Topalov efstur eftir sigur á Carlsen

Topalov náði forystunni á Alslemmumótinu í Bilbao með sigri á Carlsen í áttundu umferð sem fram fór í kvöld.  Aronian vann Anand, en sá síðarnefndi hefur ekki unnið skák og virkar heimsmeistarinn engan veginn sannfærandi.  Ivanchuk sigraði Radjabov og hefur væntanlega náð efsta sæti á heimslistanum af Carlsen.  Frídagur er á morgun, vegna undanúrlita Hraðskákkeppni taflfélaga, en níunda og næstsíðasta umferð fer fram á föstudag. 

Staðan:

• 1. Topalov 13 stig
• 2. Aronian 12 stig
• 3.-4. Carlsen og Ivanchuk 11 stig
• 5.-6. Anand og Radjabov 6 stig

Veit eru 3 stig fyrir sigur, eitt fyrir jafntefli og ekkert fyrir tap.

Mótið í Bilbao er eitt allra sterkasta skákmót heims.  Sex skákmenn taka þátt og eru meðalstigin 2769 skákstig.  Tefld er tvöföld umferð.

Heimasíða mótsins

Úrslit Hraðskákkeppni taflfélaga

Úrslit Hraðskákkeppni taflfélaga munu fara fram í Bolungarvík föstudaginn 19. september og verður hluti af skákhátíðinni þar. 

Á morgun fara fram undanúrslit keppninnar.  Þá mætast Íslandsmeistarar Taflfélags Reykjavíkur og  Skákfélags Akureyrar annars vegar og Taflfélagið Hellir og Taflfélag Bolungarvíkur hins vegar.

Viðureignirnar fara báðar fram í Skákhöllinni Faxafeni 12 og hefjast kl. 19:30.  Áhorfendur boðnir velkomnir að sjá marga af bestu hraðskákmönnum landsins að tafli.  Heitt á könnunni!

 

 

Skafti líka Máti

Skafti Ingimarsson (1835) hefur fylgt í fótspor þremenningana frá fyrr í dag og hefur gengið til liðs við Taflfélagið Máta úr skákfélagi Akureyrar.

Magnús, Jón Árni og Jakob Þór orðnir Mátar

Magnús Teitsson (2189), Jón Árni Jónsson (2073) og Jakob Þór Kristjánsson (1790) hafa allir gengið til liðs við Taflfélagið Máta úr Skákfélagi Akureyrar.

Þetta er ekki einu fréttirnar af félagaskiptum því Helgi Hauksson (1935) er genginn til liðs við Taflfélag Bolungarvíkur úr Skákfélagi Selfoss og nágrennis. 

Taflfélag Bolungarvíkur á EM taflfélaga

Taflfélag Bolungarvíkur tekur þátt í Evrópumóti skákfélaga í Grikklandi sem fram fer dagana 16.-24.október nk.

Liðið er skipað eftirfarandi skákmönnum:

1. AM Jón Viktor Gunnarsson 2437  
2. AM Bragi Þorfinnsson 2387  
3. AM Dagur Arngrímsson 2392  
4. Guðmundur Stefán Gíslason 2328  
5. Guðmundur Halldórsson 2251  
6. FM Halldór Grétar Einarsson   2264
7. Stefán Arnalds 1935

Þetta er í fyrsta sinn sem lið frá Vestfjörðum tekur þátt í Evrópukeppni.

Nýtt taflfélag - Taflfélagið Mátar

Stofnað hefur verið nýtt taflfélag með aðsetur í Garðabæ. Félagið hefur hlotið nafnið Taflfélagið Mátar og hefur öðlast þátttökurétt á Íslandsmóti skákfélaga 2008-2009 í fjórðu deild.

Félagalisti verður birtur á Skak.is síðar í þessari viku, en í ljósi þess að ýmislegt er farið að kvisast út um félagsskapinn unga, þá skal nefnt að nokkrir Norðanmenn eru meðal félaga. Hér er um Akureyringa að ræða, sem búsettir hafa verið á suðvesturhorninu um árabil en yfirgefa Skákfélag Akureyrar nú eftir áralanga tryggð. Í þeirri von og vissu að S.A. gangi áfram á Guðs vegum og verði vinafélag Máta óskum við gömlum félögum allra heilla. Við sjáumst við skákborðið!

