Bjarni Jens í Helli

Bjarni Jens Kristinsson (1798), nýkrýndur unglingameistari Íslands, 20 ára og yngri, er genginn til liðs við Íslandsmeistara Hellis, en Bjarni Jens hefur síðstu ár verið í Skáksambandi Austurlands en er nú fluttur í bæinn.  Bjarni var um tíma í Hróknum og Fjölni. 

 

 

Árni Ármann í Taflfélag Bolungarvíkur

Árni Ármann Árnason (2139), er genginn til liðs við Taflfélag Bolungarvíkur.   Árni Ármann hefur alla tíð verið í Taflfélagi Reykjavíkur og var m.a. formaður félagsins á árunum 1991-94 og átti mikinn þátt í því að snúa við erfiðum fjárhag félagsins til betri vegar á sínum formannsferli.  

Árni mun án efa styrkja Bolvíkinga í baráttu þeirra um fyrstu deildarsæti að ári.  

 

 

Þrítugur hamar að baki......hjá honum Þórði Sveinssyni.

Þórði til heiðurs héldu Hrókurinn og skákfélag Vinjar, afmælisskákmót í Vin, mánudaginn 10. september kl. 13:00.

Átta þátttakendur skráðu sig til leiks, en nokkrir fulltrúar skákfélags Vinjar forfölluðust og allmargir gátu ekki verið með vegna vinnu og skóla. Nokkrir félagar afmælisbarnsins kíktu þó við og heilsuðu upp á nýþrítugan piltinn. 

Katrín Júlíusdóttir, alþingismaður, var heiðursgestur og lék fyrsta leikinn í skák þeirra Róberts Harðarsonar og Elsu Maríu Þorfinnsdóttur.

Heiðraði hún þar afmælisdrenginn sem er jú formaður ungra jafnaðarmanna í Hafnarfirði, lögfræðingur persónuverndar og gjaldkeri skákfélagsins Kátu biskuparnir. Katrín vildi meina að framfarir hennar í skáklistinni væru hægar svo hún var að sjálfsögðu leyst út með bókinni "skákþjálfun" auk ljóðabókar eftir mótsstjóra, Kristian Guttesen.

Tefldar voru fimm umferðir eftir monradkerfi þar sem umhugsunartími var 7 mínútur.

Eftir harða keppni stóð Róbert Harðarson uppi sem sigurvegari með 4,5. vinninga. Annar varð Gunnar Freyr Rúnarsson með 3,5, þriðji Marteinn Harðarson, kátur biskup, með þrjá og þar á eftir komu hin unga og efnilega skákkona, Elsa María Þorfinnsdóttir og afmælisbarnið sjálft.

Að móti loknu voru veglegar kaffiveitingar eins og venjan er og allir fengu vinning, í bóka- eða geisladiskaformi. 

Vin er athvarf Rauða krossins fyrir fólk með geðraskanir, Hverfisgötu 47 í Reykjavík og teflt er á mánudögum kl. 13:00.

Allir velkomnir að vera með og mót eru haldin að meðaltali einu sinni í mánuði.

Myndir: Afmælisbarnið Þórður, Róbert, Marteinn og Gunnar Freyr.   Katrín Júlíusdóttir, þingmaður, leikur fyrsta leik mótsins fyrir Elsu Maríu gegn Róberti.   

Haukar unnu Bolvíkinga

Viðureign Hauka og Bolvíkinga fór fram í íþróttamiðstöð Hauka að Ásvöllum í gærkvöldi. Bolvíkingar mættu einungis með fimm keppendur þar sem hluti liðsins var á sjúkrahúsi eða á sólarströnd! Haukar buðu af einstökum drengskap að keppt yrði á fimm borðum í stað sex og varð það úr. Haukar unnu fyrstu tvær umferðirnar 4-1 og náðu góðu forskoti. Staðan í hálfleik eftir sex umferðir var 18-12 fyrir Hauka.

 

Í seinni umferðinni söxuðu Bolvíkingar á forskotið og fyrir síðustu umferð hefðu þeir náð að jafna metin með 4-1 sigri. En Haukar stóðust prófið og sigruðu lokaumferðina 3-2. Bolvíkingar unnu seinni umferðina 16-14, en samanlagt unnu Haukar 32-28.

 

Lið Hauka:
Heimir Ásgeirsson  5 af 10

Þorvarður Ólafsson 7 af 10

Hlíðar Þór Hreinsson 7 1/2 af 10

Stefán Freyr Guðmundsson 4 af 10

Sverrir Örn Björnsson 3 af 10

Sverrir Þorgeirsson 5 1/2 af 10

 

Lið Bolungarvíkur:

Halldór Grétar Einarsson 9 af 12

Magnús Pálmi Örnólfsson 7 1/2 af 12

Guðmundur Daðason 3 af 12

Stefán Andrésson 4 1/2 af 12

Unnsteinn Sigurjónsson 4 af 12

 

Hraðskákmeistarar Taflfélags Reykjavíkur og Skákfélag Akureyrar munu mætast í undanúrslitum á morgun.  Ekki liggur fyrir hvenær Íslandsmeistarar Hellis og Haukar mætast en undanúrslitum á að vera lokið 20. september og úrslitum 30. september.    

