Hannes Hlífar vann kynslóðamót Skákskóla Íslands

Hannes Hlífar Stefánsson vann fyrsta kynslóðamót Skákskóla Íslands á haustönn sem haldið var í sal skólans að Faxafeni 12 sl. fimmtudagskvöld. Hannes hlaut 7½ vinning af níu mögulegum. Í 2. sæti var Bragi Þorfinnsson með 7 vinninga og í 3. sæti varð Stefán Bergsson með 6½ vinning. Guðmundur Kjartansson og Halldór Grétar Einarsson hlutu 6 vinninga og urðu í 4.-5. sæti.

23 skákmenn tóku þátt í mótinu. Tímamörkin voru 3 2 en þau hafa verið notuð á heimsmeistaramótum í hraðskák. Meðal keppenda voru fulltrúar Íslands á EM ungmenna í Svartfjallalandi, nokkrar landsliðskonur og  ýmsir af fremstu skákmönnum Íslands.

Góður gestur og nýr félagsmaður í Helli, Sewa Enyonam Fumey frá Tógó, sem tefldi fyrir hönd þjóðar sinnar á síðasta ólympíuskákmóti, tók þátt í mótinu en aldursforseti var Björn Þorsteinsson Íslandsmeistari 1967 og 1975. Einn þátttakenda, Hilmir Freyr Heimisson, sem  hlaut 5½ vinning er búsettur á Patreksfirði og tefldi skákir sínar í gegnum vef  ICC  en Omar Salama sem þar stýrir umferð sá um allt færi vel fram á þeim vettvangi. 

Skákstjórar voru Helgi Ólafsson og Stefán Bergsson.

Mótstöflu má finna á Chess-Results.

Myndir af Facebook-síðu Stefáns Más (föður Vignis)