Huginn efstur í hálfleik - TR minnkaði forskotið niður í 2½ vinning

Skákfélagið Huginn hefur 2½ vinnings forskot á Taflfélag Reykjavíkur eftir fyrra hluta Íslandsmóts skákfélaga sem lauk í dag í Rimaskóla. Huginsmenn unnu Fjölnismenn 5-3 í umferð dagsins en á sama tíma unnu TR-ingar Reyknesinga 6-2 og minnkuðu þar með forystu Hugins um einn vinning. Fjölnir er í þriðja sæti þrátt fyrir tapið gegn Hugin.

Viðureign Hugins og Fjölnis var afar spennandi og um tíma leit út fyrir að Fjölnir myndi hafa sigur. Helgi Ólafsson, sem hafði gjörtapað tafl gegn Fjölnismanninum Robert Ris, náði að snúa taflinu sér í vil með afar lúmskri gildru og fleiri skákir féllu Huginsmönnum í vil. Dagur Ragnarsson (Fjölni) gerði sér lítið fyrir og vann stórmeistarann Hannes Hlífar Stefánsson (Hugin).

Siguringi Sigurjónsson (Skákfélagi Reyknesinga) var hetja sinna manna gegn TR en hann lagði alþjóðlega meistarann Jón Viktor Gunnarsson að velli.

Taflfélag Bolungavíkur vann Víkingaklúbbinn 4½-3½ og b-sveitirnar áttu ekki góðan dag og eru báðar í fallsæti. Skákfélag Akureyrar vann b-sveit TR 5½-2½ og Skákdeild KR lagði Hugin-b að velli 4½-3½. Fallbaráttan verður spennandi en aðeins munar 1½ vinningi á liðinu sjötta sæti og því neðsta 

Einstaklingsúrslit dagsins má nálgast á Chess-Results.

Staðan

1. Skákfélagið Huginn 30½ v. af 40
2. Taflfélag Reykjavíkur 28 v.
3. Skákdeild Fjölnis 22 v.
4. Víkingaklúbburinn 21 v.
5. Taflfélag Bolungarvíkur 19 v.
6. Skákfélag Akureyrar 16½ v. (4 stig)
7. Skákdeild KR 16½ v. (2 stig)
8. Skákfélag Reykjanesbæjar 16 v.
9. Skákfélagið Huginn b-sveit 15½ v.
10. Taflfélag Reykjavíkur b-sveit 15 v.

Mótstöflu má finna á Chess-Results.

2. deild 

Taflfélag Garðabæjar er efst í 2. deild eftir öruggan sigur í "Derby-viðureign" gegn Hafnfirðingum í Haukum 4½-1½. B-sveit Skákfélags Akureyrar er í öðru sæti og c-sveit Hugins í því þriðja.

Mótstafla á Chess-Results. 

3. deild

Skákfélag Selfoss og nágrennis er í forystu í 3. deild. Hrókar alls fagnaðar eru í öðru sæti og b-sveit Skákfélags Reyknesinga í því þriðja.

Staðan á Chess-Results.

4. deild

B-sveit Víkingaklúbbsins er á toppnum en þeir hafa unnið allar sínar viðureignir. Skákfélag Sauðárkróks er í öðru sæti e-sveit Taflfélag Reykjavíkur í því þriðja.

Staðan á Chess-Results.

Á Íslandsmóti skákfélaga er kynslóðarbilið brúað en keppendur á mótinu eru á aldursbilinu 6-83 ára.

• Heimasíða mótsins
• Chess-Results