 

Hægt  er að lesa um fyrri úrslit keppninnar á vinstri hluta síðunnar, undir viðeigandi færsluflokk.   

Glitnir heldur sterkt hraðskákmót í Noregi - Hannesi boðin þátttaka

Íslenski bankinn Glitnir heldur ofurhraðskákmót, Glitnir Blitz, en mót með sama nafni, var haldið í Ráðhúsi Reykjavíkur í fyrra.   Mótið er haldið í Osló 27. október nk.   Meðal þátttakenda er Magnus Carlsen, sem sigraði í fyrra eftir sigur á Hannesi Hlífari Stefánssyni í úrslitaeinvígi.  Hannes Hlífari hefur verið boðin þátttaka en endanleg þátttaka hans virðist ekki liggja fyrir.  Undankeppnin verður haldin þar sem 6-7 keppendur ávinna sér til að tefla í 16 manna úrslitum.  

Keppendalistinn:

1. GM Aleksander Grisjuk, Russland. 23 år, rating 2732.

2. GM Magnus Carlsen, Norge. 16 år, rating 2710.

3. GM Peter Heine Nielsen, Danmark. 34 år, rating 2637.

4. GM Simen Agdestein, Norge. 40 år, rating 2582.

5. GM Tomi Nyback, Finland. 22 år, rating 2567.

6. GM Kjetil A Lie, Norge. 26 år, rating 2536.

7. GM Pia Cramling, Sverige. 44 år, rating 2533.

8. GM Leif Erlend Johannessen, Norge. 27 år, rating 2531.

9. IM Jon Ludvig Hammer, Norge. 17 år, rating 2412.

Frétt Nettavisen

 

 

Heimsmeistarar Salaskóla halda til Namibíu - ný vefsíða tileiknuð sveitinni

Samkvæmt frétt mbl.is í gær heldur skáksveit Salaskóla til Namibíu í boði Þróunarsamvinnustofnun Íslands og Kópavogsbæjar, ásamt tveimur fararstjórum.  

Í fréttinni segir m.a.:  

"róunarsamvinnustofnun hefur í samstarfi við Skáksamband Íslands og Hrókinn staðið fyrir skákverkefni meðal grunnskólabarna í Namibíu síðustu þrjú árin ásamt því að styðja við bakið á namibíska skáksambandinu og þjálfa landslið Namibíu í skák. Skákverkefninu lýkur á næstunni og því þótti við hæfi að bjóða nýju heimsmeisturunum í skólaskák frá Salaskóla í heimsókn til Namibíu, samkvæmt upplýsingum frá Þróunarsamvinnustofnun.

Í ferðinni gefst íslensku sveitinni kostur á því að tefla við aðra grunnskólanemendur og taka þátt í tveimur meistaramótum ungmenna í Namibíu. Annars vegar er um að ræða keppni skólaliða og hins vegar einstaklingskeppni en bæði mótin eru haldin í Eros grunnskólanum í höfuðborginni Windhoek.

Skáksveit Salaskóla ogi vann í sumar heimsmeistaratitil í flokki 14 ára og yngri á alþjóðlegu móti grunnskólaliða sem haldið var í Tékklandi. Í sigurliðinu voru Jóhanna Björg Jóhannsdóttir, Petrekur Maron Magnússon, Páll Andrason, Guðmundur Kristinn Lee og Birkir Karl Sigurðsson, öll á aldrinum 11-14 ára. Þessi hópur fer til Namibíu í vikunni ásamt þjálfurum og fararstjórum liðsins, Hrannari Baldurssyni og Tómasi Rasmus.

Ferðin hefst næstkomandi miðvikudag og lýkur 21. september."

Rétt er líka að benda á að Hrannar Baldursson hefur sett upp vefsíðu tileinkaða sveitinni þar sem væntanlega verður hægt að fylgjast með ferðasögunni.  

• Frétt mbl.is
  
• Salaskólaskák
• Skákvefur Hrannars
  

 

Afmælisskákmót Þórðar í Vin í dag

Hinn góði drengur, Þórður Sveinsson, lögfræðingur, formaður ungra jafnaðarmanna í Hafnarfirði, gjaldkeri skákfélagsins Kátu biskupanna og foringi í herdeild þeirra í skáklandnámi Hróksins á  Grænlandi, varð þrítugur á dögunum og af því tilefni halda Hrókurinn og skákfélag Vinjar mót honum til heiðurs í Vin, Hverfisgötu 47 í Reykjavík, mánudaginn 10. september kl. 13:00.

Þórður var hlaðinn verkefnum á afmælisdaginn og hafði ekki tækifæri til að setja upp veislu, sigldi með bátnum Þyt frá Tasiilaq til Kulusuk á Grænlandi, ferjaði töskur og kassa á flugvöllinn í roki og rigningu og flaug heim, í stórum hópi leiðangursmanna, þreyttur og slæptur.

