Gallaryskak.net

Nýlega hefur verið opnað myndarlegt NetTorg á slóðinni www.galleryskak.net sem vert er að heimsækja. Auk sérstakrar heimasíðu fyrir Gallerý Skák, þar sem lesa má um viðburði þar og skoða áhugavert myndasafn, er þar að finna heimasíður fyrir Skákdeild KR og þá þriðju fyrir Riddarann, skákklúbb eldri borgara, auk sérstakra flipa fyrir ungar og aldnar skákekkjur og síðna fyrir Lista- & SkákSelið, sælureitinn við Selvatn.  Einkaskákklúbburinn "Hin Vísa Kaísa" (áður VISA-klúbburinn), á þar að fá smáhorn líka innan tíðar.  Unnið verður að því áfram að bæta þar inn efni bæði gömlu og nýju, sem snertir viðkomandi klúbba, ásamt fleiri myndum og ýmsum fróðlegum greinum um skáklíf á Íslandi að fornu og nýju. 

Það er að sjálfsögðu eldhuginn og skákforkólfurinn Guðfinnur R. Kjartansson, fyrrv. form. TR, sem stendur að baki þessa myndarlega átaks, til að miðla upplýsingum og auka tengsl innan hins stóra og vaxandi hóps áhuga- og ástríðuskákmanna af eldri kynslóðinni, sem sumir telfa í öllum þessum klúbbum reglulega og reyndar víðar.

Guðfinnur var nýlega heiðraður af skákfélögum sínum með því að honum var veitt SkákEflis-orðan fyrir hans drjúga og heillaríka framlag til skákmála. Það er SkákEfli rhs, óformleg regnhlífarsamtök umræddra klúbba, sem standa að Gallerýinu og orðuveitingum af þessu tagi.