EM ungmenna - pistill 6. umferðar

Frábær umferð í dag.  Eftir leiðinda föstudag í síðustu umferð þá var frábær sunnudagur í dag.  Við fengum sjö vinninga af tíu og með smá heppni hefðum við getað fengið enn fleiri.  Krakkarnir mættu vel stemmdir til leiks í dag eftir frídaginn í gær þar sem við tókum mjög rólegan dag og skoðuðum bæinn.

U-12 drengir:

Samdan Samdanov, RUS (1718) - Friðrik Þjálfi Stefánsson (0)  1-0

Erfið skák hjá Friðrik.  Hann var ekki alveg að finna sig í stöðunni sem kom upp, tapaði peði en virtist hafa nægar bætur fyrir það.  Ónákvæmni í framhaldinu kostaði það að staðan varð óverjandi og niðurstaðan því tap.  Friðrik var hundfúll með þetta, enda traustur skákmaður sem tapar sjaldan.

U-14 stúlkur:

Uma Dibirova, RUS (1977) - Geirþrúður Anna Guðmundsdóttir (0)  0-1

Geirþrúður er búin að vera að tefla frábærlega á þessu móti og var skákin í dag engin undantekning á því.  Hún mætti grjótharðri rússneskri stúlku sem teflir gjarnan þunga stöðubaráttu.  Geirþrúður tefldi mjög vel og var alltaf með stöðuna í jafnvægi.  Hún vann svo að lokum peð og skákina í endatafli eftir 85 leiki og fimm og hálfs tíma taflmennsku.  Frábærlega gert.

U-14 drengir:

Davor Draskovic, MNE (0) - Dagur Andri Friðgeirsson (1812) 0-1

Dagur fékk frekar erfiða stöðu eftir byrjunina eftir ónákvæmni í leikjaröð.  Loks féllu hlutirnir þó með honum og hann snéri á andstæðinginn í endatafli og vann góðan sigur.  Þetta hlýtur að efla sjálfstraustið hjá honum því hann hefur verið reglulega óheppinn í þessu móti.

U-16 stúlkur:

Ilinca Vericeanu, ROU (1811) - Hallgerður Helga Þorsteinsdóttir (1907)  0-1

Ég leit á þessa stöðu eftir nokkra leiki og sá að upp var komin Caro-Kann og þar sem meira var, mér sýndist á andstæðingi Hallgerðar að hún væri þungt hugsi við að finna leikina í byrjuninni.  Ég hugsaði með mér að þessi skák yrði aðeins formsatriði fyrir Hallgerði því stúlkan er búin að vera að tefla vel og teflir þessa byrjun einnig alltaf frábærlega.  Ég hafði rétt fyrir mér og Hallgerður landaði öruggum sigri og er að eiga mjög gott mót.

Marta Sofia Cardoso Martins, POR (1500) - Jóhanna Björg Jóhannsdóttir (1655)  ½-½

Ég veit ekki hvað skal segja um þessa skák.  Á tímabili var ég að velta því fyrir mér hvort að þetta væri örugglega manngangurinn.  Skákin fór svo sem ágætlega af stað og náði Jóhanna tökum á stöðunni í miðtaflinu og vann að lokum skiptamun.  Á þessum timapunkti hófst allt önnur skák.  Stúlkurnar skiptust á að leika hverjum afleiknum á fætur öðrum og endaði skákin á einhvern ótrúlegan hátt í jafntefli eftir þráleik í stöðu sem var unnin á hvítt!  Verður líklega að teljast sanngjörn úrslit þar sem hvorugur keppenda tefldi þessa skák vel.

U-16 drengir:

Mehran Kamali, HOL (2035) - Hjörvar Steinn Grétarsson (2299)  0-1

Stund hefndarinnar!  Að vísu átti Hjörvar ekkert sérstaklega sökótt við þennan andstæðing en eftir að hafa tapað á eldhúsborðinu í síðustu umferð vann hann á þessu sama borði í dag.  Skákin aldrei í hættu og öruggur sigur í höfn.

Patrekur Maron Magnússon (1872) - Maksikm Gilev, MNE (0)  0-1

Ágætt skák lengi vel hjá Patreki.  Stundum getur þó allt gengið á afturfótunum og í þessari skák lék Patrekur illa af sér í endataflinu og tapaði snöggt.  Ergilegt, sérstaklega þar sem hann var aldrei í taphættu í þessari skák.

U-18 stúlkur:

Spela Orehek, SLO (1886) - Tinna Kristín Finnbogadóttir (1655) 0-1

Flott skák hjá Tinnu sem tefldi rosalega vel í þessari skák.  Tinna vann mann af andstæðingnum í miðaflinu og tefldi svo endataflið af öryggi til sigurs.  Virkilega vel gert hjá henni.

U-18 drengir:

Irfan Jabandzic, MNE (0) - Sverrir Þorgeirsson (2102) 0-1

Sverrir tefldi eins og hann gerir best.  Traust byrjun og beið eftir færum.  Greip tækifærið um leið og það gafst og vann örugglega.  Vel gert hjá Sverri.

Daði Ómarsson (2029) - Benjamin Tereick, GER (2382)  ½-½

Enn ein góð skák og góð úrslit hjá Daða.  Daði var lengi vel með betra og endaði skákin í jafntefli, reyndar eftir að báðir höfðu leikið skákinni einu sinni af sér án þess að hinn kæmi auga á það.

Davíð Ólafsson