Netfang félagsins er: [e-mail]. Skákaðstaða hefur verið tryggð í vetur í húsnæði Rauða krossins í Garðabæ við Garðatorg. Forsvarsmaður Máta verður Pálmi R. Pétursson fyrst um sinn. Tilgangur félagsins er að smala saman Mátum og tefla reglulega, helst vikulega. Einnig munum við láta til okkar taka í fjórðu deild í ár og bætast þar með formlega í flóru skák- og taflfélaga.

Með skákkveðju.

Pálmi R. Pétursson og Mátar

Carlsen efstur þrátt fyrir tap

Magnus Carlsen er efstur eftir sjö umferðir á Alslemmumótinu í Bilbao þrátt fyrir tap gegn Ivanchuk í sjöundu umferð sem fram fór í dag.  Toplov, sem er annar, tapaði einnig fyrir Aronian.   Heimsmeistarinn Anand og Radjabov gerðu jafntefli og deila neðsta sætinu.   

Staðan:

• 1. Carlsen 11 stig
• 2. Topalov 10 stig
• 3. Aronian 9 stig
• 4. Ivanchuk 8 stig
• 5.-6.Ivanchuk og Radjabov 6 stig

Veit eru 3 stig fyrir sigur, eitt fyrir jafntefli og ekkert fyrir tap.

Mótið í Bilbao er eitt allra sterkasta skákmót heims.  Sex skákmenn taka þátt og eru meðalstigin 2769 skákstig.  Tefld er tvöföld umferð.

Heimasíða mótsins

Skákþing Garðabæjar hefst á mánudag - skráning byrjar vel

Skákþing Garðabæjar hefst mánudaginn 15. september.   Tefldar verða 7 umferðir og verður mótið reiknað til íslenskra og alþjóðlegra stiga. Teflt verður í Garðabergi Garðatorgi 7.  Þetta er síðasta alvöru mót fyrir Íslandsmót skákfélaga á höfuðborgarsvæðinu og tilvalið að koma og hita sig upp.

Upplýsingar um skráða keppendu og mótiðr má nálgast á Chess-Results:  http://chess-results.com/?tnr=15716&redir=J&lan=1

Umferðatafla:

• 1. umf. Mánudag 15. sept kl. 19.30.
• 2. umf. Fimmtudag 18. sept. kl. 19.30
• 3. umf. Föstudag 19. sept. kl. 19.30
• 4. umf. Mánudag. 22. sept. kl. 19.30
• 5. umf. Miðvikudag 24. sept. kl. 19.30
• 6. umf. Föstudag 26. sept. kl. 19.30
• 7. umf. Mánudag 29. sept. kl. 19.30

Keppnisfyrirkomulag er Svissneskt kerfi.
Tímamörk eru 90 mínútur og 30 sek sem bætist við hvern leik.

Verðlaun auk verðlaunagripa:

• 1. verðlaun. 15 þús.
• 2. verðlaun 10 þús.
• 3. verðlaun 7 þús

Verðlaun fyrir Skákmeistara Garðabæjar 5.000 auk grips. Mótið er um leið skákþing Taflfélags Garðabæjar. (keppt er um titilinn ef jafnt, verðlaunafé er ekki skipt.)

Aukaverðlaun:

• Efstur U-1800 (með 1800 skákstig og minna):                 DGT skákklukka.
• Efstur 16 ára og yngri.(1993=< x):                         DGT skákklukka.

ATH. Ekki er hægt að vinna til fleiri en einna aukaverðlauna. Verðlaun fara eftir röð aukaverðlauna. 1-3 verðlaunum (pen) er skipt séu menn með jafn marga vinninga. Aukaverðlaunum verður ekki skipt. (og bætast hugsanlega við önnur verðlaun)

Sæmdartitilinn Skákmeistari Garðabæjar geta aðeins fengið félagsmenn TG eða skákmaður með lögheimili í Garðabæ.

Þátttökugjöld	Félagsmenn	Utanfélagsmenn
Fullorðnir	2000 kr	3000 kr
Unglingar 17 ára og yngri	Ókeypis	1500 kr

Skráning er á staðnum frá hálftíma fyrir mót en mjög æskilegt er að menn skrái sig fyrirfram í tölvupósti á [e-mail] eða í síma 861 9656. Skákstjóri er Páll Sigurðsson

Skákmeistari Garðabæjar 2007 var Jóhann Ragnarsson.

