Kátir grænlenskir og íslenskir skákkrakkar í Kópavogi

Það var líf og fjör í Kársnesskóla í Kópavogi á miðvikudaginn þegar Hrafn Jökulsson tefldi við skákþyrsta grænlenska og íslenska krakka. Grænlensku börnin eru stödd hér á landi til að læra sund (engar sundlaugar eru á Grænlandi) og kynnast jafnöldrum sínum. Jafnframt hafa þau farið í Húsdýragarðinn, heimsótt forsetann á Bessastöðum og fengið að kynnast íslenska hestinum, svo fátt eitt sé nefnt að ævintýrum þeirra.
 
Börnin, sem eru 26 talsins, koma frá smáþorpum á Austur-Grænlandi og er þetta fyrsta utanlandsferð langflestra úr hópnum. Þetta er fjórða árið í röð sem Kalak, vinafélag Íslands og Grænlands, býður barnahóp frá Grænlandi til Íslands, í samvinnu við Hrókinn, Kópavogsbæ, Flugfélag Íslands og fleiri aðila.
 
Öll grænlensku börnin kunnu mannganginn og sum eru orðin býsna glúrin, enda hafa Hróksmenn einbeitt starfi sínu að byggðum Austur-Grænlands síðustu sex árin. Þar búa næstu nágrannar Íslendinga í heiminum og þar er jafnframt mest fátækt á Grænlandi og mest um félagsleg vandamál af ýmsu tagi. Heimsóknin hefur heppnast frábærlega og fara grænlensku börnin frá Íslandi með margar góðar minningar. Jafnaldrar þeirra í Kópavogi eru líka reynslunni ríkari og hnýtt vinabönd, sem vonandi munu lengi endast.