Gríðarleg spenna á Íslandsmóti skákfélaga - GM Hellir leiðir

Síðari hluti Íslandsmóts skákfélaga hófst í gær í Menntaskólanum í Hamrahlíð. Gríðarleg spenna er í keppninni en þrjú félög berjast um Íslandsmeistaratitilinn. Fyrir síðari hlutann var Taflfélag Vestmannaeyja efst en það breyttist í gær þegar sveitin tapaði afar óvænt fyrir Taflfélagi Reykjavíkur, 3-5. Á sama tíma unnu Skákfélagið GM Hellir og Víkingaklúbburinn stórsigra. GM Hellir leiðir í keppninni en Íslandsmeistarar Víkingaklúbbsins eru í öðru sæti 1,5 vinningi á eftir.

Úrslit sjöttu umferðar má nálgast á Chess-Results.

Staða efstu liða í fyrstu deild

1. Skákfélagið GM Hellir 36 v.
2. Víkingaklúbburinn 34,5 v.
3. Taflfélag Vestmannaeyja 31,5 v.
4. Taflfélag Bolungarvíkur 30 v.
5. Taflfélag Reykjavíkur 29,5 v.

Mótstöflu má nálgast á Chess-Results.

Mótinu verður framhaldið í kvöld kl. 20. Þá teflir GM Hellir við Skákfélag Akureyrar, Víkingaklúbburinn við b-sveit GM Hellis og Taflfélag Vestmannaeyja við Vinaskákfélagið.

Mótinu lýkur svo á laugardag með tveimur síðustu umferðunum. Sú fyrri fer fram á milli 11-15 og sú síðari á milli 17-21.

Íslandsmót skákfélaga er stærsta einstaka mót hvers árs á Ísland. Í ár tefla 308 skákmenn í hverri umferð, allt frá sex ára til ríflega áttræðs. Í keppninni tefla nánast allir sterkustu skákmenn landsins, erlendir sterkir stórmeistarar, sterkustu skákkonur landsins auk hins almenna skákáhugamanns í stórum stíl.