Flugfélagshátíð Hróksins á Grænlandi: Gleðin ræður ríkjum

Liðsmenn Hróksins heimsóttu í dag göngudeild fyrir fólk með geðraskanir í Nuuk, höfuðborg Grænlands, og kynntu skákíþróttina við góðar undirtektir. Flugfélagshátíð Hróksins hófst fyrir viku og hafa liðsmenn félagsins heimsótt skóla, fjölmiðju fyrir unglinga, leikskóla og athvörf, og efnt til skákmóta og fjöltefla. 
 
Hátíðin markar upphaf að 11. starfsári Hróksins á Grænlandi, og hafa liðsmenn félagsins alls farið 30 sinnum til að kynna skák meðal Grænlendinga, og efla vináttu og samvinnu þjóðanna á sem flestum sviðum. Að baki hátíðinni nú standa Hrókurinn og Flugfélag Íslands, í samvinnu við Kalak, vinafélag Íslands og Grænlands, og Grænlensk-íslenska verslunarráðið, með stuðningi fjölmargra fyrirtækja og einstaklinga.
 
Skákhátíðin hefur heppnast einstaklega vel og vakið mikla gleði og ánægju. Strax á fyrsta degi hátíðarinnar fengu um 80 börn taflsett að gjöf frá Flugfélagi Íslands sem alls lagði 300 taflsett til hátíðarinnar. Þá hafa hundruð barna fengið að gjöf skákkver á grænlensku, sem skákfrömuðurinn Siguringi Sigurjónsson stendur að.
 
Við setningarathöfn hátíðarinnar var Benedikte Thorsteinsson gerð að heiðursfélaga í Hróknum og Kalak, en hún hefur um árabil unnið mikið og óeigingjarnt starf við að efla tengsl Íslands og Grænlands. Hún fékk að gjöf listaverk frá Huldu Hákon, gjafabréf frá FÍ og lambalæri frá Finnbogastöðum í Trékyllisvík. Benedikte hefur hafið störf á ræðisskrifstofu Íslands í Nuuk sem opnar formlega í næstu viku, og hefur Pétur Ásgeirsson sendiherra tekið virkan þátt í hátíðahöldunum.
 
Föstudaginn 1. nóvember mun skákfélag heimamanna í Nuuk slá upp afmælismóti Hrafns Jökulssonar, forseta Hróksins, og verður það haldið í hinni glæsilegu verslunarmiðstöð borgarinnar. Mótið ber nafnið ,,Tulugaq Open" en tulugaq þýðir hrafn á grænlensku. Auk Hrafns eru í leiðangrinum Róbert Lagerman og Jósep Gíslason, sem notið hafa ómetanlegrar liðveislu Kristjönu G. Motzfeldt, heiðursforseta Hróksins á Grænlandi, Benedikte Thorsteinsson og margra annarra.
 
Í vetur eru fyrirhugaðar fleiri skákferðir á vegum Hróksins og Kalak, en félögin vinna náið saman að því að rækta vináttubönd grannþjóðanna.
 
Hægt er að fylgjast með gangi  mála á Facebook-síðunni Skák á Grænlandi.