Bragi teflir á EM landsliða

Alþjóðlegi meistarinn Bragi Þorfinnsson (2360) hefur tekið sæti Stefán Kristjánssonar (2462), sem hefur dregið sig úr liðinu, á EM landsliða sem fram fer í Novi Sad í Serbíu 21.-31. október nk.

Lið Íslands munu því skipa:

1. SM Héðinn Steingrímsson (2540)
2. AM Jón Viktor Gunnarsson (2462)
3. AM Dagur Arngrímsson (2396)
4. AM Björn Þorfinnsson (2395)
5. AM Bragi Þorfinnsson (2360)

Athugasemdir

[Geir (IP-tala skráð) 31.8.2009 kl. 17:10]

Getur einhver sagt mér af hverju Hannes teflir ekki ?

[Skák.is, 31.8.2009 kl. 17:46]

Sjá bókun frá stjórnarfundi SÍ, 15. júní sl.: 

2. EM landsliða 2009:

Mótið verður haldið í Serbíu 21. okt. - 1. nóv. Stjórnin samþykkir að draga verulega úr kostnaði Skáksambandsins við þátttöku Íslands að þessu sinni. Skákmönnum með 2350 skákstig eða meira verður boðið að sækja um sæti í sveit Íslands gegn 50.000 kr styrk Skáksambandsins auk þess sem sambandið myndi greiða þátttökugjald íslensku skáksveitarinnar. Þátttakendur myndu bera allan annan tilfallandi kostnað

Hannes gaf ekki kost á sér á þessum forsendum

[Sigurður Daði Sigfússon (IP-tala skráð) 31.8.2009 kl. 17:58]

Þetta er þétt og skemmtilegt lið sem verður sent þarna út þó maður sakni auðvitað atvinnumannanna okkar eins og Hannesar og Henrik.  Skil þó vel fjarveru þessarra manna ef þetta er það sem boðið er upp á (þ.e. 50.000 kr styrkur frá SÍ).  Hefði haldið að keppni landsliðsins ætti að vera eitt aðalverkefni Skáksambandsins og niðurskurður ætti frekar að koma fram á öðrum sviðum

[Skák.is, 31.8.2009 kl. 18:12]

Þátttaka á EM hefði kostað verulegar fjárhæðir og kostnaður við slík mót hefur hækkað verulega en á sama tíma eru tekjur SÍ að dragast saman.  SÍ mun þurfa að draga seglin saman á ýmsum sviðum, því miður.  

Að mati stjórnar SÍ stóð stjórnin fyrir tveimur kostum.  Að senda ekki lið eða bjóða upp á þessa leið.  Sú síðarnefnda var valin.  Margar Evrópu-þjóðir senda ekki lið á EM og láta Ól-mótið duga.

SÍ mun hins vegar senda lið á Ólympíuskákmótið á hefðbundin hátt.

Kveðja,
Gunnar

[Sigurður Daði Sigfússon (IP-tala skráð) 31.8.2009 kl. 18:22]

Auðvitað hafa allir skilning á því að SÍ þurfi að skera niður í því árferði sem er.  Það sem mér finnst hins vegar slæmt við þessa nýju stefnu SÍ (og sumra félaga reyndar líka) er að með því að senda bara þá sem geta borgað megnið af kostnaðinum sjálfir þá er verið að mismuna mönnum gróflega eftir persónulegum efnahag þeirra eða hvort þeir hafa góða styrktaraðila á bakvið sig.