Safnað fyrir verkefnum Hróksins á Grænlandi

Liðsmenn Hróksins bjóða til uppskeruhátíðar, bóksölu og flóamarkaðar á Menningarnótt og ætlar Hrafn Jökulsson að gefa allar bækur sínar til að safna fyrir næstu verkefnum Hróksins á Grænlandi. Hrókurinn hefur undanfarið ár haft aðstöðu í vöruskemmu Brims við Reykjavíkurhöfn, og þar hefur verið miðstöð fatasöfnunar í þágu barna og ungmenna á Grænlandi.

Meðal bóka á markaðinum eru nýjar og gamlar skáldsögur og ljóð, fræðirit og ferðabækur, þjóðlegur fróðleikur og erlendar bækur um allt milli himins og jarðar. Margra grasa kennir á flóamarkaðinum, en gestir geta líka gripið í tafl og fræðst um Grænland en þar hafa liðsmenn Hróksins útbreitt fagnaðarerindi skákarinnar og vináttunnar síðan árið 2003.

Hróksmenn hafa á þessu ári sent fjóra leiðangra til Grænlands, auk þess að senda þangað mikið af vönduðum og góðum fatnaði fyrir börn. Hróksmenn stefna að því að senda þrjá leiðangra til viðbótar til Grænlands á þessu ári og munu m.a. nema ný lönd á vesturströndinni.

Uppskeruhátíð Hróksins í vöruskemmu Brims, Geirsgötu 11 við Reykjavíkurhöfn, hefst klukkan 13 og stendur til 17, og eru allir hjartanlega velkomnir.