Þráinsstyttan - nýr verðlaunagripur fyrir Skákþing Íslands

Við setningu Skákþings Íslands í gær (27. ágúst)  var Skáksambandinu færður að gjöf nýr og veglegur farandgripur fyrir keppnina um Íslandsmeistaratitilinn í skák.

Gefendur eru þrir fyrrv. forsetar SÍ, þeir Einar S. Einarsson; Guðmundur G. Þórarinsson;  Þorsteinn Þorsteinsson og Guðfinnur R. Kjartansson, fyrrv. formaður TR.

Verðlaunastyttan er gefin til minningar um  vin þeirra, skákfélaga og samstarfsmann,  Þráinn Guðmundsson, fyrrv. forseta SÍ, sem lést í fyrra, en Þráinn var ötul liðsmaður skákhreyfingarinnar um áratugaskeið, mikill fræðaþulur og átti lengri setu í stjórn SÍ en nokkur annar. 

Gripurinn er smíðaður af  Jóni Adolf Steinólfssyni, trélistamanni og ber merki Skáksambandsins, en einnig komu fyrirtækin, Steinsmiðja Sigurðar Helgasonar og Ísspor að gerð hans.   Hann leysir af hólmi kjörgrip mikinn, sem Guðmundur Arason, fv. forseti SÍ og hnefaleikakappi, gaf árið 1967.

Margrét Guðmundsdóttir, ekkja Þráins heitins, afhjúpaði hina nýju verðlaunastyttu að loknu stuttu ávarpi  Einars S. Einarssonar, fyrir hönd gefenda.  Björn  Þorfinnsson, forseti SÍ veitti gjöfinni viðtöku með þökkum.