Sérviðburðir Reykjavíkurskákmótsins!

N1 Reykjavíkurskákmótið er ekki bara skákmót. Það er skákhátíð. Fjölmargir sérviðburðir fara fram samhliða stífri taflmennsku. Hér að neðan má finna yfirlit um þá. Og svo getur vel verið að fleiri bætist við!

Opnunarpartíið verður haldið milli 17:00-19:00 á Sky Lounge and Bar mánudaginn 3. mars eða degi fyrir mót. Sky Lounge and Bar er hótelbarinn á CenterHotel Arnarhvoll þar sem margir erlendir keppendur dvelja. Hótelið er beint á móti Hörpu, tekur eina mínútu að ganga frá Hörpu. Á meðan partíið stendur yfir verður happy hour á barnum.

Reykjavik Open Chess Pub Quiz

Sjötta árið í röð fer fram hin geysi skemmtilega spurningakeppni um hvaðeina er varðar skák. Hvað voru tefldar margar skákir í fimm heimeistaraeinvígjum Kasparovs og Karpovs? Hvert var herbergisnúmer Fischers þegar hann gisti á Hótel Loftleiðum 1972? Hver vann fyrsta Reykjavíkurskákmótið?

Þrjátíu spurningar og tveir og tveir saman í liði. Pöbb-kvissið fer fram á Sky Lounge and Bar fimmtudaginn 6. mars klukkan 22:00. Engin skráning, bara mæta tímanlega. Aldurstakmark 18 ár.

Reykjavik Open Barna Blitz

Líkt og Pöbb-Kvissið fer Reykjavik Barna Blitz fram í sjötta skiptið. Átta krakkar (f. 2001 og síðar) munu tefla til úrslita í Hörpu með útsláttarfyrirkomulagi. Undanrásirnar fara fram á vettvangi taflfélaga borgarinnar.

Úrslitin fara fram laugardaginn 8. mars klukkan 10:30 og verðlaunaafhending í upphafi sjöttu umferðar.

Nánar um undanrásir má finna á skak.is 

Teflt án tafar (Even Steven)

Langar þig að hafa 9 mínútur á klukkunni gegn einni mínútu andstæðingsins? Eða ertu stigahár og vilt reyna að vinna skákir með mínútu á klukkunni? Þá mætirðu á hraðskákmótið, "Teflt án tafar" eða "Even Steven" sem verður haldið á Sky Lounge Bar laugardagskvöldið 8. mars klukkan 20:00.

Fyrirkomulagið er einfalt. Keppendur skipta milli sín tíu mínútum. Hver 100ELO-stig sem munar á keppendum draga þá í sundur um eina mínútu í hvora átt. 200 stig tvær mínútur í hvora átt. Alveg niður í eina mínútu gegn níu mínútum þegar munurinn er 400 stig eða meir. Tefldar verða níu umferðir. ATH: hver 1 sekúnda í viðbótartíma við hvern leik.

Skráning í Hörpu á fimmtu- eða föstudeginum eða á [e-mail]. Skráning þarf að berast fyrir laugardag!

Þátttökugjald 1500 kr. Öll þátttökugjöld renna í verðlaunasjóð.  Aldurstakmark 18ár.

Fyrirlestur Kobalia (Kobalia's lecture)

Mikhail Kobalia er rússneskur stórmeistari með 2650 ELO-stig. Hann hefur um árabil verið einn af sterkari skákmönnum Rússa og m.a. teflt sjö sinnum í undanrásum um heimsmeistaratitilinn.

Kobalia er yfirþjálfari rússneska ungmennalandsliðsins og ferðast með liðinu á öll Evrópu- og heimsmeistaramót. Á þeim mótum eru Rússar yfirleitt með í kringum 200 keppendur og 30 þjálfara. Í fyrirlestri sínum mun Kobalia segja frá hvernig málum er háttað í Rússlandi er varðar kennslu og þjálfun. Fyrirlesturinn fer fram sunnudaginn 9. mars klukkan 11:00 í Hörpu. Engin skráning, bara mæta. Skákkennarar sérstaklega hvattir til að mæta.

Fótboltinn (the soccer)

Ef skákmótið er ekki að ganga þá má alltaf mæta í fótboltann. Hinn árlegi fótbolti mun fara fram í Fífunni í Kópavogi sunnudagskvöldið 9. mars klukkan 22:00. Skipt verður í fjögur lið og spilað á tveimur völlum. Mót, allir við alla!

Skráning er á [e-mail] eða í Hörpu. Þeir sem ætla að mæta í boltann mega endilega skrá sig fyrir sunnudaginn, þó það megi einnig skrá sig þá. Allir skákmenn velkomnir!

Auglýst er eftir bílstjórum sem geta náð í erlenda keppendur í Hörpu um 21:30 og tekið með sér í Fífuna. Fyrir viðvikið fá menn glaðning á lokahófi mótsins! Hafa samband við Stefán þeir sem geta skutlast.

Kasparov í Hörpu

Eins og hefur komið fram mun sjálfur Garry Kasparov heimsækja Reykjavík með mótið stendur yfir. Kasparov mun árita bækur og veita myndatökur í Hörpu fyrir umferð mánudaginn 10. mars. Sigurbjörn Björnsson skákbókasali verður á staðnum með bækur Kasparovs til sölu. Nánari tímasetning auglýst síðar.

Lokahófið (the price ceremony)

Lokahófið fer fram í Ráðhúsi Reykjavíkur að lokinni tíundu umferð miðvikudaginn 12. mars klukkan 18:30.

Þannig lítur það út. Einhverjir fleiri viðburðir gætu bæst við dagskránna. Erlendir keppendur hafa síðustu árin tekið mikinn þátt í dagskránni og munu einnig gera það í ár. Þannig mun t.d. hollenska skákkonan Arlette Van Weersel heimsækja grunnskóla og stelpurnar á stelpunámskeiði Skákskóla Íslands.

Sameinumst öll um glæsilega og skemmtilega skákhátíð í Reykjavík!

Samantekt:

• 3. mars Opnunarpartí
• 6. mars Gullni hringurinn
• 6. mars Pöbb-kviss
• 8.mars Reykjavik Barna Blitz
• 8. mars Even Steven
• 9. mars Fyrirlestur Kobalia
• 9. mars Fótboltinn
• 10. mars Kasparov áritar
• 12. mars Lokahóf