Skráðir keppendur, 9. ágúst 2008:

No.		Name	FED	Rtg	Club/City
1	FM	Sigfusson Sigurdur	ISL	2324	Hellir
2		Jensson Einar Hjalti	ISL	2223	TG
3		Salama Omar	EGY	2212	Hellir
4		Bergsson Stefan	ISL	2097	SA
5		Kristinsson Bjarni Jens	ISL	1912	Hellir
6		Sigurjonsson Siguringi	ISL	1895	KR
7		Sigurdsson Pall	ISL	1867	TG
8		Sigurdsson Jakob Saevar	ISL	1860	Godinn
9		Ottesen Oddgeir	ISL	1822	Haukar
10		Kristbergsson Bjorgvin	ISL	0	TR

 

Fyrri hluta Íslandsmóts skákfélaga fer fram 3.-5. október

Fyrri hluti Íslandsmóts skákfélaga 2008-2009 fer fram dagana 3.-5. október nk.  Mótið fer fram í Rimaskóla í Reykjavík.  1. umferð mun hefjast kl. 20.00 föstudaginn 3. október, 2. umferð kl. 11.00 laugardaginn 4. október og 3. umferð kl. 17.00 sama dag.  4. umferð verður síðan teflt kl. 11.00 sunnudaginn 5. október.

Seinni hluti Íslandsmóts skákfélaga 2008-2009 fer fram á Akureyri dagana 21. og 22. mars 2009.

Tímamörk:  90 mín. + 30 sek. til að ljúka.

Þátttökugjöld:

• 1. deild                       kr. 110.000.-
• 2. deild                       kr.   90.000.-
• 3. deild                       kr.   10.000.-
• 4. deild                       kr.   10.000.-

Skáksamband Íslands mun greiða fargjöld utan stór-Reykjavíkursvæðisins samkvæmt reikningum fyrir sveitir í 1. og 2. deild.  Miða skal við einn brottfararstað á hverju svæði, t.d. Akureyri, Egilsstaði, Ísafjörð.  Sami háttur verður hafður í 3. og 4. deild og áður, þ.e. þátttökugjöld höfð lág en sveitirnar verða sjálfar að sjá um ferðakostnað á skákstað.

Meðfylgjandi er reglugerð um Íslandsmót skákfélaga og 3. kafli skáklaga Skáksambands Íslands sem varða Íslandsmót skákfélaga.

Þátttökutilkynningar þurfa að berast Skáksambandi Íslands fyrir 20. september með bréfi, tölvupósti ([e-mail]) eða símleiðis.  Að gefnu tilefni er minnt á að nauðsynlegt er að skrá sveitir í keppnina, ekki síst í 4. deild.

Ath.  Skákir í Íslandsmóti skákfélaga verða reiknaðar til alþjóðlegra skákstiga.

 

 

3. kafli

Íslandsmót skákfélaga

 15. grein.
Stjórn Skáksambands Íslands gengst árlega fyrir Íslandsmóti skákfélaga.  Keppnin er sveitakeppni og eiga öll skuldlaus taflfélög eða svæðasambönd innan S.Í þátttökurétt.  Stjórn S.Í. skal ákveða keppnisdaga og þátttökugjöld fyrir 1. september ár hvert.  

16.grein.
Keppninni skal skipt í fjórar deildir.  Efsta sveit í 1. deild er sigurvegari keppninnar. Fjöldi vinninga skal ráða úrslitum um endanlega röð sveita.  Verði vinningar jafnir, skulu liðsstig (matchpoints) ráða.  Hvert félag á rétt á að senda svo margar sveitir til keppninnar sem það óskar.  Þó mega ekki vera fleiri en tvær sveitir frá nokkru félagi í fyrstu deild og ekki fleiri en fjórar samanlagt í fyrstu og annarri deild.  Þó er félögum sem hafa með sér svæðissamband, heimilt að sameinast um eina eða fleiri sveitir.

 
17. grein.
8 lið skulu vera í tveim efstu deildunum.  Stjórn S.Í. hefur rétt til að fjölga eða fækka liðum í 3. og 4. deild þyki henni ástæða til.  Tvö efstu lið 2. 3. og 4. deildar færast upp í lok keppnistímabils en tvö neðstu í fyrstu, annarri og þriðju deild færast niður.

