Uppskeruhátíð Skákfélags Akureyrar fór fram í gær

Í gær lauk formlega vetrarstarfi Skákfélags Akureyrar með veglegri uppskeruhátíð.  Fyrst var efnt til

VORMÓTS fyrir yngri kynslóðina. Þar voru keppendur 12 talsins, tefldar sjö umferðir:

1. Jón Kristinn Þorgeirsson      7

2. Símon Þórhallsson               6

3. Andri Freyr Björgbinsson      5

4. Gabríel Freyr Björnsson       4

5-6. Benedikt Stefánsson og 

Roman Darri Stevensson Bos 3,5

Þvínæst var VERÐLAUNAAFHENDING fyrir mót vormisseris. Þar hirti Akureyrarmeistarinn, Jón Kristinn Þorgeirsson flest verðlaun; hann vann nýjársmótið, Skákþing Akureyrar, bæði í flokki fullorðinna og unglinga, varð skólaskákmeistari, vann bikarmótið og páskahraðskákmótið og hirti verðlaunin fyrir TM-mótaröðina. Þá stýrði hann Kælismiðjunni Frost til sigurs í firmakeppninni. Eru þá ótalin verðlaun hans á utanfélagsmótum.    Aðrir fengu mun færri verðlaun en greinilegt að meistarar framtíðarinnar eru þess albúnir að hirða verðlaun sem þá bjóðast. Svo fékk Auðunn Elfar Þórarinsson verðlaun fyrir besta ástundun á æfingum á almennum flokki og voru þó margir sem mættu vel og drengilega í vetur. 

Eins og alkunna er verða menn svangir rétt áður en verðlaunaafhending hefst og því bauð Sprettur-inn upp á pizzu. Þær brögðuðust vel. 

Að þessu loknu hófst árleg keppni um Akureyrarmeistaratitilinn í hugur og hönd. Þar unnu öruggan sigur tvímennið Andriver Frísak sem vann allar sínar viðureignir.

Meðan á þeirri keppni stóð tefldu þrír aðdáendur bandaríska drykkjavöruframleiðandans Coca-cola um sigurverðlaun í móti sem við hann er kennt. Á Coca-cola mótinu á fimmtudaginn urðu þeir Smári Ólafsson, Jón Kristinn Þorgeirsson og Áskell Örn Kárason efstir og jafnir með 9 vinninga af 12.   Nú var teflt til þrautar. Tvöföld umferð var á úrslitamótin og tefldu því allir fjórar skákir. Nú bar svo við að fyrrverandi Coke Zero meistari félagsins Áskell Örn Kárason bar sigur úr býtum en þeir Smári og Jokki deildu með sér öðru sætinu.   

Fóru svo allir heim til sín sæmilega sáttir og saddir. Nú tekur við sumardagskrá sem verður með rólegra yfirbragði en vetrardagskráin. Hún verður auglýst á næstu dögum.