Oliver Aron og Heimir Páll skólaskákmeistarar Reykjavíkur

Skólaskákmót Reykjavíkur fór fram fimmtudaginn 24. apríl í Rimaskóla. Sterkustu skákmenn reykvískra skóla voru mættir til leiks og var yngri flokkurinn sérstaklega vel mannaður. Þar var mikil baráttu um tvö efstu sætin sem gáfu sæti á Landsmót í skólaskák sem fer fram um næstu helgi í Skáksambandi Íslands.

Ein af úrslitaskákunum fór fram í fjórðu umferð þegar Heimir Páll Ragnarsson Hólabrekkuskóla og Mykhaylo Kravchuk Ölduselsskóla mættust. Úr varð afar spennandi skák þar sem Mykhaylo pressaði stíft í miðtaflinu en Heimir varðist vel og komst í unnið endatafl sem hann kláraði af öryggi. Vel tefld skák hjá báðum. Í næstu umferð mætti Heimir Óskari Víking Davíðssyni og sömdu þeir jafntefli.  Óskar Víkingur hélt öðru sætinu fram í sjöundu umferð þegar hann mætti Mykhaylo sem lagði Óskar að vell og komst því áfram ásamt Heimi Páli sem var öruggur sigurvegari.

Úrslit mótsins má finna á Chess-Results.

Í eldri flokki voru tíu keppendur sem tefldu allir við alla. Þar kom lítið á óvart en baráttan var þó mikil um þriðja sætið sem gaf þátttökurétt á Landsmótinu. Fór svo að Jacob Alexander vann sér inn þátttökuréttinn.

Úrslit mótsins má finna á Chess-Results.

Skákstjóri var Stefán Bergsson og honum til aðstoðar Björn Ívar Karlsson, Helgi Árnason og Erla Hjálmarsdóttir.