Afmælisskákmót Hrafns í Ráðhúsinu í dag

Í dag, sunnudaginn 1. nóvember kl. 14 verður haldið Afmælismót Hrafns Jökulssonar í Ráðhúsi Reykjavíkur í tilefni af fimmtugsafmæli Hrafns. Meðal keppenda verða stórmeistarar, skákdrottningar, eldri kempur, efnisbörn og kaffihúsakempur. Þá verður því einnig fagnað að í dag kemur út ný útgáfa af bók Hrafns, ,,Þar sem vegurinn endar", og er hún gefin út í 300 tölusettum og árituðum eintökum í tilefni dagsins.

 

Afmælismót Hrafns verður vel skipað. Meðal keppenda verða stórmeistararnir Jóhann Hjartarson, Jón L. Árnason, Hannes Hlífar Stefánsson, Þröstur Þórhallsson, Stefán Kristjánsson og Hjörvar Steinn Grétarsson, alþjóðlegu meistararnir Bragi Þorfinnsson, Guðmundur Kjartansson, Jón Viktor Gunnarsson og Sævar Bjarnason, skákkonurnar Guðlaug Þorsteinsdóttir, Sigríður Björg Helgadóttir og Hrund Hauksdóttir og fjöldi annarra skemmtilegra skákmanna, en keppendur eru alls 34.

 

Skákáhugamenn eru boðnir hjartanlega velkomnir á afmælisskákmótið og útgáfugleðina. Veislunni stjórnar Össur Skarphéðinsson, skákstjóri er Róbert Lagerman, og meðal þeirra sem troða upp er Bjartmar Guðlaugsson tónlistarmaður. Boðið verður upp á kaffi og veitingar.

 

Bók Hrafns, ,,Þar sem vegurinn endar" kom fyrst út árið 2007 og fékk einstaklega góðar viðtökur. Hún hefur lengi verið ófáanleg en er nú gefin út með nýrri kápumynd Huldu Hákon. Í bókinni segir Hrafn frá dvöl sinni í Árneshreppi á Ströndum, en þangað fór hann fyrst átta ára gamall og hefur síðan verið tengdur sveitinni við ysta haf sterkum böndum.