Glitnir Blitz: Hannes hafnaði í níunda sæti

Hannes Hlífar Stefánsson komst ekki áfram úr sínum riðli í fyrstu umferð á Glitnir Blitz skákmótinu í Noregi fyrr í dag. Rússneski stórmeistarinn Alexander Grischuk (2.726) sigraði í riðlinum, en keppnin um annað sætið stóð á milli Hannesar og alþjóðlega meistarans Bjørn Tiller. Þeir voru hnífjafnir eftir stigaútreikninga og var kastað upp á hvor þeirra kæmist áfram í keppnina um efsta sætið á mótinu. Þar hafði Bjørn Tiller betur. Hannes sigraði hins vegar í keppni um níunda sætið á mótinu.

Í úrslitaeinvíginu tefldu þeir Grischuk og Magnus Carlsen (2.710) og hafði Grischuk betur eftir harða baráttu. Úrslitin urðu 3-1, en jafntefli varð í fyrstu og þriðju skákinni.