Heimsmeistaraeinvígi Carlsens og Karjakins í Hörpu í nóvember

Heimsmeistaraeinvígi Magnúsar Carlsens og Sergei Karjakins verður haldið í Hörpu í nóvember nk.  Til stóð að halda einvígið í New York en sú fyrirætlun fór um þúfur þar sem bandarískir stuðningsaðilar, sem höfðu áður lofað stuðningi, höfðu ekki áhuga að styðja við einvígið þegar á reyndi. Réði þar mestu að hvorki Caruana né Nakamura komust alla leið. Að auki fældi það stuðningsaðila mjög frá að til er mynd af Karjakin í bol með mynd af Pútin á en slíkt þykir alls ekki gott í Bandaríkjunum.

Ríkisstjórn Íslands ákvað á ríkisstjórnarfundi á þriðjudaginn var að styðja á myndarlegan hátt við Skáksamband Íslands yrði einvígið haldið hérlendis. Áætlaður heildarkostnaður við einvígið nemur um 400 milljónum króna.Skiptu snögg viðbrögð  öllu máli að FIDE ákvað að boði Skáksambands Íslands um að einvígið yrði haldið hérlendis. Vel tefld skák að hálfu ríkisstjórnar Íslands.

Forsætisráðherra sagði í viðtali við Ísland í bítið á Bylgjunni fyrr í morgun að það væri mikið ánægjuefni að hafa fengið einvígið til landsins. Á Íslandi hafi einvígi 20. aldarinnar verið haldið og ekki væri verra að halda hér einnig einvígi 21. aldarinnar. Þess má geta að Karjakin er annar tveggja sem hafa orðið stórmeistarar yngri en Carlsen.

Að sögn forsætisráðherra skipti miklu máli að góður samningur hafi náðst við kröfuhafa bankanna sem gerðu ríkisstjórninni kleift að styðja við þjóðaríþróttina á svo myndarlegan hátt.

Einvígið verður haldið í Eldborgarsal Hörpu 11.-30. nóvember. Alls tefla kapparnir 12 skákir og vinnur sá sem fyrr fær 6,5 vinninga.

Fyrstu 20 sem skrá sig á Skák.is (guli kassinn efst) fá frímiða á allar skákir einvígisins.

Hinir sem eru ekki nógu snöggir að tryggja sér boðsmiða geta keypt sér miða í forsölu á Midi.is á aðeins 9.900 kr.