Gallerý Skák: Dagur vann góðan sigur

Það var glatt á hjalla í Bolholtinu í síðustu viku þegar vetrardagskráin upphófst með fjörlegu 11 umferða "hvatskákmóti" þar sem tímamörkin eru 10 mínútur á skákina. Tuttugu skákgeggjarar á öllum aldri voru mættir til leiks að tefla sér til afþreyingar og hugarhægðar. Boðið var upp á hugræna atferlismeðferð yfir skákborðinu og áfallahjálp milli skáka eftir því þörf var á en flestir tóku úrslitunum vel og mættu sjálfsköpuðum örlögum sínum með jafnaðargeði þótt á móti blési.

Hinn ungi og bráðefnilegi Dagur Ragnarsson sýndi fljótt styrk sinn og leiddi mótið frá byrjun. Ljóst er að þar fer öflugur skákmaður sem kann ýmislegt fyrir sér enda fór svo að hann varð einn efstur með 10 vinninga. Hann hafði sér til fulltingis afa sinn Hermann Ragnarsson sem stappaði í hann stálinu eftir föngum og hvatti til dáða.  Hinn hægláti Jon Olav Fivelstad var þó aldrei langt undan og náði öðru sætinu með 9.5 vinning sem verður að teljast vel af sér vikið, enda hefur Norðmönnum farið mikið fram í skákinni á síðustu árum.  Gunni Gunn mátti hafa sig allan við að halda sér við toppinn og Ögmundur Kristinsson sýndi einnig að lengi lifir í gömlum glæðum. Aðrir mega muna sinn fífil fegri og hyggjast hefna harma sinna næst og þá verður ekkert gefið eftir og glatt í höllinni ef að líkum lætur.

Nánari úrslit má greina á meðf. mótstöflu ef vel er að gáð.

 

 

Mótin í Gallerýinu eru öllum opin og þar er blásið í herlúðra alla fimmtudaga kl. 18 svo nú fer mjög að styttast í þaðan heyrist vopnaglamur á ný þegar menn taka til við að vega hvern annan á hvítum reitum og svörtum í gustukaskyni sér og öðrum til skemmtunar þegar degi hallar.