 18.grein.
Tilkynning skákmanns skv. 12.gr. laga S.Í. skal hafa verið send 20 dögum fyrir mótið ella getur hann ekki teflt fyrir sitt nýja félag á því.  Félög sem hyggjast taka þátt í Íslandsmóti skákfélaga skulu minnst 14 dögum fyrir keppnina skila félagaskrá til S.Í.  Á félagaskrám skulu tilgreind nöfn, heimilisföng og kennitölur félagsmanna.  Aðeins þeir sem eru á skránni teljast löglegir með viðkomandi félagi í Íslandsmótinu (fyrri - og seinni hluta).  Enginn hefir rétt til að tefla fyrir nema eitt félag, sjá þó ákv. 16. greinar um svæðissambönd.  Sé sami maður á félagaskrá tveggja eða fleiri félaga skal mótsstjórn strika hann út af báðum eða öllum félagaskrám þar til leiðrétting fæst.  Fáist ekki leiðrétting viku fyrir keppnina telst skákmaðurinn ekki löglegur með neinu félagi.

 19. grein.
Keppendur skulu vera fullgildir félagsmenn þeirra taflfélaga sem þeir tefla fyrir.  Raða skal keppendum í sveitir og borð eftir styrkleika.  Ekki er leyfilegt að breyta röð keppenda eftir að keppni hefst.  Keppandi getur flust upp eða niður um sveit hvenær sem er keppninnar en heildarröð keppenda verður að haldast.  Komi lið ekki til keppni án orsaka tapar það skákum á öllum borðum.  Komi slíkt fyrir tvisvar skal liðið dæmt úr keppninni.  Í hverri viðureign skal a.m.k. helmingur liðsmanna hverrar sveitar vera íslenskir ríkisborgarar eða hafa verið með lögheimili sitt á Íslandi undanfarið ár.

 20.grein.
Stjórn Skáksambandsins skal árlega skipa sérstaka mótsstjórn sem sker úr um lögmæti keppenda ef beiðni um athugun á lögmæti viðkomandi liggur fyrir eða ef kæra berst mótsstjórninni. Beiðni um athugun og/eða kæra skal berast mótsstjórn, eða skákstjórum fyrir hennar hönd, áður en keppni lýkur í þeirri umferð sem ólöglegur keppandi telst hafa teflt í. Úrskurður skal liggja fyrir áður en næsta umferð mótsins hefst. Ef keppandi er úrskurðaður ólöglegur er dreginn einn vinningur frá liði hans fyrir hverja viðureign sem hann tekur þátt í. Úrskurði mótsstjórnar má skjóta til Dómstóls SÍ og skulu slík erindi hafa verið send Dómstólnum innan þriggja sólarhringa frá upphafi þeirrar umferðar, sem keppandinn var á meðal þátttakenda. Dómur Dómstóls S.Í. skal liggja fyrir eigi síðar en 5 sólarhringum eftir að erindið barst. Skákstjóri úrskurðar um önnur vafaatriði.

21.grein
Stjórn S.Í. setur reglugerð um nánari framkvæmd Íslandsmóts skákfélaga. 

 

Reglugerð um Íslandsmót skákfélaga

 

1. gr. Fyrri hluti Íslandsmóts skákfélaga, fjórar umferðir, skal tefldur á tímabilinu september til desember. Síðari hluti mótsins skal fara fram eftir áramótin og ljúka fyrir lok apríl.

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.

3. gr.

Tefla skal einfalda umferð í 1. og 2. deild, en stjórn SÍ skal ákveða fyrirkomu­lag í 3. og 4. deild, miðað við fjölda þátttökuliða.

Ef stendur á stöku í deild skal liðið sem situr hjá fá 4 vinninga í yfirsetunni.

Stjórn SÍ ákveður tímamörk skáka, en þau skulu ekki vera skemmri en kappskákartímamörk FIDE.

4. gr.

Liðsstjóra þess liðs, sem svart hefur á 1. borði, er skylt að gefa skákstjóra skýrslu um úrslit viðureignarinnar, strax að henni lokinni.

5. gr.

Hver sveit í 1. deild skal skipuð 8 keppendum, en í öðrum deildum skulu sveitir skipaðar 6 keppendum.

6. gr.

Við uppstillingu í lið skal keppendum raðað í styrkleikaröð, þannig að sterkasti skákmaðurinn teflir á fyrsta borði, sá næststerkasti á öðru borði o.s.frv.

