Gallerý Skák opnar dyr sínar fyrir skákþyrstum

SKÁK- OG LISTASMIÐJAN  í Bolholti 6 opnar dyr sínar að nýju fimmtudagskvöldið 26. september nk.   eftir sumarhlé.  Þar verða líkt og undanfarna 5 vetur haldin opin skákkvöld alla fimmtudaga fram á vor, nema öðruvísi sé tilkynnt um sérstaklega.

Í GALLERÝ SKÁK tefla menn af andríki  fyrir fegurðina  undir fororðunum  "sjáumst og kljáumst"  og  „hart er barist - hart er varist" sjálfum sér og öðrum til yndisauka og Kaissu til dýrðar  - til viðbótar annarri skákiðkun á heimaslóðum eða í sínum félagsklúbbum.

Skákkvöldin eru einkum ætluð brennheitum ástríðuskákmönnum á öllum aldri, sem hafa gaman af að etja kappi og blanda geði reglulega við stallbræður sína höldnum „skákáráttustreyturöskun"  og njóta hugrænnar atferlismeðferðar á meðan á móti stendur. 

Tvær keppnis- og mótaraðir með GrandPrix sniði verða haldnar - önnur fyrir áramót hin eftir áramót.

KAPPTEFLIÐ UM PATAGÓNÍUSTEININN IV - 6 kvölda mótaröð,  þar sem 4 bestu mót hvers keppenda telja til  GP stiga og vinnings,  hefst  17. október og líkur 21. nóvember.  

SKÁKKÓNGUR FRIÐRIKS III - 4 kvölda mótaröð með GP-sniði hefst 25. janúar og líkur 13. febrúar, þar sem 3 bestu mót hvers keppanda telja til stiga.

Sest er að tafli kl. 18 öll fimmtudagskvöld og tefldar 11 umferðir með 10 mínútna umhugsunartíma á skákina með stuttu matar-  og skeggræðuhléi.

Forstöðumenn Gallerýsins  þeir Guðfinnur R. Kjartansson og Einar S. Einarsson taka þátttakendum  fagnandi gegn greiðslu 1000 króna þátttökugjalds sem innifelur matföng, kaffi, meðlæti og áfallahjálp milli skáka.

Veri gestir velkomnir.  

www.galleryskak.net