EM ungmennta - pistill 7. umferðar

Úrslit sjöundu umferðarinnar hefðu alveg mátt vera betri.  Við fengum þó fjóra vinninga af tíu.

U-12 drengir:

Friðrik Þjálfi Stefánsson (0) -  Aleksandar Mladenovic, MNE (1619)  0-1

Friðrik missti þráðinn í miðtaflinu og lék síðan af sér peði.  Hann tapaði síðan öðru peði en fékk í staðinn mislita biskupa og hróka.  Hann tefldi þetta mjög vel lengi vel og var nánast búinn að tryggja sér jafntefli þegar slæmur leikur varð þess valdandi að biskupinn hans varð óvirkur og tapaðist skákin skömmu síðar.

U-14 stúlkur:

Geirþrúður Anna Guðmundsdóttir (0) - Eva Baekelant, BEL (1935)  0-1

Geirþrúður tefldi þessa skák mjög vel framan af og fékk heldur betri stöðu eftir byrjunina.  Hún missti síðan af besta framhaldinu og fékk erfiða stöðu sem tapaðist eftir mikla baráttu.

U-14 drengir:

Dagur Andri Friðgeirsson (1812) -  Mitar Djukanovic, MNE (0) 1-0

Dagur virðist vera kominn á beinu brautina.  Öruggur sigur í dag hjá honum.

U-16 stúlkur:

Hallgerður Helga Þorsteinsdóttir (1907) - Daria Veretennikova, RUS (2002) ½-½

Góð skák hjá Hallgerði í dag.  Mikil stöðubarátta sem leiddi að lokum til jafnteflis.

Jóhanna Björg Jóhannsdóttir (1655) - Dragana Nesic,  BIH (1873) ½-½

Ég er hættur að skilja þetta.  Jóhanna fékk erfiða stöðu í miðtaflinu en hún hlýtur að vera mjög ógnvekjandi stúlka því annan daginn í röð þráleikur andstæðingurinn á móti henni í mikið betri stöðu.  Fín úrslit fyrir Jóhönnu.

U-16 drengir:

Hjörvar Steinn Grétarsson (2299) - Juri Holvason, est (2041)  1-0

Góður sigur hjá Hjörvari.  Andstæðingurinn virtist aldrei eiga möguleika og nú er Hjörvar skyndilega farinn að blanda sér í toppbaráttuna með 5 vinninga af 7.

Alexander Bolychevsky, RUS (1807) - Patrekur Maron Magnússon (1872)  0-1

Vel gert hjá Patreki í dag.  Hann var heldur ákafur í byrjuninni sem olli því að andstæðingurinn fékk þægilega stöðu.  Patrekur tefldi síðan framhaldið mjög vel og uppskar mjög góðan sigur.

U-18 stúlkur:

Tinna Kristín Finnbogadóttir (1655) - Lucia Brandenburg, NED (1926) 0-1

Tinna missteig sig eftir byrjunina og tapaði tveimur peðum og fékk mjög slæma stöðu.  Hún tefldi framhaldið skemmtilega og fékk mikið mótspil og átti unna stöðu á einum stað.  Því miður sá hún það ekki og tapaði í framhaldinu.

U-18 drengir:

Panagiotis Homatidis, GRE (2035) - Sverrir Þorgeirsson (2102) 1-0

Sverrir hefur verið afskaplega lánlaus í þessu móti.  Hann fékk mun betra eftir byrjunina og hafði færi á því að fórna biskup fyrir unna stöðu.  Hann vildi samt reyna að bæta stöðuna fyrst og missti því af tækifærinu sem gaf andstæðingi hans færi á því að koma mönnunum á betri reiti.  Sverrir var þá komin með öllu verri stöðu sem tapaðist í framhaldinu.

Daði Ómarsson (2029)  - Peter Lichmann, GER (2375) 0-1

Lítið um þessa skák að segja.  Daði fór einfaldlega of geyst í sóknina á kostnað kóngstöðunnar og tapaði.

Að lokum viljum við hér í Svartfjallalandi óska Patreki sérstaklega til hamingju með afmælið í dag  sem og ritstjóra skak.is sem reyndar er öllu eldri!

Davíð Ólafsson

Athugasemdir

[Skák.is, 23.9.2008 kl. 13:28]

Þakka fyrir mig!

Ég óska jafnframt Patreki til hamingju með daginn sem og Jónasi Þorvaldssyni en þrír Hellisbúar eiga afmæli á þessum merkisdegi!

Kveðja,
Ritstjórinn