Helgi Jónatansson látinn

Helgi Jónatansson lést 27. janúar sl. Helgi var jarðsunginn frá Kópavogskirkju 16. febrúar sl. Félagar hans úr Skákfélagi Reykjanesbæjar, Björgvin Jónsson og Sigurður H. Jónsson, rituðu um hann minningargrein sem birtist í Morgunblaðinu þann sama dag.

Síðasta kappskák Helga var gegn alþjóðlega meistaranum Arnar E. Gunnarssyni í fyrra hluta Íslandsmóts skákfélaga í október sl. Hún endaði með glæsilegum sigri Helga og má nálgast hér.

Kveðja frá Skákfélagi Reykjanesbæjar

Í dag kveðjum við félagar í Skákfélagi Reykjanesbæjar liðsfélaga okkar og góðan vin, Helga E. Jónatansson, er varð bráðkvaddur þann 27. janúar síðastliðinn. Helgi gekk til liðs við Skákfélag Reykjanesbæjar fyrir nær 40 árum og hefur frá þeim tíma átt fast sæti í skákliði félagsins. Meðan hann bjó í Reykjanesbæ var hann auk þess mjög virkur í starfi félagsins, m.a. formaður þess um skeið. Á þeim tíma var og algengt að teflt væri í hópi okkar skákfélaganna á heimili Helga á Vatnsnesveginum og síðar að Háseylu í Innri-Njarðvík á föstudags- eða laugardagskvöldum, enda var Helgi höfðingi heim að sækja. Helgi á að baki fjölda sigra á innanfélagsmótum hjá Skákfélagi Reykjanesbæjar, t.a.m. varð hann á árabilinu 1977-1982 fjórum sinnum skákmeistari Keflavíkur. Eftir að Helgi flutti á höfuðborgarsvæðið um 1990 kom af sjálfu sér að dró úr þátttöku hans í starfi félagsins, en hann hélt þó engu að síður áfram að tefla fyrir þess hönd, s.s. í liðakeppnum. Í Deildakeppninni, Íslandsmóti skákfélaga, hefur Helgi í gegnum tíðina reynst öflugur liðsmaður og er skemmst að minnast árangurs hans í fyrri hlutanum af yfirstandandi keppni, sem tefldur var í október sl., þar sem Helgi náði bestum úrslitum liðsmanna, en liðið teflir nú í efstu deild. Þótt Helgi hefði fyrir fáum árum kennt sér einhvers hjarta- eða kransæðameins var ekki annað að merkja en hann væri kominn í sitt gamla form, bæði líkamlega og skáklega. Helgi var ávallt mannblendinn, léttur og hress og sagði skemmtilega frá hlutum. Við félagar hans úr Skákfélagi Reykjanesbæjar þökkum honum nú á kveðjustund fyrir ánægjulegar samverustundir og stuðning gegnum árin, við okkur og félagið. 

Við sendum börnum Helga, Lindu Björgu og Einari og barnabörnum, okkar innilegustu samúðarkveðjur.

Fh. félaga í Skákfélagi Reykjanesbæjar, 

Björgvin Jónsson

og Sigurður H. Jónsson.