsti keppandinn.

• Heimasíða mótsins
• Skákirnar í beinni

 

Riddarinn: Öldungar heiðraðir

Í tengslum við nýársmót Riddarans, skákklúbbs eldri borgara á höfuðborgarsvæðinu, var ákveðið með fulltingi allra  klúbbfélaga sem eru yfir 30 að tölu að heiðra þá: Bjarna Linnet (82), Hauk Sveinsson( 86) og Sigurberg H. Elentínusson (82) með því að sæma þá stór- & heiðursriddaranafnbót í virðingar- og þakklætisskyni fyrir störf þeirra og þátttöku í klúbbnum allt frá stofnun hans fyrir meir en áratug síðan.

Þeir eru allir  í hópi stofnfélaga klúbbsins og hafa teflt í honum frá upphafi  sjálfum sér og öðrum til yndisauka og verið virkir í skákhreyfingunni um áratugaskeið.  Allir eru þeir öflugir og slyngir skákmenn og harðsnúnir á hvítum reitum og svörtum,  jafnframt því að vera traustir félagar og hvers manns hugljúfar í góðum skákvinahópi. Því voru þeir félagar með viðeigandi seramoníu að viðstöddum Sr. Gunnþór Ingasyni, verndara klúbbsins, slegnir til stór- og heiðursriddara af  virðingu og þakklæti fyrir:                        

> framlag þeirra  til klúbbsins

> drengskap þeirra og fórnfýsi

> hugkvæmni þeirra  og háttvísi

> og snilli þeirra   á skákborðinu

Því  til staðfestu var þeim síðan afhent riddarastytta með áletruðu nafni sínu, klúbbsins og ártali, ásamt  viðurkenningarskjali og ósk um að þeim megi ævinlega velfarnast innan og utan skákborðsins enn um langa hríð.

Því miður gat Bjarni ekki verið viðstaddur athöfnina en úr því verður bætt fljótlega.

Myndaalbúm