Hallgerður og Sigríður gerðu jafntefli í áttundu umferð

Hallgerður Helga Þorsteinsdóttir og Sigríður Björg Helgadóttir gerðu báðar jafntefli í áttundu og næstsíðustu umferð  Stockholm Ladies Open sem fram fór í dag.  Hallgerður gerði jafntefli við sænsku skákkonuna Christin Anderson (2194) sem er alþjóðlegur meistari kvenna.  Hallgerður er efst íslensku skákstúlknanna en hún hefur hlotið 3,5 vinning og hefur teflt við titilhafa í öllum umferðum nema einni.

Elsa hefur 3 vinninga, Sigríður, Jóhanna og Tinna hafa 2,5 vinning.  Allar eru þær hækka á stigum fyrir frammistöðu sína.

Níunda og síðasta umferð verður tefld í fyrramálið.

• Heimasíða mótsins
• Chess results

 

Athugasemdir

[Helgi Árnason (IP-tala skráð) 24.3.2008 kl. 21:22]

Þetta firnasterka mót hér í Täby er mótshöldurum á allan hátt til mikils sóma og er vonandi ávísun á árlegan viðburð. Aðstæður mjög góðar og allt mótshald undir stjórn þeirra sem kunna best til verka. Þar fer fremstur í flokki hinn kunni skákhugsjónarmaður Peter Hlawatsch ásamt framkvæmdarstjóra sænska skáksambandsins Jónasi Sandbom sem fjölmargir Íslendingar kannast við. Hallgerður búin að tefla frábærlega og náð að leggja eða gera jafntefli við mun stigahærri skákdrottningar. Flestar skákir hennar hafa verið langar og lengst sú sem var tefld var langt fram á kvöld í 7. umferð. Þá tókst Hallgerði að halda jafntefli í endatafli með peði undir. Hinar stelpurnar hafa líka teflt ágætlega og koma til með að safna í mikinn reynslubanka með þátttöku í svona sterku móti. Þær hafa allar fengið að tefla við tvær eða fleiri skákkonur yfir 2100 stig. Nú stendur yfir lokaskemmtun skákhátíðarinnar sem er "en underbar och fantasifull Schackbal" greinilega ekki ólíkt því sem við upplifðum á lokahófi Íslandsmóts skákfélaga nema hvað kynjahlutfallið er öfugt. Þær eru ekkert smá glæsilegar skákdrottningarnar komnar í sitt fínasta púss og leiftra af gleði og þokka. Nokkrar þeirra voru hér á Reykjavik open eins og sú stigahá úkraínska Inna Gaponenka sem er í hópi þeirra sem berjast um efsta sætið á morgun í lokaumferðinni. Páskakveðja frá Sbíþjóð.