Jólaskákmót KR - Róbert fór með sigur af hólmi

Það voru óvenju margir mættir til tafls í KR-heimilið á mánudagskvöldið var þegar blásið var þar í herlúðra og til jólahrað- eða hvað- skákmóts, á fjórða tug skákmanna, sem allir ætluðu að selja sig dýrt.  Kristján formaður var í fínu formi nýbúinn að leggja Arion banka af velli í Hæstarétti og tilbúinn í slaginn á ný.  Hafði með sér nokkrar kippur af jólaöli –-malt og appelsíni til að gleðja þá sem kynnu að lúta í lægra haldi í mótinu og konfektöskjur fyrir væntanlega sigurvegara þess. 

Það var snemma ljóst að ekki yrði öllum af ósk sinni um að leggja alla andstæðinga sína að velli, menn léku skákum sínum niður villt og galið, nema þeir allra hörðustu sem sigu smá saman fram úr meðan aðrir skiptust á sigrum og ósigrum og skertu þannig sigurmöguleika sína í mótinu.  Því má segja að mótið hafi verið mjög talsvert sterkt um miðjuna, en nokkrir skáru sig úr eins og mótstaflan ber með sér. 

Það kom engum á óvart að Grænlandsfarinn Róbert Lagerman Harðarson sýndi mikið æðruleysi í skákum sínum enda marghertur af hverri raun nýkominn af bjarndýraslóðum. Hann vann allar andstæðinga sína nema þann yngsta Vigni Vatnar Stefánsson, ungstirnið undraverða, 10 ára, en þeir mættust í 7 umferð, og var ekki laust við að það færi örlítill uggur um Robba, brosið var frosið.

Svo fór að Róbert vann mótið með 12 vinningum af 13 mögulegum, Björgvin Víglundsson varð í öðru sæti með 10.5 v.  og Vignir Vatnar þriðji með 10 v.  Sá ungi vann margan kappann og glæstan sigurinn, auk Róberts, vann hann Björgvin, Jón Friðjóns, Gunnar Birgis, Birgi Brendsen, Jón Þór Björgvins,  sem allir hafa unnið mót í KR-klúbbnum fyrr í haust.  Þetta var fjögurra Gunnarra mót og þeir Gunni Gunn og Gunnar Freyr náðu að snúa á þann stutta og þeir Stefán Þormar og Sigurður Áss gerðu við hann jafntefli með bros á vör.

Elsa María Kristínardóttir, landsliðskona, hætti sér inn í ljónagryfjuna ein kvenna og uppskar hrós fyrir það og 7 vinninga og hvarf brosandi á braut.    Mótið fór fram í góðum keppnis- og jólanda og allir skyldu sáttir. Ekki var þó alveg laust við að einhverjir hugsuðu hverjum öðrum þegjandi þörfina svo lítið bæri á. Næsta mót í KR-heimilinu er ekki fyrr en 6. janúar vegna Jólahátíðarinnar og sprengihættu vegna flugeldasölu um áramótin.  Skákin er eldfim.

Mótstafla fylgir hér að neðan og vettvangsmyndir í myndasafni. Meira á www.kr.is (skák) /ESE