Tefldar verða fimm umferðir og umhugsunartími er sjö mínútur.

Allir þátttakendur fá glaðning.

Að lokum verður kaffiveisla að venju, spjallað og farið yfir glæstar byrjanir og afleiki.

Allir velkomnir og ekkert þátttökugjald, að venju.

Vin er athvarf Rauða krossins fyrir fólk með geðraskanir og hefur Hrókurinn haldið úti skákæfingum þar á mánudögum í um fjögur ár.

Saman hafa Hrókurinn og skákfélag Vinjar staðið að ýmsum mótum og uppákomum undanfarin ár.

Íslandsmótið í hraðskák á Bolungarvík

Vegna fyrirspurna vilja mótshaldarara koma eftirfarandi á framfæri:

1. Boðið er upp á uppábúin rúm fyrir þá sem þá vilja.

2. Skráningarfrestur  hefur verið framlengdur til fram á mánudag.

Að öðru leyti er vísað á fyrri frétt um mótið.   

NM barnaskóla: Grunnskóli Vestmannaeyja í öðru sæti!

Skáksveit Grunnskóla Vestmanneyja vann stórsigur á sænskri sveit, 3,5-0,5, í fimmtu og síðustu umferð Norðurlandamóts barnaskólasveita, sem fram fór í dag í Örsundsbro í Danmörku.  Sveitin fékk 13,5 vinning og var aðeins hálfum vinningi frá því að hampa titlinum.   Nökkvi Sverrisson, Sindri Freyr Guðjónsson og Hallgrímur Júlíusson unnu en Alexander Gautason gerði jafntefli.   Sindri Freyr vann allar sínar skákir, fimm að tölu!   Frábær frammistaða hjá Eyjamönnum á sína fyrsta norðurlandamóti.

Það er reyndar athyglisvert að á þeim þremur norðurlandamótum sem fram fóru um helgina voru það ávallt þriðja borðs mennirnir sem fengu flesta vinninga í íslensku liðunum!   Hilmar Þorsteinsson í framhaldsskólakeppninni, Matthías Pétursson í grunnskólakeppninni og Sindri Freyr í barnaskólakeppninni.   

Grunnskóli Vestmannaeyja - Mälarhojdens skola (Svíþjóð) 3,5-0,5

1. Nökkvi Sverrisson - Leo Brodin 1-0
2. Alexander Gautason - Jakob Kisselgof  0,5-0,5
3. Sindri Freyr Guðjónsson - Kalle Thyman 1-0
4. Hallgrímur Júlíusson - Jonathan Hanses 1-0 

 

Lokastaðan:

1. Svíþjóð I 14 v.
2. Grunnskóli Vestmannaeyja 13,5 v.
3. Noregur 10,5 v.
4. Danmörk 9 v.
5. Svíþjóð II 7 v.
   
6. Finnland 6 v.

Skáksveit Grunnskóla Vestmannaeyja:

1. Nökkvi Sverrisson (1540) 3 v. af 5
2. Alexander Gautason (1475) 1,5 v. af 5
3. Sindri Freyr Guðjónsson (1505) 5 v. af5
4. Hallgrímur Júlíusson (1390) 4 v. af 5
5. Kristófer Gautason (1160)
   

Liðstjóri er Helgi Ólafsson.   

• Heimasíða mótsins
• Bloggsíða Karls Gauta
• Heimasíða TV

NM framhaldsskóla: MR með jafntefli í lokaumferðinni

Skáksveit Menntaskólans í Reykjavík gerði 2-2 jafntefli við sænsku sveitina í 5. og síðustu umferð Norðurlandamóts framhaldsskóla sem fram fór í Lundi í Svíþjóð.   Guðmundur Kjartansson og Hilmar Þorsteinsson unnu en Aron Ingi Óskarsson og Helgi Egilsson töpuðu.   Sveitin hlaut 6,5 vinning af 16 mögulegum og náði aldrei að blanda sér í toppbaráttuna.   Hilmar stóð sig best MR-inga, hlaut 3 vinninga.   Norðmenn urðu norðurlandameistarar.  

 

 

 

S:t Petri, Malmö - Menntaskólin, Reykjavik 2-2

1. Drazen Drageizevic - Gudmundur Kjartansson 0-1
2. Mladen Gajic - Aron Ingi Oskarsson 1-0
3. Enver Kazazi - HIlmar Thorsteinsson 0-1
4. Nada Gjoreska - Gardar Sveinbjörnsson 1-0

Sveit MR: 

1. FM Guðmundur Kjartansson (2306) 1,5 v. af 4
   
2. Aron Ingi Óskarsson (1871) 0,5 v. af 4
3. Hilmar Þorsteinsson  (1780) 3 v. af 4
4. Helgi Egilsson (1580) 1,5 v. af 4
5. Garðar Sveinbjörnsson (1480)

Liðsstjóri  MR var Ólafur H. Ólafsson.

Mynd: Skáksveit MR ásamt liðsstjóra.  Myndin er tekin af Gunnari Finnlaugssyni sem er búsettur er í Lundi. 

Heimasíða mótsins