Hjörvar í stuði á Menningarnótt

 

 

Með sanni má segja að aðstæður til Leifturskákiðkunar hafi verið með allra besta móti á Menningarnótt. Á hinu glæsilega og nýja Vitatorgi var nefnilega stillt með öllu, hitastig milt og lítil sem engin sól til að blinda keppendur. Fjórtán skákmenn voru mættir til leiks og tefldu allir við alla, einvígi, upp í einn og hálfan vinning og vannst þar með einvígið. Mættir voru til leiks nokkrir af allra hröðustu skákmönnum Íslands.

 

 

Fór svo að Hjörvar Steinn Grétarsson stórmeistari sigraði með yfirburðum eftir að hafa stráfellt alla sína andstæðinga. Eðli málsins samkvæmt voru mikil læti og töldu glaðværir áhorfendur ansi marga ólöglega leiki sem keppendur voru ekki að gera alvarlegar athugasemdir um. Áhorfendur voru um tíma ansi margir og þá ekki síst erlendir gestir sem tóku upp myndavélarnar.

 

 

Skákakademían þakkar keppendum kærlega fyrir þátttökuna en svona viðburður er fyrst og fremst haldinn til að njóta um leið og athygli er vakin á að taflmennska á torgum getur verið hin mesta skemmtun og miklir sóknarmöguleikar fyrir hendi varðandi næsta sumar. Sérstaklega hvað varðar Vitatorg.

Úrslit má finna á Chess-Results.

 

 

Um kvöldið fór svo fram skemmtilegt barmót á hinum nýja sportbar Rio á Hverfisgötu 46. Þar hélt Hjörvar Steinn áfram sigurgöngu sinni, tapaði aðeins einni skák og það gegn Jóhanni Ingvasyni. Jóhann er í mikilli hraðskákæfingu þessar mundir og til alls líklegur með Skákfélagi Reykjanesbæjar í 8-liða úrslitum Hraðskákkeppni taflfélaga. Ljóst er að miklar æfingar hans með Kristjáni Erni Elíassyni eru að skila sér en þeir æfa hraðskák nokkrum sinnum í viku á Billiard-barnum í Faxafeni þar sem nokkur skákmenning ríkir og hægt að fá töfl og klukkur á barnum.

 

 

Myndaalbúm (GB/SSB)