Ef félag teflir fram fleiri en einu liði í keppninni skulu þau auðkennd með A, B, C o.s.frv. Lið A skal vera sterkasta lið félagsins, lið B það næststerkasta o.s.frv.  Efsta borð í neðri sveit skal vera skipað af aðila sem hefur svipaðan eða minni styrkleika en neðsta borð í efri sveit.

Hverju félagi er heimilt að hafa unglinga-öldunga-og  kvennasveitir sem ekki þurfa að uppfylla framangreind skilyrði.  Skákmönnum þessara sveita er heimilt að tefla með öðrum sveitum, sem ekki eru unglinga-öldunga-eða kvennasveitir, hvenær sem er í keppninni en geta að því loknu ekki teflt aftur með unglinga-öldunga-eða kvennasveit.  Hafi félög fleiri en eina unglinga-öldunga-eða kvennasveit skal raða þeim í styrkleikaröð og er félögunum heimilt að flytja skákmenn á milli þessara sveita á sama hátt og um almennar sveitir væri að ræða.

Brjóti félag gegn ákvæðum þessarar greinar við röðun í lið teljast þeir keppendur sem rangt er raðað ólöglegir og skal meðferð málsins þá vera skv. 20. gr. skáklaga.

7. gr.

Framkvæmdanefnd er heimilt að fresta viðureign ef um samgönguerfiðleika er að ræða.  Sé viðureign frestað skal ákveða nýjan keppnisdag innan hálfs mánaðar.  Umferð skal lokið innan mánaðar frá töfludegi.

 

8. gr.

Ef lið hættir keppni, hvort sem er fyrir upphaf móts, eða eftir að það er hafið, eða ef liði er vísað úr keppni, þá skal það hefja þátttöku í neðstu deild, þegar það hyggst taka þátt í mótinu næst.

Ef lið kýs að taka ekki sæti sitt, skv. úrslitum á næsta Íslandsmóti á undan, sbr. 17. gr. skáklaga, telst það hafa sagt sig úr mótinu.

9. gr.

Ef flytja þarf fleiri lið upp á milli deilda en gert er ráð fyrir skv. 17. gr. skáklaga, eða ef lið sem á að flytjast upp skv. sömu grein kýs að taka ekki sæti sitt í efri deild skal bjóða öðrum liðum úr sömu deild að taka sæti þess í efri deild. Öðrum liðum en þeim sem samkvæmt 17. gr. skáklaga eiga að færast upp er heimilt að hafna slíku boði án skýringa. Liðum úr neðri deildinni skal boðið að færast upp um deild í eftirfarandi forgangsröð:

1.     Liðið sem lenti í þriðja sæti

2.     Það liðanna tveggja sem féll úr efri deildinni sem lenti þar í næstneðsta sæti

3.     Liðið sem lenti í fjórða sæti deildarinnar

4.     Það liðanna tveggja sem féllu úr efri deildinni sem lenti þar í neðsta sæti

5.     Liðið sem lenti í fimmta sæti deildarinnar og svo koll af kolli.

Almennt gildir sú regla að næsta lið sem á að fara upp hefur forgang en annars virkar á víxl.

10. gr.

Reglugerð þessi er sett með heimild í 21. gr. skáklaga SÍ og tekur gildi við útgáfu hennar.                            

Omar og Elsa efst á hraðkvöldi

Omar Salama og Elsa María Kristínardóttir urðu efst og jöfn á hraðkvöldi Hellis sem haldið 8. september.  Þau fengu bæði 6½ vinning í 7 skákum og voru líka jöfn á öllum stigum og innbyrðis viðureignin endaði með jafntefli þannig að grípa þurfti til hlutkestis til að fá úrslit. Þá hafði Omar betur þegar fiskurinn kom upp. Þriðji varð svo Andri Áss Grétarsson með 5 vinninga. 

 

 

Lokastaðan á hraðkvöldinu:

• 1.   Omar Salama                     6,5v/7 (22, 25, 28)
• 2.   Elsa María Kristínardóttir    6,5v   (22, 25, 28)
• 3.   Andri Áss Grétarsson         5v
• 4.   Ólafur Gauti Ólafsson         4v
• 5.   Vigfús Vigfússon                4v
• 6.   Arnar Valgeirsson              3v
• 7.   Brynjar Steingrímsson        3v
• 8.   Finnur Sveinbjörnsson        3v
• 9.   Björgvin Kristbergsson       3v
• 10.  Pétur Jóhannesson            2,5v
• 11.  Ottó Hörður Guðmundsson 1,5v