NM Skólaskák 2014 pistill sjöttu umferðar

A-flokkur
Nökkvi Sverrisson (2081) - Erik Rönka, Finnland (2154) ½-½
Mikael Jóhann Karlsson (2057) – Martin Haubro, Danmörk (2191) ½-½

Nökkvi tefldi við Erik frá Finnlandi og endaði skákin með jafntefli eftir nokkra stöðubaráttu.  Það sama má segja um skák Mikaels á móti Martin frá Svíþjóð.  Þeir félagar enduðu báðir með þrjá og hálfan vinning.  Nökkvi endaði í þriðja sæti og Mikael í fjórða sæti eftir stigaútreikning.

B-flokkur
Egor Norlin, Svíþjóð (2117) - Dagur Ragnarsson (2073) 0-1
Oliver Aron Jóhannesson (2104) – Silas Eyðsteinsson, Færeyjar (1668) 1-0

Dagur tefldi við Egor Norlin frá Svíþjóð.  Dagur gerði ákaflega vel að landa sigri í langri og erfiðri skák með því að snúa á andstæðinginn í endatafli.  Oliver átti náðugan dag gegn Silas frá Færeyjum.  Getumunurinn á þeim er einfaldlega það mikill að Silas átti raunverulega aldrei séns í þessari skák.  Dagur endaði með fjóra vinninga og hlaut brons í flokknum. Hann var reyndar jafn  Eero í öðru sæti en lægri eftir stigaútreikning.  Oliver endaði með þrjá og hálfan vinning og varð í fjórða til sjötta sæti (fimmti eftir stigaútreikning).

C-flokkur
Jón Kristinn Þorgeirsson (1844) – Eyvind X Djurhuus (1963) ½-½
Dawid Kolka (1748) - Sondre Merkesvik, Noregur (2022) 0-1

Jón Kristinn tefldi afar vel í þessum flokki og endaði með fjóra og hálfan vinning og hlaut silfurverðlaun í þessum flokki.  Flott frammistaða hjá honum og greinilegt að hann er mun sterkari skákmaður en stigin segja til um.  Dawid hlaut tvo og hálfan vinning og endaði í níunda sæti.

D-flokkur
Hilmir Freyr Heimisson (1761) – Arunn Anathan, Danmörk (1746) 1-0
Felix Steinþórsson (1536) - Andreas Garberg Tryggestad, Noregur (1878) 0-1

Hilmir Freyr átti að vanda hjartastopp dagsins.  Eftir byrjunina lék Hilmir illa af sér peði og fékk því slæma stöðu.  Hann hóf þá sókn af krafti, meira af kappi en forsjá.  Fljótlega var hann kominn með gjörtapaða stöðu en drengurinn er lipur í því að þyrla upp ryki og slá andstæðingana út af laginu.  Hann hélt bara áfram að sækja hróki undir og náði að vinna mann.  Andstæðingnum varð svo um að hann lék fyrirvaralaust af sér drottningu!  Annað skiptið í mótinu sem svipað atvik gerist hjá Hilmi.  Mér þætti reyndar betra að hann tefldi bara traust og ynni sannfærandi í stað þess að þeyta hjartsláttartíðni þjálfara og liðstjóra fram upp og niður líkt og þeir væru staddir í rússíbana.  Felix tefldi við Andreas frá Noregi sem er rúmlega þrjúhundruð og fjörutíu stigum hærri en Felix.  Eftir snarpa baráttu mátti Felix játa sig sigraðan.  Hilmir endaði með fjóra vinninga og hlaut brons í þessum flokki.  Hann endaði reyndar í öðru til fjórða sæti en varð þriðji eftir stigaútreikning.  Felix hlaut tvo og hálfan vinning og endaði í áttunda til tíunda sæti (níundi eftir stigaútreikning).

E-flokkur
Jonas Bjarre, Danmörk (1899) - Vignir Vatnar Stefánsson (1800) ½-½
Mykhaylo Kravchuk (1453) – Isak Sjöberg, Noregur (ekki með skráð stig) ½-½

Vignir reyndi hvað hann gat til að sigrast á Jonasi frá Danmörku.  Sá danski hélt sér hins vegar afar fast og niðurstaðan varð að lokum jafntefli.  Það er greinilegt að drengirnir í þessum flokki voru hræddir við Vigni hvort sem þeir voru stigalægri eða stigahærri en hann.  Mykhaylo gerði ágætis jafntefli við Isak frá Noregi.  Vignir endaði með fjóra og hálfan vinning og hlaut silfurverðlaun í þessum flokki.  Mykhaylo endaði með þrjá vinninga og varð í fimmta til sjötta sæti (fimmti eftir stigaútreikning).

Landskeppnin – lokastaða

Ísland 35,5 vinningar
Danmörk 34 vinningar
Svíþjóð 33 vinningar
Noregur 32,5 vinningar
Finnland 30 vinningar
Færeyjar 15 vinningar

Íslenska liðið sigraði semsagt sjálfa landskeppnina og varði þar með titilinn frá því á heimavelli í fyrra.  Sigurinn var sérstaklega sætur í ljósi þess að danir voru afar ákveðnir í að vinna þessa keppni og lögðu mikinn metnað í það.  Það er nú búið að fá nýjan farandbikar í þessa keppni, Legobikarinn, sem Ísland mun varðveita fram að næstu keppni.

Þegar á heildina litið verður árangur Íslendinganna að teljast góður.  Við erum til að mynda eina landið sem á mann á verðlaunapalli í öllum flokkum.  Allir keppendur okkar eru mjög agaðir í vinnubrögðum á svona mótum og eru okkur svo sannarlega til sóma.  Það þótti við hæfi að Jón Kristinn tæki við bikarnum fyrir hönd okkar þar sem hann var með bestan árangur Íslensku keppendanna mælt með frammistöðumati miðað við ELO stig.

 

 

Að lokum eiga danirnir svo skilið mikið hrós fyrir framkvæmd keppninnar.  Ég vona svo sannarlega að sambærileg umgjörð verði viðhöfð á þessum mótum hér eftir.  Fyrir foreldra/áhorfendur heima á Íslandi hlýtur líka að vera algjörlega frábært að geta horft á allar skákir sinna manna í beinni útsendingu í gegnum netið.

Davíð Ólafsson