Fimm skákmenn efstir á N1 Reykjavíkurskákmótinu - Hjörvar efstur Íslendinga

Fimm stórmeistarar eru efstir og jafnir með fullt hús að lokinni fjórðu umferð N1 Reykjavíkurskákmótsins sem fram fór í kvöld í Hörpu. Það eru Ungverjinn ungi, Richard Rapport, sem hefur vakið gríðarlega athygli fyrir afar fjörlega og skemmtilega taflmennsku, Hollendingarnir Erwin L´ami og Robin Van Kampen, en sá síðarnefndi vann Walter Browne í kvöld, Eric Hansen, Kanada, og Svíinn Nils Grandelius.

Hjövar Steinn Grétarsson er meðal ellefu keppenda sem hafa 3,5 vinning og er efstur Íslendinga.

Átta Íslendingar hafa 3 vinninga. Meðal þeirra má nefna Guðna Stefán Pétursson sem vann FIDE-meistarann Sigurbjörn Björnsson og gömlu kempuna Jón Kristinsson, sem var meðal keppenda á fyrsta Reykjavíkurskákmótinu fyrir hálfri öld síðan, sem mætir Walther Browne á morgun, sigurvegara Reykjavíkurskákmótsins 1978.

Í dag var hópferð erlendra keppenda í Gullna hringinn. Það er þó lítilsháttar breyttur Gullinn hringur því höfð er viðkoma við gröf Fischers sem og Fischer-setrinu á Selfossi. Ferðin tókst ákfaflega vel en meðal þeirra sem fóru í dag voru Rapport og kínverski ofurstórmeistarinn Chao Li.

Fimmta umferð N1 Reykjavíkurskákmótsins er kl. 16:30 á morgun. Þá teflir Rapport við Van Kampen og Hjörvar viðalþjóðlega meistarann Mohamed Ezat frá Egyptalandi.

• Heimasíða N1 Reykjavíkurskákmótsins
• Beinar útsendingar
• Skákskýringar í beinni útsendingu
• Chess-Results