Flugfélagssyrpa Hróksins í hádeginu!

Annað mótið af fimm í Flugfélagssyrpu Hróksins verður haldið í hádeginu í dag, föstudaginn 19. september kl. 12:00 í Pakkhúsi Hróksins, við Geirsgötu 11 í Reykjavík. Til mikils er að vinna í Flugfélagsyrpunni, því sigurvegari í heildarkeppninni fær ferð til Grænlands í verðlaun. Þá er heppinn keppandi dreginn út, sem sömuleiðis fær ferð til Grænlands fyrir 2, og aukast vinningslíkur eftir því sem keppt er á fleiri mótum í Flugfélagssyrpunni.

Tefldar eru 5 umferðir með 5 mínútna umhugsunartíma. Keppendur á fyrsta mótinu voru 26, þar af sex stórmeistarar og tveir alþjóðlegir meistarar. Héðinn Steingrímsson sigraði, fékk 5 vinninga og tók þar með forystu í syrpunni. Næstur var Hjörvar Steinn Grétarsson með 4,5 og Helgi Ólafsson hlaut 4.

Flugfélagssyrpan er opin öllum skákmönnum og er þátttaka ókeypis.

 

Pakkhús Hróksins er í vöruskemmu Brims við Geirsgötu 11 (beint á móti DV). Nóg er af bílastæðum fyrir keppendur og gesti